?Ol Enjel Oli Hu, No Oli Wanem?
Ansa we Baebol i givim
Ol enjel oli ol laef samting we oli gat moa paoa mo save i bitim ol man. (2 Pita 2:11) Oli laef long heven, o long ples blong ol spirit, wan ples we i hae moa long yunives blong yumi. (1 King 8:27; Jon 6:38) Taswe Baebol i kolem olgeta se ol spirit.—1 King 22:21; Ol Sam 18:10.
?Ol enjel oli kam wea?
Blong wokem ol enjel, God i yusum Jisas, we Baebol i talem se hem i “fasbon blong olgeta samting we God i mekem.” Baebol i tokbaot olsem wanem God i yusum Jisas blong krietem ol samting, i se: “God i yusum [Jisas] blong mekem olgeta narafala samting long heven mo long wol, olgeta samting we yumi save luk mo olgeta samting we yumi no save luk.” Hemia i minim ol enjel tu. (Kolosi 1:13-17) Ol enjel oli no mared mo oli no gat pikinini. (Mak 12:25) God i krietem olgeta wanwan, taswe oli “pikinini blong tru God.”—Job 1:6.
Oli wokem ol enjel longtaem finis i pas, bifo we wol i stat. Taem God i mekem wol, ol enjel “oli stat singaot from oli glad.”—Job 38:4-7.
?I gat hamas enjel?
Baebol i no givim wan stret namba, be i soemaot se i gat plante plante enjel. Long vison we aposol Jon i luk, i gat plante handred milian enjel.—Revelesen 5:11, futnot.
?Ol enjel oli gat prapa nem mo prapa fasin blong olgeta?
Yes. Baebol i talem nem blong tu enjel, hemia Maekel mo Gabriel. (Daniel 12:1; Luk 1:26) a Sam narafala enjel oli talem se oli gat wan nem, be oli no talemaot nem ya.—Jenesis 32:29; Jajes 13:17, 18.
Ol enjel oli gat defdefren fasin mo oli save toktok tugeta. (1 Korin 13:1) Oli save yusum tingting blong olgeta, mo oli naf blong wokem ol singsing blong presem God. (Luk 2:13, 14) Mo tu, oli fri blong jusum blong mekem samting we i stret o samting we i no stret, olsem yumi luk taem sam long olgeta oli jus blong joenem Setan blong rebel agensem God.—Matiu 25:41; 2 Pita 2:4.
?I gat sam enjel we oli hae moa long ol nara enjel?
Yes. Enjel we i gat paoa mo haenem antap long evriwan, hemia akenjel Maekel. (Jud 9; Revelesen 12:7) Mo tu, i gat ol seraf, we oli hae mo oli stanap klosap long tron blong Jehova. (Aesea 6:2, 6) Ol jerubim, oli wan narafala grup we oli hae mo oli gat spesel wok blong mekem. Olgeta ya nao we oli gad long get blong garen blong Iden, afta we Jehova i sakemaot Adam mo Iv.—Jenesis 3:23, 24.
?Ol enjel oli givhan long ol man?
Yes, God i yusum ol gudfala enjel blong givhan long ol man tede.
God i yusum ol enjel blong oli lidim ol man blong hem long wok blong talemaot gud nius blong Kingdom blong God. (Revelesen 14:6, 7) Oli givhan long olgeta we oli stap prij, mo olgeta we oli harem gud nius ya tu.—Ol Wok 8:26, 27.
Ol enjel oli givhan blong blokem ol rabis man, blong oli no save mekem Kristin kongregesen i kam doti.—Matiu 13:49.
Ol enjel oli lidim mo protektem olgeta we oli holemstrong long God.—Ol Sam 34:7; 91:10, 11; Hibru 1:7, 14.
I no longtaem, ol enjel bambae oli givhan blong mekem ol man oli harem gud, taem oli joen wetem Jisas Kraes blong faet mo finisim ol rabis fasin long wol.—2 Tesalonaeka 1:6-8.
?Yumi wanwan i gat wan enjel blong lukaot long yumi?
Nating se ol enjel oli lukaot long ol man blong God blong oli fren gud wetem hem, be hemia i no min se God i givim wan enjel long wanwan Kristin blong i lukaot long olgeta. b (Matiu 18:10) Ol enjel oli no blokem ol man blong God long evri trabol mo evri samting we i traem olgeta. Baebol i soemaot se plante taem God i “mekem rod” blong oli winim wan trabol, taem hem i givim waes mo paoa blong oli stanap strong.—1 Korin 10:12, 13; Jemes 1:2-5.
Rong tingting long saed blong ol enjel
Rong tingting: Olgeta enjel oli gud.
Trutok: Baebol i tokbaot “ol rabis spirit” mo ‘ol enjel we oli mekem sin.’ (Efesas 6:12; 2 Pita 2:4) Ol rabis enjel ya oli ol dimon, we oli joenem Setan blong rebel agensem God.
Rong tingting: Laef blong ol enjel i no save finis samtaem.
Trutok: God bambae i spolem gud ol rabis enjel wetem Devel Setan.—Jud 6.
Rong tingting: Taem ol man oli ded, oli kam ol enjel.
Trutok: Ol enjel oli no ol man we oli laef bakegen, be oli wan defren kaen laef samting we God i krietem. (Kolosi 1:16) Ol man we oli laef bakegen blong go long heven, God i givim presen long olgeta, se oli no moa save ded samtaem. (1 Korin 15:53, 54) Bambae oli hae moa i bitim ol enjel.—1 Korin 6:3.
Rong tingting: Ol enjel oli stap blong mekem wok blong ol man.
Trutok: Ol enjel oli obei long ol tok blong God, be i no ol tok blong yumi. (Ol Sam 103:20, 21) Jisas i talem se hem i singaot long God blong i givhan long hem, be hem i no singaot stret long ol enjel.—Matiu 26:53.
Rong tingting: Yumi save prea long ol enjel blong oli halpem yumi.
Trutok: Prea i haf blong wosip blong yumi we i mas go long Jehova God nomo. (Revelesen 19:10) Yumi mas prea i go long God nomo, tru long Jisas.—Jon 14:6.
a Long Aesea 14:12, sam Baebol oli yusum nem ya “Lucifer,” we plante man oli ting se i minim wan enjel we biaen i kam Devel Setan. Be olfala Hibru tok we oli yusum long ples ya, hemia “yu we yu saen.” Ol vas raonabaot oli soemaot se tok ya i no minim Setan, be i minim Babilon we God i mekem hem i sem from we hem i kam flas tumas. (Aesea 14:4, 13-20) Tok ya “yu we yu saen” i blong jikim Babilon afta we narafala kantri i winim hem.
b Taem samfala oli harem stori blong Pita we i kamfri long prisen, oli ting se hem i gat wan enjel blong hem we i lukaot long hem. (Ol Wok 12:6-16) Be taem ol disaepol oli tokbaot “enjel blong [Pita],” maet oli gat rong tingting se wan enjel we i representem Pita i kamtru long olgeta, be i no rili Pita.
Maet Yu Laekem Hemia Tu
ANSA WE BAEBOL I GIVIM
?Hu Ya Maekel Jif Blong Ol Enjel?
Hem i gat wan narafala nem we maet yu yu savegud.
WAJTAOA
?Yu Gat Wan Enjel Blong Yu?
?I stret blong ting se wan enjel, o ol enjel bambae oli protektem yu?
