Lodsprea i givhan long yumi blong save olsem wanem blong prea mo ol samting blong askem. Jisas i talem Lodsprea taem ol disaepol blong hem oli askem se: “Masta, yu tijim mifala blong prea.” (Luk 11:1) Be i no Lodsprea o Notre Pere nomo we God i akseptem. a Jisas i talem Lodsprea olsem wan eksampol blong ol prea we God i glad blong lesin long olgeta.

Long atikol ya

•  ?Lodsprea i tokbaot wanem?

•  ?Wanem mining blong Lodsprea?

•  ?Yumi mas ripitim Lodsprea evritaem we yumi prea?

•  ?Olsem wanem blong prea?

•  Sam narafala prea long Baebol

 Lodsprea we i stap long Matiu 6:9-13, i no sem mak long evri Baebol. Hemia tu eksampol:

 Baebol Long Niu Wol Translesen: “Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem wil blong yu i kamtru long wol ya olsem long heven. Plis yu givim bred long mifala tede, we i naf blong tede, mo yu fogivim ol kaon blong mifala, olsem we mifala i stap fogivim ol narafala we oli gat kaon long mifala. Mo yu no letem ol samting oli kam traem mifala, be yu tekemaot mifala long man ya we i rabis.”

 King James Version: “Papa blong mifala we i stap long heven, yu mekem nem blong yu i holi. Yu mekem Kingdom blong yu i kam. Yu mekem wil blong yu i kamaot long wol, olsem we i kamaot long heven. Yu givim bred blong tede long mifala mo fogivim ol kaon blong mifala, olsem we mifala i fogivim olgeta we oli gat kaon long mifala. Yu no letem wan samting i traem mifala, be yu tekemaot mifala long ol samting we i nogud.” b

 Ol tijing blong Jisas oli laenap wetem ol narafala vas blong Baebol, taswe ol nara vas ya oli save givhan long yumi blong kasemsave mining blong Lodsprea.

“Papa blong mifala long heven”

 I stret blong singaot God se “Papa blong mifala,” from we hem i krietem yumi mo i givim laef long yumi.—Aesea 64:8.

“Plis yu mekem we nem blong yu i tabu”

 Yumi mas ona long nem blong God, Jehova, mo tingbaot nem ya olsem wan tabu samting. Ol man oli givhan blong mekem nem ya i tabu taem oli tokbaot ol gudfala fasin blong God, mo talemaot stamba tingting blong hem long ol narafala.—Ol Sam 83:18; Aesea 6:3.

“Yu mekem Kingdom blong yu i kam”

 Kingdom blong God i wan gavman long heven we Jisas i King blong hem. Jisas i tijim yumi blong prea se gavman ya bambae i rulum fulwol.—Daniel 2:44; Revelesen 11:15.

“Yu mekem wil blong yu i kamtru long wol ya olsem long heven”

 I no gat ol rabis fasin mo ded long heven. Mo wil blong God se ol man long wol ya tu, bambae oli laef olwe long pis mo stap sefgud.—Ol Sam 37:11, 29.

“Plis yu givim bred long mifala tede, we i naf blong tede”

 Long taem blong Jisas, bred i stamba kakae blong ol man. Yumi no mas fogetem se yumi dipen long Krieta blong yumi blong givim ol samting we yumi nidim blong stap laef.—Ol Wok 17:24, 25.

“Yu fogivim ol kaon blong mifala, olsem we mifala i stap fogivim ol narafala we oli gat kaon long mifala”

 Long ples ya, ol “kaon” i wan narafala wei blong talem ol sin. (Luk 11:4) Olgeta man oli mekem sin mo oli nidim we God i fogivim olgeta. Be sipos yumi wantem se God i fogivim yumi, yumi mas rere blong fogivim ol narafala we oli mekem sin agensem yumi.—Matiu 6:14, 15.

“Yu no letem ol samting oli kam traem mifala, be yu tekemaot mifala long man ya we i rabis”

 Jehova God i neva pulum yumi blong mekem i rong. (Jemes 1:13) Be Devel Setan nao i mekem olsem. Hem i “man ya we i rabis” o “Man Ya Blong Traem Man.” (1 Jon 5:19; Matiu 4:1-4) Yumi askem long Jehova blong i givhan long yumi blong obei long hem, taem wan samting i pulum yumi blong mekem i no stret.

 Jisas i talem Lodsprea olsem wan eksampol. Hemia i no min se yumi ripitim ol tok ya bakegen mo bakegen. Bifo we Jisas i talem Lodsprea, hem i givim woning ya se: “Taem yu prea, yu no mas talem sem toktok bakegen mo bakegen.” (Matiu 6:7) Long wan narafala taem we hem i givim eksampol blong prea, hem i no yusum sem toktok olsem Lodsprea.—Luk 11:2-4.

 Beswan prea, hemia taem yumi talemaot long God ol samting we i stap long hat blong yumi.—Ol Sam 62:8.

 Lodsprea i wan gudfala eksampol blong prea we God i lesin long hem. Makem gud olsem wanem prea ya i laenap wetem sam narafala vas long saed blong prea.

•   Prea long God nomo

   Vas: “Yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem.”—Filipae 4:6.

   Mining: Yumi mas prea long God nomo, i no long Jisas, Meri, o wan tabu man. Fastok blong Lodsprea, “Papa blong mifala,” i soemaot se yumi mas prea long Jehova God nomo.

•   Prea from ol samting we oli laenap wetem wil blong God

   Vas: “Nomata wanem samting yumi askem long hem, mo sipos i laenap wetem wil blong hem, hem i harem yumi.”—1 Jon 5:14.

   Mining: Long ol prea blong yumi, yumi save tokbaot eni samting we i laenap wetem wil blong God. Taem Jisas i talem long Lodsprea se “yu mekem wil blong yu i kamtru,” hem i tijim yumi se wil blong God i wan samting we i impoten tumas. Sipos yumi stadi long Baebol, yumi kasemsave wanem nao wil blong God long saed blong wol mo ol man.

•   Tokbaot ol wari blong yu long prea

   Vas: “Yu sakem ol hevi baden blong yu long Jehova, mo hem bambae i sapotem yu.”—Ol Sam 55:22.

   Mining: God i tingbaot ol wari blong yumi. Long Lodsprea, Jisas i tokbaot sam samting we yumi wanwan i nidim long laef blong yumi. Long sem fasin, yumi save prea from samting we yumi nidim evri dei blong stap laef. Mo tu, yumi save askem long God blong i lidim yumi taem yumi mekem ol impoten desisen, mo i sapotem yumi taem yumi kasem trabol, mo i fogivim ol sin blong yumi. c