?Hu i mas tijim ol pikinini blong oli save long saed blong seks? Baebol i givim wok ya long ol papa mo mama. Plante papa mo mama oli luk se taem oli folem ol advaes daon, hemia i givhan bigwan long olgeta:

•   Yu no mas sem. Baebol i toktok klia taem i tokbaot seks mo ol tabu haf blong bodi, mo God i talem long ol man Isrel se oli mas tokbaot ol samting ya long “ol pikinini” blong olgeta. (Dutronome 31:12; Levitikas 15:2, 16-19) Ol pikinini oli no mas luk seks mo ol tabu haf blong bodi olsem ol samting blong sem. Blong givhan long olgeta, yu save yusum ol wod we i pulum olgeta blong oli gat respek long ol haf blong bodi ya.

•   Yu tijim olgeta sloslo. I no nid we yu wet se bodi blong pikinini blong yu i stat blong jenis, ale yu mekem wan longfala storian wetem hem blong tokbaot seks. Taem pikinini blong yu i stap gruap, i gud we yu givim smosmol save long hem, blong tijim hem long ol samting long saed blong seks.—1 Korin 13:11.

•   Yu tijim olgeta long ol gudfala fasin. Long skul, maet ol tija oli tijim ol pikinini long sam samting long saed blong seks. Be Baebol i pulum ol papa mo mama blong oli tijim ol pikinini blong olgeta, blong oli save long ol samting long saed blong seks, mo antap long hemia, oli mas tijim olgeta blong oli gat stret tingting long saed blong seks.—Ol Proveb 5:1-23.

•   Yu lesin gud long olgeta. Sipos pikinini blong yu i askem sam kwestin long saed blong seks, yu no mas hareap blong kros no yu katem tok blong hem. Be, yu ‘mas rere oltaem blong lesin, mo yu no hareap blong toktok.’—Jemes 1:19.

Protektem ol pikinini blong yu long ol man we oli wantem slip wetem olgeta

•   Yu tijim yu wan fastaem. I gud we fastaem, yu wan yu kasem save long fasin blong man we i stap slip wetem ol pikinini, se hem i mekem olsem wanem blong pulum pikinini.—Ol Proveb 18:15; yu luk japta 32 blong buk ya Questions Young People Ask—Answers That Work, Volume 1 (Franis mo Inglis).

•   Yu intres long laef blong pikinini blong yu. Yu no mas putum pikinini blong yu long han blong wan narafala we yu no save gud mo yu no trastem hem, mo yu no mas letem pikinini blong yu i “folem tingting blong hem nomo.”—Ol Proveb 29:15.

•   Yu tijim olgeta blong oli tingting gud bifo we oli obei long narafala. Ol pikinini oli mas lanem blong obei long ol papa mo mama blong olgeta. (Kolosi 3:20) Be sipos yu tijim pikinini blong yu se oltaem hem i mas obei long ol bigman, yu stap openem rod blong wan bigman i mekem seks wetem hem. Ol Kristin papa mo mama oli save talem long ol pikinini blong olgeta se: “Sipos wan man i talem long yu blong mekem samting we God i talem se i nogud, yu no mas mekem.”—Ol Wok 5:29.

•   Yu trenem olgeta blong oli save wanem blong mekem, taem i gat denja. I gud yu givhan long pikinini blong yu, blong hem i save samting we hem i mas mekem, sipos wan man i wantem fosem hem blong slip wetem hem taem yu no stap. Yu mas tijim pikinini blong yu blong i talem long man olsem se: “!Yu stop! !Bambae mi ripotem yu!” mo blong hem i goaot kwiktaem. Blong hem i lan blong talem ol tok ya, i gud we yutufala i mekem wan pleplei tugeta, nao yu aktem samting we i save hapen, mo hem i talem ol tok ya. Ol pikinini oli save fogetem samting kwiktaem nomo, taswe “oltaem” yu mas talem samting ya long olgeta.—Dutronome 6:7.