Wan profet tok hemia wan mesej we i kamaot long God, wan tok we i kam long God. Baebol i talem se ol profet ya “tabu spirit i putum tok ya long tingting blong olgeta, nao oli talemaot tok we i kamaot long God.” (2 Pita 1:20, 21) So wan profet i wan man we i kasem mesej long God mo i talemaot mesej ya long ol narafala.—Ol Wok 3:18.

?Olsem wanem ol profet oli kasem ol infomesen long God?

 God i yusum plante rod blong pasem ol tingting blong hem i go long ol profet blong hem:

•   Raeting. God i yusum rod ya wan taem, hemia taem hem wan i raetem ol Ten Komanmen mo i givim long Moses.—Eksodas 31:18.

•   I toktok tru long ol enjel. Eksampol, God i yusum wan enjel blong i go talemaot long Moses, mesej we hem i mas go talemaot long Fero long Ijip. (Eksodas 3:2-4, 10) Taem God i wantem talemaot ditel blong wan impoten samting, hem i lidim ol enjel blong oli talemaot sem ditel ya we oli no mestem wan, olsem we hem i bin mekem taem i talem long Moses se: “Yu mas raetemdaon ol tok ya, from we folem ol tok ya, bambae mi mekem wan kontrak wetem yu mo ol man Isrel.”—Eksodas 34:27. a

•   Ol Vison. Samtaem hemia i hapen taem profet i wekap nomo i stap mo tingting blong hem i klia gud. (Aesea 1:1; Habakuk 1:1) Samfala, vison we oli luk i klia we i klia, i olsem we olgeta tu oli stap insaed long vison ya. (Luk 9:28-36; Revelesen 1:10-17) Sam narafala taem, man i luk vison taem hem i stap drim. (Ol Wok 10:10, 11; 22:17-21) Mo tu, God i bin talemaot mesej blong hem tru long ol drim, taem profet i slip.—Daniel 7:1; Ol Wok 16:9, 10.

•   I lidim tingting blong olgeta. God i lidim tingting blong ol profet blong hem, blong oli talemaot mesej blong hem. Hemia nao samting we Baebol i talem, i se: “Olgeta tok blong Baebol oli kamaot long God fastaem.” Toktok ya “kamaot long God” i save minim tu se “God i pulum win.” (2 Timoti 3:16; The Emphasised Bible) God i yusum tabu spirit o paoa blong hem, blong “bloem” ol tingting blong hem i go long ol man blong wok blong hem. Mesej ya i blong God, be ol profet oli yusum prapa toktok blong olgeta blong talemaot.—2 Samuel 23:1, 2.

?Oltaem ol profet tok oli tokbaot fiuja?

 No, ol profet tok blong Baebol oli no tokbaot fiuja nomo. Be plante long ol mesej we i kam long God oli tokbaot ol samting we i save kamaot long laef blong ol man. Eksampol, ol profet blong God oli wonem ol man Isrel bakegen mo bakegen from ol nogud samting we oli stap mekem. Ol woning ya oli tokbaot ol blesing we ol man Isrel oli save kasem sipos oli lesin long ol woning ya, be i tokbaot tu trabol we oli save kasem sipos oli no lesin long woning. (Jeremaea 25:4-6) Taswe samting we ol man Isrel bambae oli kasem, i dipen long rod we oli jusum.—Dutronome 30:19, 20.

Sam eksampol blong ol profet tok long Baebol we oli no tokbaot fiuja

•   Wan taem, taem ol man Isrel oli askem God blong i halpem olgeta, hem i sanem wan profet blong eksplenem long olgeta se from we oli no wantem obei long ol komanmen blong God, Hem i no halpem olgeta.—Jajes 6:6-10.

•   Taem Jisas i toktok wetem wan woman Sameria, hem i tokbaot ol samting we woman ya i bin mekem bifo. Jisas i save ol samting ya tru long wan drim. Woman ya i luk Jisas olsem wan profet, nating se Jisas i no tokbaot wan samting we bambae i kamtru long fiuja.—Jon 4:17-19.

•   Long taem we oli traem Jisas, ol enemi blong hem oli kavremap fes blong hem, oli kilim hem, mo oli talem long hem se: “!Sipos yu wan profet! Yu talem, ?hu ya i faetem yu?” Oli no stap singaot long Jisas blong i talemaot fiuja, be blong hem i yusum paoa blong hem blong talemaot se hu i stap kilim hem.—Luk 22:63, 64.