!Yes! Baebol i kamaot long ‘God ya we i stap leftemap tingting blong ol man we oli harem nogud.’ (2 Korin 7:6) Nating se Baebol i no wan buk blong helt, be ol advaes blong hem oli bin givhan long plante man blong winim tingting ya blong kilim ded olgeta wan. Ol gudfala advaes blong hem oli save givhan long yu tu.

•  ?Wanem advaes we Baebol i talem?

•  ?Baebol i tokbaot sam man we oli bin gat nogud filing se oli wantem ded?

•  ?Wanem ol vas blong Baebol we oli save givhan long yu blong winim tingting ya blong kilim ded yu wan?

•  ?Yu save mekem wanem sipos wan fren i se, “Mi wantem ded”?

•  ?Olsem wanem sipos bifo yu gat tingting ya blong kilim ded yu wan?

• ● Talemaot samting we i stap long hat blong yu.

   Samting we Baebol i talem: “Wan tru fren i lavem yu oltaem nomo, mo hem i olsem wan brata we i rere blong givhan long taem blong trabol.”—Ol Proveb 17:17, NW.

   Mining: Yumi nidim help blong ol narafala taem yumi gat ol tingting we oli no stret.

   Sipos yu holemtaet ol nogud filing blong yu, ol filing ya oli save winim yu. Be sipos yu talemaot ol filing blong yu, oli no save gat paoa long yu, mo yu save kasem gudfala advaes we oli save givhan long yu blong gat stret tingting.

   Traem mekem samting ya: Tokbaot wetem wan man tede, maet wan memba blong famle o wan fren we yu trastem hem. a Yu save harem gud tu sipos yu raetem daon ol filing blong yu.

• ● Go luk wan dokta we i tritim ol sik blong tingting.

   Samting we Baebol i talem: “Ol man we oli no sik, oli no nidim dokta, be olgeta we oli sik, yes, oli nidim.”—Matiu 9:12.

   Mining: Yumi mas go luk dokta sipos yumi no harem gud.

   Maet tingting ya blong wantem kilim ded yu wan i wan saen se yu sik, speseli long tingting. Olsem ol narafala sik, yu no mas sem from samting ya. Dokta i save tritim sik blong tingting.

   Traem mekem samting ya: Kwik blong go luk wan spesel dokta we i tritim ol sik blong tingting.

• ● Tingbaot se God i kea long yu.

   Samting we Baebol i talem: “Tingbaot ol smol pijin ya we oli salem faef blong tu selen nomo, be God i no fogetem wan long olgeta. . . . Yufala i no fraet. Long fes blong hem, yufala i gud moa i winim plante smol pijin.”—Luk 12:6, 7.

   Mining: Yu sas long ae blong God.

   Maet yu harem se i nogat man blong givhan long yu, be God i stap luk ol hadtaem we yu stap gotru long hem. Hem i kea long yu, nating sipos yu harem se yu no moa wantem laef. Ol Sam 51:17, NW i tokbaot God se: “Yu yu no save tanem baksaed long man we i harem nogud tumas long hat blong hem.” God i wantem se yu gohed blong laef from we hem i lavem yu.

   Traem mekem samting ya: Lukaot sam pruf long Baebol we oli soemaot se God i lavem yu. Eksampol, yu save ridim japta 24 blong buk ya Draw Close to Jehovah.

• ● Prea long God.

   Samting we Baebol i talem: “Yufala i mas lego ol wari blong yufala long [God], from we hem i stap tingbaot yufala.”—1 Pita 5:7.

   Mining: God i invaetem yu blong yu talemaot olgeta tingting blong yu long hem we oli mekem yu stap harem nogud.

   God i save givim pis long tingting mo paoa blong gohed. (Filipae 4:6, 7, 13) Long rod ya, hem i stap sapotem olgeta we oli prea long hem blong i givhan long olgeta.—Ol Sam 55:22.

   Traem mekem samting ya: Prea long God tede. Yusum nem blong hem, Jehova, long prea blong yu, mo talemaot filing blong yu long hem. (Ol Sam 83:18) Askem hem blong i halpem yu blong gohed blong laef.

• ● Tingting dip long ol hop blong fiuja.

   Samting we Baebol i talem: “Hop ya we yumi gat, hem i olsem wan angka blong holem laef blong yumi.”—Hibrus 6:19.

   Mining: Samtaem filing blong yumi i olsem wan sip we strong wef i stap muvum olbaot, be ol hop we Baebol i tokbaot oli save givim pis long tingting.

   Hop ya i no wan drim nomo, be i wan promes we God i mekem blong tekemaot ol samting we oli stap mekem yumi harem nogud.—Revelesen 21:4.

   Traem mekem samting ya: Yu save lanem moa long saed blong ol hop we Baebol i tokbaot, sipos yu ridim lesen 5 blong buklet ya !Gud Nius We i Kamaot Long God!

• ● Mekem samting we yu laekem.

   Samting we Baebol i talem: “Sipos yu yu stap glad oltaem, sik i no save spolem yu.”—Ol Proveb 17:22.

   Mining: Taem yumi mekem ol samting we i mekem yumi glad, yumi stap mekem i gud long helt blong yumi.

   Traem mekem samting ya: Mekem wan samting we yu laekem blong mekem. Eksampol, lesin long ol miusik we oli leftemap tingting, ridim wan samting we i leftemap tingting, o mekem wan nara samting we yu laekem blong mekem. Yu save harem gud tu sipos yu mekem wan samting blong givhan long ol narafala, nating sipos i wan smol samting nomo.—Ol Wok 20:35.

• ● Lukaot gud long bodi blong yu.

   Samting we Baebol i talem: “Fasin ya blong trenem bodi, i save givhan long man.”—1 Timoti 4:8.

   Mining: Yumi save harem gud taem yumi mekem eksesaes, slip i naf, mo kakae ol gudfala kakae.

   Traem mekem samting ya: Go wokbaot smol, maet blong 15 minit olsem.

• ● Tingbaot se ol filing blong yu mo ol narafala samting long laef oli stap jenis.

   Samting we Baebol i talem: “Yufala i no save se tumora laef blong yufala bambae i olsem wanem.”—Jemes 4:14.

   Mining: Wan problem we maet yu ting se i no gat rod blong winim, i save stap blong smoltaem nomo.

   Nomata se i luk olsem se i had blong winim problem blong yu tede, be tingting ya i save jenis tumoro. Taswe lukaot rod blong winim problem ya. (2 Korin 4:8) Problem ya we yu ting se yu no save winim bae i lus sloslo, be sipos yu kilim ded yu wan yu no moa save jenisim samting ya bakegen.

   Traem mekem samting ya: Ridim ol stori blong Baebol we oli tokbaot olgeta we oli harem nogud tumas nao oli wantem ded from, mo luk olsem wanem sloslo laef blong olgeta i jenis i kam gud moa, long wan rod we oli neva tingbaot. Traem luk sam eksampol.

 Yes. Baebol i tokbaot stori blong sam man we olgeta tu oli talem se, “Mi wantem ded.” God i no kros long olgeta, be hem i givim samting we oli nidim. Hem i save mekem sem samting long yu.

Elaeja

•  ● ?Hem i hu? Elaeja hem i wan profet. Be samtaem hem tu i harem nogud. Jemes 5:17 i talem se: “Elaeja i wan man we i gat filing olsem yumi.”

•  ● ?From wanem hem i wantem ded? Wantaem, Elaeja i harem se hem i stap hem wan, hem i fraet, mo hem i no impoten. Taswe hem i askem strong long God se: “Plis yu tekemaot laef blong mi.”—1 King 19:4.

•  ● ?Wanem i givhan long hem? Elaeja i talemaot stret filing blong hem long God. ?Olsem wanem God i givhan long hem? God i soemaot long hem se hem i kea long hem mo i mekem hem i luk bigfala paoa blong Hem. I mekem Elaeja i kasem save se Jehova i nidim hem yet, mo i givim wan man blong i givhan long hem.

•  ▸ Ridim stori blong Elaeja: 1 King 19:2-18.

Job

•  ● ?Hem i hu? Job i wan man we i rij, i gat bigfala famle, mo hem i wosipim trufala God.

•  ● ?From wanem hem i wantem ded? Kwiktaem nomo laef blong Job i jenis bigwan. Hem i lusum evri samting blong hem. Evri pikinini blong hem oli ded long wan disasta. Hem i kasem wan sik we i mekem hem i harem nogud tumas from. Mo antap long ol samting ya, sam fren blong hem oli talem sam giaman tok we i spolem hem se hem nomo i mekem trabol long hem wan. Job i se: “Naoia mi taed finis long laef ya, mi rere blong lego rop.”—Job 7:16.

•  ● ?Wanem i givhan long hem? Job i prea long God mo i toktok long ol narafala. (Job 10:1-3) Wan fren we i gat sore i leftemap tingting blong hem. Elihu i givhan long hem blong i gat stret tingting. Antap long hemia, Job i glad blong lesin long advaes blong God.

•  ▸ Ridim stori blong Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moses

•  ● ?Hem i hu? Moses i wan lida blong ol man Isrel bifo mo hem i wan profet.

•  ● ?From wanem hem i wantem ded? Moses i gat wan bigfala wok blong mekem, ol man oli tok nogud long hem, mo hem i taed. Taswe hem i krae i go long God se: “I moa gud yu kilim mi mi ded.”—Namba 11:11, 15.

•  ● ?Wanem i givhan long hem? Moses i talemaot filing blong hem long God. God i givhan long Moses wetem ol wok blong hem, blong mekem hem i no stres tumas.

•  ▸ Ridim stori blong Moses: Namba 11:4-6, 10-17.