“Putum yufala i stap aninit long bigfala paoa blong God, olsem nao long stret taem, bambae hem i leftemap yufala. Mo long semtaem, yufala i mas lego ol wari blong yufala long hem, from we hem i kea long yufala.”—1 Pita 5:6, 7, Baebol Long Niu Wol Translesen.

 “Putum yufala i stap daon aninit long strong han blong God, nao long stret taem bambae Hem i leftemap yufala. Sakem ol wari blong yufala long Hem from we Hem i kea long yufala.”—1 Pita 5:6, 7, New King James Version.

 Aposol Pita i talem ol tok ya blong mekem ol Kristin oli sua se oli save prea long God blong tokbaot ol problem mo wari blong olgeta. God i laekem tumas olgeta we oli gat tingting daon, mo bambae hem i blesem olgeta bigwan.

 “Putum yufala i stap aninit long bigfala paoa [o han] blong God.” Long Baebol, plante taem han blong God i minim paoa blong hem blong sevem mo protektem man. (Eksodas 3:19; Dutronome 26:8; Esra 8:22) Ol Kristin oli putum olgeta i stap daon aninit long han blong God taem oli dipen long hem. Oli luksave se oli no naf blong mekem plante samting mo blong winim ol trabol, olgeta nomo. (Ol Proveb 3:5, 6; Filipae 4:13) Oli gat strong tingting se God i gat paoa blong givhan long olgeta long taem we oli nidim mo long rod we i beswan.—Aesea 41:10.

 “Olsem nao long stret taem, bambae hem i leftemap yufala.” Olgeta we oli stanap strong tru long ol hadtaem wetem longfala tingting, oli save sua se God bambae i leftemap olgeta o blesem olgeta long stret taem. Bambae hem i no letem wan samting we i traem ol man blong hem i gohed blong olwe, o i strong tumas blong oli winim. (1 Korin 10:13) Be sipos oli gohed blong mekem i stret, i sua se God bambae i blesem olgeta “long stret taem.”—Galesia 6:9.

 “Lego [o sakem] ol wari blong yufala long hem, from we hem i kea long yufala.” Ol Kristin oli save prea wetem tingting daon blong sakem o slingim ol wari blong olgeta long God. Wan buk blong eksplenem Baebol i talem se: “Tok ya lego o sakem i min se yu yusum paoa blong yu blong slingim wan samting i gowe long yu. Hemia wan aksen we yu minim nomo blong mekem.” Taem wan Kristin i sakem ol trabol blong hem long God, hem i no moa wari tumas, mo hem i kasem samting we Baebol i singaotem se ‘pis blong God.’ (Filipae 4:6, 7) Hem i sua se God i wantem givhan long hem from we hem i save se God i kea long hem, mo Hem i naf blong yusum bigfala paoa blong Hem blong halpem hem.—Ol Sam 37:5; 55:22.

 Japta 5 i laswan japta long leta we aposol Pita i raetem long ol Kristin. (1 Pita 1:1) Ol man blong Kraes bifo, mo ol man blong hem tede tu, oli fesem ol defdefren kaen trabol we i traem bilif blong olgeta mo i mekem olgeta oli wari. (1 Pita 1:6, 7) Pita i save ol wari we oli fesem, taswe samwe long 62-64 K.T., hem i raetem wan gudfala leta blong leftemap tingting blong olgeta.—1 Pita 5:12.

 Pita i finisim leta blong hem wetem ol toktok blong leftemap tingting blong olgeta we oli fesem ol trabol, we i traem bilif blong olgeta. Sipos oli holem tingting daon mo dipen long God, oli save sua se God bambae i givhan long olgeta blong oli stanap strong. (1 Pita 5:5-10) Long sem fasin, ol tok blong Pita i save leftemap tingting blong ol Kristin tede, we ol man oli ronem mo kilim olgeta.

 Wajem sot video ya blong luk wanem samting we buk blong 1 Pita i tokbaot.