“Kaen fasin we mi soemaot long yu hem i naf, from we taem yu no gat paoa, long taem ya nao paoa blong mi i kam strong moa long yu.”—2 Korin 12:9, Baebol Long Niu Wol Translesen.

 “Kaen fasin blong mi i mekem yu yu naf, from we taem yu yu slak mi save soemaot bigfala paoa blong mi.”—2 Korin 12:9, New International Version.

 God i promes blong givim paoa we aposol Pol i nidim blong winim ol trabol mo ol samting we hem i no naf blong mekem.

 “Kaen fasin we mi soemaot long yu hem i naf.” Narafala rod blong tanem ansa we God i givim long prea we Pol i mekem bakegen mo bakegen, hemia se “yu nidim nomo kaen fasin blong mi.” Hemia i min se kaen fasin blong God bambae i naf blong halpem Pol blong stanap strong tru long ol hadtaem. ?From wanem yumi talem olsem? Tok ya we yumi tanem i kam “kaen fasin” i stap tokbaot wan presen we God i givim wetem gladhat blong hem, mo presen ya i bigwan moa i bitim samting we i stret blong yumi kasem. Ol tok we Pol i raetem oli soemaot se kaen fasin blong God i givhan bigwan long hem. Fastaem Pol i stap ronem mo kilim ol Kristin, be God i givim paoa we hem i nidim blong jenisim fasin blong hem mo givhan long plante narafala blong oli kam Kristin. (1 Korin 15:9, 10; 1 Timoti 1:12-14) Pol i save gat strong tingting se God bambae i halpem hem blong winim ol problem mo hadtaem we hem i fesem.

 “Taem yu no gat paoa, long taem ya nao paoa blong mi i kam strong moa long yu.” Hae Masta Jehova a i mekem Pol i tingbaot se paoa blong Hem i kamaot klia moa, taem hem i yusum blong givhan long ol sinman we oli no strong. (2 Korin 4:7; 12:8) Taem ol Kristin oli luksave se oli no naf, nao oli askem long Jehova blong i halpem olgeta, oli stap letem paoa blong God i wok fulwan long olgeta. (Efesas 3:16; Filipae 4:13) Long rod ya, paoa blong God i kamaot klia moa taem i givhan long ol man we oli harem se oli slak.

 Samwe long 55 K.T., tabu spirit i pulum Pol blong raetem wan leta i go long ol Kristin long Korin. Long las haf blong leta ya, hem i eksplenem from wanem hem i gat raet blong talem se hem i wan aposol. Hem i harem se hem i mas mekem olsem from we samfala we oli talem se oli ol tija, oli agensem hem. Maet oli jajem hem nomo from we bodi blong hem i no strong mo hem i no gat gudhan blong toktok.—2 Korin 10:7-10; 11:5, 6, 13; 12:11.

 Blong ansa long olgeta, Pol i eksplenem se long prapa paoa blong hem, hem i no naf blong mekem wok we God i givim long hem, mo stanap strong tru long ol trabol we hem i kasem. (2 Korin 6:4; 11:23-27; 12:12) Long japta 12, hem i tokbaot “wan ropnil we i stap stikim” hem. I luk olsem se hemia wan problem we i stap mekem hem i harem nogud long bodi o filing blong hem. (2 Korin 12:7) Pol i no talem stret wanem problem we hem i gat, be hem i gat strong tingting se God bambae i givhan long hem blong stanap strong.

 Long taem blong yumi tu, ol Kristin oli fesem hadtaem mo fasin agens. Oli harem gud blong save se paoa blong God i save mekem olgeta oli naf blong stanap strong tru long enikaen trabol. Olsem Pol, oli talem wetem strong tingting se: “Taem we mi no gat paoa, long taem ya nao mi mi gat paoa.”—2 Korin 12:10.

 Wajem sot video ya blong luk wanem samting we buk blong 2 Korin i tokbaot.