“Be olgeta we oli putum hop blong olgeta long Jehova, bambae oli kasembak paoa. Bambae oli gat wing olsem igel, oli flae i go antap. Bambae oli ron be oli no save kam slak, mo bambae oli wokbaot be oli no save kam taed.”—Aesea 40:31, Baebol Long Niu Wol Translesen.

 “Be olgeta we oli wet long MASTA bambae oli kam strong bakegen. Bambae oli gat wing olsem igel blong flae i go antap, bambae oli ron be oli no taed, bambae oli wokbaot be oli no kam slak.”—Aesea 40:31, New King James Version.

 Jehova a God i promes long ol man blong hem se bambae hem i givim paoa we oli nidim blong winim o gotru long eni problem we oli fesem.

 “Olgeta we oli putum hop blong olgeta long Jehova, bambae oli kasembak paoa.” Olgeta we oli gat hop, o oli trastem God se hem i gat paoa mo i wantem halpem ol man blong hem, oli save sua se bambae hem i sapotem olgeta. (Ol Proveb 3:5, 6) Wan rod we God i yusum blong givim paoa long olgeta we oli wosipim hem, hemia tru long tabu spirit o paoa blong hem.—Luk 11:13.

 “Bambae oli gat wing olsem igel, oli flae i go antap.” Pijatok ya i soemaot samting we paoa blong God i mekem long wan man. Igel i dipen long win we i stap go antap mo i hot, hemia oli kolem thermal, blong leftemap hem i go antap mo blong hem i flot long win. Taem igel i faenem wan thermal, hem i openem gud tufala wing blong hem, mo hem i goraon insaed long thermal ya, we i leftemap hem i go antap. Taem igel i stap flae i go long wan ples, hem i save stap antap plante aoa sipos hem i muv i go long ol defren thermal. Hem i no kam taed from we hem i yusum smol paoa nomo.

 “Bambae oli ron be oli no save kam slak.” Ol problem we yumi fesem oli save mekem se yumi kam slak long bodi mo filing, be God i save givim paoa blong yumi stanap strong. Hem i save givim paoa long yumi blong mekem samting we i stret, nating se yumi fesem bigfala trabol. Aposol Pol i gotru long plante samting we oli traem hem bigwan, be hem i talem se: “Mi mi gat paoa blong fesem olgeta samting from God ya we i givim paoa long mi.”—Filipae 4:13.

 God i pulum profet Aesea blong raetem ol tok ya, samwe long 2,700 yia i pas. I tru se vas ya i stret long ol gudfala man blong God, be maet hem i talemaot tok ya blong leftemap tingting blong ol man Jiu we bambae oli go kalabus long Babilon blong 70 yia. Taem oli gobak long ples blong olgeta, oli luk se tok ya blong God i kamtru long olgeta. (Aesea 40:1-3) Taem oli aot long Babilon blong gobak long Jerusalem long 537 B.K.T., God i givim paoa long olgeta blong oli finisim longfala wokbaot ya we i had tumas. b—Aesea 40:29.