“Mi mi gat paoa blong fesem olgeta samting from man ya we i givim paoa long mi.”—Filipae 4:13, Baebol Long Niu Wol Translesen, futnot.

 “Mi save mekem olgeta samting long paoa blong Kraes we i mekem mi mi strong.”—Filipae 4:13, New King James Version.

 Ol tok ya we aposol Pol i raetem, oli mekem ol man blong God oli sua se bambae oli kasem paoa blong mekem wil blong Hem.

 Sam Baebol oli talem se Kraes nao i givim paoa long Pol. Be ol olfala hanraet ya we oli raetem long Grik oli no gat tok ya “Kraes” long olgeta. Taswe, plante Baebol oli tanem i kam “man ya we i givim paoa long mi” (Baebol Long Niu Wol Translesen, futnot), “hemia we i mekem mi mi strong” (New International Version), mo “man ya we i stamba blong paoa blong mi” (New American Bible). ?Pol i stap tokbaot hu?

 Ol vas raonabaot oli soemaot se Pol i stap tokbaot God. (Filipae 4:6, 7, 10) Long japta tu blong leta ya, Pol i raet long ol Kristin long Filipae se: “Paoa we yufala i kasem i kam long God . . . mekem se yufala i wantem wok mo i givim paoa long yufala blong mekem olgeta samting.” (Filipae 2:13) Mo long 2 Korin 4:7, hem i talem se God nao i givim paoa long hem blong i save finisim minista wok blong hem. (Skelem wetem 2 Timoti 1:8.) Taswe i gat gudfala risen blong bilif se Pol i stap tokbaot God olsem “man ya we i givim paoa.”

 ?Pol i minim wanem, taem hem i talem se hem i stap kasem paoa blong mekem “olgeta samting”? I luk olsem se ol samting we Pol i stap tokbaot, hemia ol samting we hem i fesem taem hem i mekem wok blong God. Nating se hem i gat plante samting o i gat smol nomo, oltaem hem i dipen long God blong lukaot long hem. Taswe Pol i lanem blong harem gud, nomata wanem samting we hem i fesem.—2 Korin 11:23-27; Filipae 4:11.

 Ol tok blong Pol i mekem tingting blong ol man blong God tede i strong. God bambae i givim paoa we oli nidim blong gotru long ol trabol mo blong mekem wil blong hem. God i save yusum tabu spirit, o paoa blong hem, blong givhan long olgeta, mo i yusum tu ol narafala man blong hem wetem Tok blong hem, Baebol.—Luk 11:13; Ol Wok 14:21, 22; Hibru 4:12.

 Ol tok ya i stap long lashaf blong leta we Pol i raetem long ol Kristin long Filipae. Hem i raetem leta ya long faswan taem we hem i stap long prisen long Rom, samwe long 60-61 K.T. Yumi no save hamas taem i pas, stat long taem we ol Kristin long Filipae oli no moa save givim samting long Pol. Be naoia, oli stap sanem ol presen long Pol blong givim ol samting we hem i nidim.—Filipae 4:10, 14.

 Pol i talem bigfala tangkiu long ol Kristin long Filipae from gladhat blong olgeta blong givim presen, mo hem i talem se hem i gat evri samting we hem i nidim. (Filipae 4:18) Mo tu, hem i tekem janis blong talem wan impoten trutok long saed blong laef blong ol Kristin: Olgeta Kristin, nating se oli rij o pua, oli save harem gud sipos oli dipen long God blong i givhan long olgeta.—Filipae 4:12.