“Mi mi talem ol samting ya long yufala, blong yufala i save kasem pis long mi. Long wol ya bambae yufala i kasem trabol, !be tingting blong yufala i mas strong! Mi mi winim wol ya finis.”—Jon 16:33, Baebol Long Niu Wol Translesen.

 “Mi mi talem ol samting ya long yufala, blong yufala i save faenem pis tru long mi. Long wol ya, bambae yufala i kasem trabol, be yufala i harem gud, mi mi winim wol ya finis.”—Jon 16:33, New King James Version.

 Jisas i talem ol tok ya blong leftemap tingting blong ol man blong hem, se olgeta tu oli save mekem God i glad, nating se oli kasem trabol mo ol man oli agensem olgeta.

 “Mi mi talem ol samting ya long yufala, blong yufala i save kasem pis long mi.” a Narafala haf blong vas ya i soemaot se pis ya i no minim nomo se oli no faet, be i min se oli gat pis long hat mo tingting blong olgeta. I posibol blong gat pis ya tru “long Jisas,” we hem i promes blong sanem tabu spirit. Strong paoa ya i wan “helpa” we bambae i givhan long ol disaepol blong oli winim enikaen hadtaem we oli fesem.—Jon 14:16, 26, 27.

 “Long wol ya bambae yufala i kasem trabol, !be tingting blong yufala i mas strong!” Jisas i talem stret long ol disaepol blong hem se bambae oli kasem trabol, olsem, samfala bambae oli mekem i no stret long olgeta mo agensem olgeta. (Matiu 24:9; 2 Timoti 3:12) Be ‘tingting blong olgeta i mas strong’ o oli “no mas fraet.”—Jon 16:33, New International Version.

 “Mi mi winim wol ya finis.” “Wol ya” i minim ol man we oli no mekem stret fasin mo oli stap longwe long God. b Fas Jon 5:19 i talem se: “Fulwol i stap long paoa blong man ya we i rabis,” o Setan. Taswe ol tingting mo aksen blong ol man blong “wol ya” oli agensem samting we God i wantem.—1 Jon 2:15-17.

 Setan mo wol blong hem i traem stopem Jisas blong i no mekem samting we God i wantem, hemia blong tijim ol man long saed blong God mo givim laef blong hem olsem wan ransom. (Matiu 20:28; Luk 4:13; Jon 18:37) Be Jisas i no letem wol ya i jenisim tingting blong hem mo pulum hem i gowe long God. Hem i holemstrong long God go kasem we hem i ded. Taswe hem i save talem se hem i winim wol ya finis, mo se Setan we i “rula blong wol ya,” i “no gat paoa” long hem.—Jon 14:30.

 Jisas i tokbaot eksampol blong hem wan blong soemaot long ol man blong hem se olgeta tu oli save holemstrong long God, nating se Setan mo wol blong hem i traem olgeta. I olsem we Jisas i stap talem long olgeta se: “Sipos mi mi winim wol ya, be yufala tu i save winim.”

 Jisas i talem ol tok ya long naet bifo we hem i ded. Hem i save se i no longtaem bambae hem i ded, taswe hem i tekem janis blong givim laswan advaes long ol aposol blong hem. Hem i givim sam save we oli mas tinghevi long hem olsem: bambae oli no moa luk hem, bambae ol man oli mekem i nogud long olgeta mo maet oli kilim olgeta i ded tu. (Jon 15:20; 16:2, 10) Ating hemia i mekem ol aposol oli fraet, taswe Jisas i finisim tok blong hem wetem Jon 16:33, blong leftemap tingting blong olgeta mo mekem se oli no moa fraet.

 Ol tok blong Jisas mo eksampol blong hem oli leftemap tingting blong ol man blong hem tede tu. Olgeta Kristin oli save holemstrong long God nating se oli kasem bigfala trabol.