“Naoia i stret taem, mo Kingdom blong God i kam klosap. Yufala i mas tanem tingting blong yufala, mo yufala i mas bilif long gud nius.”—Mak 1:15, Niu Wol Translesen.

 “Taem i kamtru finis, mo kingdom blong God i stap klosap; tanem tingting mo bilif long gospel.”—Mak 1:15, English Standard Version.

 Jisas Kraes i talem se Kingdom blong God a i “stap klosap,” o i “kam klosap,” from we hem i stap long taem ya mo hem nao bambae i King blong Kingdom ya.

 Jisas i no stap minim se Kingdom i stat blong rul finis. Blong talem stret, hem i soemaot long ol disaepol blong hem se Kingdom bambae i kamtru long fiuja. (Ol Wok 1:6, 7) Be hem i kam long stret yia we Baebol i bin talemaot se bambae i kamtru olsem fiuja King blong Kingdom ya. b From risen ya, i stret nomo we Jisas i talem se “naoia i stret taem” blong hem i statem minista wok blong hem blong prijimaot gospel, o gud nius long saed blong Kingdom.—Luk 4:16-21, 43.

 Blong ol man oli save kasem blesing from gud nius blong Kingdom, oli mas tanem tingting blong olgeta. Hemia i min se oli mas lego ol rabis fasin we oli bin mekem bifo mo oli laef folem ol rul blong God. Olgeta we oli tanem tingting blong olgeta, oli soemaot se oli bilif long gud nius long saed blong fiuja Kingdom ya.

 Jisas i talem ol toktok ya long taem we hem i statem wok blong prij long Galili. Sem stori we i stap long Matiu 4:17 i talem se “i stat long taem ya,” Jisas i stap talemaot Kingdom blong God. Kingdom i men samting we Jisas i stap tijim ol man long hem. Blong talem stret, ol fo Gospel c oli tokbaot Kingdom bitim 100 taem, mo plante taem oli kamaot long ol toktok blong Jisas. Long Baebol, Jisas i tokbaot Kingdom blong God moa i bitim ol narafala samting.