“Yufala i no mas wari tumas from ol samting blong tumora. Ol wari blong tumora oli blong tumora. Trabol blong wan dei hem i naf finis blong dei ya.”—Matiu 6:34, Niu Wol Translesen.

 “Yu no mas wari from tumoro, from we tumoro i gat wari blong hem. Wan dei i gat i naf trabol blong hem.”—Matiu 6:34, New International Version.

 Jisas nao i talem ol tok ya, mo hem i leftemap tingting blong ol man we oli stap lesin se oli no nid blong wari tumas from ol problem blong fiuja. Be oli save harem gud sipos oli tingbaot ol problem blong wan dei nomo.

 Jisas i no minim se yumi no mas tingbaot ol samting blong tumoro o mekem plan blong fiuja. (Ol Proveb 21:5) Be hem i halpem yumi blong no wari tumas from ol samting we maet oli hapen tumoro. Wari olsem i save mekem se yumi no moa glad mo yumi no moa putum tingting long ol samting we yumi mas mekem. Yumi no save winim ol problem we oli no hapen yet, taem yumi stap wari tumas from. Mo tu, plante taem ol samting we yumi wari long hem oli no hapen, o oli no bigwan tumas olsem we yumi tingbaot.

 Ol tok ya blong Jisas oli pat blong Bigfala Toktok blong hem antap long hil, we i stap long Matiu japta 5-7. Long toktok blong hem, Jisas i eksplenem se fasin ya blong wari tumas i no save mekem laef blong wan man i kam gud moa, o i kam longfala moa. (Matiu 6:27) Mo tu, hem i talem se taem yumi putum God i stap fas ples long laef blong yumi, yumi no nid blong wari tumas from ol samting blong tumoro. God i stap lukaot gud long ol plant mo ol animol, mo bambae hem i lukaot gud tu long olgeta we oli mekem wok blong hem.—Matiu 6:25, 26, 28-33.