“Yufala i stop blong letem sistem blong wol ya i jenisim fasin blong yufala, be yufala i mas jenisim tingting blong yufala blong yufala i jenis fulwan, olsem nao bambae yufala i save pruvum long yufala wan se wil blong God i gud, i stret gud, mo hem i glad long hem.”—Rom 12:2, New World Translation.

 “Yufala i no mas folem fasin blong wol ya, be yufala i mas mekem tingting blong yufala i kam niuwan blong jenis fulwan. Nao bambae yufala i naf blong traem mo agri long wil blong God, se i gud, hem i glad long hem, mo i stret gud olgeta.”—Rom 12:2, New International Version.

 I no naf blong ol man we oli wantem mekem God i glad oli agensem ol nogud fasin we oli save spolem laef blong olgeta, be oli mas jenisim prapa fasin blong olgeta tu. God i no fosem olgeta blong jenis, be oli mekem olsem from we oli lavem hem mo oli luksave se ol samting we hem i askem oli no strong tumas, oli kaen, mo oli givhan long olgeta.—Aesea 48:17.

 “Yufala i stop blong letem sistem blong wol ya i jenisim fasin blong yufala.” “Sistem blong wol ya” i minim ol man blong wol ya wetem ol fasin, ol aksen, mo ol tingting blong olgeta, we oli no laenap wetem ol tingting mo rul blong God. (1 Jon 2:15-17) Oltaem, wol ya i fosem ol man blong folem ol tingting mo fasin blong hem, mo hem i save jenisim fasin mo ol aksen blong olgeta. Wan man we i wantem wosipim God long fasin we God i glad long hem, i mas blokem ol fasin blong wol. Sipos no, bambae hem i wokem ol fasin we oli spolem hem, mo we God i no laekem.—Efesas 2:1-3; 4:17-19.

 “Yufala i mas jenisim tingting blong yufala blong yufala i jenis fulwan.” Wan man i mas traehad tu blong jenisim ol tingting mo filing we i stap long hat blong hem. Blong soemaot se jenis ya i bigwan, Baebol i yusum wan Grik tok blong talem “jenis fulwan,” we i blong tokbaot katapila taem i jenis i kam bataflae. Olgeta we oli wosipim God oli mas wokem “niufala fasin.”—Efesas 4:23, 24; Kolosi 3:9, 10.

 “Pruvum long yufala wan se rul blong God i gud, i stret gud, mo hem i glad long hem.” God i wantem se olgeta we oli wosipim hem, oli sua gud long bilif blong olgeta. Blong sua gud, oli mas stadi long Tok blong God, folem ol tok ya, mo luksave ol blesing we oli kasem taem oli folem ol rul blong God. Long rod ya, oli pruvum long olgeta bakegen se ol rod we God i talem blong yumi folem, oli beswan.—Ol Sam 34:8.

 Rom japta 12 i eksplenem wosip we God i glad long hem. Wosip olsem i joen long evri haf blong laef blong yumi, mo i nidim we yumi “yusum gud tingting.” I nogud yumi gat wan bilif we yumi no sua gud long hem, o yumi folem filing blong yumi nomo, we plante taem i no stret. (Rom 12:1, 3) Japta ya i givim ol gudfala advaes olsem wanem blong gat ol fasin we God i glad long olgeta, olsem wanem blong mekem i gud long ol narafala, mo olsem wanem yumi mas mekem taem narafala i spolem yumi.—Rom 12:9-21.