“God i lavem yumi, mo hem i soemaot samting ya olsem: Taem yumi man blong mekem sin yet, Kraes i ded blong sevem yumi.”—Rom 5:8, Baebol Long Niu Wol Translesen.

 “God i soemaot lav long yumi long rod ya: Taem yumi man blong mekem sin yet, Kraes i ded from yumi.”—Rom 5:8, New International Version.

 Jehova a God i soemaot bigfala lav blong hem taem hem i letem Pikinini blong hem, Jisas Kraes, i ded long bihaf blong ol sinman. (Jon 3:16) From we yumi sinman, plante taem yumi gat ol tingting mo yumi mekem ol aksen we oli agensem samting we God i laekem. (Kolosi 1:21, 22) Be God i mekem se yumi save fren gud bakegen wetem hem tru long “ded blong Pikinini blong hem.” (Rom 5:10) From samting ya, yumi gat janis blong fren gud wetem God naoia, mo kasem laef we i no save finis long fiuja.—Rom 5:11; 1 Jon 4:9, 10.

 Aposol Pol i raetem ol tok ya i go long ol Kristin long Rom. Long japta 5 long leta we Pol i raetem long olgeta, hem i eksplenem from wanem oli save glad tumas long hop blong olgeta, mo bilif strong long hop ya. (Rom 5:1, 2) Hop ya “bambae i no mekem yumi harem nogud,” from we hem i stanap long bigfala lav we God i soemaot tru long Jisas. (Rom 5:5, 6) Jisas i obei long God long fasin we i stret gud olgeta, hemia samting we fas man ya Adam i no mekem. (Rom 5:19) From we Adam i no obei, ol pikinini blong hem oli kasem sin mo ded. (Rom 5:12) Be from we Jisas i obei gud mo i ded olsem wan sakrefaes, hem i mekem rod blong ol man we oli obei oli save laef olwe.—Rom 5:21.