Baebol i talem se yumi save tekem strong dring sipos i stret folem loa blong kantri. Be Baebol i agensem fasin blong drong.—Ol Sam 104:15; 1 Korin 6:10.

 ?Olsem wanem sipos narafala i traem fosem yu blong dring, nating se i agensem loa blong kantri, o papa mo mama blong yu i putum tabu long hem?

•  Tingbaot trabol we i save kamaot from

•  Mekem wan desisen

•  ?Sam yangfala oli talem wanem?

 Sam yangfala oli ting se blong gat wan gudtaem, yu mas tekem strong dring. ?Be wanem i save hapen biaen?

•  Yu kasem panis from yu brekem loa. Sipos i agensem loa blong kantri blong yu blong tekem strong dring, yu save faen, kot i save jajem yu se yu brekem loa, yu save lusum laesens blong draevem trak, oli save givim panis long yu se yu mas mekem wok long komuniti, o maet yu save go kalabus.—Rom 13:3.

•  Spolem gudnem blong yu. Strong dring i save mekem se yu no fraet blong mekem ol krangke samting. Maet yu talem o mekem samting we biaen yu sem from. (Ol Proveb 23:31-33) Long taem blong yumi we ol man oli stap pasem ol save i go olbaot long Intenet, ol aksen blong yu oli save spolem gudnem blong yu blong longtaem.

•  Bodi mo tingting i no moa naf blong blokem ol nogud samting. Strong dring i save mekem se i isi blong bodi i kasem ol sik mo yu no moa naf blong blokem ol rabis fasin long saed blong seks. Mo tu, i save mekem se i isi blong yu letem narafala i pulum yu, nao yu save mekem samting we i denja o i brekem loa.

•  Yu no save lego strong dring. Ol man blong stadi long saed ya, oli faenemaot se sipos yu stat blong tekem strong dring taem yu yangfala, bambae yu dipen moa long hem taem yu kam bigman. Sipos yu dring blong winim wari, mo from we yu harem nogud blong stap yu wan, o yu les nomo, hemia i save mekem se oltaem yu stap dipen long strong dring, mo i had moa blong lego.

•  Yu save ded from. Long wan yia long Yunaeted Stet, oli makem se wan man i ded evri 52 minit from aksiden long trak, we draeva blong trak ya i drong. Long faef yia, bitim 1,500 man we oli no gat 21 yia yet, oli ded evri yia from ol aksiden long trak we draeva blong ol trak ya i drong. Nating se yu no dring, be sipos yu go long trak wetem draeva we i bin dring, yu putum laef blong yu long bigfala denja.

 Sipos yu mekem desisen fastaem long aksen we bambae yu tekem, yu save blokem ol denja mo bigfala trabol we oli kamaot taem man i dring bitim mak.

 Advaes blong Baebol: “Man we i tingting gud i luksave we trabol i stap kam, nao i go haed.” (Ol Proveb 22:3) I no waes blong dring bifo we yu draev, o bifo we yu mekem wan narafala wok we yu mas putum tingting blong yu fulwan long hem.

 Desisen: ‘Bambae mi jusum blong tekem strong dring nomo, taem i stret folem loa mo long stret taem.’

 Advaes blong Baebol: “Yufala i slef blong hem from we yufala i obei long hem.” (Rom 6:16) Sipos yu dring from we ol nara yangfala oli mekem olsem, yu stap letem olgeta oli bos long yu. Sipos yu dring from we yu stap les o yu stap wari, bambae yu no wokem ol fasin we yu nidim blong winim ol problem blong yu.

 Desisen: ‘Bambae mi no letem ol nara yangfala oli fosem mi blong dring.’

 Advaes blong Baebol: “Yu no mas stap wetem olgeta we oli dring tumas waen.” (Ol Proveb 23:20) Sipos yu stap joen wetem ol man we oli dring tumas, hemia i save mekem se yu no moa stanap strong long desisen blong yu. Yu stap putum yu wan long denja, taem yu joen wetem olgeta we oli dring bitim mak.

 Desisen: ‘Bambae mi no joen wetem olgeta we oli dring bitim mak.’