Sikret #1: !Taem yu givim samting long narafala, bambae narafala i givim samting long yu tu!
Ol man bambae oli luksave se yu yu glad blong givim samting. Mo from samting ya, bambae olgeta tu oli glad blong givim samting long yu. Baebol i talem se:
“Yufala i mas gat fasin ya blong givim samting long ol man, nao ol man oli save givim samting long yufala. . . . Ol man bambae oli stap mekem long yufala olsem we yufala i stap mekem long olgeta.”—Luk 6:38.
“Fasin we yu mekem long ol narafala, bambae olgeta tu oli mekem sem mak long yu.”—Luk 6:38, Contemporary English Version.
Taem yu mekem ol gudfala samting blong halpem ol narafala, hemia i mekem se yu no ting nating long yu wan, mo i mekem yu glad from we yu givim samting long narafala. Baebol i talem se:
“Man i harem gud moa taem hem i givim samting, i bitim we hem i kasem samting.”—Ol Wok 20:35.
“Taem yu mekem lafet, yu invaetem ol puaman, ol man we oli handikap, ol man we leg blong olgeta i nogud, mo ol blaenman. Nao bambae yu yu glad tumas, from we olgeta oli no gat samting blong givim long yu, olsem jenis blong samting we yu mekem long olgeta.”—Luk 14:13, 14.
Ol yangfala we oli kea
!I gat plante yangfala we oli kea long ol narafala! Traem luk sam long ol eksampol ya.
“Samtaem mi harem se mi wantem sidaon nomo mo wajem TV, be afta mi tingbaot se mama mo papa blong mi oli wok had, mo bambae oli taed taem oli finis wok mo kambak long haos. So mi stanap mo mi wasem ol plet, mi klinim ol ples mo mi brum. Mo tu, mi mekem rere kofi from mi tingbaot se perens blong mi i laekem blong dring kofi. Taem mama i kambak long haos, hem i talem se: ‘!O ples i luk naes! Mo i smel gud tu. !Tangkiu tumas gel blong mi!’ Oltaem mi harem gud, taem mi mekem wan gudfala samting blong halpem mama mo papa blong mi.”—Casey.
“Oltaem perens blong mi i sapotem mi, mo oli givim evri samting we mi nidim. So las yia, taem trak blong tufala i nogud, mi givim bighaf blong mane blong mi long tufala blong tufala i save fiksimap trak blong tufala. I tru se tufala i no wantem tekem mane ya, be mi fosem tufala se tufala i mas tekem. Samting we mi mekem blong perens blong mi i nating nomo, be mi glad se mi givim samting blong halpem tufala.”—Holly.
?Yu yu save? Plante yangfala we oli Witnes blong Jehova oli ekspiriensem semfala glad ya, taem oli givhan blong tijim ol narafala long Baebol. Samfala oli muv i go long wan defren ples we i nidim moa man blong tijim trutok.
“Mi aot long Yunaeted Stet mo mi go long Meksiko blong givhan long wok ya blong tijim ol man long Baebol. Samtaem i no isi blong givim mane o ol narafala samting blong givhan long ol narafala, from we mi no gat tumas samting. Be mi makem se taem mi yusum taem mo paoa blong mi long wok blong prij, hemia i gud moa i bitim we mi givim samting long saed blong bodi.”—Evan.
?Olsem wanem mi save halpem ol narafala?
?Yu yu wantem ekspiriensem semfala glad ya taem yu givhan long ol narafala? Hemia sam tingting.
Blong halpem famle blong yu, yu save:
Brum, wasem plet, o klinim wan rum nating se oli no askem yu blong mekem
Kukum kakae
Raetem wan kad blong talem tangkiu long perens blong yu
Halpem brata o sista blong yu wetem ol homwok blong hem
Blong halpem wan we i no famle blong yu, yu save:
Sanem wan kad long wan man we i sik o i harem nogud
Givhan blong klinim yad blong wan neba we i olfala
Visitim wan man we i no save aot long haos
Pem presen blong wan man we i stap fesem wan hadtaem
Traem hemia: Traem tingbaot sam samting we yu save mekem. Biaen putum mak blong halpem wan man long wik ya. !Maet bambae yu sapraes se yu glad tumas!
“Taem yu halpem ol narafala, bambae yu glad. Mo bambae yu harem se samting we yu mekem i no blong nating, from yu luk we ol narafala oli glad long samting we yu mekem. Maet yu glad tumas blong mekem, nating se long stat, yu no ting se bambae i olsem. Samtaem, maet bambae yu harem se samting we yu mekem i no olsem wan sakrefaes, from yu luk se yu kasem plante moa samting i bitim wanem we yu givim.”—Alana.
