OL YANGFALA OLI ASKEM

?From Wanem Mi Katkatem Mi Wan?

PLEI

?I minim wanem blong givim kil long yu wan?

I gat plante defren samting we man i mekem blong givim kil long hem wan. Hem i save bonem hem wan long faea, bangem o faetem hem wan, o hem i yusum wan sap samting blong katkatem bodi blong hem wan. Atikol ya i tokbaot moa fasin ya blong katkatem bodi, be i aplae tu long eni samting we man i mekem blong givim kil long hem wan.

Jekem save blong yu: Tru o Giaman.

Ol gel nomo oli stap katkatem bodi blong olgeta.
Taem wan man i katkatem bodi blong hem, hem i no obei long tok ya blong Baebol long Levitikas 19:28, we i se: “Yufala i no mas katkatem bodi blong yufala.”

Stret ansa:

Giaman. I luk olsem se i tru we ol gel nao oli stap mekem moa fasin ya, be sam boe oli katkatem bodi blong olgeta mo oli mekem sam moa narafala samting tu blong givim kil long olgeta wan.
Giaman. Levitikas 19:28 i stap tokbaot wan olfala kastom we ol hiten man oli stap mekem, be i no stap tokbaot fasin ya blong katkatem bodi olsem we atikol ya i stap tokbaot. Nating se i olsem, i stret nomo blong talem se Krieta blong yumi we i lavem yumi, i no wantem se yumi givim kil long yumi wan.—1 Korin 6:12; 2 Korin 7:1; 1 Jon 4:8.

?From wanem ol man oli mekem olsem?

Jekem save blong yu: ?Weswan long ol tingting ya we yu ting se i stret moa?

Ol man oli katkatem bodi blong olgeta . . .

from we oli stap traem blong winim filing ya blong harem nogud.
from we oli wantem kilim olgeta wan i ded.

Stret ansa: A. Plante man we oli stap katkatem bodi blong olgeta, oli no wantem ded. Oli jes wantem nomo winim filing ya blong harem nogud.

Traem luk samting we sam yangfala oli talem long saed ya.

Celia: “Taem mi katkatem mi wan, mi harem gud moa.”

Tamara: “Hemia i olsem wan rod blong mekem mi kam fri. I moa gud mi harem nogud long bodi blong mi, i bitim we mi harem nogud long filing blong mi.”

Carrie: “Mi no laekem nating blong harem nogud. So taem mi katkatem bodi blong mi, hemia i mekem se mi no moa tingbaot samting we i mekem mi harem nogud, be mi tingbaot moa bodi blong mi we i stap soa.”

Jerrine: “Evritaem we mi katkatem bodi blong mi, mi no tingbaot nating ol samting we i stap raonabaot long mi, mo mi no nid blong dil wetem ol problem blong mi. Mi glad long jenis ya.”

Sipos yu gat problem ya, ?olsem wanem yu save stop?

Prea long Jehova God, hemia nao impoten samting we yu save mekem blong harem gud bakegen. Baebol i talem se: “Yufala i mas lego ol wari blong yufala long hem, from we hem i kea long yufala.”—1 Pita 5:7.

Wan tingting: Stat wetem wan sot prea nomo, maet yu save talem nomo long Jehova se: “Mi nidim help.” Sloslo, bambae yu naf blong talemaot hat blong yu mo olgeta filing blong yu long “God ya we i mekem olgeta samting blong leftemap tingting blong man.”—2 Korin 1:3, 4.

Prea i no jes wan rod blong mekem yu harem gud blong smoltaem nomo, nogat. Yu yu stap toktok stret wetem Papa blong yu long heven we i promes se: “Bambae mi halpem yu, bambae mi holemtaet yu long raethan blong mi we i blong stret fasin.”—Aesea 41:10.

Plante man we oli gat fasin olsem, oli harem gud tu taem oli toktok wetem wan perens o wan narafala bigwan we oli trastem hem. Makem toktok blong tri yangfala we oli mekem olsem.

Intaviu

Diana, 21 yia
Kathy, 15 yia
Lorena, 17 yia

?Yu gat hamas yia taem yu stat blong katkatem bodi blong yu?

Lorena: Mi stat taem mi gat samwe 14 yia.

Diana: Taem mi gat 18 yia. Mo mi mekem fasin ya plante taem. Mi save katkatem bodi blong mi evri dei blong wan o tu wik olsem, mo biaen mi stop wan manis olsem we mi no katkatem mi.

Kathy: Mi stat taem mi gat 14 yia. Mo samtaem mi stil mekem fasin ya.

?From wanem yu wantem givim kil long yu wan?

Kathy: Mi stap faet agensem filing ya we mi no laekem mi wan. Mi harem olsem se i no gat man i wantem kam fren blong mi.

Diana: Samtaem mi harem nogud gogo mi kam kros, mo taem mi kros, mi harem olsem se evri samting i gorong. Filing ya i gru gogo i kam strong tumas. I olsem we i gat wan bigfala wael animol insaed long mi, mo mi harem olsem se mi mas katkatem bodi blong mi blong letem hem i kamaot.

Lorena: Samtaem mi harem nogud tumas o mi kros long mi wan, o tingting blong mi i foldaon. Mo samtaem mi harem olsem se mi doti, so blong tekemaot ol nogud filing ya, mi harem se mi mas givim kil long mi wan.

?Yu harem gud moa taem yu givim kil long yu wan?

Diana: Yes. Mi harem gud moa afta, mi harem olsem se wan hevi samting i kamaot long mi.

Kathy: Hemia i olsem wan kaen krae. Sam man we oli harem nogud, oli harem gud moa afta we oli krae. Hemia i sem mak long mi, mi harem gud moa afta we mi katkatem bodi blong mi.

Lorena: Taem mi katkatem bodi blong mi, i olsem we mi mekem wan smol hol long wan balun insaed long mi we i fulap long ol nogud filing. Bambae hem i no bosta, be win bambae i kamaot sloslo mo i letem ol nogud filing ya oli kamaot.

?Yu yu fraet blong talemaot long narafala samting we yu stap mekem?

Lorena: Yes. Mi fraet se ol man bambae oli ting se mi narakaen. Antap long hemia, mi no wantem se ol narafala oli save long samting we i bisnes blong mi nomo.

Diana: Oltaem ol man oli stap talem se oli tingbaot mi se mi mi strong, mo mi wantem se oli tingbaot mi olsem nao. Mi harem olsem se sipos mi askem help, hemia bambae mekem ol man oli luk mi se mi no strong.

Kathy: Mi no wantem ol man oli luksave se mi harem nogud long filing blong mi, from hemia bambae i mekem mi mi harem nogud moa. Mo tu, mi harem se samting we mi stap mekem long mi wan i stret nomo.

?Wanem i halpem yu blong stopem fasin ya?

Lorena: Mi talemaot long mama blong mi, samting we mi stap mekem. Mo tu, mi go luk wan dokta we i save halpem mi blong kontrolem ol nogud tingting blong mi. I tekem taem blong mi kam gud, be Baebol stadi i halpem mi bigwan. Mo tu, mi joen plante long wok blong prij. Plante taem bambae mi stil gat filing ya se mi nating nomo, be taem filing olsem i kamaot, mi traem blong no letem i kontrolem mi.

Kathy: Wan Kristin sista we i gat samwe ten yia moa long mi, i luksave long mi se wan samting i rong, mo mi talem long hem. Be mi sapraes se hem tu, bifo hem i gat fasin ya blong katkatem bodi blong hem. Hemia i mekem se i isi blong mi toktok wetem hem, from we hem tu i bin fesem sem problem olsem mi. Mo tu, mifala i go luk wan dokta we i save halpem mi, mo perens blong mi blong oli kasemsave problem we mi stap fesem.

Diana: Wan naet mi stap long haos blong wan kapol we mi trastem tufala, mo hasban ya i luksave long mi se wan samting i no stret. Ale hem i toktok kaen mo i askem blong mi talemaot. Waef blong hem i putum han blong hem i goraon long mi, i holemtaet mi olsem we mama blong mi i mekem long mi taem mi wan smol gel. Mi stat blong krae mo hem tu i krae. I had blong talemaot long tufala, samting we mi stap mekem long mi wan, be mi glad tumas se mi talemaot.

?Baebol i halpem yu olsem wanem?

Diana: Baebol i bin halpem mi blong luksave se mi no naf blong winim fasin ya mi wan. Mi nidim Jehova blong i halpem mi.—Ol Proveb 3:5, 6.

Kathy: !Fasin ya blong ridim Baebol mo luksave se ol tok blong hem oli kamaot long God, hemia i rili leftemap tingting blong mi!—2 Timoti 3:16.

Lorena: Taem mi ridim wan vas we i stret long problem blong mi, mi raetem daon long notbuk blong mi blong mi save folem biaen.—1 Timoti 4:15.

?I gat wan stret vas we i tajem hat blong yu?

Diana: Ol Proveb 18:1 i talem se: “Man we i stap hem wan oltaem, i stap folem ol samting we hem nomo i wantem. Hem i sakemaot olgeta waestok we i wok gud.” Samtaem i had blong mi stap wetem ol narafala, be vas ya i halpem mi blong luksave se fasin ya blong stap mi wan i denja.

Kathy: I gat tu vas blong Baebol we mi laekem tumas, hemia Matiu 10:29 mo 31, we Jisas i talem se Jehova i save taem wan nomo long ol smol pijin i ded. Mo hem i gohed i se: “Yufala i no fraet. Long fes blong hem, yufala i gud moa i winim plante smol pijin.” Tede tu, taem mi ridim ol vas ya, oli rimaenem mi se mi mi sas long ae blong Jehova.

Lorena: Mi laekem tumas vas ya long Aesea 41:9, 10, we Jehova i talem long ol man blong hem se: “Mi neva sakemaot yu. Yu no mas fraet, from we mi mi stap wetem yu. . . . Bambae mi mekem yu yu strong.” Taem mi tingbaot wan samting we i strong, mi tingbaot se i no gat wan samting i save gotru long hem, olsem wan stonwol we oli wokem long ston. Vas ya i mekem mi harem se mi gat paoa, mi save se Jehova i lavem mi mo se bambae hem i stap long saed blong mi oltaem.

Ol kwestin blong tingting long hem

Sipos yu wantem askem help long narafala, ?bambae yu askem hu?
?Bambae yu talem wanem long Jehova God, taem yu prea long hem long saed blong problem ya?
?Yu save talem tu samting (we i no joen wetem fasin ya blong givim kil long yu wan) we yu save mekem, blong yu no moa stres mo wari?

Ol vas we mi raetemdaon

Wan tingting: Taem yu ridim wan vas blong Baebol we i tokbaot lav we Jehova i gat, o i tokbaot wan poen we i save halpem yu blong gat stret tingting long yu wan, mo ol slak fasin blong yu, i gud yu raetemdaon vas ya, mo wan o tu sentens blong talem from wanem yu laekem vas ya. Blong halpem yu, hemia sam vas we Diana, Kathy, mo Lorena oli luk se i givhan long olgeta.

Rom 8:38, 39

“Ol vas ya oli soemaot long mi se Jehova i lavem mi, nating se mi haremsave we ol nogud filing ya bambae oli no kam mowas.”—Diana.
Ol Sam 73:23

“Ol vas olsem hemia, oli mekem mi sua se mi no stap mi wan. I olsem we Jehova i stap nomo long saed blong mi.”—Kathy.
1 Pita 5:10

“Yumi no save harem gud kwiktaem nomo. Maet yumi save ‘safa blong smoltaem.’ Afta nomo, Jehova i save mekem se yumi naf blong stanap strong long eni samting.”—Lorena.