OL YANGFALA OLI ASKEM

?Kriesen o Evolusen?—Pat 2: ?I Stret Blong Kwestinim Evolusen?

PLEI

Tingting blong Alex i fasfas. Oltaem hem i bilif se i gat wan God mo i bilif long kriesen. Be tede, bioloji tija blong hem i talem se evolusen i tru, from i gat ol strong pruf we ol saentis oli faenemaot. Alex i no wantem mekem olsem se hem i no save samting. Ale hem i stap tingting se: ‘Sipos ol saentis oli naf blong pruvum se evolusen i tru, ?mi mi hu blong mi kwestinim olgeta?’

?Yu yu bin fesem wan situesen olsem? Maet long ful laef blong yu, yu bilif long tok ya we Baebol i talem se: “God i mekem heven mo wol.” (Jenesis 1:1) Be naoia, ol man oli stap traem blong pulum yu blong bilif se kriesen i wan kastom stori nomo mo se evolusen nao i tru. ?Olsem wanem? ?Bambae yu bilivim olgeta? ?I stret blong kwestinim evolusen?

Tu risen blong kwestinim evolusen

I no evri saentis we i agri long evolusen. Nating se ol saentis oli mekem plante risej finis, be oli no faenem yet wan rod blong eksplenem evolusen we evri saentis oli agri long hem.

Blong tingbaot: Sipos ol saentis oli no agri long evolusen, mo olgeta nao oli ol ekspet long saed ya, ?yu ting se i rong blong kwestinim ol save blong olgeta?—Ol Sam 10:4.
Samting we yu bilif long hem i impoten. Wan boe we nem blong hem Zachary, i talem se: “Sipos ol laef samting i kamaot from wan aksiden nomo, hemia i minim se i no gat wan gudfala risen blong laef mo olgeta samting long yunives ya i no gat pepos.” Toktok blong hem i stret nomo. So sipos evolusen i tru, hemia i olsem we laef blong yumi i blong nating nomo. (1 Korin 15:32) Be sipos kriesen nao i tru, hemia i min se i mas gat ansa blong ol impoten kwestin long saed blong laef mo long saed blong fiuja.—Jeremaea 29:11.

Blong tingbaot: ?Olsem wanem trutok long saed blong evolusen mo kriesen i save afektem laef blong yu?—Hibru 11:1.

Ol kwestin blong tingbaot

SAM MAN OLI SE: ‘Evri samting long yunives oli kamaot from we i bin gat wan big bang o bosta long spes.’

?Hu o wanem i mekem samting ya i bosta?
Yu ting se weswan tingting i isi moa blong akseptem, ?tingting ya se olgeta samting i jes kamaot olsem nomo, o se wan man i wokem olgeta?

SAM MAN OLI SE: ‘Ol man oli kamaot long ol animol.’

Sipos i tru se ol man oli kamaot long ol animol, olsem ol mangki, ?from wanem tingting mo waes blong man i defren bigwan long hemia blong ol mangki? a
?From wanem i had blong kasemsave long ol “simpol” samting we oli laef? b

SAM MAN OLI SE: ‘Evolusen i wan tru samting.’

?Man we i talem tok ya i bin jekemgud ol pruf?
Plante man oli bilif long evolusen from we narafala i talem se evri man we oli waes oli bilif long samting ya.

SAM YANGFALA OLI TALEM WANEM

Gwen

“Traem tingbaot sipos wan man i talem long yu se wan bigfala bosta i hapen long faktri blong printim ol buk, mo ol ink oli flae i go long wol, long siling mo sam oli flae olbaot nao oli krietem wan ful diksonari. ?Bambae yu yu bilivim hem? Nogat. ?Bambae i had blong bilivim se evri samting long yunives i stap long stret ples blong olgeta, from wan big bang o bosta long spes?”

Jessica

“I tru, ol man oli gat ol fasin we oli nidim blong stap laef, be i no hemia nomo, oli gat ol nara gudfala fasin tu. Eksampol, yumi stap kea long olgeta we oli sik mo halpem ol man we oli gat nid. Sipos evolusen i tru, bambae yumi no kea long ol narafala man, bambae yumi olsem ol animol we oli folem rul ya se ‘olgeta we oli strong bambae oli laef.’”

Julia

“Sipos yu stap wokbaot long bus mo yu luk wan naesfala haos we oli wokem long wud, bambae yu gat tingting ya se: ‘!Wow, haos ya i naes tumas! I sua se ol tri ya oli foldaon long stret ples blong olgeta blong oli save mekem.’ Tingting ya i no stret. Taswe, i narakaen blong bilif se evri samting long yunives oli kamaot olsem nomo.”

a Maet samfala oli talem se ol man oli waes moa from we bren blong olgeta i bigwan moa i bitim blong ol mangki. Be blong save from wanem risen ya i no stret, luk buklet ya The Origin of Life—Five Questions Worth Asking, pej 28.

b Luk buklet ya The Origin of Life—Five Questions Worth Asking, pej 8-12.