“!Mi no laekem skul nating!” Sipos yu gat tingting olsem, maet yu wantem lego. Hemia sam advaes we i save givhan long yu.

•  ?From wanem samfala oli lego skul?

•  Tingbaot samting we i save kamaot from

•  Samting we i moa gud

•  Sam yangfala oli talem wanem

 Sam tija oli makem ol risen ya:

•   Skul i had. ‘Ol mak blong mi long skul oli stap godaon.’

•   Oli no kea. ‘Mi no ting se samting we mi lanem long skul bambae i givhan long mi.’

•   Trabol long saed blong mane. ‘Mi mas wok blong givhan long famle.’

 Baebol i talem se: “Man we i tingting gud, hem i skelem gud wanwan step blong hem.” (Ol Proveb 14:15) ?Yumi lanem wanem? Sipos yu stap tingting blong lego skul, meksua se yu tingbaot samting we i save kamaot from.

 Askem se:

•   ‘Sipos mi lego, ?bambae i isi blong faenem wok?’

   “Tingbaot se yu mas faenem wok mo maet wan dei yu mas winim naf mane blong lukaot long ol pikinini blong yu. ?Olsem wanem yu save mekem olsem, sipos bighaf blong ol bos oli wantem se yu mas gat pepa blong soem se yu finisim hae skul?”—Julia.

•   ‘Sipos mi lego, ?bambae i isi blong winim ol problem long fiuja?’

   “Skul i mekem yu yu rere from laef blong yu long fiuja. Ol man we bambae yu mitim, ol samting we oli pulum yu blong mekem i no stret, mo wok we yu mekem, bambae oli sem mak long ol samting we yu fesem long skul.”—Daniel.

•   ‘Sipos mi lego, ?bambae mi naf blong mekem evri wok we mi mas mekem long fiuja?’

   “Maet yu ting se ol samting we yu lanem long skul i blong nating nomo, be taem yu gat 23 yia mo yu stap traem blong jekem ol kaon mo mane blong yu, bambae yu glad se yu bin traehad long matematik.”—Ana.

•   Askem help. Baebol i talem se: “Taem i gat plante man blong givim advaes, ol samting oli go gud.” (Ol Proveb 11:14) Sipos ol mak blong yu long skul oli stap godaon, i gud yu toktok long papa, mama, wan tija, wan man blong givim advaes long skul, o wan narafala bigman we yu trastem hem. Maet gudfala advaes blong olgeta i save givhan long yu.

   “Sipos skul i had, i gud yu toktok long tija blong yu. Maet yu ting se tija nao i stamba blong problem ya, be plante taem ol samting i save kam gud sipos yu askem help.”—Edward.

•   Tingbaot olsem wanem skul bambae i givhan long yu long fiuja. Baebol i talem se: “En blong wan wok i gud moa i bitim stat blong hem.” (Prija 7:8) Taem yu finis long skul, bambae yu gat save long ol samting we yu stadi long hem, mo bambae yu gat gudhan mo plante fasin we yu nidim long laef tu.

   “Maet yu no nidim blong raetem ol stori mo ripot mo mekem ol eksam long fiuja, be sipos yu lan blong winim ol problem long skul, bambae i isi moa blong winim ol problem long laef blong yu biaen.”—Vera.

•   Tingting gud fastaem. Baebol i talem se: “Man we i no tingting gud fastaem, bambae i kam pua.” (Ol Proveb 21:5) Yu no mas hareap blong mekem desisen blong lego skul. Maet yu save finisim edukesen blong yu long Intenet o long wan kos we yu mekem long haos nomo.

   “Skul i gud, from we i tijim yu blong wok had, winim ol problem, mo wok gud wetem ol narafala. Ol gudfala fasin ya bambae oli stap wetem yu olwe. I gud yu traehad blong finisim ol yia blong yu long skul.”—Benjamin.

 Stamba poen: Sipos yu finisim ol yia blong yu long skul, bambae yu rere gud blong mekem ol wok blong yu long fiuja.