Aposol Pol i raetem se: “Taem mi wantem mekem samting we i stret, be tingting blong mekem i nogud, hem tu i stap long mi.” (Rom 7:21) ?Yu yu harem olsem samtaem? Sipos yes, atikol ya bambae i halpem yu blong blokem ol traem we oli save pulum yu blong mekem i no stret.

•  Samting we yu mas save

•  Samting we yu save mekem

•  Sam yangfala oli talem wanem

 Taem narafala i putum presa long yu, hemia i save pulum yu blong mekem i no stret. Baebol i talem se “ol rabis fren oli save spolem ol gudfala fasin.” (1 Korin 15:33) Toktok we i kamaot long media o long ol narafala, i save mekem se yu gat ol filing we i lidim yu blong mekem i no stret. Mo tu, oli save pulum yu blong “folem bighaf blong ol man blong mekem ol samting we i nogud.”—Eksodas 23:2.

 “Taem yu wantem se ol narafala oli laekem yu mo oli akseptem yu, hemia i save pulum yu blong mekem sem mak olsem olgeta, jes blong oli glad long yu.”—Jeremy.

 Tingbaot: ?From wanem i had moa blong winim ol traem, taem yu fraet long tingting blong ol narafala?—Ol Proveb 29:25.

 Impoten samting se: No letem presa we i kam long ol narafala, i pulum yu blong mekem samting we i go agensem tingting blong yu.

 Sua long samting we yu bilif long hem. Sipos yu no sua long ol mak blong yu long laef, yu yu olsem wan doli we narafala i stap kontrolem. Taswe, i gud blong folem advaes ya blong Baebol, we i se: “Yufala i mas traem olgeta samting fastaem, nao yufala i save holemtaet ol samting we oli gud.” (1 Tesalonaeka 5:21) Taem yu savegud samting we yu bilif long hem, bambae i isi moa blong folem ol bilif ya mo blokem ol traem.

 Tingbaot: ?From wanem yu bilif se ol rul blong God oli save givhan long yu?

 “Mi luk se taem mi holemstrong long samting we mi bilif long hem mo mi no letem ol traem i winim mi, ol narafala oli respektem mi moa.”—Kimberly.

 Eksampol long Baebol: Daniel. Taem Daniel i yangfala, hem “i mekem desisen finis long hat blong hem” se bambae hem i obei long ol loa blong God.—Daniel 1:8.

 Save ol slak fasin blong yu. Baebol i tokbaot “ol samting we ol yangfala oli stap wantem tumas,” o ol strong filing we yu kasem taem yu yangfala. (2 Timoti 2:22) Hemia i no minim nomo ol filing long saed blong seks, be i minim tu filing ya blong wantem se narafala i glad long yu, mo blong wantem kam independen nating we yu no rere yet blong mekem olsem.

 Tingbaot: Baebol i talem se: “Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.” (Jemes 1:14) ?Wanem samting i traem yu moa?

 “Yu mas savegud samting we i save pulum yu moa. Ale yu mekem risej blong luk olsem wanem yu save winim, mo raetemdaon ol poen we yu save folem. Long rod ya, taem yu fesem traem ya bakegen, be bambae yu save olsem wanem blong blokem.”—Sylvia.

 Eksampol long Baebol: Deved. Samtaem hem i foldaon long traem, from we ol narafala oli putum presa long hem o maet from prapa filing blong hem. Nating se i olsem, Deved i lanem samting from mastik blong hem mo i traehad blong kamgud moa long ol gudfala fasin. Hem i prea long Jehova se: “Plis yu wokem wan hat we i klin gud insaed long mi, mo yu putum wan niufala tingting insaed long mi, yes, wan we i stap strong oltaem.”—Ol Sam 51:10.

 Kontrolem yu wan. Baebol i talem se: “Yu no mas letem ol rabis samting oli winim yu.” (Rom 12:21) Hemia i min se i no nid blong letem ol traem oli winim yu. Yu save jusum blong mekem samting we i stret.

 Tingbaot: Sipos wan i traem pulum yu blong mekem i no stret, ?wanem i save givhan long yu blong kontrolem yu wan mo mekem samting we i stret?

 “Taem wan samting i traem mi, mi stap tingbaot filing we mi save gat. ?Bambae mi haremgud? Maet, be blong smoltaem nomo. ?Bambae mi stil haremgud afta? Nogat, bambae mi harem nogud moa. ?I rili impoten blong mekem samting ya? !Nogat!”—Sophia.

 Eksampol long Baebol: Pol. Hem i talemaot we samtaem hem i mekem samting we i no stret, be nating se i olsem, hem i traehad blong kontrolem hem wan. Hem i raetem se: “Mi strong blong stretem bodi blong mi mo mi fosem hem olsem wan slef.”—1 Korin 9:27, futnot.

 Impoten samting se: Taem yu fesem wan traem, yu nao yu holem stia blong mekem desisen.

 Tingbaot se ol traem we yumi kasem oli no save stap longtaem. Melissa we i gat 20 yia i talem se: “Plante bigfala traem we mi fesem long hae skul, naoia mi luk olgeta olsem ol smol samting nomo. Hemia i mekem mi sua se ol traem we mi stap kasem naoia tu bambae oli finis, mo se wan dei taem mi luklukbak mi save talem se mi mekem i gud taem mi blokem ol traem ya.”