OL YANGFALA OLI ASKEM
?From Wanem Papa Mo Mama i No Letem Mi Mi Gat Gudtaem?
Ol fren blong yu oli invaetem yu blong yu joen wetem olgeta long wan pati long wiken. Ale yu askem long papa mo mama sipos yu save go, be kwiktaem nomo tufala i talem “no.” Yu save finis se bambae tufala i talem no, from we hemia sem samting we tufala i talem lastaem.
Long atikol ya
?From wanem oltaem papa mo mama i talem no long mi?
Sipos oltaem papa mo mama blong yu i talem no long yu, maet yu save gat tingting ya se tufala i no wantem se yu gat gudtaem.
Wan yangfala we nem blong hem Marie i gat tingting ya taem hem i kasem faswan fon blong hem. Hem i talem se: “Papa blong mi i putum plante rul long wanem app we mi save daonlodem, hu olgeta we mi save toktok wetem olgeta, mo se mi save toktok wetem olgeta kasem wanem taem. !Be ol fren blong mi oli save yusum fon blong olgeta olsem we oli wantem!”
Traem tingbaot: ?Yu ting se papa blong Marie i no wantem se hem i gat gudtaem? ?O i gat sam narafala risen we i mekem se hem i putum ol rul ya?
Ol rul blong rod we wan draeva i mas folem i blokem hem blong mekem sam samting, be ol rul ya oli stap blong protektem hem. Hemia i sem mak tu long ol rul we papa mo mama i putum.
Traem hemia: Tingbaot se yu nao yu papa o mama, mo pikinini blong yu i jes kasem wan fon. ?Wanem sam samting we bambae yu wari long hem? ?Wanem sam rul we bambae yu yu putum? ?Bambae yu yu talem wanem sipos pikinini blong yu i talem se yu no wantem we hem i gat gudtaem?
“Oltaem papa blong mi i stap talem se: ‘Traem tingbaot sipos yu nao yu wan papa o wan mama.’ Hemia i givhan long mi blong kasemsave long tingting blong hem mo from wanem hem i putum ol rul. Sipos mi mi gat ol pikinini, mi ting se bambae mi wantem se oli folem ol semfala rul we papa blong mi i wantem se mi folem.”—Tanya.
?Mi save mekem wanem blong papa mo mama i talem yes?
“Taem yu kros mo yu singaot strong long papa mo mama blong yu, i no gat wan gudfala samting i save kamaot from, be bambae yufala evriwan i harem nogud. Sipos yu raorao wetem tufala, bambae tufala i luk se yu no naf yet blong yusumgud tingting blong yu mo maet bambae tufala i putum sam moa rul.”—Richard.
“Papa mo mama blong mi i putum ol rul from ol gudfala risen. Ol rul ya oli no blong blokem mi blong gat gudtaem, be i blong blokem ol trabol we mi save kasem.”—Ivy.
Advaes blong Baebol: “Man we i stupid, hem i letem ol filing blong hem oli kamaot, be man we i waes, hem i stap kwaet nomo, i holemtaet ol filing blong hem.”—Ol Proveb 29:11.
“Mi traem blong brekem ol rul blong papa long fasin haed. Mi faenem sam rod blong sanem mesej long ol fren blong mi let long naet mo daonlodem sam app we papa blong mi i no wantem se mi daonlodem. Be oltaem hem i faenemaot samting we mi mekem, nao hem i putum sam moa rul from we hem i no moa trastem mi. Mi luksave se i no waes nating blong brekem ol rul long fasin haed.”—Marie.
“Yu mas gat longfala tingting. Sipos papa mo mama blong yu i luk se yu traehad blong folem ol rul we tufala i putum, sloslo bambae tufala i glad blong jenisim sam long ol rul ya.”—Melinda.
Advaes blong Baebol: “Yufala i mas obei long papa mo mama blong yufala long evri samting.”—Kolosi 3:20.
“Sipos yu traem blong fosem papa mo mama blong yu blong talem yes, hemia bambae i no givhan long yu mo bambae yu no kasem samting we yu wantem.”—Natalie.
“Ol papa mo mama oli wantem luk sipos yumi naf blong mekem ol gudfala desisen. So taem mi storian wetem papa mo mama, mi traem blong eksplenem gud from wanem mi wantem mekem wan samting i bitim we mi tokbaot ol filing blong mi nomo. Taem mi mekem olsem, tufala i glad moa blong letem mi mekem samting we mi askem.”—Joseph.
Advaes blong Baebol: “Yu mas ona long papa mo mama blong yu.”—Efesas 6:2.
Maet Yu Laekem Hemia Tu
OL YANGFALA OLI ASKEM
?Olsem Wanem Mi Save Toktok Long Papa Mo Mama Long Ol Rul We Tufala i Putum?
Lanem olsem wanem blong toktok wetem respek long papa mo mama blong yu, mo maet bambae yu sapraes long gudfala frut we i kamaot.
KATUN WE MAN I DROEM
?Olsem Wanem Mi Save Kam Fri Moa?
Yu ting se ol narafala oli sud luk yu olsem wan bigwan, be maet papa mo mama blong yu i no agri. ?Yu save mekem wanem blong tufala i trastem yu moa?
OL YANGFALA OLI ASKEM
?I Stret We Papa Mo Mama i Putum Ol Rul?
?Yu yu harem se i had blong folem ol rul we papa mo mama i putum? Hemia sam advaes we i save givhan long yu blong gat stret tingting.
SAM YANGFALA OLI TALEM WANEM
Laef Blong Wan Yangfala—?Olsem Wanem Mi Save Toktok Wetem Papa Mo Mama?
Maet yu no tingbaot be plante moa gudfala samting i save kamaot from.
OL YANGFALA OLI ASKEM
?Olsem Wanem Blong Mekem Se Papa Mo Mama i Trastem Mi?
I no ol yangfala nomo we oli mas mekem fasin we narafala i save trastem.
