Wan yangfala we nem blong hem Elaine, i talem se: “Taem mi luk we long intenet, bitim handred man oli stap folem ol klasmet blong mi, mi stap tingting se, ‘!Wow, olgeta oli popiula!’ Blong talem stret, mi jalus smol.”

 ?Yu yu harem olsem samtaem? Sipos yes, atikol ya bambae i givhan long yu, blong yu no foldaon long trap ya blong wantem kam popiula long intenet.

•  ?Wanem ol denja we i save kamaot from?

•  “Ol giaman tingting long saed blong popiula”

•  ?I impoten we plante man oli folem yu mo oli laekem pej blong yu?

•  Flas be no wantem talem

 Long Ol Proveb 22:1, Baebol i talem se “I moa gud yu jusum blong gat wan gudfala nem i bitim we yu jusum blong gat ol sas samting.” So i oraet blong wantem gat wan gudnem mo wantem se ol narafala oli laekem yu.

 I tru we yumi wantem we ol narafala oli laekem yumi, be samtaem filing ya i save kam bigwan tumas, nao yumi no moa glad sipos yumi no kam popiula. ?Olsem wanem? ?I gat denja? Onya we i gat 16 yia, i ansa se yes:

 “Mi luk we sam man oli putum laef blong olgeta long denja. Oli jamdaon long seken stori bilding long skul blong mi, jes from we oli wantem kam popiula.”

 Blong pulum ae blong ol narafala yangfala, samfala oli postem ol video blong olgeta we oli mekem sam krangke samting. Eksampol, sam yangfala oli postem ol video blong olgeta, we oli stap kakae sop blong londri, hemia ol smol plastik sop we i gat posen long hem. !Hemia wan samting we man i no sud mekem!

 Baebol i talem se: “Yu no mas mekem eni samting we. . . i blong nating nomo, jes blong leftemap yu wan.”—Filipae 2:3, Good News Translation.

 Blong tingbaot:

•   ?Yu yu ting se i impoten blong kam popiula long intenet?

•   ?Bambae yu putum laef blong yu long denja, jes blong pulum ae mo mekem ol narafala oli laekem yu?

 Ol man oli no nid blong putum laef blong olgeta long denja, blong oli kam popiula. Erika we i gat 22 yia, i makem wan narafala rod we sam man oli stap yusum:

 “Sam man bambae oli postem plante defren foto, blong mekem olsem se oli gat plante fren we oli stap joengud tugeta oltaem. Hemia i mekem ol man oli ting se olgeta oli popiula.”

 Cara we i gat 15 yia, i talem se sam man oli giaman blong mekem ol man oli ting se olgeta oli popiula:

 “Mi luk sam man oli postem ol foto we i soemaot se oli stap long lafet, be rili oli stap long haos nomo.”

 Matiu we i gat 22 yia, i talem se hem i bin mekem wan samting olsem, hem i talem se:

 “Mi postem wan pija mo mi putum lokesen se mi stap long Hil ya Everest, !be mi mi neva go long Esia!”

 Baebol i talem se: “Mifala i wantem tumas we oltaem mifala i stap mekem i stret nomo long olgeta samting.”—Hibru 13:18.

 Blong tingbaot:

•   ?Yu yu bin postem finis wan samting we i no tru, blong mekem se yu kam popiula?

•    ?Olsem wanem? ?Ol pija mo ol komen we yu postem oli soemaot ol trufala fasin blong yu, mo ol samting we yu tinghae long hem?

 Plante man oli ting se rod blong kam popiula, hemia taem plante oli folem olgeta mo oli laekem pej blong olgeta. Matiu we yumi tokbaot hem finis, i talem se hem i bin gat tingting ya:

 “Samtaem mi askem ol man se, ‘?Hamas man oli stap folem yu long intenet?’ o ‘?Hamas man oli stap laekem pej blong yu? ?Mo wanem bigfala namba we yu bin kasem?’ Blong mekem se namba blong ol man we oli folem mi i kam plante, mi stat blong folem ol man we mi no save olgeta, mo mi hop se bambae oli folem bak mi. Mi stat blong wantem kam popiula mo sosol media i mekem se filing ya i kam strong moa.”

 Maria we i gat 25 yia, i talem se samfala oli luk namba blong ol man we oli laekem pej blong olgeta mo folem olgeta, nao oli jajem olgeta wan folem namba ya:

 “Sipos wan gel i postem selfi blong hem mo smol man nomo oli laekem, hem i save gat tingting ya se hem i no naes. Hemia wan rong tingting, be plante man we oli fesem sem situesen, oli save harem olsem. Hemia i olsem we oli stap spolem olgeta wan.”

 Baebol i talem se: “I gud yumi no kam flas, mo yumi no traem blong winim narafala, mo yumi no jalus long yumi.”—Galesia 5:26.

 Blong tingbaot:

•   Taem yu yusum sosol media, ?yu yu harem se yu wantem komperem yu wetem narafala?

•    ?Yu yu tingbaot moa namba blong olgeta we oli folem yu, i bitim we yu frengud wetem olgeta we oli kea long yu?