?Yu yu save wan yangfala we i gat wan strong sik? ?Yu yu gat wan sik o disabiliti, we i blokem yu blong yu no save joen wetem ol narafala mo mekem ol samting we oli harem gud long hem?

 Sipos yes, i nomol we samtaem tingting blong yu i foldaon. Be i gat tu tingting long Baebol we oli save kamfotem yu.

•   Jehova God, we i krietem yu, i save problem blong yu. Mo tu, “hem i kea” long yu.—1 Pita 5:7.

•   !Stamba tingting blong Jehova God i blong tekemaot ol sik! Yu save ridim promes ya long Baebol long Aesea 33:24 mo Revelesen 21:1-4.

 Plante yangfala we oli gat ol strong sik, oli luk se bilif long God mo ol promes blong hem, i givhan long olgeta. Tingbaot fo long ol yangfala ya.

•  YEIMI

•  MATEO

•  BRUNA

•  ANDRE

 Taem mi kasem 11 yia, mi no moa save wokbaot, be mi mas yusum wan wiljea. Mi no save mekem wan wok, nating se i blong leftemap wan smol samting nomo.

 Taem mi gat faef yia, ol dokta oli faenemaot se mi gat sik ya muscular dystrophy. Hemia wan sik we sloslo i kam moa nogud, mo i blokem mi blong mi no save mekem plante samting. Samtaem, tingting blong mi i foldaon from we mi no save mekem ol samting we ol nara yangfala oli mekem. Be papa mo mama blong mi mo olgeta long kongregesen, oli givhan long mi long saed blong bodi, filing, mo bilif. Mi stap mekem wok blong God fultaem, mo plante taem narafala i folem mi blong mekem ol Baebol stadi wetem olgeta we oli intres.

 Jisas i talem se evri dei bambae yumi gat sam wari. (Matiu 6:34) Taswe mi traem blong tingbaot tede nomo mo mi no wari long tumoro. Mi traem kasem ol mak nomo we mi naf blong kasem. Mi wantem tumas se God bambae i mekem niufala wol nao mi no moa sik, hemia nao “laef ya we i prapa wan.”—1 Timoti 6:19.

  Blong tingbaot: Yeimi i talem se hem i ‘traem kasem ol mak nomo we hem i naf blong kasem.’ ?Olsem wanem yu save folem eksampol blong hem?—1 Korin 9:26.

 Taem mi gat sikis yia, bak blong mi i soa. Ol dokta oli ting se hemia from we mi stap gru. Be wan yia biaen, oli faenem wan lam long bigfala bun blong bak blong mi.

 Oli katem mi, be oli save tekemaot 40 pesen nomo blong lam ya. !Mo afta tu manis, lam ya i bigwan bakegen! Stat long taem ya, oli mekem plante tes, oli traem plante defren tritmen, mo tingting blong mi i foldaon plante taem.

 Samtaem, sik ya i mekem mi mi harem nogud tumas, i olsem we wan naef i stap stikim mi evri ples, speseli long bak mo jes. Nating se i olsem, mi traehad blong no tingbaot sik blong mi oltaem. Mi tingbaot ol narafala we oli gat ol rabis sik tu, be oli stanap strong mo holem positif tingting. Samting we i givhan moa long tingting blong mi, hemia strong bilif se wan dei Jehova God bambae i mekem promes blong hem i kamtru blong finisim ol sik.—Revelesen 21:4.

Blong tingbaot: Sipos yu tingbaot promes blong God blong finisim ol sik, ?olsem wanem hemia i save givhan long yu olsem we i givhan long Mateo?—Aesea 65:17.

 Maet samfala oli ting se mi les from we oli no save luk se mi sik. Be, blong talem stret, i had blong mi mi mekem eni samting, olsem ol wok long haos, stadi, o jes blong kamaot long bed.

 Taem mi gat 16 yia, ol dokta oli faenemaot se mi gat sik ya multiple sclerosis. Hemia wan sik we sloslo i kam mowas, mo i blokem mi blong wok, mo tu blong joen fulwan long ol Kristin wok olsem mi wantem. Oltaem mi ridim 1 Pita 5:7, we i talem se: “Yufala i mas lego ol wari blong yufala long [God], from we hem i kea long yufala.” Taem mi tingbaot se Jehova i kea long yumi wanwan, hemia i givim paoa long mi, mo i mekem mi mi strong kam kasem tede.

  Blong tingbaot: Sipos yu lego ol wari blong yu long Jehova, ?olsem wanem hemia i save givhan long yu olsem we i givhan long Bruna?—Ol Sam 55:22.

 Samfala oli mekem olsem se mi wan pikinini we i gat 10 yia. Be mi no save kam kros long olgeta, from we i tru se mi luk olsem wan pikinini nomo.

 Taem mi gat tu yia, ol dokta oli faenemaot se mi gat wan kaen kansa we i stat long bigfala bun long bak blong mi mo i go long bren. Oli givim tritmen, be hemia i mekem se mi no moa gru. Tede mi longfala olsem 1.37 meta nomo. !Plante oli ting se mi stap giaman taem mi talem se mi gat 18 yia!

 Olgeta long Kristin kongregesen oli soemaot respek long mi. Oli no jikim mi olsem ol yangfala we mi skul wetem olgeta. Mi traem blong holem positif tingting. ?Yu save wanem? Beswan samting we i save hapen long eni man i hapen long mi. !Mi kasem save long Jehova! Nomata wanem hadtaem mi fesem, mi sua se Jehova i stap wetem mi. Taem mi tingbaot niufala wol we Jehova God i promes blong mekem, mi holemtaet positif tingting.—Aesea 33:24.

  Blong tingbaot: ?From wanem “beswan samting we i save hapen long eni man” hemia blong save Jehova, olsem Andre i talem?—Jon 17:3.