Ol dolfin oli save wokem plante defren kaen saon mo biaen oli lesin long eko blong ol saon ya, nao oli save jusum stret ples we oli wantem go long hem. Nambawan saon we ol dolfin oli mekem (Tursiops truncatus), i pulum ol saentis blong oli wokem sam spesel masin we oli yusum aninit long solwota blong makem se solwota i dip olsem wanem, mo mekem ol narafala wok aninit long solwota.

 Tingbaot: Saon blong dolfin i mekem hem i save faenem fis we i haed aninit long sanbij mo blong i save sipos hemia i wan fis o wan ston. Keith Brown we i wan profesa long Yunivesiti blong Heriot-Watt, Edinburgh, long Skotlan, i se ol dolfin “oli naf blong haremsave sipos i gat ol defren samting insaed long wan kontena, olsem wota, solwota, swit jus, mo oel, nating sipos ol samting ya oli stap longwe long wan distens olsem 10 meta o 32.8 fit.” Ol saentis oli wantem tumas blong wokem sam masin we oli save mekem samting ya.

 Ol man oli stadi long saon blong dolfin mo fasin blong olgeta blong harem samting, nao oli traem blong wokem sam samting we i save wok olsem. Oli wokem wan masin we i raon samwe long 1 meta (3.3 fit) we insaed long hem i gat plante smosmol spesel elektrik we i save wokem saon olsem blong dolfin. Oli joenem masin ya wetem wan spesel masin we i olsem trak we i save go aninit long solwota. Nao oli yusum ol masin ya blong stadi long ol samting we oli stap aninit long solwota. Mo blong faenem mo jekem ol samting we oli bin berem aninit solwota, olsem ol rop blong elektrik, mo ol paep. Ol man we oli wokem masin ya, oli talem se i gud we ol kampani blong oel mo gas oli yusum ol masin olsem. Be saon blong dolfin i strong moa i bitim ol masin ya we oli wokem blong mekem saon. Hemia i mekem ol teknisien oli luksave se, taem oli putum masin blong olgeta i go aninit long solwota, oli mas putum long wan stret ples o kona, blong oli save faenemaot sipos i gat wan samting i nogud. Eksampol, sipos paep blong oel we oli digim aninit long solwota i brok, o i gat wan samting i fas long hem.

 ?Wanem Tingting Blong Yu? ?Yu ting se saon we dolfin i mekem, i kamaot olsem nomo, no i gat wan Man i wokem?