Emwa nibun wa mu okhian rrie ẹvbo ima, do gha ghee okpe amẹ nọ tue ladian vbe okuta, nọ rre ọkpẹn Pagsanjan vbe Philippines. Evba nii ẹre erha mwẹ na wan, ẹni ẹnrẹn ọre Nardo Leron, ovbi ogue sẹlẹke wa gha nọ. Erha mwẹ ghi bẹghe vbene arriọba ẹvbo nii, avbe olakpa kevbe emwa nọ winna lele ya gha fi ibeleku, ohu na ghi suẹn gha muẹn.

 Ọ ma gha khuẹrhẹ ne evbibiẹ mwẹ ya koko ima erẹnrẹn wan. Ugbo emwa ọvbehe ẹre iran ghaa gbaroghe vbe uhunmwu oke, rhunmwuda ọni, iran i rherhe rrie owa. Mẹ vbe ọtẹnmwẹ ne ọdiọn na tie ẹre Rodelio ẹre ọ ghi gha gbaroghe etẹn mwẹ nikẹre, erriọ obọ ohanmwẹ vbe ya da ima. Vbe ima wan dee, ẹkpotọ ma wa gha kie ne ima ya gha ku. Ma gha wa gba vbe ukpo ihinrọn, ma ghi ya gha winna vbe ugbo ọghẹdẹ, ma ghi vbe gha mu ẹkpo ivin nikhua la oke nọ khuo. Adeghẹ Ihẹ ne ima mu na khua ima gbe, ma ghi suẹn gha si ẹre lele otọ khian.

 Ẹghẹ hia ẹre erha ima ya gha gbe ima, sokpan nọ ghi daa ima sẹ vbọ, ọre vbọ ghaa gbe iye ima. Ugbẹnso ima ghi hia na ima da ẹre obọ yi, sokpan ima i sẹtin. Ẹre imẹ vbe Rodelio na ghi kha wẹẹ, ma gha wan nẹ, te ima khian gbe erha ima rua. Akpawẹ ima mwẹ erha nọ hoẹmwẹ ima nian, ọ gha te maan gbe!

 Iho na wa han mwẹ rhunmwuda obọ nọ tọn ne erha ima ya gha mu ima, erriọ ohu erha mwẹ vbe ya gha mu mwẹ. Vbe I ghi rre ukpo 14, I na kpa hin owa rre. Abọ idunmwu ẹre I ghi gha vbiẹ, I na suẹn gha si e morroco. Vbene ẹghẹ ya khian, I ke gha ya okọ viọ emwa ni do mu okhian lẹga ẹvbo ima, yo ehe ne amẹ na tue ladian vbe okuta.

 Ukpo eso ghi gberra nẹ, I na ghi la owebe nọ yo nọ rre Manila. Sokpan I i mobọ miẹn ẹghẹ ya tie ebe, rhunmwuda I zẹdia ya winna vbe Pagsanjan vbe ufomwẹ uzọla. Te agbọn wa gha lọghọ mwẹ, I ma ghi rẹn vbene I khian ghi khian ẹmwẹ agbọn mwẹ hẹ. E morroco ne I te si ya mu orhiọn mwẹ sotọ, i ghi ru winna nọ te ru. Ẹre I na werrigbe suẹn gha loo ikpẹ ukhunmwu ni wegbe, vbe na ghee methamphetamines, cocaine, kevbe heroin. Vbene I ya gha loo avbe ikpẹ ukhunmwu na, erriọ I vbe ya gha munnọ ikhuo. Te emwa ni fi ibeleku, ni gbe ọmwa ekueku kevbe ivbiogue wa lẹga mwẹ. Ohu arriọba na wa gha mu mwẹ, rhunmwuda I yayi wẹẹ, iran ẹre ọ si avbe ọlọghomwa na. Ẹre I na ghi nọ Osanobua wẹẹ, “Vbọzẹ ne emwi na ye vbenia?” Sokpan ugamwẹ ughughan ni yo, ma sẹtin zẹ ewanniẹn ye inọta na. Ẹre I na werriegbe suẹn gha loo ikpẹ ukhunmwu ni wegbe, ne emwa ghẹ mieke na rẹn obalọ ne I ye.

 Ọ ghi rre ukpo 1972, ivbi esuku ni rre Philippines na ghi suẹn gha gbe olighi rhunmwuda emwi ne arriọba ru. Ẹre I na ghi deba iran, sokpan igbinna ẹre ọ ghi gha re okiekie ẹre. Igbinna na yọn sẹrriọ wẹẹ, a na khui emwa eso ye eghan, uki eso ghi gberra nẹ, a na yae wewe wẹẹ, ẹmwẹ ne soldier tae, ẹre a khian ghi ya gha ru emwi vbe ẹvbọ nii.

 Idunmwu ẹre I ghi werriegbe suẹn gha vbiẹ, ẹghẹ na, ohan arriọba ẹre ọ ghi gha mu mwẹ, rhunmwuda ne I na deba emwa gbe olighi. Ne I mieke na gha miẹn igho ya dẹlẹ ikpẹ ukhunmwu ne I loo, I na suẹn gha rha, I vbe gha ghẹ ba re, avbe ọmwẹ igho kevbe orriọvbe ni mu otuẹ rre, ẹre I ghaa gu do ẹki na, iyeke ọni, iran ghi ha mwẹ usighi igho. Vbene ọ rhirhi khọn mwẹ ẹre I ghi ya gha loo arrọọ mwẹ.

 Vbe uwu ẹghẹ na, Avbe Osẹe Jehova suẹn gha ya e Baibol maa iye mwẹ kevbe ọtẹnmwẹ ne kherhe emwi nẹ. Erha mwẹ ma kue yọ hiehie, ọ lọghọ iran sẹrriọ wẹẹ, ọ na giẹn ebe ne iran ya ruẹ emwi ruan. Sokpan iran ma gie ọni gbe orhiọn ye iran iwu, okiekie ẹre, iran na ghi dinmwiamẹ zẹvbe ọkpa vbe Osẹe Jehova.

 Ọ ghi rre ẹdẹ ọkpa, Osẹe Jehova na do kporhu ma erha mwẹ, ọ na ma rẹn vbe uwu e Baibol wẹẹ, ẹdẹ dee ne Osanobua khian ya wabọ uyinmwẹ a gbe ọmwa ekueku hin agbọn na rre. (Psalm 72:​12-​14) Emwi ne erha mwẹ họn vbe ẹdẹrriọ yẹẹ ọre sẹrriọ wẹẹ, ọ na ya tobọ ẹre gualọ otọ ẹre, deghẹ ẹmwata iran tae. Ọ ghi tie Baibol, ọ na bẹghe eyan ne Osanobua yan rẹn, ọni ọre wẹẹ, irẹn gha mu arriọba ne a i khian na gha gbe ọmwa ekueku rre, ọ na vbe miẹn ọnrẹn tie wẹẹ, obọ nọ maan ẹre ọ khẹke ne ọdọ kevbe erha ya gha mu ẹgbẹe ọre. (Ẹfisọs 5:​28; 6:⁠4) Vbọ ma he kpẹ vba, erha mwẹ kevbe etẹnmwẹ nikẹre na do khian Osẹe Jehova. Na kha na, mẹ ma rẹn egiaye, rhunmwuda ehe ne I ye rre ne owa.

 Vbọ ghi rre ukpo 1978, I na si gha rrie Australia. Agharhemiẹn wẹẹ ọfumwegbe kevbe igho wa rre ẹvbo nii, orhiọn mwẹ ma ye sotọ. Ọrheyerriọ, I ma dobọ ayọn na da yi, I na ye gha loo ikpẹ ukhunmwu ni wegbe. Ukpo nii ẹre Avbe Osẹe Jehova vbe do kporhu ma mwẹ. Iran na ghi maa mwẹ re vbe Baibol wẹẹ, ẹdẹ dee ne ọfumwegbe khian ya gha rre ehe hia, ẹmwẹ ne I họn na wa yẹẹ mwẹ, sokpan I na gha rhu ẹwaẹn vbe egbe iran.

 Vbọ ma he kpẹẹ vba, I na werriegbe gha rrie Philippines ya gbe uzọla eso. Etẹn mwẹ na ghi tama mwẹ wẹẹ erha mwẹ fi werriẹ nẹ, sokpan ohu ẹre na ye gha mu mwẹ, ọni ẹre ọ si ẹre ne I ma na hoo ne I ye aro mwẹ kaan rẹn.

 Ọtẹn mwẹ ne okhuo nekherhe, keghi ya e Baibol rhan otọ re ma mwẹ, evbọ si ẹre ne usẹ kevbe a gbe ọmwa ekueku na gba ehe hia. Ọ na wa kpa mwẹ odin wẹẹ, ọtẹn mwẹ nekherhe nọ ma rẹn emwi rhọkpa, ẹre ọ ghi sẹtin rhie ewanniẹn ye inọta ni nọ ke otọ gha dee. I ke kpa, erha mwẹ na rhie ebe ọkpa mẹ, na tie ẹre You Can Live Forever in Paradise on Earth. * Ọ na tama mwẹ wẹẹ: “Ghẹ ghi zozo gualọ ewanniẹn kevbe agbẹkunsotọ vbe odẹ nọ ma khẹke. Ebe na gha rhie ewanniẹn ye inọta hia nọ kpokpo ruẹ vbe orhiọn.” Ọ na wẹẹ ne I gualọ Avbe Osẹe Jehova vbe I gha sẹ Australia.

 I gele ru vbene erha mwẹ khare, I ghi sẹ owa, I na gualọ Ọgua Arriọba ọghe Avbe Osẹe Jehova nọ sikẹ owa mwẹ vbe Brisbane. ẹre I na wẹẹ ne iran do gha ya e Baibol maa mwẹ emwi. Ẹmwẹ akhasẹ nọ rre ebe Daniel uhunmwu ẹnrẹn 7 kevbe ebe Aizaia uhunmwu ẹnrẹn 9, ya mwẹ rẹn wẹẹ, Arriọba Osanobua ọkpa ẹre ọ khian sẹtin kha yan ima, ne agbọn mieke na maan ima, ẹghẹ nii, ai khian ghi miẹn emwa ni fi ibeleku. I vbe ruẹ ọre wẹẹ, te agbọn na khian khian e Paradais, erriọ ima khian vbe sọyẹnmwẹ ọnrẹn. I hoo ne Osanobua miẹn mwẹ yi, sokpan I rẹnrẹn wẹẹ ọni ke sunu, te I gha mu ohu dan nọ mu mwẹ fua, I ghi dobọ ikpẹ ukhunmwu na loo yi, ayọn na da gbe egbe, kevbe oghẹ. Ẹre I na ghi kpa sẹ okhuo nọ mu mwẹ ye owa rae, I na vbe ban avbe uyinmwẹ dan ni gua mwẹ obọ ro. Zẹvbe ne I ya gha mu ẹtin yan e Jehova, I ke gha rinmwiaẹn nọ ru iyobọ mẹ ya ru afiwerriẹ nọ khẹke.

 Zẹvbe ne ẹghẹ ya khian, I na do bẹghe ẹre wẹẹ, emwi ne I ruẹ gha sẹtin fi mwẹ werriẹ. E Baibol khare wẹẹ, deghẹ ima na hia ne ima gha rhie ẹre ye uyinmwẹ emwi ne ima ruẹ, ma gha sẹtin mu ‘akpa ọghe ọgbọn’ yọ. (Kọlose 3:​9, 10) Zẹvbe ne I ya hia ni fi werriẹ, I na bẹghe ẹre wẹẹ, ẹmwata ẹre etẹn mwẹ tae, ne iran na wẹẹ erha mwẹ fi werriẹ nẹ. I ma ghi gha mu ohu erha mwẹ, nọ gha te ya yerriọ, I na gha hoo ne I guẹ ru adọlọ. Ke otọ gha dee, ẹre I ke wa khẹko ẹre, sokpan I yabọ ẹre nẹ nian.

 Vbe I wan dee, ẹghẹ hia ẹre I ya gha deba emwa ọvbehe do uza. Emwi ne Baibol khare wa sẹ vbe egbe mwẹ​​—avbe ọse dan ne I ghaa gu mu obọ, ẹre ọ mu uyinmwẹ mwẹ rhia. (1 Kọrinti 15:33) Avbe Osẹe Jehova ẹre ọ ghi ọsẹ mwẹ nian, iran na ẹre ọ ru iyobọ mẹ ya khian ọmwa esi. Vbe uwu ẹbu iran, ẹre I na vbe miẹn ọvbokhan mwẹ ne uwa, ẹni ẹnrẹn ọre Loretta. Ma eva ẹre ọ ghi vbe maa emwa re, vbene Baibol khian ya ru iyobọ ne iran hẹ.

 E Jehova ru ẹse nọ na ru iyobọ ne erha mwẹ ya fi werriẹ, I ma te ya aro yọ wẹẹ, erha mwẹ gha sẹtin do hoẹmwẹ iye mwẹ, ọ ghi vbe do gha re ọmwa nọ mu egbe rrie otọ, nọ vbe gu emwa ọvbehe rrọọ vbe ọfumwegbe. Ukpo 1987 ẹre I dinmwiamẹ zẹvbe ọkpa vbe Osẹe Jehova, erha mwẹ ghi miẹn mwẹ, ọ na gba mwẹ ginna egbe. Ke obo na ya biẹ mwẹ, ọna ẹghẹ okaro ne erha mwẹ ya mu mwẹ dede!

 Ọ gberra ukpo 35 ne erha mwẹ vbe iye mwẹ gba kporhu ma emwa ọvbehe vbekpae Arriọba Osanobua kevbe vbene ọ khian ya sọfurre ye ọlọghọmwa ọghe ima hẹ. Emwa na do rẹn erha mwẹ ye ọmwa ne aro ẹre sotọ vbe egbe emwa ọvbehe, kevbe nọ ru iyobọ ne emwa. Vbe uwu ẹghe nii, te I wa gha rhie ọghọ nẹẹn, erriọ I vbe ya hoẹmwẹ ọnrẹn. I wa gha ghọghọ wẹẹ irẹn ẹre ọ biẹ mwẹ! Sokpan ọ ghi rre ukpo 2016 erha mwẹ na wu. Ẹghẹ ke ẹghẹ ne I ya ye ẹre rre, ẹko ghi wa gha sẹ mwẹ ọyẹnmwẹ, rhunmwuda, ima eva sẹtin fi uyinmwẹ ima werriẹ. I i ghi zẹdẹ mu ohu ẹre. I wa ghọghọ wẹẹ I sẹtin do rẹn Erha mwẹ nọ rre ẹrinmwi ighẹ Jehova, nọ yan rẹn wẹẹ, irẹn gha wabọ ẹre rua, emwi ke emwi nọ ghi si obalọ ye emwa egbe vbe ẹdẹnẹrẹ.