“Adeghẹ u gele hoo ne rẹn Osanobua, Avbe Osẹe Jehova ẹre ọ khẹke ne u gha gu mu obọ.” Te ẹmwẹ nọ tae wa kpa mwẹ odin. Ẹghẹ na kha na, Avbe Osẹe Jehova gu mwẹ ruẹ Baibol nẹ. U ke rẹn evbọzẹe ne ẹmwẹ nọ tae na kpa mwẹ ọdin, I gha ka tama ruẹ emwi eso vbekpa mwẹ.

 El Salvador ẹre a na biẹ mwẹ, vbe ẹvbo na tie ẹre in Quezaltepeque. Mẹ ọre nogie 6 vbe emọ 15 ne evbibiẹmwẹ biẹ. Te evbibiẹ mwẹ wa koko mwẹ, ne I gha re ọmwa nọ ta ẹmwata kevbe nọ lele uhi. Osẹe Jehova ọkpa na tie ẹre Leonardo kevbe Avbe Osẹe Jehova ọvbehe, zẹdia rrie owa ima do gha ya e Baibol maa ima emwi. Sokpan I ma gha mu aro ye emwi ne iran ghaa maa mwẹ re, rhunmwuda ọni, I na gha fi obọ ye emwi dan ughughan. Vbe I ghi rre ukpo 14, I na ghi suẹn gha deba avbe ọse mwẹ ne ima gba rre owebe daa ayọn, erriọ ima vbe ya gha loo ikpẹ ukhunmwu ni wegbe. Vbene ẹghẹ ya khian, iran na dobọ esuku na yo yi, iran na ya deba otu dan, ẹre I na wa vbe deba iran. Te ima wa gha hẹ yo hẹ rre vbe idunmwu, ma ghi gha nọ emwa igho, erriọ ima vbe ya gha do emwa emwi viọ, igho nii ma ya gha do ẹki ọrhiae.

 Otu dan nii ẹre ọ ghi do gha re ẹgbẹe mwẹ. I wa yayi wẹẹ, iran ọkpa ẹre ọ khẹke ne I gha họn ẹmwẹ na. Vbe Igiemwi, vbọ ghi rre ẹdẹ ọkpa, ọkpa vbe uwu ima ghi loo ikpẹ ukhunmwu ni wegbe nẹ, ukhunmwu nii na ghi vẹẹ lae ẹrherhe, ọ na suẹn gha gu okpia ọkpa ne ima gba rre idunmwu gbinna. Obọ okpia nii wa da ọse mwẹ ẹsẹsẹmwẹse, ọ ghi muẹn, ọ na piẹn ọnrẹn ginna oto, iyeke ọni, ọ na tie olakpa. Ohu na wa mu mwẹ, ẹre I na suẹn gha ya erhan guọghọ imọto okpia nii, nọ mieke na sẹ ọse mwẹ rae. Vbene okpia nii rinmwia mwẹ sẹ, I ma rhie.

 Ọ mwẹ asẹ ọkpa ne emwa ne ima gba rre otu ọkpa ya gha gu avbe olakpa khọn, na kha na, ukpo 18 ẹre I ghaa ye. Ẹre I na wẹẹ ne I fi ugbe ọwẹwẹ ne ima tobọ ima ru gie iran, ọ na wa mu sa vbe obọ mwẹ. I ma wa rẹn vbene ọ ya sunu hẹ, emwi ọkpa ni wa yerre ọre, te obọ mwẹ wa zanzan​—ọ ghi sunu, I na wa kuọ. I ghi rhiọre, I na ya miẹn egbe mwẹ vbe owa isinmwiegbe, ẹre ọbo ebo na tama mwẹ wẹẹ, ukhiọnmwẹ obọ I ghi mwẹ, ọ wẹẹ, I i khian ghi sẹtin ya ehọ mwẹ ọkpa gha họn ẹmwẹ, kevbe wẹẹ, kherhe ẹre ọ ghi kẹ ne aro mwẹ ọkpa rhu.

 Vbene obọ da mwẹ sẹ, I ma ye ya emwi nọ sunu daa mwẹ wannọ egbe, I ghi ke owa isinmwiegbe sẹ owa, I na ye bu otu dan nii gha khian, ya gha gu iran mu obọ. Vbọ ma he kpẹẹ vba, avbe olakpa na mu mwẹ, iran na fi mwẹ ye eghan. Evba nii, ẹre imẹ vbe avbe ọse mwẹ na vbe mu khui, ghi ya sikẹ egbe sayọ. Te ima wa gha ru emwi hia kugbe, ima ẹre ọ gba rri evbare kugbe, ima ere ọ gba si e morroco, ẹghẹ ne ima ya se egbe rae, ọre vbe ima ra khian vbiẹ.

 Vbe I ghaa rre eghan, Leonardo na do tuọ mwẹ. Ma ghi guan, ọ na niẹn obọ daa emwi ni vinnọ ye oberhọmwa mwẹ. Ọ na nọ mwẹ wẹẹ: “U rẹn emwi na ya emwi eha ne u vinnọ ye obọ na kha ra?” I na wẹẹ “Ẹn,” Ẹre I na ghi kha wẹẹ “Ne okpia vbe okhuo na lovbiẹ ke egbe, ikpẹ ukhunmwu ni wegbe, Ihuan na ya emadogua nikhuo kpee na tie ẹre rock and roll.” Sokpan e Leonardo khian ghi kha, ọ na wẹẹ, “nọ ne imẹ, I gha tie ẹre owa isinmwiegbe, eghan, kevbe uwu. U yo owa isinmwiegbe rre nẹ, eghan ẹre u ye na, u rẹn emwi ọvbehe nọ khian ghi sunu ra?”

 Emwi ne Leonardo tae na wa gbe mwẹ egbe. Ẹmwata ẹre ọ wa ta. Te I wa gha ya obọ mwẹ eveva gualọ emwi nọ gha gbe mwẹ. Leonardo na wẹẹ, irẹn hoo ne irẹn werriegbe suẹn gha ya e Baibol maa mwẹ emwi, ẹre I na wẹẹ ọ maan. Emwi ne I ghaa ruẹ, ẹre ọ ghi ru iyobọ mẹ ya fi werriẹ. Vbene ọta ye, e Baibol khare wẹẹ, “otu dan ọre ọ mu uyinmwẹ esi rhia.” (1 Kọrinti 15:33) Ọna ẹre ọ si ẹre ne I na ban otu dan ni gu mu obọ, I na ghi zẹ ọse ọgbọn. I ma ghi gha gu avbe otu dan nii do iko, nọ gha ya yerriọ, iko ọghe Avbe Osẹe Jehova ẹre I ghi gha yo vbe uwu eghan. Vbe iko ọkpa ọghe Avbe Osẹe Jehova ne I yo, I na miẹn okpia ne ima gba rre eghan, eni ẹnrẹn ọre Andrés, ọ dinmwiamẹ nẹ vbe uwu eghan, zẹvbe ọkpa vbe Osẹe Jehova. Ọ na wẹẹ ne I do deba irẹn rri evbare. Iyeke ọni, I ma ghi gha si e morroco vbe owiẹ owiẹ. E Baibol ẹre imẹ vbe Andrés ghi gha tie.

 Otu ne I ghaa ye na do bẹghe ẹre wẹẹ, I fẹko fi werriẹ nẹ. Ẹre ọkpa vbe ọka olotu ọghe otu nii, na wẹẹ irẹn hoo ne irẹn gu mwẹ guan. Ohan na wa gha mu mwẹ. I ma rẹn emwi nọ gha ru mwẹ re, deghẹ I na tama rẹn emwi ne I hoo ne I ru, rhunmwuda ọmwa gha la otu nii nẹ, ọ lọghọ a ke do sẹtin la hin vbọ. Ọ na khama mwẹ wẹẹ: “Ma bẹghe ẹre wẹẹ, u i ghi gu ima do iko, iko ọghe Avbe Osẹe Jehova ẹre u ghi yo. Vbua hoo ne u ru na yi?” I na wẹẹ, I ma hoo ne I dobọ e Baibol ne I ruẹ yi, I hoo ne fi arrọọ mwẹ werriẹ. Emwi ghi wa ru aro, ọ na tama mwẹ, iran i khian ru mwẹ emwi rhọkpa, ọni ọre, deghẹ I gele hoo ne I khian Osẹe Jehova. Ẹre ọ na wẹẹ: “Adeghẹ u gele hoo ne rẹn Osanobua, Avbe Osẹe Jehova ẹre ọ khẹke ne u gha gu mu obọ. Ma hoo ne u dobọ emwi dan na ru yi. I ghọghọ nuẹn. Owẹ nọ maan ẹre u zẹ na. Avbe Osẹe Jehova gha sẹtin ru iyobọ nuẹn. Iran ka gha ya e Baibol maa mwẹ emwi, vbe ẹghẹ ne I na gha rre United States, kevbe wẹẹ, Osẹe Jehova ẹre etẹnmwẹ eso ghi khin. Ghẹ gi ohan muẹn. Ghẹ kpa hin ugamwẹ na rre.” Agharhemiẹn wẹẹ ohan ye gha mu mwẹ, vbe uwu ekhọe mwẹ, te ọyẹnmwẹ wa gha sẹ mwẹ. Ẹre I na kpọnmwẹ e Jehova. I keghi yevbe ahianmwẹ na fan fua, eban ẹre I ghi rẹn otọe ẹmwẹ ne Jesu khare, nọ na wẹẹ: “Wa gha rẹn ẹmwata ne ọ rrọọ, ẹmwata ni gha ya uwa khian enọyan egbe ẹre.”​—Jọn 8:​32.

 Avbe ọse ne I ka gha gu mu obọ, ke gha danmwẹ mwẹ ghee, deghẹ I gha deba iran loo ikpẹ ukhunmwu ni wegbe. Ne I wa ta ẹmwata, I zẹdia gha deba iran. Sokpan I ghi ghee vbene emwi hia ghi ye hẹ, I na suẹn gha rinmwian e Jehova nọ ru iyobọ mẹ. Zẹ vbene ẹghẹ ya khian, I na ghi do gha ban avbe uyinmwẹ dan nii.​—Psalm 51:​10, 11.

 A ghi fan mwẹ nẹ vbe eghan, emwa nibun na gha roro ẹre wẹẹ, te I khian werriegbe suẹn emwi dan na ru, sokpan ọ ma gha ye vberriọ. Nọ gha ya yerriọ, I na ya ra kporhu ma emwa ne ima gba te gha rre eghan. Vbe okiekie, emwa ne ima gba te gha rre otu ọkpa, na do bẹghe ẹre wẹẹ, I gele fi werriẹ nẹ. Sokpan ọ ma gha ye vberriọ ne otu ọvbehe, nọ ghaa re eghian ima vbe ẹghẹ nii.

 Vbe I rre ikporhu ẹdẹ ọkpa, mẹ vbe ọmwa ne ima gba kporhu, na lae idunmwu okpa, idunmwu na ẹre eghian ọghe otu ne I ka gha gu mu obọ ye. Te iran nii wa gha hoo ne iran gbe mwẹ rua. Ọwarọkpa ne iran ya bẹghe mwẹ, iran na wa vẹẹ ladian, emwi igbinna ughughan na vbe gha gu iran. Ẹre ọmwa ne ima gba winna na fẹko tama iran wẹẹ, I i ghi rre otu nii. Na kha na, I ma zẹdẹ gu iran guan. Ẹre iran na ya ugbemwẹ yan mwẹ, iran ghi gbe mwẹ fo nẹ, iran na ya obọ sekhae mẹ wẹẹ, ne I ghẹ werriegbe la idunmwu nii, ẹre iran na ghi sẹ mwẹ rae. E Baibol gele fi mwẹ werriẹ nẹ. Deghẹ ẹghẹ nẹdẹ nọ, I gha te ru iran re werriegbe. Adia nọ rre ebe 1 Tẹsalonaika 5:​15 ẹre ọ ru iyobọ mẹ, ọ wẹẹ: “Wa ghẹ ye ọkhọ ha osa ọkhọ, sokpan wa gha ru egbe emwi esi, wa ghi vbe gha ru emwa hia ẹse vbe ẹghẹ hia.”

 Ke obọ ne I ya khian Osẹe Jehova, te I wa hia ne I gha re ọmwa na gba ẹko ẹre, agharhemiẹn wẹẹ, ọ ma zẹdẹ gha khuẹrhẹ. Sokpan iyobọ ọghe Jehova, ọghe Baibol, kevbe ọghe avbe ọse ọgbọn ne I ghi mwẹ nia, ẹre ọ zẹe ghẹ I sẹtin mu sọe. I ma hoo ne I werriegbe gha rrọọ vbene I ka gha ye.​—2 Pita 2:​22.

 Ọmwa ne ohu dan rherhe mu, kevbe nọ gbinna ẹghẹ hia ẹre I ghaa khin. Ọghe ne ẹmwata, deghẹ ẹi ne I na fi werriẹ, ọ kpẹẹ re ne I gha te wu fua nẹ. Te emwi ne I ruẹ re vbe Baibol wa gele fi arrọọ mwẹ werriẹ. I mu avbe uyinmwẹ dan ni ka gua mwẹ obọ ro fua nẹ. Te I ghi gu emwa hia rrọọ vbọ ọfumwẹgbe, ya sẹ egbe eghian ne I ka gha mwẹ. (Luk 6:​27) Te I ghi mwẹ avbe ọse ni maan, iran ẹre ọ vbe ru iyobọ mẹ, ne I gha mwẹ uyinmwẹ esi. (Itan 13:20) Te ọyẹnmwẹ ghi sẹ mwẹ nia, rhunmwuda I rẹnrẹn wẹẹ afiangbe khẹ mwẹ vbe odaro, kevbe wẹẹ, I vbe ga Osanobua nọ mu egbe nọ ya ya orukhọ mwẹ hia bọ mwẹ.​—Aizaia 1:​18.

 Ọ ghi rre ukpo 2006, I na ghi yo owebe na tie ẹre Bible School for Single Brothers. Ukpo eso ghi gberra, I na ghi rọnmwẹ ọvbokhan mwẹ ne uwa, ọmọ okhuo ọkpa ma ghi mwẹ nia. Te I ghi loo ẹghẹ nọ se omwa ya maa emwa ọvbehe ilele ni rre Baibol, ni ru iyobọ mẹ. Ọdiọn ẹre I ghi vbe khin vbe iko, I wa vbe hia ni ru iyobọ ne igbama, ne iran ghẹ zẹ owẹ ihan, vbene I ru ẹre vbe I ye kherhe. Ne I gha te ya gha ya obọ mwẹ gualọ emwi nọ gha gbe mwẹ ruan, te I ghi mu egbe khẹ agbọn ọgbọn ne Osanobua yan rẹn wẹẹ, irẹn mu dee vbe odaro.