Ẹvbo na tie ẹre Ciudad Obregón vbe odẹ okuọ ọghe Mexico ẹre a na biẹ mwẹ. Mẹ ọre nogie isẹn vbe emọ ihinrin ne evbibiẹ mwẹ biẹ. Ehe nọ khian rre vbe orere ẹvbo ẹre ima ghaa ye, evba nii ẹre erha mwẹ na gha mu ugbo kherhe kherhe, ma na vbe gha koko emwi irri baa re. Te ẹdogbo ne ima ghaa ye wa ye mosee, erriọ ima vbe ya gha mwẹ ọfumwegbe kevbe akugbe vbuwe ẹgbẹe. Vbe I ghi rre ukpo isẹn, okpe ẹhoho na tie ẹre hurricane na wa guọghọ emwi hia ne ima mwẹ. Ọni ẹre ọ ghi ya ima si gha rrie ehe ọvbehe.

 Zẹvbe ne ẹghẹ ya khian, erha mwẹ na do gha mwẹ igho, sokpan ọ na gha da ayọn gbe egbe. Uyinmwẹ na, ẹre ọ si ọlọghọmwa ye uwu ẹgbẹe ima. Imẹ vbe etẹnmwẹ nikpia na suẹn gha si e siga, e siga ne ima do viọ vbe obọ erha ima, ẹre ima ghaa si. Ukpo ehan kẹkan ẹre I ghaa ye vbe I suẹn gha da ayọn gbe egbe. Vbọ ma he kpẹẹ vba, iye mwẹ na kpa sẹ erha mwẹ rae, erriọ ẹkpotọ ghi ya kie mẹ ya guẹ emwi dan nibun ye ihiẹn.

 Iye mwẹ na ghi zẹ okpia ọvbehe ọse, ọ na viọ ima ya tota kẹ okpia nii. Okpia na ma zẹdẹ gha rhie igho ne iye mwẹ, igho ne iye mwẹ vbe gha miẹn vbe isi iwinna, ma sẹ ima ya gha gaga egbe. Ẹre imẹ vbe etẹnmwẹ na ghi suẹn gha ru iwinna ne ima rhirhi miẹn, sokpan ima ma gha miẹn igho agbọn vbe iwinna ne ima ghaa ru. Usun iwinna ne I ru, ọre ibata na polish, I vbe khiẹn e brẹd, e newspaper kevbe chew gum. Erriọ I vbe ya gha zozo gualọ evbare khian, vbe otiku ọghe emwa ni fe.

 Vbe I ghi rre ukpo igbe, okpia ọkpa na wẹẹ ne I do gha gu irẹn winna vbe otiku. Ẹre I na kue yọ, ọni ẹre ọ ghi ya mwẹ kpa hin owa rre, I na vbe dobọ esuku yi. Igho nọ ghaa ha mwẹ re vbe ẹdẹ ma sẹ dollar ọkpa (183 Naira), evbare ne ima rhọ re vbe otiku ẹre ọ vbe gha rhie mẹ. Okhogbo ne I ghaa vbiẹ, kegha re ne I ya emwi ne I viọ re vbe otiku bọ. Emwa ne ima gba gha winna vbe otiku kegha re emwa ni gbe alama oghẹ, ẹmwẹ dan ẹre ọ vbe gha ke iran unu ladian. Ọdayọn ẹre nibun wa gha khin, erriọ iran vbe ya gha loo ikpẹ ukhunmwu ni wegbe. Ọna ọre ẹghẹ ne agbọn ghi ya lọghọ mwẹ sẹ, eve eve I ghaa viẹ vbe asọn, ohan ohan ẹre ọ vbe gha mu mwẹ. Rhunmwuda ne I na gha re ovbi ogue sẹlẹkẹ, I ma vbe rẹn ebe, ekhue egbe mwẹ na gha mu mwẹ. Ukpo eha gbalaka ẹre I ya vbe otiku. Iyeke ọni, I na gha rhie ehe ọvbehe vbe Mexico. Evba nii ẹre I na suẹn gha winna vbe ugbo. Obobo kevbe ikpẹ oru ẹre I ghaa kọlọ, I vbe gha fian ukhuerhe, I na vbe gha vulo iyan ebo.

 Ukpo enẹ ghi gberra nẹ, I na werriegbe gha rrie Ciudad Obregón. I ghi sẹ evba, ọtẹn iye mwẹ nokhuo ọkpa, nọ ghaa zẹ ọbo edunna, na rhie ughugha ọkpa mẹ dia. Asọn asọn ẹre I ya gha minna iminna dan, orhiọn mwẹ ma ghi sotọ, iro keghi han mwẹ sẹrriọ wẹẹ, I na gha hoo ne I rhie uko rhọ. Ọ ghi rre asọn ọkpa, I na na erhunmwu gie Osanobua: “Nọyaẹnmwa, deghẹ u gele rrọọ, I hoo ne I rẹn ruẹ, I hoo ne I ya arrọọ mwẹ ga ruẹ vbe etẹbitẹ, adeghẹ ugamwẹ ẹmwata rrọọ, lahọ gie ẹre ma mwẹ.”

 I wa hoẹmwẹ Osanobua. I wa yo esọsi nibun vbe I rre ọvbokhan, sokpan te odẹ ne iran ya gha ru emwi wa gha sọnnọ mwẹ. Iran rhọkpa ma sẹtin ru iyobọ mẹ ya sikẹ Osanobua, rhunmwuda iran ma gha tie Baibol. Ẹmwẹ igho ẹre eso mu yan uhunmwu, vbene eso na gha ghẹ ne ekhẹn ghee.

 Vbe I ghi rre ukpo 19, orhuan mwẹ na tama mwẹ wẹẹ, Avbe Osẹe Jehova maa irẹn re, emwi ne Baibol khare vbekpa amazẹ ne emwa loo vbe ugamwẹ. E Baibol wẹẹ, ọ ma khẹke ne ima gha mwẹ amazẹ ne ima gbe uhunmwu kotọ na. Ẹre ọ na tie ebe Ẹksodọs 20:​4, 5 ma mwẹ. Uviẹn 5 vbọ khare wẹẹ: ‘Wa ghẹ ya uhunmwu rhanmwẹ otọ ne ukhurhẹ ra ne uwa gae, rhunmwuda mẹ ọrọre Nọyaẹnmwa Osanobua uwa.’ Orhuan mwẹ na ghi nọ mwẹ wẹẹ, “Deghẹ amazẹ ẹre Osanobua ya gele ru emwi ọyunnuan ra deghẹ ọ hoo ne ima gha ya loo ẹre vbe ugamwẹ, vbọ ghi zẹe ne ọna wẹẹ ne ima ghẹ ya uhunmwu rhanmwẹ otọ nẹẹn?” I na wa gha mu inọta nii roro. Erriọ ghi ya suẹn gha ya e Baibol maa mwẹ emwi. I wa gele sọyẹnmwẹ emwi ne I ghaa ruẹ. Ọ na ye vbe ne ẹghẹ wa lẹ khian. Mẹ ma ghi kue rẹn ighẹ ẹghẹ khian buan nẹ.

 Ọ ghi sẹ ẹghẹ, ọ na ghi rhie mwẹ gha rhie iko ọghe Avbe Osẹe Jehova. Emwi ne I miẹn kevbe emwi ne I họn vba, wa mu mwẹ ekhọe. Igbama vbe gha rre usun emwa ni ya ọta guan! Te ọta ne iran ya guan wa rriẹ. Vbuwe ekhọe mwẹ, I na kha wẹẹ, ‘Ẹi re emwi kherhe Avbe Osẹe Jehova ruẹ!’ I ma mu egbe ẹse vbe ẹdẹrriọ, eto mwẹ wa kakabọ sọn, ọ na vbe ye zagha zagha, ọrheyerriọ, Avbe Osẹe Jehova na ye soyaya mu mwẹ. Ma ghi vbe zobọ nẹ, ẹgbẹe ọkpa na wẹẹ ne I gha die owa iran, ne I do deba iran rri evbare!

 Emwi ne Avbe Osẹe Jehova maa mwẹ re, ẹre ọ ya mwẹ rẹn wẹẹ, e Jehova ọre Erha nọ hoẹmwẹ emwa hia, erriọ vbe ya gbaroghe ima, ọ gha khonrẹn ne ima gha re ovbiogue, ọdafẹn, nọ rẹn ebe, nọ rre ukpo nọ yo, ebo ra emwa ne khui. Ẹi gbe ewanmwẹ ghee obọ ọkpa. (Iwinna 10:​34, 35) Eban ẹre I miẹn odẹ ọghe ẹmwata. Eban ẹre arrọọ mwẹ ghi mwẹ evbọ demu.

 Emwi hia na ghi suẹn gha gbe ye uviẹn vbe arrọọ mwẹ! I na do ban e siga na si, I ma ghi vbe gha da ayọn gbe egbe, I ma ghi gha ta ẹmwẹ ekpọ. Ekhọe orriara ẹre I wa gha mwẹ ke otọ gha dee, sokpan ẹi ghi yerriọ nia. Ii ghi vbe minna iminna dan. Te I wa vbe gha ghee egbe mwẹ zẹvbe ọmwa nẹi mwẹ esa nọ ye, rhunmwuda oya ọghe ọhanabe ne I re vbe I waan dee, sokpan vbọ ghi sẹ ẹghẹ, I ma ghi gha ghee egbe mwẹ vberriọ.

 Afiangbe ọvbehe ne I miẹn vbe obọ e Jehova, ọre okhuo esi ne I rhie re, te ọ wa deziẹn vbe odẹ ọghe orhiọn. Ọgbaroghe ọghe otako ẹre I ghi khin nia, ọni ọre wẹẹ, iko ughughan ọghe Avbe Osẹe Jehova ẹre I mu otuẹ yo, I gha rhie igiọdu ne iran, I ghi vbe ya e Baibol maa iran emwi. I kpọnmwẹ e Jehova rhunmwuda afiwerriẹ nọ rhie egbe ma vbe arrọọ mwẹ. E Baibol gele mwẹ ẹtin nọ ya fi ọmwa werriẹ. Nia I i ghi ghee egbe mwẹ zẹvbe ọmwa nẹi mwẹ esa nọ ye.