San Juan Chancalaito ẹre a na biẹ mwẹ, vbe ovbi ẹvbo na tie ẹre Chiapas vbe Mexico. Ivbi ẹvbo na tie ẹre Chol, ni ke uniẹn ọghe Maya rre ẹre ima khin. Emọ 12 ẹre evbibiẹ mwẹ biẹlẹ, mẹ ẹre ọre nogie isẹn vbe uwu iran. Vbe I rre ọvbokhan, Avbe Osẹe Jehova ghaa gu imẹ vbe etẹn mwẹ ruẹ e Baibol. Sokpan emwi da ọmwa nọ wẹẹ, I ma rhie emwi ne I ghaa ruẹ ye uyinmwẹ.

 Vbe I ghi rre ukpo 13, I na ghi suẹn gha loo ikpẹ ukhunmwu ni wegbe, I na vbe gha rra ba ẹre. Ẹghẹ na ẹre I vbe ya kpa hin owa rre, I na ghi gha kpodẹ kporagha khian. Vbe I rre ukpo 16, I na ghi suẹn gha winna vbe ugbo e morroco. Odẹ ukpo ọkpa ẹre I ya winna vbe vba. Sokpan ọ ghi rre asọn ọkpa vbe ima khian ya ya okọ khian e morroco, otu ọvbehe nọ gu ima suan, nọ vbe do egbe ẹki ne ima do, na wa vẹẹ rre, iran na suẹn gha filo osisi. Ne obọ ghẹ mieke na vba mwẹ, I na ghi san fi ẹzẹ, ọbọ nọkpa ẹre I ghi na ya ladian. Evba nii ẹre I na ghi lẹ gha rrie United States.

 I ghi sẹ United States, ikpẹ ukhunmwu ni wegbe ẹre I ye gha khiẹn, erriọ I vbe ya gha de fi ẹti. Vbe I ghi rre ukpo 19, a na ghi mu mwẹ khui rhunmwuda I do ọmwi viọ, I khian te vbe gbe ọmwa nii rua. I ghi rre eghan, I na deba otu ọkpa ni wa gha mwẹ obọ vbe emwi dan na ru. Ọna ẹre ọ ghi ya arriọba mu mwẹ gha rrie eghan ọvbehe na wa kakabọ gbogba ga, nọ rre Lewisburg vbe Pennsylvania.

 I ghi vbe sẹ evba, uyinmwẹ mwẹ na werriegbe rhia sayọ. Rhunmwuda a vinnọ ama ọghe otu ne I ye yọ mwẹ egbe, emwa ni rre otu nii ghi miẹn mwẹ, iran na wa yi mwẹ ro zẹvbe ọkpa vbe uwu iran, ẹre iran na ghi rhie mwẹ ba egbe. Vbene ẹghẹ ya khian, aro mwẹ na ghi gha kpannọ ugiọnmwẹ erhẹn, igbinna igbinna ẹre I ghi gha gbinna. Ọ mwẹ asẹ ọkpa ne otu dan ni ghaa ye ya gu otu ọvbehe gbinna. Igbinna nii yọn sẹrriọ wẹẹ, ukpokpo kevbe ematọn ẹre ima ghaa loo. Ugbẹnvbe a miẹn wẹẹ, avbe eseghan ma sẹtin mu ima igbinna, iran na suẹn gha filo tear gas. Iyeke ọni, arriọba na ghi ya fi mwẹ fi uwu eghan igbedia ọkpa. Evba ẹre a viọ avbe oleghan ne ekhọe iran mu rri yi. Ọmwa ne ohu dan rherhe mu kevbe nọ ta ẹmwẹ ekpọ ẹre I wa gha khin. Te ugbemwẹ na gbe emwa re wa gha yẹẹ, ẹi vbe gbe mwẹ egbe.

 Uwu eghan ẹre a mobọ gha khui mwẹ yi, rhunmwuda ọni I na ghi suẹn gha tie Baibol. Ẹdẹ ọkpa, eseghan ọkpa na rhie ebe ọkpa mẹ, uhunmwuta ebe na ọre You Can Live Forever in Paradise on Earth. * Zẹvbe ne I ya gha tie ẹre, I na ghi ya ye emwi nibun ni ruẹ re rre vbe obọ Avbe Osẹe Jehova, vbe I rre ọvbokhan. Vbe iyeke ọni, I na ghi suẹn gha muẹn roro, emwi dan nibun ne ohu he ya mwẹ ru. I na ya ye ẹgbẹe mwẹ rre. Ugbenvbe a miẹn wẹẹ, Osẹe Jehova ẹre etẹn mwẹ nikhuo ghi khin, I na ghi gha roro ẹre wẹẹ, ‘te iran khian gha rrọọ vbe etẹbitẹ.’ Ẹre I na nọ egbe mwẹ ruẹ, ‘Vbọzẹe ne I ma na khian Osẹe Jehova?’ Evba nii ẹre I na ghi tae wẹẹ, I gha wa fi werriẹ.

 Vbọrhirhighayehẹ, I rẹnrẹn wẹẹ, vbẹ re te ọmwa ru iyobọ mẹ, I i khian sẹtin tobọ mwẹ fi werriẹ. I keghi na erhunmwu gie Jehova nọ ru iyobọ mẹ, ọna ọre emwi okaro ne I wa ru. Iyeke ọni, I na ghi gbẹn ebe gie Abotu ọghe Avbe Osẹe Jehova nọ rre United States wẹẹ, I hoo ne ọmwa do gha gu mwẹ ruẹ e Baibol. Ẹre abotu na ghi ru emwamwa ne iko nọ sikẹ eghan ni ghaa ye, gie ọtẹn ọkpa gha dee, nọ do gha ya e Baibol maa mwẹ emwi. Vbe ẹghẹ na kha na, ai gie ọmwa rhọkpa nẹi ọkpa vbe ẹgbẹe mwẹ do gha tuọ mwẹ. Rhunmwuda ọni, e lẹta nọ rhie ẹrhiọn ye ọmwa iwu, ẹre ọtẹn na gie rre na, ghi gbẹn gu mwẹ, ọ ghi vbe viọ ebe eso ba re ne I khian gha tie. Ọna ẹre ọ ghi gua mwẹ kpa ya fi uyinmwẹ mwẹ werriẹ.

 Afiwerriẹ ọvbehe ne I ru, ọre ne I na kpa hin otu dan ni ghaa ye rre. Ọkaolotu ọghe otu ni vbe rre eghan igbedia, I na ghi bu ẹre gha khian ya tama rẹn wẹẹ, I hoo ne I gha re ọkpa vbe Osẹe Jehova. Ẹmwẹ nọ tama mwẹ wa kpa mwẹ odin, ọ wẹẹ: “Adeghẹ u hoo ne u deba iran, ọ maan. I i sẹtin mu idobo ye emwi ke emwi nọ ghi kaẹn Osanobua nẹ. Sokpan deghẹ u ma ghi hoo ne u deba ima kẹkan, ẹre ọ ya ruẹ ta ẹmwẹ na, u rẹn emwi ne ima gha ru ruẹ re.”

 Vbe ukpo eva nọ ghi lelẹe, avbe eseghan na do gha bẹghe ẹre wẹẹ, I fi uyinmwẹ werriẹ nẹ. Rhunmwuda ọni, iran na ghi fan obọ mẹ, ne I gha ru emwi eso ne iran i te kue ne I gha ru. Vbe Igiemwi, iran i ghi gbe ọgiorọ yọ mwẹ obọ, vbe I ra khian ya khuẹ. Ọkpa vbe uwu eseghan nii ghi bẹghe vbene I ya fi werriẹ hẹ, ọ na ghi bu mwẹ gha dee do tama mwẹ wẹẹ, ni gha yae khianmwu, ne I ghẹ gie egbe wọọ mwẹ. Emwa ni gbaroghe eghan nii ghi bẹghe ẹre wẹẹ, I fi uyinmwẹ werriẹ nẹ, iran na ghi mu mwẹ hin eghan nọ wegbe nii rre, gha rrie eghan ọvbehe ne ọmwa gha na sẹtin zẹ obọ ze owẹ. Vbe iyeke I ghi gbe ukpo igbe nẹ vbe eghan, iran na ghi fan mwẹ vbe ukpo 2004. Imọto na ya viọ avbe oleghan, ẹre iran ya mu mwẹ werriegbe gha die Mexico.

 Vbe I wa sẹ Mexico, I na ya gualọ Ọgua Arriọba ọghe Avbe Osẹe Jehova. Iko nokaro ne I yo, ukpọn eghan ẹre I yọ gha khian, rhunmwuda, ọni ọre ukpọn agbọn ọkpa ne I ghaa mwẹ. Agharhemiẹn wẹẹ ọ mwẹ vbene I ghaa ye hẹ, te Avbe Osẹe Jehova wa ye soyaya mu mwẹ. I ghi bẹghe obọ esi ne iran ya mu mwẹ, ẹre I na ghi rẹn wẹẹ, uwu ẹbu Ivbiotu e Kristi ata ẹre I wa ye na. (Jọn 13:35) Ẹdẹrriọ ẹre ediọn ru emwamwa na do gha ya e Baibol maa mwẹ emwi. Ọ ghi rre September 3, 2005, I na ghi dinmwiamẹ zẹvbe ọkpa vbe Osẹe Jehova.

 Ọ ghi rre January 2007, I na ghi suẹn gha ga zẹvbe arọndẹ ọghe ẹghẹ hia, ughaẹdẹ 70 ẹre I ya gha ya e Baibol maa emwa emwi vbe uki uki. Ukpo 2011 ẹre I ghi ladian vbe owebe Bible School for Single Brothers (na ghi rẹn ye School for Kingdom Evangelizers). Owebe na, wa kakabọ ru iyobọ mẹ ya sẹtin gha ru iwinna na mu mẹ vbe iko.

 Ọ ghi rre 2013, I na rhie ọvbokhan mwẹ ne uwa ighẹ Pilar. Vbe I tama ọvbokhan mwẹ vbene I ka gha ye hẹ, ọ na kha wẹẹ, irẹn ma yayi ighẹ I ka gha mwẹ egbe uyinmwẹ vberriọ. Vbene a guan na, I i ghi mwẹ obọ vbe avbe uyinmwẹ dan vberriọ. Mẹ vbe ọvbokhan mwẹ wa yayi wẹẹ, e Baibol ẹre ọ ya mwẹ khian aro ọmwa ne I ghi khin nian, nọ rhie ma wẹẹ, e Baibol gele mwẹ ẹtin nọ ya fi ọmwa werriẹ.​—Rom 12:2.

 Ẹmwẹ ne Jesu ta vbe ebe Luk 19:10 wa kaẹn mwẹ. Ọ khare wẹẹ: “Iran ni wiri ọre Ovbi Ọmwa do gualọ, nọ miẹn ehe na miẹn iran fan.” Eban I ghi loo arrọọ mwẹ vbe odẹ nọ ghi maan sẹ. I i ghi rhie ikuanegbe ne ọmwa rhọkpa. I kpọnmwẹ e Jehova nọ na ya e Baibol fi mwẹ werriẹ, te I ghi sẹtin ru iyobọ ne emwa ọvbehe, I vbe gu emwa rrọọ vbe ọfumwegbe, nọ ghi wa sẹ ehia, ọsie Jehova ẹre I ghi khin nian.