Ẹn o, iran i re egbe emwa vberriọ. Avbe Osẹe Jehova keghi re Ivbiotu e Kristi na miẹn wẹẹ, iyayi ọghe iran keghi hẹnhẹn egbe yan Evbagbẹn Nọhuanrẹn. Agharhemiẹn wẹẹ, ugamwẹ eso keghi yae ma emwa emwi wẹẹ, Evbagbẹn Nọhuanrẹn tae yotọ ighe Ivbie Ju gha khian na yẹrẹro vbe Palestine, Avbe Osẹe Jehova i mwẹ egbe iyayi vberrio. Iran ma yayi wẹẹ, Ebe Nọhuanrẹn wa tae yotọ taara ighẹ Ivbie Ju gha mu arriọba ọghe iran gbọọ vbe Palestine. Vbene ẹmwata, ẹi mwẹ arriọba emwa nagbọn ọkpa, Ivbie ẹvbo ọkpa ra agbẹnvbo ọkpa ne Ebe Nọhuanrẹn khare wẹẹ, ẹre ọ hiunsi sẹ. Ne Watchtower, nọre ebe iyẹn ọghe Avbe Osẹe Jehova, wa tae vbe odẹ nọ dewuarorua wẹẹ: ‘Evbagbẹn Nọhuanrẹn ma yẹrike ighẹ Otu Arriọba Oseghe Ẹvbo Ọghe Ivbie Ju.’

 Ne Encyclopædia Britannica keghi rhan otọre wẹẹ, Otu Oseghe Ẹvbo Ọghe Arriọba Ivibe Ju, keghi re ‘Otu akugbe ọghe ivbie Ju, nọ hoo nọ muẹn gbọọ arriọba otọẹvbo ọghe Ivbie Ju vbe Palestine.’ Ẹmwẹ ugamwẹ kevbe a hoo na gha loo ẹtin ọghe arriọba, ẹre ọ siẹre ne otu na, na zọ ladian. Otu ọghe Ivbie Ju na kevbe uyinmwẹ niran yin, i zẹdẹ rre imamwaemwi ọghe Avbe Osẹe Jehova, a mai wẹẹ, iran vbe yae kporhu, kevbe wẹẹ, idiaghe ẹre iran wa ye fẹfẹfẹ vbe nọ dekaan Otu Oseghe Ẹvbo Ọghe Arriọba Ivbie Ju.

 Otu ọghe Avbe Osẹe Jehova keghi re ọghe ugamwẹ vbe odẹ hia fẹrẹ, kevbe wẹẹ, ẹi vbe yẹrike arriọba emwa nagbọn rhọkpa, nọ ya se egbe Otu Oseghe Ẹvbo Ọghe Arriọba Ivbie Ju. Aro emwa ne avbe Osẹe Jehova khin zẹvbe emwa ni rre idiaghe vbe nọ dekaan ẹmwẹ arriọba ọghe emwa nagbọn, keghi re na wa gbẹn ye ebe ẹsẹṣẹmwẹse, kevbe wẹẹ, vbe otọẹvbo eso, Avbe Osẹe Jehova wa ye egbe miẹn ukpokpo nọ wegbe ne iran gha ya muẹn fua, idiaghe ọghe iran nii. Ma mwẹ ilẹkẹtin wẹẹ, Arriọba ọghe Osanobua nọ rre ẹrinmwi ọkpa ẹre ọ khian sẹtin rhie ọfunmwegbe ọghe ẹdẹdẹmwẹdẹ gha die agbọn na; arriọba ọghe emwa nagbọn ra otu akugbe ọghe emwa nagbọn ọkpa i rrọọ nọ khian sẹtin ru ọna.

 Ọkpa vbe usun ilele ne kpataki ne Avbe Osẹe Jehova wa dayi kankankan vbe ehe ke ehe ne iran rhirhi gha ye ọre, na gha lele uhi ọghe arriọba. Iran i sọtẹ daa arriọba nọ rre ọdakha, ra ne iran gha mwẹ obọ vbe igbinna ọghe osisi kevbe ugbenọwẹwẹ.