E Baibol ẹre emwi hia ne ima yayi hẹnhẹn egbe yan, rhunmwuda ọni, zẹvbe ne ima ya rẹn otọ e Baibol sayọ, erriọ ima vbe ya fi emwi eso ne ima te ka yayi werriẹ. a

 Avbe afiwerriẹ na wa guaẹro, emwi nọ rre ebe Itan 4:​18, ako nii wẹẹ: “Odẹ ne ọmwa esi la khian, te ọ yevbe ovẹn nọ da yan rre, uwanmwẹ ọnrẹn ghi gha mu otọ yọ, rhinrin ya sẹ ẹghẹ ogiavan.” Zẹvbe ne uwanmwẹ ovẹn nọ da yan rre ya fẹko mu otọ yọ, ọ te sẹ ẹghẹ avan, erriọ Osanobua vbe ya fẹko ru iyobọ ne emwa ya rẹn ẹmwata ni rre Ẹmwẹ ọghẹe, vbe ẹghẹ nọ khẹke vbe aro ọre. (1 Pita 1:​10-12) E Baibol tae yotọ wẹẹ, vbe “ẹghẹ ufomwẹ” e Jehova tobọre gha ru iyobọ ne emwa ya gha mwẹ irẹnmwi ẹmwata. ​—Daniẹl 12:4.

 Ọ ma khẹke ne avbe afiwerriẹ na gha kpa ima odin, ra ne iran gha kpokpo ima vbe orhiọn. Eguọmwadia Osanobua eso ni ghaa rrọọ vbe ẹghẹ nẹdẹ vbe gha mwẹ irẹnmwi eso ni ma gba, ẹghẹ ne iran vbe ya ya aro yọ wẹẹ, emwi eso gha sunu ma vbe gba, rhunmwuda ọni, iran keghi ru afiwerriẹ nọ khẹke.

•   E Mozis keghi rhiegbe ẹre ladian zẹvbe ọmwa nọ khian miẹn Izrẹl fan, na kha na, ọ ye kẹ ukpo 40, ọ te sẹ ẹghẹ ne Jehova mwamwa yọ.​—Iwinna 7:​23-25, 30, 35.

•   Avbe ukọ ma rẹn otọ ẹmwẹ akhasẹ nọ guan kaẹn uwu kevbe arhiọkpaegbe ọghe Mezaia.​—Aizaia 53:​8-12; Matiu 16:​21-23.

•   Ivbi Otu e Kristi eso vbe gha mwẹ iyayi nọ ma gba, vbekpa ẹghẹ ne “ẹdẹ ọghe Jehova” khian ya rre.​—2 Tẹsalonaika 2:​1, 2.

 Ọ ghi sẹ ẹghẹ, Osanobua keghi ru iyobọ ne iran ya gha mwẹ irẹnmwi nọ gbae, erhunmwu ne ima na ọre nọ ye gha ru iyobọ vbenian ne ima.​—Jems 1:5.