Avbe Osẹe Jehova keghi mwẹ emwamwa na ya gu emwa ruẹ Baibol. Lekpae iruẹmwi na, a keghi rhie ewanniẹ ye usun inọta nọ khare wẹẹ:

• De Ọmwa Ne Osanobua khin?

• Osanobua gele gbaroghe mwẹ ra?

• De emwi ni gha ru ne alaghodaro gha rre orọnmwẹ ọghomwẹ?

• De vbene I khian ya gha mwẹ oghọghọ vbe arrọọ ọghomwẹ hẹ?

Vbe ototọ mwa, u gha miẹ ewanniẹ ọghe avbe inọta ne emwa mobọ nọ vbekpae emwamwa iruẹmwi e Baibol ọghomwa.

De vbene a ya ru emwamwa ọghe ne iruẹmwi hẹ? Ma keghi rhiẹre ladian uhunta vbene a ghee “Osanobua” ra “orọnmwẹ,” kevbe ma ghi do zanzan avbe uviẹn ọghe Baibol ni dekaan nenẹ uhunta. Ma gha ghi ghee dọmwadẹ uviẹn ọghe avbe evbagbẹn nọhuanrẹn na nẹ, ma ghi do bẹghe ẹre emwi ne Baibol suigiẹ yi vbekpae nenẹ uhunta. Vbe odẹ vbe nia, ma keghi gie Baibol rhan otọ egbe ẹre.

Ebe ne ima loo nọ ru iyobọ ne ima ya ruẹ e Baibol ọre, What Does the Bible Really Teach? Usun emwi ne ebe na wa rhan otọre vbe odẹ nọ dewuarorua, ọre emwi ne Biabol tae vbekpae Osanobua, Jesu, kevbe vbene arrọọ ọghomwa khian gha ye hẹ vbe odaro.

Inu igho ẹre a hae ye ne iruẹmwi e Biabol? Ọghọhẹ ẹre ne iruẹmwi khin, kevbe wẹẹ, ai vbe miẹn ọmwa igho ye avbe ebe na loo ya ruẹmwi.

Vbọ kpẹẹ sẹ hẹ ighẹ ne ẹghẹ na ya ruẹ emwi? Emwa nibun keghi zẹ odẹ ukẹdẹ ọkpa kọ vbe uzọla uzọla ne iran ya gu ima ruẹ e Biabol. Sokpan ẹi wa mwẹ ẹghẹ ọkpa na mwamwa yọ wẹẹ, ẹre a khian gha loo vbe ẹghẹ ke ẹghẹ ne ima do ya guẹ ruẹ emwi. Ma keghi loo ẹghẹ nọ gu emwamwa ọghuẹ ro.

De emwi ne uwa khian ghi ru deghẹ I na nọ na do gu mwẹ ruẹ e Baibol? Adeghẹ u na nọ na do guẹ ruẹ e Baibol, ọkpa vbe Avbe Osẹe Jehova ghi mu otuẹ guẹ vbe ehe kevbe ẹghẹ nọ gha yẹẹ ruẹ. Irẹn ghi loo ifuanro eso ya giẹre ma ruẹ, emwamwa iruẹmwi ọghomwa. Adeghẹ ọ na yẹẹ ruẹ, u sẹtin gha lele emwmwa na khian.

Adeghẹ I na kue yọ na do gu mwẹ gha ruẹ e Biabol, esalẹbẹ ghi nọ ne I do gha re ọkpa vbe Osẹe Jehova ra? Ẹn o. Ọ keghi yẹẹ Avbe Osẹẹ Jehova ne iran gha ye Baibol ma emwa emwi, sokpan ma i muẹn kpan ye ọmwa rhọkpa egbe nọ do deba ugamwẹ ọghomwa. Nọghayayerriọ, ma keghi ye odẹ ọghe ọghọ muẹn ma emwa emwi ne Biabol khare, vbene ima na rẹn wẹẹ, edọmwadọghẹ mwẹ asẹ nọ ya zẹ ne egbe ẹre emwi nọ gha yayi.—1 Pita 3:15.