Adia Na Khian Lele Vbe Iko Uyinmwẹ Kevbe Iwinna Ọghe Ima Ne Ivbi Otu E Kristi
Adia Na Khian Lele Vbe Iko Uyinmwẹ Kevbe Iwinna Ọghe Ima Ne Ivbi Otu E Kristi
Dọmwadẹ Uhunmwuta Ni Rre Uwu Ẹre
1. Avbe adia ni rre mwa gha ru iyobọ ne emwa hia ni mwẹ abọ vbe Iko Uyinmwẹ Kevbe Iwinna Ọghe Ima. Te ọ khẹke ne iran tie avbe adia na gbẹnnẹ ye ototọ mwa ni ginna abọ ne iran mwẹ kevbe avbe adia ni rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Ọ khẹke na rhie igiọdu ne etẹn hia ni ya iyẹn wewe, ne iran gha mwẹ obọ vbe abọ ọghe owebe. Emwa ọvbehe ni yo iko vbe ẹghẹ hia, sẹtin gha mwẹ obọ vbọ, deghẹ iran miẹn avbe imamwaemwi ni rre Baibol yi, kevbe deghẹ iran vbe loo ẹdagbọn iran zẹvbe nọ gua ilele ọghe Ivbi Otu e Kristi ro. Ọmwa nọ ma he suẹn gha ya iyẹn wewe gha kha wẹẹ, irẹn hoo ne irẹn gha mwẹ obọ vbe abọ ọghe owebe, ọ khẹke ne ọgbaroghe ọghe Iko Uyinmwẹ Kevbe Iwinna Ọghe Ima kevbe ọmwa nii gba guan vbekpa emwi nọ khẹke nọ ru, ọ ke sẹtin gha mwẹ obọ vbe owebe na; iyeke ọni, ọ ghi gi ẹre rẹn deghẹ ọ gbegba. Sirra ọtẹn nọ gu ọmwa nii ruẹ e Baibol (ra sirra erhae ra iyẹe nọ re Osẹe Jehova), ẹre a khian na ru ena hia. Emwi na gualọ vbe obọ ọmwa nọ ma he dinmwiamẹ nọ hoo nọ suẹn gha ya iyẹn wewe, ẹre a vbe gualọ vbe obọ ọmwa nọ hoo nọ gha mwẹ obọ vbe owebe na.—od-E uhunmwuta 8 okhuẹn 8.
ẸMWẸ ỌGHE OMUSO
2. Ifuanro ọkpa. Vbe uzọla uzọla, a gha ghi so ihuan na khian ya suẹn nẹ, a na vbe na erhunmwu nẹ, olaga ọghe Iko Uyinmwẹ Kevbe Iwinna Ọghe Ima, ghi ta ẹmwẹ nọ gha ya etẹn kpẹho khẹ emwi ne iran khian ruẹ vbe iko vbe ẹdẹrriọ. Ọ khẹke ne olaga nianian avbe olika ẹmwẹ nọ rẹnrẹn wẹẹ, ọ gha kakabọ ru iyobọ ne etẹn ni rre uwu iko.
EMWI EWE NI RRE UWU ẸMWẸ ỌGHE OSANOBUA
3. Ọta Ọghe Ọwara: Ifuanro igbe. Uhunmwuta na khian guan yan kevbe uhunmwu ẹmwẹ eva ra eha keghi rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Ọkpa vbe ediọn ra ọguọmwadia iwinna nọ gbegba ẹre a khian rhie ọta na na. Adeghẹ ebe ọghe ọgbọn vbe uwu e Baibol ẹre a khian suẹn gha tie vbe uzọla nii, a ghi kpee vidio ya mu ebe ọghe Baibol nii so. Ọmwa nọ ya ọta nii guan sẹtin ya unu kaẹn vbene vidio nii ya dekaẹn uhunmwuta nii hẹ. Vbọrhirhighayehẹ, ọ khẹke nọ guan yan avbe uhunmwu ẹmwẹ na ya unu kaẹn vbe ebe iwinna. Deba ọni, deghẹ ẹghẹ na gha rrọọ, ọ ghi rhan otọ avbe efoto ni rre ebe iwinna; emwi ne avbe efoto nii gu rre evba, ọre ne iran ru iyobọ ne emwa ya rẹn otọ ọta nii sayọ. Ọ sẹtin ya unu kaẹn emwi nọ miẹn vbe ebe ima ọvbehe na ma sunu yi vbe ebe iwinna, sokpan ọkpa nọ, ọ ghi gua uhunmwu ẹmwẹ nọ rre ọta nii ro.
4. Emwi Ewe Ọghe Orhiọn: Ifuanro igbe. Ọna keghi re abọ ọghe inọta vbe ewanniẹn; ọmwa nọ khian ru abọ na i khian ta ẹmwẹ rhọkpa ya muẹn so, ẹ i khian vbe ta ẹmwẹ rhọkpa ya muẹn sẹ ufomwẹ. Ọkpa vbe ediọn ra ọguọmwadia iwinna nọ gbegba ẹre ọ khian gha ru abọ na. Te ọ khẹke ne ọtẹn nọ yan abọ na, nọ ọta eva ni rrọọ. Deba ọni, ọtẹn nọ yan abọ na ẹre ọ khian tae deghẹ a gha tie avbe ako ọghe Baibol na sunu yi, ra a i khian tie ẹre. A gha tie ọmwa nọ zẹ ewanniẹn, ọ ma khẹke ne ewanniẹn ọnrẹn gberra ibuanro 30.
5. E Baibol Na Tie: Ifuanro enẹ. Ọtẹn nokpia ẹre ọ khian gha ru abọ ọghe owebe na. Te ọ khẹke ne ọtẹn na tie abọ na rhie nẹẹn, vbe nẹi khian na ta ẹmwẹ rhọkpa ya muẹn so, ẹ i khian vbe ta ẹmwẹ rhọkpa ya muẹn sẹ ufomwẹ. Te ọ khẹke ne olaga ọghe iko, hia nọ ru iyobọ ne ọtẹn na, nọ sẹtin gha tie ebe vbe odẹ nọ gbae, vbe odẹ nọ gia rẹn otọ re, vbe odẹ nọ rriẹ, kevbe nọ vbe sẹtin rẹn ẹmwẹ nọ khẹke na tua unu mu, ehe nọ khẹke na na fi urhu werriẹ, ehe nọ khẹke na na gbamẹ sawọn, kevbe nọ sẹtin tie ẹre vbe odẹ nọ ya guan vbe otọ kẹkan. Ako ọghe Baibol na tie keghi tan sẹ egbe. Rhunmwuda ọni, a te miẹn wẹẹ ọgbaroghe ọghe Iko Uyinmwẹ Kevbe Iwinna Ọghe Ima rhie abọ na ne etẹn, ọ khẹke nọ ka muẹn roro deghẹ ọtẹn nọ khian rhie abọ na na gha sẹtin tie ako nii.
RHIEGBE YE IWINNA IKPORHU IYẸN NỌ MAAN
6. Ifuanro ekesugie. Emwi na gu mwamwa abọ na ọre nọ kie ẹkpotọ ne emwa hia ya sẹtin mu egbe yotọ khẹ iwinna ikporhu, ne iran sẹtin gha mwẹ alaghodaro vbe odẹ ne iran ya gu emwa zẹ iro, odẹ ne iran ya kporhu kevbe odẹ ne iran ya ma emwa emwi. A sẹtin vbe rhie abọ ọghe owebe ne ediọn, deghẹ esa na gha rrọọ. Te ọ khẹke ne dọmwadẹ etẹn na rhie abọ na, winna yan iruẹmwi na we ne iran winna yan vbe ebe na tie ẹre Imamwaemwi ra Hoẹmwẹ Emwa; eke ne iran khian winna yan ẹre a sa ako lẹga vbe ọkpẹn ako ne abọ ọghe iran ye vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Ugbẹnso, a sẹtin mwamwa abọ eso zẹvbe ọta na koko zẹ iro yan. Ọ ghaa yerriọ, ọkpa vbe ediọn ra ọguọmwadia iwinna nọ gbegba ẹre a khian rhie abọ na na.—Ya ghee okhuẹn 15 ne u mieke na rẹn vbene a ya ru ọta na koko zẹ iro yan hẹ.
7. U Gha Khian Suẹn Gha Gu Emwa Guan: Ọtẹn nokpia ra ọtẹn nokhuo sẹtin ru abọ ọghe owebe na. Adeghẹ ọtẹn nokpia ẹre a rhie abọ na na, ọtẹn nokpia ẹre ọ khẹke nọ ru iyobọ nẹẹn, erriọ vbe ye, deghẹ ọtẹn nokhuo ẹre a rhie abọ na na, ọtẹn nokhuo ẹre ọ khẹke nọ ru iyobọ nẹẹn. Ọmwaikọmwa vbe uwu ẹgbẹe sẹtin vbe ru iyobọ nẹẹn. Ọtẹn nọ khian ru orhiema na kevbe nọ khian ru iyobọ nẹẹn sẹtin ru ẹre vbe itota ra vbe imudia.—Adeghẹ u hoo ne u rẹn sayọ vbekpa emwi na hoo ne u ru vbe abọ na kevbe vbene u khian ya ru ẹre hẹ, ya ghee okhuẹn 12 kevbe 13.
8. Rhie Obọ Lelẹe: Ọtẹn nokpia ra ọtẹn nokhuo sẹtin ru abọ ọghe owebe na. Adeghẹ ọtẹn nokpia ẹre a rhie abọ na na, ọtẹn nokpia ẹre ọ khẹke nọ ru iyobọ nẹẹn, erriọ vbe ye, deghẹ ọtẹn nokhuo ẹre a rhie abọ na na, ọtẹn nokhuo ẹre ọ khẹke nọ ru iyobọ nẹẹn. (km-E 5/97 ipapa 2) Ọtẹn nọ khian ru orhiema na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọtẹn na ghi ru orhiema ọghe emwi nọ gha sẹtin ta deghẹ ọ na dọlegbe miẹn ọmwa nọ ka kporhu ma.—Adeghẹ u hoo ne u rẹn sayọ vbekpa emwi na hoo ne u ru vbe abọ na kevbe vbene u khian ya ru ẹre hẹ, ya ghee okhuẹn 12 kevbe 13.
9. Ya Emwa Khian Erhuanegbe: Ọtẹn nokpia ra ọtẹn nokhuo sẹtin ru abọ ọghe owebe na. Adeghẹ ọtẹn nokpia ẹre a rhie abọ na na, ọtẹn nokpia ẹre ọ khẹke nọ ru iyobọ nẹẹn, erriọ vbe ye, deghẹ ọtẹn nokhuo ẹre a rhie abọ na na, ọtẹn nokhuo ẹre ọ khẹke nọ ru iyobọ nẹẹn. (km-E 5/97 ipapa 2) Ọtẹn nọ khian ru orhiema na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọ khẹke nọ gha re orhiema ọghe Baibol na gu ọmwa ruẹ nọ khian vbe obọ. Esa i rrọọ na gha ya ta ẹmwẹ na khian ya muẹn so, ra na khian ya muẹn sẹ ufomwẹ, sokpan a ma wẹẹ, ọni ọre ako na hoo ne ọtẹn na winna yan. Esa i rrọọ na ya tie okhuẹn hia na khian gu ọmwa ruẹ ladian, sokpan a i vbe wua deghẹ a na ru vberriọ.
10. Rhan Otọ Emwi Ne U Yayi: Adeghẹ abọ na, na gha re ọta ọghe ọwara, ọtẹn nokpia ẹre ọ khẹke nọ ru ẹre. Sokpan deghẹ ọ na gha re orhiema, ọtẹn nokpia ra ọtẹn nokhuo sẹtin ru ẹre. Adeghẹ ọtẹn nokpia ẹre a rhie abọ na na, ọtẹn nokpia ẹre ọ khẹke nọ ru iyobọ nẹẹn, erriọ vbe ye, deghẹ ọtẹn nokhuo ẹre a rhie abọ na na, ọtẹn nokhuo ẹre ọ khẹke nọ ru iyobọ nẹẹn. Ọmwaikọmwa vbe uwu ẹgbẹe sẹtin vbe ru iyobọ nẹẹn. Ọtẹn nọ yan abọ na gha khian rhie ewanniẹn ye inọta na we nọ guan yan, ọ ghi loo ako nọ khian na miẹn ewanniẹn ọnrẹn, na sunu yi vbe ebe iwinna; ọ ghi gi uhunmwu ẹmwẹ nọ rrọọ dewarorua, ọ ghi vbe mu ẹmwẹ ye owa ẹse. Ọ ghaa ru abọ na, ọ sẹtin sunu ye ako nọ na miẹn ewanniẹn ọnrẹn, deghẹ ọ na gha hoo nọ ru vberriọ.
11. Ọta Ọghe Ọwara: Ọtẹn nokpia ẹre ọ yan abọ na. Te ọ khian ru abọ na zẹvbe ọta ọghe ọwara. Adeghẹ apẹndis A ọghe ebe na tie ẹre Hoẹmwẹ Emwa ẹre a ke rhie ọta nii ladian, te ọ khẹke ne ọtẹn nọ yan abọ na, nianian vbene a khian ya sẹtin loo avbe ako ọghe Baibol na sunu yi vba vbe ikporhu. Vbe igiemwi, ọ sẹtin guan kaẹn ẹghẹ nọ khẹke na ya tie uviẹn eso vbe Baibol, evba ya emwi nọ rre uviẹn nii kha kevbe vbene a khian ya loo ẹre ya gu emwa zẹ iro. Adeghẹ ọkpa vbe uhunmwu ẹmwẹ ni rre avbe iruẹmwi ọghe ebe na tie ẹre Hoẹmwẹ Emwa ẹre a ke rhie ọta nii ladian, te ọ khẹke ne ọtẹn nọ yan abọ na, guan yan vbene a khian ya loo emwi na ruẹ re vbọ vbe iwinna ikporhu. Ọ sẹtin ya unu kaẹn igiemwi nọ ladian vbe uhunmwu ẹmwẹ nokaro ọghe iruẹmwi nii, ọ sẹtin vbe guan yan avbe ako ọghe Baibol na we na ya ghee vbe iruẹmwi nii, deghẹ esa na gha rrọọ.
12. Emwi Na Hoo Ne U Ru: Rhunmwuda abọ na tie ẹre “U Gha Khian Suẹn Gha Gu Emwa Guan” kevbe “Rhie Obọ Lelẹe” ẹre a gu gbẹn adia nọ rre okhuẹn na kevbe okhuẹn nọ lelẹe. Vbe ẹ i re te a rhie adia ọvbehe ne ọmwa nọ yan abọ na, emwi na hoo nọ ru ọre nọ gu ọmwa guan vbekpa imamwaemwi ọkpa nọ rre Baibol, nọ ma lọghọ gbe na rẹn otọ re, nọ gha vbe ru iyobọ ne ọmwa nọ gu guan; ọ ghi vbe gi ọmwa nii rẹn emwi eso ne irẹn vbe ọre gha sẹtin guan yan vbe ẹghẹ ọvbehe. Ọtẹn na ghi loo uhunmwuta nọ rẹnrẹn wẹẹ, emwa ni rre ẹdogbo ẹre a gha mu roro vbe ẹghẹ nii kevbe nọ gha mu iran ekhọe. Adeghẹ ọmwa nọ yan abọ na hoo, ọ sẹtin tama ọmwa nọ gu guan vbekpa ọkpa vbe usun e vidio ni rre Emadogua Na Ya Ma Emwa Emwi, ra ọ ghi rhie ọkpa vbe usun ebe ni rre evba nẹẹn. Ọtẹn na i khian ru orhiema na zẹvbe ọmwa nọ ta ekharha nọ rẹnrẹn ye uhunmwu. Nọghayayerriọ, ọ ghi hia nọ gha mwẹ alaghodaro vbe odẹ nọ ya gu emwa zẹ iro; vbe igiemwi, a sẹtin we nọ winna yan vbene a ya ta ẹmwẹ nọ gha yẹẹ emwa, ra vbene a ya gu emwa zẹ iro, vbe nẹi khian na ya uhukpa mu ẹmwẹ e Baibol rre.
13. Vbene U Khian Ya Ru Ẹre Hẹ: A gha we ne ọtẹn ru orhiema ọghe ikporhu ọghe ke owa ya sẹ owa, ọ ghi ru ẹre vbe odẹ nọ gha gua ẹdogbo ọghẹe ro; erriọ ẹre ọ khian vbe ru ẹre deghẹ ikporhu ọghe ẹghẹ ke ẹghẹ nọ ra ọghe adesẹ orere. Vbe igiemwi:
(1) Ke Owa Ya Sẹ Owa: Ọna ọre na bu emwa gha rrie owa, na kporhu ma iran ghee mwẹ ghee ruẹ, ra na loo efoni ra elẹta ya kporhu ma iran; ọ vbe dekaẹn na werriegbe gu ọmwa na ka kporhu ma, vbe ikporhu ọghe ke owa ya sẹ owa guan.
(2) Ikporhu Ọghe Ẹghẹ Ke Ẹghẹ: Ọna ọre na loo ẹkpotọ nọ rhirhi kie ya kporhu ma ọmwa na gu guan. A sẹtin miẹn wẹẹ, te u khian ya ẹmwẹ nọ rre Baibol kporhu ma ọmwa ne u miẹn vbe isiwinna, vbe ẹdogbo ne u ye, vbe uwu imọto ra ehe ọvbehe ne u rhirhi gha ye.
(3) Ikporhu Ọghe Adesẹ Orere: Ọna sẹtin gha re ikporhu na na loo uhanhan na waa ebe yi, ra na na bu emwa gha rrie isiwinna ra ehe ne iran na do ẹki, ọ vbe dekaẹn na kporhu ma emwa vbe idunmwu, ehe na na rọkhọ egbe, ra ehe ọvbehe ne ẹvbo wa bi la.
14. Vbene A Ya Loo Avbe Vidio Kevbe Ebe Ọghe Ima Hẹ: Ọmwa na rhie abọ na sẹtin ma ọmwa nọ kporhu ma, ọkpa vbe usun e vidio ra ebe ọghe ima. Adeghẹ e vidio na gha rre abọ ne ọtẹn khian ru, ra ọ na tobọre kha wẹẹ, irẹn gha loo e vidio, ọ sẹtin tama ọmwa nọ gu guan vbekpae nene vidio, sokpan, ẹ i khian kpee ẹre.
UYINMWẸ ỌGHE IMA NE IVBI OTU E KRISTI
15. A gha ghi so ihuan nẹ, a ghi ya ifuanro 15 guan yan abọ ọkpa ra eva, nọ gha ru iyobọ ne etẹn ya rhie emwi ne iran ruẹ re vbe Ẹmwẹ Osanobua ye uyinmwẹ. Sokpan wẹẹ te a rhie adia ọvbehe rre, abọ na keghi re na khian gha rhie ne ediọn ra eguọmwadia iwinna ni gbegba. Sokpan, ediọn ọkpa, ẹre ọ khian gha ru abọ ọghe evba gualọ vbe iko. Adeghẹ a na mwamwa abọ na zẹvbe ọta na koko zẹ iro yan, ọtẹn nọ yan abọ na sẹtin ru abọ na ke omuhẹn ya sẹ ufomwẹ zẹvbe inọta vbe ewanniẹn; ọ sẹtin loo avbe inọta ni rre ebe iwinna, ọ sẹtin vbe loo ẹwaẹn obọ ọre ya nọ etẹn ọta nọ khẹke. Ọ ma khẹke nọ ta ẹmwẹ nọ bun gbe ya mu abọ ọghẹe so, nọ mieke na miẹn ẹghẹ nọ somwa ya rhie uhunmwu ẹmwẹ nọ rre abọ nii ladian, deba ọni, ẹkpotọ ghi vbe kie ne etẹn ya zẹ ewanniẹn. Adeghẹ ọ mwẹ ọtẹn na gha nọ rẹn ọta vbe abọ na, ọ gha maan sẹ, ne ọtẹn na gha die uhunmwu ogiukpo deghẹ ọ gha sẹtin, nọ gha te ya ke ehe nọ tota yi gha guan.
16. Iruẹmwi E Baibol Ọghe Iko: Ifuanro ọgban. Ọkpa vbe ediọn nọ gbegba ẹre a khian gha rhie abọ na na. (Vbe iko ne ediọn i na bun, a sẹtin rhie abọ na ne eguọmwadia iwinna ni gbegba.) Ẹbu ediọn ẹre ọ khian tae deghẹ ọmwa gbegba nọ gha siẹnro Iruẹmwi E Baibol Ọghe Iko. Te ọ khẹke ne emwa na kue yi nọ gha siẹnro abọ na, hia ne iran ru ẹre vbe odẹ ne etẹn gha na miẹn ere vbọ, iran ghi hia ne iran ghẹ gbe ẹghẹ, iran ghi nianian uhunmwu ẹmwẹ nọ rre avbe ako ọghe Baibol na sunu yi ni rhie olika ẹmwẹ nọ rre iruẹmwi nii ladian, iran ghi vbe hia ne iran ru iyobọ ne etẹn ya rẹn vbene iran khian ya rhie emwi ne iran ruẹ re vbọ ye uyinmwẹ hẹ. Emwa na kue yi nọ gha siẹnro abọ na, gha wa miẹn ere vbọ deghẹ iran na ya tie avbe adia nọ dekaẹn vbene a ya ru abọ ọghe inọta vbe ewanniẹn hẹ. (w23.04 ipapa 24, ẹkpẹti) A gha ghi zẹ iro yan ako nọ khẹke na ruẹ vbe uzọla nii nẹ vbene ọ khẹke, esa i rrọọ na khian ya gha si ẹmwẹ tan vbe otọ. Etẹn ughughan ẹre ọ khẹke nọ gha siẹnro Iruẹmwi E Baibol Ọghe Iko, etẹn ughughan ẹre ọ vbe khẹke nọ gha tie vbe uzọla uzọla vbe iko ne etẹn ni gbegba na bun. Adeghẹ olaga ọghe Iko Uyinmwẹ Kevbe Iwinna Ọghe Ima na kha wẹẹ, na fian ẹghẹ na khian loo vbe Iruẹmwi E Baibol Ọghe Iko kanmwa, ọtẹn nọ khian siẹnro ẹre, ẹre ọ khian ghi ya ẹwaẹn obọ ọre fiaẹn kanmwa. Ọ sẹtin sẹ okhuẹn eso rae nọ te khẹke na tie.
ẸMWẸ NA KHIAN YA MU IKO SẸ UFOMWẸ
17. Ifuanro eha. Olaga ọghe Iko Uyinmwẹ Kevbe Iwinna Ọghe Ima ghi gbe ẹre ọrriẹ avbe uhunmwu ẹmwẹ ne kpataki na ruẹ re vbe iko vbe ẹdẹrriọ. Ọ ghi vbe rhie etẹn ekhọe ghee emwi na khian zẹ iro yan vbe uzọla nọ ghi lelẹe. Adeghẹ ẹghẹ rrọọ, ọ sẹtin sunu ye eni etẹn ni khian gha mwẹ obọ vbe abọ ọghe owebe vbe uzọla nọ ghi lelẹe. Sokpan wẹẹ te a rhie adia ọvbehe rre, olaga ẹre ọ tie ayawewe kevbe elẹta nọ khẹke na tie ma iko, vbe uwu ẹghẹ nọ khian ya gha ta ẹmwẹ na khian ya mu iko sẹ ufomwẹ. Ọ ma khẹke na gha yae wewe vbe uhunmwu ogiukpo, emwi ughughan na ru vbe ẹghẹ hia, vbe na ghee emwamwa ọghe iwinna ikporhu iyẹn nọ maan kevbe emwamwa ọghe akpehuan, sokpan deghẹ ayawewe vberriọ rrọọ, a ghi sikaẹn ye ebọdi. Adeghẹ ẹghẹ ne olaga khian ya ta ẹmwẹ na khian ya mu iko sẹ ufomwẹ i khian sẹ ọre ya tie elẹta ra ayawewe ma iko, ọ ghi tama etẹn ni mwẹ abọ vbe Uyinmwẹ Ọghe Ima Ne Ivbi Otu E Kristi, ne iran fian ẹghẹ ne iran khian loo kanmwa. (Ya ghee okhuẹn 16 kevbe 19.) Ihuan kevbe erhunmwu ẹre a khian ya mu iko na sẹ ufomwẹ.
ETIAN KEVBE IBUDE
18. Dọmwadẹ etẹn ni mwẹ obọ vbe abọ ọghe owebe gha ghi ru abọ ọghe iran nẹ, olaga ọghe Iko Uyinmwẹ Kevbe Iwinna Ọghe Ima ghi loo odẹ ifuanro ọkpa ya rhie etian kevbe ibude ne etẹn na; etian kevbe ibude na ghi hẹnhẹn egbe yan eke na we ne ọtẹn nii winna yan. Olaga gha tie ọtẹn nọ mwẹ obọ vbe abọ ọghe owebe nọ do ru abọ ọghẹe, ẹ i khian ta ako nọ khian winna yan. Vbọrhirhighayehẹ, ọtẹn na gha ru abọ ọghẹe fo nẹ, olaga ghi ka wa tian rẹn. Vbe iyeke ọni, ọ sẹtin tama iko, ako na we ne ọtẹn na winna yan, ọ ghi sunu ye emwi eso nọ ru nọ rhie ẹre ma wẹẹ, ọ wa hia vbe ako na we nọ winna yan. Deghẹ ọ vbe khẹke nọ ye winna yan ako nii, ọ ghi vbe fẹko tama rẹn. Olaga sẹtin vbe guan yan abọ ọvbehe vbe orhiema ne ọtẹn ru, deghẹ ọ ghee ẹre wẹẹ, ọtẹn nọ ru abọ nii ra emwa ni gbẹbu gha miẹn ere vbọ. Olaga sẹtin loo ebe na tie ẹre Hoẹmwẹ Emwa, Imamwaemwi ra Ministry School ya rhie adia ọvbehe ne ọtẹn nii, nọ rẹnrẹn wẹẹ, ọ gha wa ru iyobọ nẹẹn. Ọ sẹtin fẹko gu ẹre guan vbe a gha zobọ nẹ, ra vbe ẹdẹ ọvbehe; adia na sẹtin vbe dekaẹn ako na we nọ winna yan ra ako ọvbehe.—Adeghẹ u hoo ne u rẹn sayọ vbekpa iwinna ọghe olaga ọghe Iko Uyinmwẹ Kevbe Iwinna Ọghe Ima, kevbe ọbude ọghe etẹn ni ya ọta guan, ya ghee okhuẹn 19, 24, kevbe 25.
ẸGHẸ
19. Ọ ma khẹke ne ọmwa rhọkpa gbe ẹghẹ, ya sẹ egbe olaga ọghe Iko Uyinmwẹ Kevbe Iwinna Ọghe Ima. Agharhemiẹn wẹẹ, a gbẹnnẹ ẹghẹ nọ khẹke na loo vbe dọmwadẹ abọ ye ebe iwinna, adeghẹ u guan yan emwi hia nẹ, nọ khẹke ne u guan yan, esa i rrọọ ne u ya gha gualọ ẹmwẹ ne u khian ta, ne u mieke na loo ẹghẹ ruẹ fo. Adeghẹ ọtẹn rhọkpa na gbe ẹghẹ, olaga ọghe iko vbe ẹdẹrriọ, ra ọbude ọghe etẹn ni ya ọta guan ghi gu ọtẹn nii guan vbe ẹkhokho. (Ya ghee okhuẹn 24 kevbe 25.) Ọ khẹke ne ẹghẹ na khian ya suẹn iko na, ya sẹ ẹghẹ na khian ya zobọ, ya sẹ egbe ihuan na khian so kevbe erhunmwu na khian na, gha re ughaẹdẹ 1 kevbe ifuanro 45.
OTUẸ ỌGHE ỌGBAROGHE ỌGHE OTAKO
20. Ọgbaroghe ọghe otako gha mu otuẹ rre, emwamwa nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima, ẹre a khian ye lele; alughaẹn nọ khian gha rrọọ ọre wẹẹ: A i khian ghi ru Iruẹmwi E Baibol Ọghe Iko, ọta ọghe ifuanro 30 ne ọgbaroghe ọghe otako khian ya guan, ẹre ọ khian ghi rhie ihe ẹre. Vbene ọgbaroghe ọghe otako te ya ọta ọghẹe guan, olaga ọghe iko ghi ya unu kaẹn emwi eso na ruẹ re vbe iko vbe ẹdẹrriọ, ọ ghi rhie etẹn ekhọe ghee emwi eso na khian ruẹ vbe uzọla nọ ghi lelẹe, ọ ghi vbe tie elẹta ra ayawewe nọ khẹke ma iko, iyeke ọni, ọ ghi tie ọgbaroghe ọghe otako. Ọgbaroghe ọghe otako gha ghi ya ọta ọghẹe guan fo nẹ, ọ ghi we na so ihuan na khian ya zobọ; irẹn ẹre ọ khian tobọre zẹ ihuan na. Ọ sẹtin tie ọtẹn ọvbehe nọ do na erhunmwu na khian ya zobọ. A i khian ru abọ ọghe owebe vbe avbe ughugha nekherhe vbe ẹghẹ ne ọgbaroghe ọghe otako khian ya mu otuẹ rre, deghẹ ẹvbo na zẹ vbe iko nii ẹre a vbe loo vbe avbe ughugha nii. Ẹbu ni vbe do iko vbe Ọgua Arriọba nii, sẹtin ye do iko ọghe iran vbe uzọla ne ọgbaroghe ọghe otako ya mu otuẹ rre. Vbọrhirhighayehẹ, ọgbaroghe ọghe otako gha khian ya ọta guan, ẹbu nii ghi ya deba etẹn nikẹre vbe ughugha nọkhua.
UZỌLA ỌGHE ASIKOKO NEKHERHE RA NỌKHUA
21. A i khian do iko rhọkpa vbe uzọla ọghe asikoko nekherhe ra nọkhua. Ọ khẹke na ye etẹn ẹre rre wẹẹ, dọmwadẹ ọghẹe ra dọmwadẹ ẹgbẹe ẹre ọ khian tobọ iran ruẹ emwi na khian te ruẹ vbe iko vbe uzọla nii.
UZỌLA ỌGHE UGIE AYERE
22. Adeghẹ ẹdẹ na khian do Ugie Ayere na de ye uwu uzọla, a i khian do Iko Uyinmwẹ Kevbe Iwinna Ọghe Ima vbe uzọla nii.
ỌGBAROGHE ỌGHE IKO UYINMWẸ KEVBE IWINNA ỌGHE IMA
23. Ẹbu ediọn ẹre ọ zẹ ọdiọn nọ khian gha gbaroghe Iko Uyinmwẹ Kevbe Iwinna Ọghe Ima. Ọtẹn na ghi hia na miẹn wẹẹ, a do iko na zẹvbe nọ gua emwamwa ro kevbe wẹẹ, a lele adia na rhie yotọ. Adeghẹ aro ọre na da emwi eso, ọ khẹke nọ gi ọbude ọghe etẹn ni ya ọta guan rẹn vbekpa ẹre. Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima ọghe uki eva ẹre ọ ladian vbe uhukpa; ọ gha wa ladian, ọgbaroghe ọghe Iko Uyinmwẹ Kevbe Iwinna Ọghe Ima ghi ghae abọ ughughan ni rrọọ ne etẹn. Avbe abọ na guan kaẹn na, ọre abọ ọghe owebe kevbe abọ nikẹre vbe iko; ọtẹn na ẹre ọ khian vbe gha ghae abọ ọghe olaga ne etẹn ne ediọn kue yi nọ gha ru ẹre. (Ya ghee okhuẹn 3-16 kevbe 24.) Ọ gha khian ghae abọ ọghe owebe ne etẹn, te ọ khẹke nọ ka muẹn roro, inu ukpo ne ọtẹn nii ye, emwi nọ he vbe miẹn vbe agbọn kevbe deghẹ ọ gha sẹtin si agbada vbe unu guan yan ọta ne u khian rhie nẹẹn. Erriọ ẹre ọ khian vbe ru ẹre, vbe ọ gha khian ghae abọ nikẹre vbe iko ne etẹn. Ọ khẹke nọ rherhe ghae abọ ne etẹn khian ru ne iran. Ọ gha ghi sikẹ otọ gbe, ọ gha re uzọla eha ọ te sẹ ẹdẹ ne iran khian ru abọ ọghe iran. Ọ gha khian ghae abọ ọghe owebe, ọ ghi loo e fọm na tie ẹre Our Christian Life and Ministry Meeting Assignment (S-89). ọgbaroghe ọghe Iko Uyinmwẹ Kevbe Iwinna Ọghe Ima ghi hia na miẹn wẹẹ, eni etẹn ni mwẹ abọ kevbe abọ ughughan ne iran mwẹ rre ebọdi. Ẹbu ediọn sẹtin we ne ọdiọn ọvbehe ra ọguọmwadia iwinna gha ru iyobọ nẹẹn. Sokpan, vbọ gberra abọ ọghe owebe, ediọn ọkpa ẹre ọ khẹke nọ gha ghae abọ nikẹre ne etẹn.
OLAGA ỌGHE IKO UYINMWẸ KEVBE IWINNA ỌGHE IMA
24. Uzọla uzọla, ọkpa vbe ediọn ghi ru olaga ọghe Iko Uyinmwẹ Kevbe Iwinna Ọghe Ima. (Vbe iko ne ediọn i na bun, a sẹtin rhie abọ na ne eguọmwadia iwinna ni gbegba.) Irẹn ẹre ọ khian tobọre mwamwa ẹmwẹ omuso kevbe ẹmwẹ na khian ya mu iko sẹ ufomwẹ. Irẹn ẹre ọ khian vbe gha tie dọmwadẹ etẹn ni mwẹ obọ vbe iko vbe ẹdẹrriọ. Adeghẹ ediọn ni rre iko nii i bun, olaga ọghe iko sẹtin vbe ru abọ ọvbehe vbe iko ọghe ẹdẹrriọ, katekate avbe abọ na khian na kpee vidio nai khian zẹ iro yan. Etẹn gha ghi ya ọta ọghe iran guan nẹ, a te miẹn wẹẹ, olaga tie etẹn ọvbehe, ọ ma khẹke nọ ta ẹmwẹ nọ bun gbe. Ẹbu ediọn ẹre ọ koko zẹ ediọn ni gbegba ni gha sẹtin gha re olaga. Ọsegbe ọsegbe ẹre a khian ya gha mwamwa ediọn ni gbegba ni khian gha re olaga. A sẹtin miẹn wẹẹ, ẹghẹ ne ọgbaroghe ọghe Iko Uyinmwẹ Kevbe Iwinna Ọghe Ima khian ya gha re olaga, ẹre ọ khian bun sẹ ẹghẹ ne ediọn ni gbegba nikẹre khian ya gha re olaga, rhunmwuda vbene emwi ye hẹ vbe iko nii. Adeghẹ ọdiọn gbegba nọ gha sẹtin siẹnro Iruẹmwi E Baibol Ọghe Iko, egbọre ọ gha vbe sẹtin gha re olaga ọghe Iko Uyinmwẹ Kevbe Iwinna Ọghe Ima. Sokpan, gha mwẹ ọnrẹn vbe ekhọe wẹẹ, te ediọn ni khian gha ru olaga khian gha rhie etian kevbe ibude nọ ru iyobọ ne ọmwa, ne etẹn ni mwẹ obọ vbe abọ ọghe owebe. Ọ khẹke ne olaga hia na miẹn wẹẹ, a ma gbe ẹghẹ vbe iko ọghe ẹdẹrriọ. (Ya ghee okhuẹn 17 kevbe 19.) Adeghẹ olaga hoo kevbe deghẹ ẹkpotọ nọ somwa na gha rrọọ, a sẹtin wa mu amigbo ọvbehe mudia ye uhunmwu ogiukpo vba, ọ ghi ke evba gha tie nọ sọregbe, vbene ọtẹn nokpia nọ tiere nọ do ya ọta guan gha na gberra ghee ehe ne uhanhan na mu ebe yi ye, nọ ya suẹn ọta ọghẹe. Erriọ vbe ye, olaga sẹtin vbe tota vbe uhunmwu ogiukpo vbe ẹghẹ ne ọtẹn nọ mwẹ obọ vbe abọ ọghe owebe khian ya gha tie Baibol. Ọ sẹtin vbe ru vberriọ vbe ẹghẹ ne etẹn khian ya gha ru orhiema ni rre Rhiegbe Ye Iwinna Ikporhu Iyẹn Nọ Maan. Ọna sẹtin vbe fian ẹghẹ na khian loo kanmwa.
ỌBUDE ỌGHE ETẸN NI YA ỌTA GUAN
25. Adeghẹ emwi nọ gha gia ru nọ, ọ khẹke ne ọkpa vbe ediọn na khian zẹ nọ gha ru iwinna na, gha re ọtẹn nọ gua ya ọta guan ẹsẹsẹmwẹse. Iwinna ọbude ọghe etẹn ni ya ọta guan ọre nọ gha rhie adia na rhie ne ediọn kevbe eguọmwadia iwinna vbe ẹkhokho deghẹ esa na gha rrọọ, vbe nọ dekaẹn abọ ne iran rhirhi ru. Vbe igiemwi, deghẹ iran na gha mwẹ obọ vbe Iko Uyinmwẹ Kevbe Iwinna Ọghe Ima, iran na ya ọta azagba guan, iran na siẹnro Iruẹmwi Ebe Owa Ọkhẹ ra Iruẹmwi E Baibol Ọghe Iko, ra iran na tie Ebe Owa Ọkhẹ vbe iko ra ebe na loo vbe Iruẹmwi E Baibol Ọghe Iko, ọ sẹtin rhie adia ne iran deghẹ esa na gha rrọọ. (Ya ghee okhuẹn 19.) Adeghẹ ediọn bun vbe iko nii, ni wa gua ya ọta guan kevbe ni gua ma emwa emwi, a sẹtin gha loo ediọn ughughan ni gbegba vbe ukpukpo zẹvbe ọbude ọghe etẹn ni ya ọta guan. Esa i rrọọ, ne ọbude ọghe etẹn ni ya ọta guan gha ya rhie adia ne etẹn vbe ẹghẹ ne iran rhirhi ya ru abọ ọghe iran.
IKO NA DO VBE UGHUGHA ỌVBEHE
26. Adeghẹ etẹn ni mwẹ obọ vbe abọ ọghe owebe na gha bun, iko sẹtin ru emwamwa ọghe iko na do vbe ughugha ọvbehe, na khian na gha ru abọ ọghe owebe. Ọ ghaa yerriọ, ọ khẹke ne ọtẹn nọ gbegba gha rre ughugha nii, nọ khian gha dia abọ ọghe owebe nii. Ọ gha maan sẹ, deghẹ ọtẹn na, na gha re ọdiọn vbe iko. Sokpan, vbe iko ne ediọn i na bun, a sẹtin loo ọguọmwadia iwinna nọ gbegba. Ẹbu ediọn ẹre ọ khian zẹ ọtẹn nọ khian gha winna iwinna na, iran ẹre ọ khian vbe tae deghẹ emwa ughughan ẹre ọ khian gha ru ẹre ọsegbe ọsegbe. Ọ khẹke ne ọtẹn nọ khian dia iko na lele adia nọ rre okhuẹn 18. Adeghẹ iko na do vbe ughugha ọvbehe na gha rrọọ, a ghi tama etẹn ni mwẹ obọ vbe abọ ọghe owebe ne iran gha rrie ughugha nii, vbe iyeke abọ ọghe Emwi Ewe Ọghe Orhiọn. Iran ghi werriegbe do deba etẹn nikẹre, vbe iran gha ghi ru abọ ọghe owebe nokiekie nẹ.
AVBE VIDIO
27. A gha kpee vidio eso vbe uwu ẹghẹ na khian ya gha do iko na. U gha sẹtin ya efoni kevbe ekọmputa kpee avbe vidio na loo vbe iko na do vbe uwu uzọla vbe JW Library® app.
© 2023 Watch Tower Bible and Tract Society of Pennsylvania
S-38-ED 11/23
metadata::MEPS:Title=Adia Na Khian Lele Vbe Iko Uyinmwẹ Kevbe Iwinna Ọghe Ima Ne Ivbi Otu E Kristi
metadata::WEB:OnSiteAdDescription=Avbe adia na lele vbe a ghaa do iko na do vbe uwu uzọla.
