1. De emwi ne u gha ru ne uwẹ vbe ọmwa mieke na gha re ọse ne kankankan?

OWẸ nokaro na ka zẹ deghẹ a na gha hoo na gu ọmwa ru ọse ọre wẹẹ, a ghi hia na sikẹ ọre. Uwẹ vbe ọmwa gha ghi suẹn gha guan nẹ, wa ghi do gha fannọ otọ ẹko ma egbe. U ke rẹn emwi nọ sunu, uwa khian ọse nẹ. Sokpan na do gha re ọsie Jesu i khuẹrhẹ vberriọ. Vbọsiẹ?

2. De emwi nokaro nọ yae lọghọ ne ima sẹtin gha re ọsie Jesu?

² Emwi nokaro nọ yae lọghọ ne ima sẹtin gha re ọsie Jesu ọre wẹẹ, ima ma he ka miẹn Jesu ẹdẹ. Ivbiotu e Kristi ni ghaa rrọọ vbe orre nokaro vbe werriẹ aro daa isievẹn vbenian. Ọrheyerriọ, ukọ e Pita keghi kha wẹẹ: “Egbe ne uwa ma rhe ya miẹn ọre aro, wa ye hoẹmwẹ ọnrẹn, egbe ne uwa ma he rhe ya miẹn ọnrẹn nian, wa ye yaeyi.” (1 Pit 1:8) Ọna rhiema wẹẹ, ma gha sẹtin gha gu e Jesu mwẹ asikẹgbe ne khuankhuankhuan, agharhemiẹn wẹẹ, ima ma he ka miẹn ọnrẹn ẹdẹ.

3. De emwi nogieva nọ yae lọghọ ne ima sẹtin gha re ọsie Jesu?

³ Isievẹn nogieva ne ima mwẹ ọre wẹẹ, ma i sẹtin gu Jesu guan. Ma ghaa na erhunmwu, e Jehova ẹre ima gu guan. Agharhemiẹn wẹẹ, eni Jesu ẹre ima ya na erhunmwu, ẹi irẹn ẹre ima na erhunmwu gie. Ẹmwata nọ rrọọ ọre wẹẹ, Jesu ma hoo ne ima gha na erhunmwu gie irẹn. Vbọzẹe? Rhunmwuda, erhunmwu keghi re odẹ ọkpa ne ima ya rhie ugamwẹ ne Jehova, deghẹ ima na gha na erhunmwu gie Jesu, ọni rhiema wẹẹ, te ima ghi rhie ugamwẹ nọ khẹke Jehova ọkpa ne ọmwa ọvbehe. (Mat 4:10) Ọrheyerriọ, ma gha ye sẹtin rhiẹre ma wẹẹ, ma hoẹmwẹ Jesu.

4. De emwi nogieha nọ yae lọghọ ne ima sẹtin gha re ọsie Jesu? De emwi ne ima khian ziro yan vbe ako iruẹmwi na?

 ⁴ Isievẹn nogieha ne ima mwẹ ọre wẹẹ, ẹrinmwi ẹre Jesu ye, rhunmwuda ọni, ma i khian sẹtin bu ẹre gha khian, ne ima ya gu ẹre ru ọse vbe odọ. Sokpan ma gha ye sẹtin rẹn emwi nibun vbekpae Jesu, agharhemiẹn wẹẹ, ma i sẹtin bẹghe ẹre ghee mwẹ ghee ruẹ. Vbe ako iruẹmwi na, ma gha ziro yan emwi enẹ nọ gha ru iyobọ ne ima ya sẹtin sikẹ Jesu sayọ. Nia, gia ka ziro yan evbọzẹe nọ na khẹke ne ima gu Jesu gha mwẹ asikẹgbe ne khuankhuankhuan.

5. Vbọzẹe nọ na khẹke ne ima gha re ọsie Jesu? (Vbe ya ghee avbe ẹkpẹti ni mwẹ uhunmwuta ni khare wẹẹ, “ U Ghaa Re Ọsie Jesu, U Ghi Vbe Do Khian Ọse Ọghe Jehova” kevbe “ Gha Ya Aro Nọ Khẹke Ghee Jesu.”)

⁵ Ma ghaa hoo ne ima kakabọ sikẹ e Jehova, ọ khẹke ne ima gu Jesu ru ọse. Gia ziro yan emwi eva nọ ya ima kha vberriọ. Nokaro, Jesu keghi tama erhuanegbe ẹre wẹẹ: “Evbavba tobọre vbe hoẹmwẹ uwa. Irẹn hoẹmwẹ uwa rhunmwuda ighẹ wa hoẹmwẹ mwẹ.” (Jọn 16:27) Ọ na vbe kha wẹẹ: “Ọmwa nọ gha sẹtin sẹ ehe ne Evbavba ye ẹi rrọọ vbe ẹi re wẹẹ te ọ la obọ mwẹ.” (Jọn 14:6) Ọmwa ghaa hoo nọ sikẹ e Jehova, vbene ọ ma na gu Jesu ru ọse, ọ ghi yevbe ọmwa nọ hoo nọ la egbe ekẹn la owa. Ẹi khabe ne Jesu na ya egbe ẹre gie “urho ne avbe ohuan la la owa.” (Jọn 10:7, NW) Nogieva, vbene Jehova ya ru emwi, erriọ Jesu vbe ya ru emwi zẹẹ. Ọna ẹre ọ ya Jesu tama erhuanegbe ẹre wẹẹ: “Ọmwaikọmwa nọ miẹn mwẹ nẹ, ọ vbe miẹn Evbavba nẹ.” (Jọn 14:9) Nọnaghiyerriọ, odẹ ne kpataki ne ima khian ya sẹtin rẹn e Jehova ọre ne ima gha ruẹ emwi vbekpae Jesu. Zẹvbe ne ima ya ruẹ vbekpae Jesu, ahoẹmwọmwa ne ima mwẹ nẹẹn ghi gha wegbe  sayọ. Ọna ghi vbe do ya ima hoẹmwẹ e Jehova ẹsẹsẹmwẹse.

6. De emwi ọvbehe nọ zẹe nọ na khẹke ne ima gha re ọsie Jesu? Rhan otọ re.

⁶ Adeghẹ ima hoo ne Osanobua gha họn erhunmwu ima, ọ khẹke ne ima gu e Jesu ru ọse. Ẹmwata nọ wẹẹ, eni Jesu ẹre ima ya na erhunmwu. Sokpan, ọ khẹke ne ima rẹn vbene Jehova ya loo Jesu ya họn erhunmwu ima hẹ. Jesu keghi tama avbe ukọ ọghẹe wẹẹ: “Emwi ne uwa rhirhi nọ vbe eni mwẹ, I gha ru ẹre.” (Jọn 14:13) E Jehova ẹre ọ họn erhunmwu ne ima na, sokpan irẹn rhie asẹ ne Jesu nẹ, nọ ya gha ru ahoo kevbe emwamwa ọghe irẹn. (Mat 28:18) Rhunmwuda ọni, a te miẹn wẹẹ e Jehova họn erhunmwu ima, ọ ghi ka ghee ẹre deghẹ ima lele adia ne Jesu rhie ne ima. Vbe igiemwi, Jesu khare wẹẹ: “Wa gha ya emwi ne emwa ru uwa re khọọ bọ iran, Erha uwa nọ rre ẹrinmwi gha vbe yabọ uwa. Sokpan, deghẹ uwa ma yabọ emwa ni ru uwa khọọ, Erha uwa nọ rre ẹrinmwi i vbe ya orukhọ uwa bọ uwa.” (Mat 6:14, 15) Rhunmwuda ọni, obọ ne Jehova kevbe Jesu ya mu ima, ẹre ọ khẹke ne ima ya gha mu emwa ọvbehe!

7. De emwa ni khian miẹn ere vbe izọese adẹwerriegbe ọghe Jesu?

⁷ Emwa ni gu e Jesu mwẹ asikẹgbe ne khuankhuankhuan ẹre ọ khian miẹn ere vbe izọese adẹwerriegbe ọghe Jesu. Vbe ima ya rẹn hẹ? Jesu khare wẹẹ, irẹn gha wu ‘ba ẹmwẹ avbe ọse irẹn.’ (Jọn 15:13) Te eguọmwadia e Jehova ni ghaa rrọọ vbe ẹghẹ nẹdẹ, a te miẹn wẹẹ Jesu rrie agbọn na, khian ruẹ vbekpae Jesu vbe iran gha rhiọ kpaegbe, iran ghi vbe hoẹmwẹ ọnrẹn. Emwa vbe na ghee Ebraham, e Sera, e Mosis kevbe Rehab gha rhiọ kpaegbe; sokpan vbe ẹi re wẹẹ, te iran do gu e Jesu ru ọse, iran i khian sẹtin gha mwẹ arrọọ ọghe etẹbitẹ.—Jọn 17:3; Iwinna 24:15; Hib 11:8-12, 24-26, 31.

8-9. De ukpamuyọmọ ne ima mwẹ rhunmwuda ne ima na re ọsie Jesu? Zẹvbe nọ rre ebe Jọn 15:4, 5, vbọzẹe nọ na ru ekpataki ne ima gha re ọsie Jesu?

⁸ Ukpamuyọmọ nọkhua nọ ne ima na gu e Jesu mwẹ obọ vbe iwinna ikporhu iyẹn nọ maan ọghe Arriọba. Te Jesu wa gha maa emwa emwi vbe ọ rre agbọn. Agharhemiẹn wẹẹ ọ kpa gha rrie ẹrinmwi nẹ, te ọ ye dia iwinna ikporhu iyẹn nọ maan zẹvbe uhunmwuta ọghe iko. Irẹn keghi gbọyẹmwẹ ye ẹrhiọn ne ima loo ya ru iyobọ ne emwa ya rẹn vbekpae irẹn kevbe Erhae. Vbene ẹmwata, ne Jehova vbe Jesu na rre ima iyeke, ẹre ọ zẹe ne ima na sẹtin musọe vbe iwinna na.—Tie Jọn 15:4, 5.

⁹ E Baibol gi ima rẹn wẹẹ, ma ghaa hoo ne ima ya ẹko rhiẹnrhiẹn e Jehova, te ọ khẹke ne ima hoẹmwẹ e Jesu, ma ghi vbe gha re ọsiọre. Nia, gi ima ziro yan emwi enẹ nọ gha ru iyobọ ne ima ya gha re ọsie Jesu.

10. De emwi okaro ne ima gha ru, ne ima mieke na gha re ọsie Jesu?

¹⁰ (1) Hia ne u rẹn Jesu. Odẹ ọkpa ne ima khian ya ru ọna ọre ne ima gha tie ebe Matiu, Mak, Luk kevbe Jọn. Ma ghaa muẹn roro okha ọghe Jesu ni rre Evbagbẹn Nọhuanrẹn, ọ gha ya ima hoẹmwẹ ọnrẹn sayọ, ma ghi vbe gha rhie ọghọ nẹẹn, rhunmwuda obọ esi nọ ya gha mu emwa. Vbe igiemwi, Jesu ma gha ghee erhuanegbe ẹre zẹvbe eviẹn, ra nọ gha ya obọ dan mu iran, rhunmwuda wẹẹ irẹn ọre Arowa iran. Nọghayayerriọ, te irẹn ghaa gu iran ziro zẹvbe ọse, ọ na vbe gha fannọ otọ ẹko ẹre ma iran. (Jọn 15:15) Te ọ wa vbe gha da e Jesu vbe egbe vbe ẹghẹ ne iran ya gha rre uwu obalọ, sẹrriọ wẹẹ, ọ na vbe gu iran gha viẹ.  (Jọn 11:32-36) Uhiẹn, eghian ọghe Jesu vbe rẹn wẹẹ, ọmwaikọmwa nọ miẹn igiuhunmwu ọghe Jesu yi gha sẹtin gha re ọsiọre. (Mat 11:19) Ma ghaa ya egbe tae Jesu vbe odẹ nọ ya gha gu erhuanegbe ẹre loo, ọ gha ru iyobọ ne ima ya gha gu emwa ọvbehe rrọọ vbe ọfunmwegbe, emwi ne ima mwẹ ghi gha sẹ ima ọkẹn, ma ghi gha mwẹ oghọghọ, ahoẹmwọmwa ne ima mwẹ ne Jesu ghi vbe gha wegbe sayọ.

11. De emwi nogieva ne ima gha ru, ne ima mieke na gha re ọsie Jesu? Vbọzẹe nọ na khẹke ne ima ru vberriọ?

¹¹ (2) Gha mwẹ egbe iziro kevbe uyinmwẹ ne Jesu ghaa mwẹ. Ma ghaa hia ne ima rẹn aro ne Jesu ya ghee emwi, ma na vbe gha ya egbe taa re, asikẹgbe ne ima gu ẹre mwẹ ghi gha wegbe sayọ. (1 Kọr 2:16) De vbene ima khian ya yegbe tae Jesu hẹ? Gia ziro yan igiemwi ọkpa. Jesu ma gha roro ọghe enegbe ẹre ọkpa. (Mat 20:28; Rom 15:1-3) Ọna ẹre ọ si ẹre nọ na gha mu ọghe emwa ọvbehe ye okaro kevbe nọ na gha yabọ. Jesu ma gha mu ohu, rhunmwuda ẹmwẹ ne emwa ghaa ta lelẹe. (Jọn 1:46, 47) Jesu ma gha ya aro dan ghee emwa rhunmwuda abakuru ne iran ru vbe ẹghẹ nọ gberra. (1 Tim 1:12-14) Jesu khare wẹẹ: “Adeghẹ uwa hoẹmwẹ egbe, ẹre emwa hia gha na rẹn wẹẹ erhuanegbe mwẹ ẹre uwa khin.” (Jọn 13:35) Nọnaghiyerriọ, nọ egbuẹ wẹẹ, “Zẹvbe ọmwa nọ lele ukpowẹ ọghe Jesu, mẹ hia vbe odẹ ke odẹ ne I gha gu etẹn rrọọ vbe ọfunmwegbe ra?”

12. De emwi nogieha ne ima gha ru, ne ima mieke na gha re ọsie Jesu? De emwi nọ gha ru iyobọ ne ima ya ru ọna?

¹² (3) Gha ku obọ gbe ba etiẹn Kristi. Emwi ke emwi ne ima ru ne etẹn na hannọ zẹ, te Jesu ghee ẹre wẹẹ irẹn ẹre ima ru ẹre na. (Mat 25:34-40) Odẹ nọ ghi ru ekpataki sẹ ne ima ya rhiẹre ma wẹẹ, ma ku obọ gbe ba etẹn na hannọ zẹ, ọre ne ima gha rhiegbe ye iwinna ikporhu iyẹn nọ maan ne Jesu mu ne erhuanegbe ẹre. (Mat 28:19, 20; Iwinna 10:42) Ne “ohuan ọvbehe” ọghe Jesu na ku obọ gbe ba etẹn na hannọ zẹ, ẹre ọ zẹe ne iwinna ikporhu iyẹn nọ maan nọ khian vbe uhunmwu otagbọn hia, na wa da otọ vbe ẹdẹnẹrẹ. (Jọn 10:16) Adeghẹ ọkpa vbe usun ohuan ọvbehe ọghe Jesu ẹre u khin, gha mwẹ ilẹkẹtin wẹẹ, ẹghẹ ke ẹghẹ ne u ya rhiegbe ladian vbe iwinna ikporhu iyẹn nọ maan, te u rhiẹre ma wẹẹ u hoẹmwẹ Jesu kevbe etẹn na hannọ zẹ.

13. De vbene ima khian ya rhiẹre ye uyinmwẹ hẹ, ẹmwẹ ne Jesu tae vbe ebe Luk 16:9?

¹³ Ma ghaa ru iyobọ igho ye iwinna Arriọba, te ima rhiẹre ma wẹẹ, ọsie Jehova kevbe Jesu ẹre ima khin, rhunmwuda, iran ẹre ọ dia iwinna na. (Tie Luk 16:9.) Vbe igiemwi, iyobọ igho ne ima ru, ẹre a ya ru emwamwa ikporhu ne ima kpe vbe ehe nọ kakabọ khian rree ne orere ẹvbo, ẹre a ya bọlọ owa ugamwẹ ọghomwa, ẹre a vbe ya dọlọe yi, ẹre a vbe loo ya ru iyobọ ne etẹn ne oguomiẹrẹ sunu daa. Ma gha vbe sẹtin ru iyobọ igho ye iwinna nọ khian vbe iko ne ima ye. Ma gha vbe miẹn etẹn ni gualọ iyobọ vbuwe iko, ọ khẹke ne ima ru iyobọ ne iran. (Itan 19:17) Ma ghaa ru ena hia, ọni rhiema wẹẹ ima ku obọ gbe ba etiẹn Kristi.

14. Zẹvbe nọ rre ebe Ẹfisọs 4:15, 16, de emwi nogienẹ ne ima gha ru, ne ima mieke na gha re ọsie Jesu?

¹⁴ (4) Gha ku obọ gbe ba emwamwa nọ khian vbe otu ọghe Jehova. Ma ghaa họn ẹmwẹ ne etẹn ni su ima vbuwe iko, asikẹgbe ne ima gu e Jesu mwẹ ghi gha wegbe sayọ, rhunmwuda Jesu ọre uhunmwuta ọghe iko. (Tie Ẹfisọs 4:15, 16.) Vbe igiemwi, emwamwa nọ wa rre otọ nia ọre wẹẹ, ai ghi wa gheghe bọlọ Ọgua Arriọba vbe na rhirhi miẹn. Rhunmwuda ọni, te a ghi ku iko ughughan kugbe vbe ihe eso, a vbe fi ẹre werriẹ  ighẹ ẹdogbo ne iko eso na te kporhu. Emwamwa vbenian keghi fian igho ne otu ọghe Jehova loo kanmwa. Sokpan ẹi khuẹrhẹ ne etẹn eso, vbe afiwerriẹ vbenian gha rhiegbe ma. Vbe igiemwi, ẹi khian gha khuẹrhẹ ne etẹn na fi iko ọghe iran werriẹ, rhunmwuda a sẹtin miẹn wẹẹ ọ kpẹẹ re ne iran ke rre iko nii, kevbe wẹẹ iran gu obọ etẹn ni rre evba nẹ. Ẹi mwẹ ẹko ma gha rhiẹnrhiẹn Jesu vbe ọ gha bẹghe ẹre wẹẹ, etẹn na ku obọ gbe ba emwamwa vbenian!

15. De vbene asikẹgbe ne ima gu e Jesu mwẹ khian gha ye hẹ vbe odaro?

¹⁵ Etẹn na hannọ zẹ keghi mwẹ ayayẹro wẹẹ, iran gha gu e Jesu kha vbe Arriọba Osanobua vbe etẹbitẹ. Na kha na, te iran khian gha bẹghe Jesu ghee mwẹ ghee ruẹ, iran ghi vbe sẹtin gu ẹre gha ziro zẹvbe ọse. (Jọn 14:2, 3) Vbọ vbe ye hẹ ne emwa ni khian gha rre agbọn na? Te iran khian ye gha re ọsie Jesu agharhemiẹn wẹẹ iran i gu ẹre rre ẹrinmwi. Zẹvbe ne iran khian ya gha sọyẹnmwẹ agbọn ọgbọn ne Jehova loo e Jesu ya kpemehe ẹre ne iran, erriọ asikẹgbe ne iran gu e Jesu mwẹ khian ya gha wegbe sayọ.—Aiz 9:6, 7.

16. De afiangbe ne ima khian lae miẹn deghẹ ima na gha re ọsie Jesu?

¹⁶ Afiangbe nibun ẹre ima khian lae miẹn deghẹ ima na gha re ọsie Jesu. Vbe igiemwi, Jesu wa ru iyobọ ne ima vbe ẹdẹnẹrẹ. Ẹkpotọ vbe kie ne ima ya gha rrọọ vbe etẹbitẹ. Sẹ ehia, asikẹgbe ne ima gu e Jesu mwẹ gha ya ima sikẹ e Jehova ẹsẹsẹmwẹse. U miẹn ukpamuyọmọ nọkhua ne ima mwẹ, ne Jesu na tie ima ọsie ọre!