Ukpo 1954 ẹre a biẹ mwẹ, vbe ẹvbo na tie ẹre St. Paul vbe Minnesota nọ rre U.S.A. Evbibiẹ mwẹ ma mobọ gha mwẹ igho vberriọ, sokpan iran ma vbe gha re ivbiogue. Ugamwẹ e Catholic ẹre iran ghaa ye. Emọ isẹn ẹre evbibiẹ mwẹ biẹlẹ, mẹ ẹre ọ ghaa re nogieva. Owebe ọghe Catholic ẹre I yo, I vbe gha rre usun ibiẹka ikpia ni ru iyobọ ne ohẹn vbe esọsi. Ọrheyerriọ, I ma rẹn emwi nibun vbuwe Baibol. Agharhemiẹn wẹẹ, I yayi wẹẹ Osanobua rrọọ kevbe wẹẹ, irẹn ẹre ọ yi emwi hia, ọ ma gha mwẹ ẹghẹ ne I ya yayi wẹẹ, ugamwẹ e Catholic ẹre I khian na sẹtin ga Osanobua vbe odẹ nọ khẹke.

Vbe ukpo ne I la owebe ọghe omugui na tie ẹre William Mitchell College of Law, ọdọ vbe amwẹ ọkpa ni re Osẹe Jehova keghi kporhu sẹ owa mwẹ, te I ghaa họ ukpọn vbe iran rre. Iran ghi bẹghe ẹre wẹẹ I mwẹ emwi ne I ru vbe obọ, iran na wẹẹ iran gha dọlegbe rre vbe ẹdẹ ọvbehe. Vbe iran ghi rre, I keghi nọ iran ọta eva. Inọta nii ọre: “Vbọzẹe ne a na miẹn wẹẹ, emwa dan ẹre agbọn maan sẹ emwa esi?” kevbe wẹẹ, “De emwi nọ khian ya ọmwa gha mwẹ oghọghọ nọ sẹ otọ ẹko?” Iran keghi rhie ebe ọkpa mẹ, uhunmwuta ọghe ebe nii ọre The Truth That Leads to Eternal Life. Iran na vbe mu New World  Translation of the Holy Scriptures mẹ; ẹmu nọ green ẹre Baibol na ghaa mwẹ, te ọ wa ye mose mose. I keghi kue yọ ne iran do gha gu mwẹ ruẹ e Baibol vbe owa. Ẹi re avbiẹ emwi ẹre iran maa mwẹ re. Iran ghi tama mwẹ wẹẹ, Arriọba Osanobua ọkpa ẹre ọ khian sẹtin sọfurre ye ọlọghọmwa ọghe emwa nagbọn, I na wa gha ghọghọ. I na gele do bẹghe ẹre wẹẹ, te arriọba emwa nagbọn gele gbokhuẹre. Usẹ, obalọ, agbọmwa ekueku kevbe ọlọghọmwa nibun ọvbehe ẹre iran he si ye emwa nagbọn egbe.

Vbe omuhẹn ọghe ukpo 1982, I keghi ya egbe mwẹ fiohan gie Jehova. Vbene ukpo nii te fo, I keghi dinmwiamẹ vbe Asikoko Nọkhua nọ mwẹ uhunmwuta nọ khare wẹẹ, “Kingdom Truth,” na do vbe St. Paul Civic Center. Vbe uzọla nọ lelẹe, I na werriegbe gha die ọgbẹlẹzẹ ne a na do Asikoko Nọkhua nii, do gbẹn edanmwẹ ọkpa. Edanmwẹ nii ẹre a khian ya rẹn deghẹ I gbegba nọ khian gha winna zẹvbe omugui. Vbe ọ ghi rre October, iran keghi tama mwẹ wẹẹ, ọkpa gbe ifuẹn mẹ vbe edanmwẹ ne I gbẹn, rhunmwuda ọni, te I ghi gbegba nọ khian gha winna zẹvbe omugui.

Vbe Asikoko Nọkhua na do nii, I keghi miẹn ọtẹn nokpia ọkpa na tie ẹre Mike Richardson, nọ ga vbe Abotu nọ rre Brooklyn, ọ keghi tama mwẹ wẹẹ, ọ mwẹ ugha ọkpa na da mu gbọọ vbe igiogbẹ, nọ khian gha siẹnro avbe ẹzọ ọghomwa na gui. Vbe ọwara ọkpa nii, I keghi yerre emwi ne Ovbi Ẹtiopia ọkpa tae vbe ebe Iwinna 8:36, NW, ẹre I na ghi nọ egbe mwẹ wẹẹ, ‘De emwi nọ khian ghi da mwẹ obọ yi nia, ne I ghẹ ya winna vbe ugha ne a na gui ẹzọ vbe igiogbẹ?’ Ẹre I na ghi rhie obọ ye ebe wẹẹ, I hoo ne I ya ga vbe Bẹtẹl.

Vbe evbibiẹ mwẹ họn wẹẹ, Osẹe Jehova ẹre I ghi khin, ẹko ma zẹdẹ gha rhiẹnrhiẹn iran. Erha mwẹ keghi nọ mwẹ wẹẹ, ‘Uwẹ ne omugui, de ere ne u khian ghi miẹn vbọ, ne u khian na ya gha winna vbe abotu ọghe uwa?’ I na ghi tama rẹn wẹẹ, ekhọe obọ mwẹ ẹre I ya rhiegbe ladian wẹẹ I khian ya ru iwinna na, kevbe wẹẹ vbe uki uki, iran ra gha rhie $75 mẹ ne I ya gha gaga egbe. Igho na ẹre a ghaa rhie ne etẹn ni ga vbe abotu vbe uki uki vbe ẹghẹ nii, ne iran ya gha gaga egbe.

Sokpan I ma gha rrie Bẹtẹl vbe ọwara ọkpa nii, rhunmwuda ọ te kẹ mwẹ ya rhie obọ ye iwinna ọkpa nẹ vbe ekọtu ọkpa, nọnaghiyerriọ, te ọ khẹke ne I ru iwinna nii fo I ke kpa. Ukpo 1984 ẹre I ghi suẹn gha ga vbe Bẹtẹl vbe Brooklyn, New York. Ugha nọ siẹnro avbe ẹzọ ọghomwa na tie ẹre Legal Office ẹre I na gha winna. Emwi ne I ruẹre vbe ẹghẹ ne I na gha winna vbe ekọtu wa ru iyobọ mẹ, ne I ya sẹtin winna iwinna ọghomwẹ ẹse vbe Bẹtẹl.

Jersey City, vbe New Jersey, ẹre ọgbẹlẹzẹ na, na tie ẹre Stanley Theater ghaa ye. Otu keghi dọe vbe November 1983. Etẹn kegha gualọ asẹ vbe obọ arriọba ne iran mieke na dọlọ ọgbẹlẹzẹ na yi. Vbe iran ghi miẹn avbe ukọ arriọba, iran keghi tama iran wẹẹ, iran hoo ne iran loo ọgbẹlẹzẹ na ya gha  do asikoko nọkhua ọghe Avbe Osẹe Jehova, sokpan ọ ma de vbene iran te yaro yi. Uhi ọghe ẹvbo nii khare wẹẹ, ẹdogbo ne emwa ye, ẹre ọ khẹke ne owa ugamwẹ vbe gha ye. Sokpan ọgbẹlẹzẹ na, kegha rre ẹdogbo ne a na do ẹki, rhunmwuda ọni, avbe ukọ arriọba nii ma rhie asẹ ne ima. Ẹre etẹn na vbe dọlegbe rinmwian iran, sokpan ọ ma gba re.

Vbe uzọla ne I sẹ e Bẹtẹl, otu keghi mu ẹzọ na gha rrie federal district court. Ugbẹnvbe a miẹn wẹẹ I ka ya ukpo eva winna vbe federal district court nọ ghaa rre St. Paul, vbe Minnesota, I keghi kakabọ fiẹnro egbe ẹzọ vbenian. Ọkpa vbe usun omugui ọghe ima na gha kha wẹẹ, a ka gha loo Stanley Theater ye emwi ughughan, ugbẹnso ẹbu emwa ghi wa si egbe koko gha ghee ikueta vbọ, ra iran ghi gha danmwehọ avbe ihuan. Vbọ ghi zẹe na gha na kha wẹẹ, ọ ma khẹke na loo ẹre ye emwi nọ ghi dekaẹn ugamwẹ? Ekọtu ghi mu ukpa mu uwerhẹn ghee ẹmwẹ na, iran na ghi kha wẹẹ, avbe ukọ arriọba nii ẹre ọ rriabe, ne iran ma na kue ne ima loo ọgbẹlẹzẹ na ye emwamwa ugamwẹ ọghe ima. Ekọtu keghi khama iran wẹẹ, ne iran rhie asẹ ne ima gualọ ne ima. I keghi bẹghe vbene Jehova ya gbinna ne emwa rẹn hẹ, ne iwinna ọghẹe mieke na gha mwẹ alaghodaro. I kegha sọyẹnmwẹ wẹẹ, mẹ tobọ mwẹ vbe gha mwẹ obọ vbọ.

Ẹre etẹn na ghi suẹn iwinna, iran na suẹn gha dọlọ ọgbẹlẹzẹ na yi, vbe iyeke ọni, ọ na ghi do khian Ọgua Asikoko. Ọgbẹlẹzẹ na, ẹre a na ya ọta guan, vbe ẹghẹ ne etẹn ni ghaa rre klasi nogie 79 ọghe owebe Gilead ya ladian vbe September 8, 1985. Vbe ẹghẹ na kha na, ọ ma he sẹ ukpo ọkpa na ya suẹn gha dọlọ ọgbẹlẹzẹ na yi. Ukpamuyọmọ nọ mẹ, ne I na gha rre usun emwa ni gui ẹzọ ne etẹn ima, ne iwinna Arriọba mieke na gha mwẹ alaghodaro, ọyẹnmwẹ nọ ghaa sẹ mwẹ vbe ẹghẹ nii, sẹ ọyẹnmwẹ nọ ghaa sẹ mwẹ, vbe ẹghẹ ne I ya gha ru iwinna na vbe orere. Sokpan I ma rẹn wẹẹ, e Jehova gha ye loo mwẹ ya gui ẹzọ nibun vbe odaro.

Vbe odẹ ukpo 1980, etẹn ni rre owa isinmwiegbe gha kha wẹẹ iran i si esagiẹn ye egbe, avbe ọbo ebo i kae yọ. Ọghe avbe ẹkpoliyẹkẹ ẹre ọ ghi wa khọọ sẹ. Avbe ọbuohiẹn kegha roro ẹre wẹẹ, ikhuo ni hanmwa i mwẹ asẹ ne iran khian ya kha wẹẹ, iran i si esagiẹn ye egbe. Iran kegha roro ẹre wẹẹ, deghẹ okhuo nọ hanmwa ma na si esagiẹn ye egbe, ọ sẹtin wu sẹ ọmọ nii rae, ẹghẹ nii, ọmọ nii ghi do khian ọmọ nẹi mwẹ iye.

Vbe December 29, 1988, vbe ọtẹn ima nokhuo ọkpa na tie ẹre Denise Nicoleau ghi biẹ nẹ, esagiẹn kegha tue ẹre. Rhunmwuda ọni, ọ na kẹ ekherhe ne esagiẹn ka vbe egbe ẹre, ẹre ọbo ebo na ghi kha wẹẹ te ọ khian si esagiẹn ye egbe. Sokpan ọtẹn ima nokhuo Nicoleau ma kue. Ẹdẹ ghi gbe, avbe ọbo ebo kegha rrie ekọtu, iran na ya rhie asẹ vbe obọ ọbuohiẹn, ne iran ya si esagiẹn ye ọtẹn ima na egbe, ọ gha khọn rẹn wẹẹ ọ ma kue yọ. Na kha na, iran ma zẹdẹ tama ọtẹn ima nokhuo na ra ọdafẹn ọnrẹn; ọbuohiẹn na gele kpasẹ ye iran re.

Vbe ọ ghi rre ẹdẹ Fraide, December 30, avbe ọbo ebo keghi si esagiẹn ye ọtẹn ima nokhuo egbe, agharhemiẹn wẹẹ ọdafẹn ọnrẹn kevbe emwa ọvbehe vbuwe ẹgbẹe ni ghaa gu ẹre rre owa isinmwiegbe nii ma kue yọ. Vbe ọ ghi rre ẹghẹ ota, avbe ọbo ebo  keghi do ya olakpa mu emwa nibun vbe ẹgbẹe okhuo na kevbe ediọn eso ni ghaa rre owa isinmwiegbe vbe ẹdẹrriọ. Iran keghi ba iran ifiẹzọ wẹẹ, iran ma kue ne iran si esagiẹn ye ọtẹn ima nokhuo na egbe. Vbe ẹdẹ ghi gbe, avbe ebe iyẹn kevbe ugha iyẹn hia ni rre New York City keghi mu iyẹn na.

Vbe ọ ghi rre owiẹ vbe ẹdẹ Mọnde, I keghi ya gui ẹzọ na ma ọbuohiẹn ọghe ekọtu ọkpa nọ yo. Eni ọbuohiẹn na ọre Milton Mollen. I keghi khama ọbuohiẹn nii wẹẹ, ọbuohiẹn nọ rhie asẹ ne avbe ọbo ebo ya si esagiẹn ye ọtẹn ima nokhuo egbe, ma zẹdẹ họn ene unu ọtẹn nokhuo na, a te miẹn wẹẹ ọ rhie asẹ ne iran. Ẹre ọbuohiẹn nii ighẹ Mollen na wẹẹ ne I dọlegbe bu irẹn gha dee vbe ẹghẹ avan, ne ima kakabọ mu ukpa mu uwerhẹn ghee ẹmwẹ na. Vbe I ghi werriegbe khian, Ọtẹn Nokpia Philip Brumley, nọ siẹnro ugha ne I na winna vbe Bẹtẹl keghi lele mwẹ. Ọbuohiẹn nii na vbe tie omugui ọghe owa isinmwiegbe nii nọ deba ima vbe iko nii. Ma ghi zẹ guan, egbe mwẹ na suẹn gha yọn, ẹre Ọtẹn Nokpia Brumley na fẹko gbẹn emwi ye ovbi ebe ọkpa, ọ na mu ma mwẹ, ọ na wẹẹ, ‘rọkhọ rọkhọ.’ Vbene ẹmwata, ibude ne Ọtẹn Nokpia Brumley rhie mẹ nii wa kakabọ rre ye ẹghẹ, rhunmwuda vbe ẹghẹ na kha na, ohu ẹre imẹ ghi ya gha guan, rhunmwuda ẹmwẹ nọ ma gba, ne omugui ọghe owa isinmwiegbe nii ghaa ta.

Vbe ọ ghi rre odẹ ughaẹdẹ ọkpa ne ima ya suẹn gha do iko nii, ọbuohiẹn ighẹ Mollen keghi kha wẹẹ, ne ima gha die ekọtu vbe owiẹ fioro na do guan yan ẹmwẹ na. Vbe ima khian ghi kpa, ọbuohiẹn nii keghi kha wẹẹ, “Ẹi khian gha khuẹrhẹ ne omugui ọghe owa isinmwiegbe nii vbe akhuẹ.” Vbe I ghi họn ẹmwẹ nii, ọ na yevbe na miẹn wẹẹ e Jehova tama mwẹ wẹẹ, ‘Ghẹ gbokhuo ovbi mwẹ, ọkpa gbe ifuẹn ne uwa nẹ.’ I wa ghọghọ wẹẹ, e Jehova loo ima ya mu ahoo ọghẹe sẹ.

Ma ma rherhe vbiẹ vbe asọn nii, ma na gha muegbe yotọ khẹ ẹzọ ne ima khian gui vbe ẹdẹ gha gbe. Ekọtu ne ima khian na gui ẹzọ na, ma rree gbe vbe abotu nọ rre Brooklyn, rhunmwuda ọni, owẹ ẹre ima nibun ya khian sẹ evba. Ọbuohiẹn enẹ ẹre ọ ghaa rre owa ẹzọ nii vbe ẹdẹrriọ. Vbe ima ghi gui ẹzọ ọghe ima ma iran, iran na ghi kha wẹẹ, te avbe ọbo ebo nii wa rriabe, ne iran na si esagiẹn ye ọtẹn ima nii egbe. Ekọtu nii keghi kha wẹẹ, ke ẹdẹrriọ kpa, ọbuohiẹn ke ọbuohiẹn nọ kpasẹ yọ, ne avbe ọbo ebo si esagiẹn ye ọmwa rhọkpa egbe, vbene iran ma na ka họn ene unu ọmwa nii, te ọbuohiẹn vberriọ rriabe.

Vbe ọ ma he kpẹẹ vba, ekọtu nọ ghi yo sẹ vbe New York, keghi kha wẹẹ, ọtẹn ima nokhuo Nicoleau mwẹ asẹ nọ ya tae wẹẹ irẹn i gualọ esagiẹn. Vbuwe ẹzọ enẹ ni dekaẹn esagiẹn ne otu ọghomwa gui vbe ekọtu ughughan vbe United States, ọna ọre nokaro ne I na gha mwẹ obọ. (Ya ghee ẹkpẹti nọ khare wẹẹ “ Ẹzọ Ughughan Na Gui Vbe State Supreme Court Ne  Ọkpa Na Gbe Ifuẹn Ne Ima.”) I vbe deba avbe omugui ọvbehe ni ga vbe Bẹtẹl gui ẹzọ nibun nọ dekaẹn ọmwa nọ khẹke nọ koko emọ, vbe ọdọ vbe amwẹ gha wannọ egbe, ẹzọ nọ dekaẹn ebe orọnmwẹ na sọ, kevbe nọ dekaẹn avbe owa kevbe otọ.

Vbene I te rhie ọvbokhan mwẹ ighẹ Dawn, ọ ka biẹ emọ eha ne okpia ọvbehe nẹ. Sokpan vbe ẹghẹ ne I ya rẹn ọnrẹn, irẹn vbe okpia nii ma ghi gha rrọọ, iran sọ ebe orọnmwẹ nẹ. Irẹn ọkpa ẹre ọ ghi gha koko emọ eha nii khian, ọ na vbe gha ru iwinna arọndẹ ba re. Ọ ma gha khuẹrhẹ nẹẹn hiehie. Vbe I ghi bẹghe vbene okhuo na ya zọghae hẹ vbe ugamwẹ e Jehova, agharhemiẹn wẹẹ emwi ma gha khuẹrhẹ nẹẹn, ẹmwẹ ọnrẹn na wa gha yẹẹ mwẹ. Vbe ukpo 1992, vbe ima ghi yo Asikoko Odin nọ mwẹ uhunmwuta nọ khare wẹẹ, “Light Bearers” vbe New York City, I na ghi tama rẹn wẹẹ I hoo ne imẹ vbe ọre gba gha rrọọ. Vbe ọ ghi rre ukpo ọkpa, ma na ghi ru orọnmwẹ. Te Jehova gele ya okhuo na ru mwẹ ẹse, rhunmwuda, ọmwa nọ deziẹn vbe odẹ ọghe orhiọn ẹre nọ, erriọ ẹre ọ vbe ya soyaya. Ke obọ ne I ya rhie ẹre gha dee, te agbọn ghi wa rhiẹnrhiẹn mwẹ.—Itan 31:12.

Vbe I da rhie ọvbokhan mwẹ, ivbi ẹre eha kegha rre ukpo 11, 13, kevbe 16. I na wa gha hoo ne I gha ya obọ esi mu iran, kevbe ne I rhie iran zẹvbe ivbi mwẹ. Rhunmwuda ọni, I keghi hia ne I tie emwi hia ne otu ọghomwa gbẹnnẹ vbekpa ẹgbẹe ne umọbọ ye. Ọ ma gha khuẹrhẹ vbe ẹghẹ okaro nii, sokpan vbene ẹghẹ ya khian, iran na do gha ya aro erha ghee mwẹ, iran na vbe do gha ghee mwẹ zẹvbe ọse iran. Mẹ vbe ọvbokhan mwẹ wa gha kue ne avbe ọse iran do gha tuẹ iran vbe owa, rhunmwuda ọni, te owa ima wa gha vuọn vbe ẹghẹ hia.

Vbe ọ ghi rre ukpo 2013, mẹ vbe ọvbokhan mwẹ keghi kpa gha rrie Wisconsin ne ima ya gbaroghe evbibiẹ ima, rhunmwuda vbe ẹghẹ na, iran khian ọmaẹn nẹ. I wa ghọghọ wẹẹ, ẹkpotọ ye kie mẹ, ne I ye gha ke owa rre do gha winna vbe Bẹtẹl. I na ye gha ru iyobọ ne ugha nọ siẹnro avbe ẹzọ ọghomwa vbe abotu.

Vbe ọ ghi rre September 2018, I na do bẹghe ẹre wẹẹ, ẹghẹ hia ẹre I ghi ya khiakhia ẹho. I ma na ka khiakhia ẹho nẹ, I i sẹtin guan. Ẹre I na ghi bu ọbo ebo ọghe ima, sokpan vbe ọ ghi ghee mwẹ egbe, ọ na wẹẹ irẹn ma bẹghe emianmwẹ rhọkpa vbe egbe mwẹ. Vbe ọ ma he kpẹẹ vba, I na bu ọbo ebo ọvbehe. Ọbo ebo nii na wẹẹ ne I gha rrie ọghe neurologist (ọni ọre ọbo ebo nọ fiẹnro vbene ẹrherhe ya winna hẹ). Vbe ọ ghi rre January 2019, e neurologist nii keghi kakabọ ghee egbe mwẹ, ọ na do bẹghe ẹre wẹẹ, I mwẹ emianmwẹ ẹrherhe ne ebo tie ẹre progressive supranuclear palsy (PSP).

Vbe ọ ghi rre ikpẹdẹ eha, I kegha ku iku isasegbe ọkpa, ẹre I na de. I keghi wan urhuabọ mwẹ. Ọ kpẹẹ re ne I ke ku iku isasegbe na, rhunmwuda, iku isasegbe nọ wa yẹẹ mwẹ ẹre nọ. I na do bẹghe ẹre wẹẹ, owẹ mwẹ i ghi guọ otọ ẹse rhunmwuda emianmwẹ ne I khuọnmwi. Vbene emianmwẹ na ya kuan mwẹ use yotọ wa kpa mwẹ odin. I ke rẹn emwi nọ sunu, na do rhan unu guan, na zẹ owẹ kevbe na mi evbare re, na do gha ba kua.

I wa ghọghọ wẹẹ I sẹtin ya iwinna mwẹ zẹvbe omugui ye iwinna Arriọba ike. I vbe ghọghọ wẹẹ ẹkpotọ kie mẹ ya gbẹnnẹ ako nibun vbe ebe ughughan ne avbe ọbo ebo, avbe omugui kevbe avbe ọbuohiẹn tie. Ẹkpotọ vbe kie mẹ, ne I ya guan vbe idagbo, ne I ya sinmwi oseghe ne emwa ọghe Jehova, vbe nọ dekaẹn vbene a ya gbaroghe ọmwa nọ khuọnmwi hẹ, vbe nai na si esagiẹn yọ re egbe. Ọrheyerriọ, emwi ne I khian sẹtin ta ọre emwi nọ rre ebe Luk 17:10: ‘Ọviẹn kẹkan ẹre I khin. Emwi nọ khẹke ne I ru, ẹre I ru.’