Osẹ rrọọ nọ rhiẹre ma wẹẹ, ẹghẹ ne Jesu ya dinmwiamẹ vbe ukpo 29 C.E ẹre ọ ya khian Ogie Ohẹn. Vbe ima ya rẹn hẹ? Ẹghẹ ne Jesu ya dinmwiamẹ, ọ keghi rhiẹre ma wẹẹ, irẹn muegbe ne irẹn ya ya egbe ẹre zọ ese gie Osanobua vbe aka ọghe orhiọn. Aka ọghe orhiọn na keghi mudia ye ihe ahoo ọghe Osanobua. (Gal 1:4; Hib 10:5-10) Ugbẹnvbe a miẹn wẹẹ, ke ẹghẹ ne Jesu ya dinmwiamẹ gha dee, ẹre aka ọghe orhiọn na ke rrọọ, ọni rhiema wẹẹ, Ọgua Osa ọghe orhiọn rrọọ nẹ, ke ẹghẹ nii gha dee. Ọgua Osa ọghe orhiọn na keghi re emwamwa ne Jehova ru lekpae izọese adẹwerriegbe ọghe Jesu nọ kie ẹkpotọ yọ, ne ima sẹtin gha rhie ugamwẹ nọhuanrẹn gie Jehova. Abọ ọkpa ne kpataki vbe Ọgua Osa ọghe orhiọn, ẹre aka nii khin.—Mat 3:16, 17; Hib 5:4-6.

Ugbẹnvbe a miẹn wẹẹ, Ọgua Osa ọghe orhiọn rrọọ nẹ, te ọ vbe khẹke ne ogie ohẹn vbe gha rrọọ nọ khian gha winna vba. Rhunmwuda ọni, e Jehova keghi ya “orhiọn nọhuanrẹn kevbe ẹtin” hannọ Jesu zẹ nọ gha ga zẹvbe ogie ohẹn na. (Iwinna 10:37, 38; Mak 1:9-11) Sokpan, vbe ima ya rẹn wẹẹ, e Jehova hannọ Jesu nẹ zẹvbe Ogie Ohẹn, vbene Jesu te wu kevbe vbene ọ te rhiọ kpaegbe? Igiemwi ọghe Erọn kevbe emwa ni ghi do gha re ogie ohẹn vbe Erọn ghi wu nẹ gha rhie ewanniẹn ye inọta na.

Uhi e Mosis khare wẹẹ, ogie ohẹn ọkpa ẹre ọ khian sẹtin la Ehe Nọ Huan Sẹ Ehia vbuwe ibọkpọ ọghe ugamwẹ, erriọ vbe gha ye vbe a ghi bọ Ọgua Osa nẹ. Ukpọn na tan ye onurho, ẹre ọ ghaa rre ẹkpo Ehe Nọ Huan Sẹ Ehia kevbe Ehe Nọ Huanrẹn vbuwe Ọgua Osa. Ẹdẹ A Miẹn Ayabọ ọkpa, ẹre ogie ohẹn ya gberra ukpọn onurho nii la uwu Ehe Nọ Huan Sẹ Ehia. (Hib 9:1-3, 6, 7) Te a ka hannọ Erọn kevbe emwa ni rhihe ẹre nẹ zẹvbe ogie ohẹn, iran ke sẹtin la ukpọn onurho nii gberra la Ehe Nọ Huan Sẹ Ehia nii. Erriọ vbe ye, ẹi mwẹ e Jehova ma hannọ Jesu zẹ nẹ zẹvbe Ogie Ohẹn ọghe Ọgua Osa ọghe orhiọn, a te miẹn wẹẹ Jesu wu. Vbe iyeke ọni, Jesu keghi la ukpọn onurho nii gberra, ọni ọre ẹghẹ nọ ya sẹ egbe ikpakpa nọ te mwẹ rae, ọ na ghi mu ọghe orhiọn yọ. (Hib 10:20) Ọna ẹre ọ si ẹre ne ukọ e Pọl na kha wẹẹ, te Jesu rre “zẹvbe ogie ohẹn.” Ọ na vbe kha wẹẹ, “ẹi re ehe nọhuanrẹn ne emwa ye obọ ru, ne a ya taa ọghe ẹmwata nọ rrọọ, ẹre Kristi lao. Ẹrinmwi fẹẹrẹ irẹn wa gha rrie.”—Hib 9:11, 24.

Ẹghẹ na ya mu olọ gbe ile ọgbọn, ẹre ọ vbe ya suẹn gha winna. Vbe ima gu kha vberriọ? Vbe Jesu ghi sẹ ẹrinmwi, ọ na muẹn ye erhae obọ ighẹ asẹ ne irẹn te mwẹ ne irẹn ya gha rrọọ zẹvbe ọmwa nọ gbae vbe uhunmwu otagbọn. Emwi ne Jesu ru nii, keghi re ọkpa vbe usun obẹlẹ na ya mu olọ gbe ile ọgbọn nii, ẹghẹ nii ẹre ile na vbe ya suẹn gha winna. De obẹlẹ na guan kaẹn na?

Vbe okaro, Jesu keghi ya rhiegbe ma e Jehova vbe ẹrinmwi; vbe iyeke ọni, ọ na muẹn ye erhae obọ ighẹ asẹ ne irẹn te mwẹ, ne irẹn ya gha rrọọ zẹvbe ọmwa nọ gbae vbe uhunmwu otagbọn; vbe iyeke ọni, e Jehova keghi miẹn ọnrẹn yi vbe obọ Jesu ighẹ asẹ nii. Vbene ọ te sẹ ẹghẹ na kha na, a ma he mu olọ gbe ile ọgbọn nii, ọ ma he vbe suẹn gha winna.

E Baibol ma wa sunu yọ taara ẹghẹ ne Jehova ya miẹn ọnrẹn yi, izọese adẹwerriegbe ọghe Jesu, rhunmwuda ọni, ma i khian wa sẹtin ta ẹghẹ na ya mu olọ gbe ile ọgbọn nii, kevbe ẹghẹ nọ ya suẹn gha winna. Vbọrhirhighayehẹ, ma rẹnrẹn wẹẹ, ke ẹghẹ ne Jesu ya kpa gha rrie ẹrinmwi ya sẹ ẹghẹ na ya do Ugie Pẹntikọst vbe ukpo 33 C.E., ikpẹdẹ igbe ẹre ọ ghaa rre uwu ẹkpo. (Iwinna 1:3) Vbuwe asẹ na, ẹre Jesu ya muẹn ye obọ e Jehova, asẹ nọ te mwẹ nọ ya gha rrọọ zẹvbe ọmwa nagbọn nọ gbae, e Jehova na vbe miẹn ọnrẹn yi. (Hib 9:12) Emwi nọ sunu vbe ẹghẹ na ya do Ugie Pẹntikọst keghi sosẹ yọ wẹẹ, e Jehova miẹn izọese adẹwerriegbe ọghe Jesu yi nẹ. (Iwinna 2:1-4, 32, 33) Ọna ẹre ọ ghi ya ima rẹn wẹẹ, ile ọghe ọgbọn suẹn gha winna nẹ vbe ẹghẹ nii.

Olika ẹmwẹ ọghe ẹmwẹ ne ima guan kaẹn sin ọre wẹẹ, ẹghẹ ne Jehova ya miẹn izọese adẹwerriegbe ọghe Jesu yi, ẹre a ya mu olọ gbe ile ọgbọn nii, ẹre ọ vbe ya suẹn gha winna, vbene Jesu na ga zẹvbe Ogie Ohẹn kevbe zẹvbe Ọmwa Nọ Rre Uwu Ẹkpo e Jehova kevbe emwa na hannọ zẹ vbe ile ọgbọn nii.—Hib 7:25; 8:1-3, 6; 9:13-15.