1. Zẹvbe nọ rre ebe 3 Jọn 3, 4, de emwi nọ ya ima sọyẹnmwẹ?

MUẸN roro vbene ọ ghaa ye ukọ e Jọn hẹ, vbe ọ họn wẹẹ, etẹn ne irẹn ru iyobọ na ya rẹn odẹ ọghe ẹmwata, ye ya ẹkoata ga e Jehova! Isievẹn nibun ẹre etẹn na ghaa werriẹ aro daa. E Jọn kegha hia nọ ru iyobọ ne iran ya gha mwẹ amuẹtinyan nọ wegbe, rhunmwuda, te ọ ghaa ghee iran zẹvbe ivbi ẹre. Erriọ vbe ye, ma gha bẹghe ẹre wẹẹ, ivbi ima ra emwa ne ima ru iyobọ na ya rẹn odẹ ọghe ẹmwata, ya egbe iran fiohan ne Jehova kevbe wẹẹ, iran ye mudia gbain vbe ugamwẹ e Jehova, ẹko keghi sẹ ima ọyẹnmwẹ.—Tie 3 Jọn 3, 4.

2. Vbọzẹe ne Jehova na dia e Jọn ya gbẹn elẹta eha gie Ivbiotu e Kristi?

² Ọ gha kẹ, Ẹfisọs ra ọkpẹn Ẹfisọs ẹre Jọn ghaa ye vbe ukpo 98 C.E. Egbọre, vbe ẹghẹ na kha na, te a da fan e Jọn vbe imu vbe otọ ne amẹ gbodin ga ọghe Patmọs. Asẹ na, ẹre orhiọn nọhuanrẹn ọghe Jehova ya dia e Jọn ya gbẹn elẹta eha gie Ivbiotu e Kristi, nọ ya rhie igiọdu ne iran, ne iran ghẹ gi amuẹtinyan ne iran mwẹ dae Jesu worua kevbe ne iran mudia gbain vbe odẹ ọghe ẹmwata.

3. De avbe inọta ne ima khian ziro yan?

³ E Jọn ọkpa ẹre ọ ghi gha rre agbọn, vbe ukọ ọghe Jesu nikẹre ghi wu nẹ. Orhiọn ọnrẹn ma ghi sotọ vbe ọ bẹghe ẹre wẹẹ, emwa okeke rre uwu iko. * (1 Jọn 2:18, 19, 26) Emwa okeke na kegha kha wẹẹ, iran rẹn Osanobua, sokpan iran ma zẹdẹ gha ya ilele ọghẹe ru emwi. Gia ziro yan adia ne Jehova ghi loo ukọ e Jọn ya rhie ne etẹn ni rre uwu iko. Ma gha vbe rhie ewanniẹn ye inọta eha na: Vbe a yae kha deghẹ a na wẹẹ, ọmwa rre odẹ ọghe ẹmwata? De emwi eso nọ gha sẹtin ya ọmwa la hin odẹ ọghe ẹmwata rre? De vbene ima khian ya sẹtin ru iyobọ ne etẹn ọvbehe hẹ, ne iran ya mudia gbain vbe odẹ ọghe ẹmwata na?

4. Zẹvbe nọ rre ebe 1 Jọn 2:3-6 kevbe 2 Jọn 4, 6, ọmwa ghaa hoo nọ gha rre odẹ ọghe ẹmwata, vbọ khẹke nọ ru?

⁴ Adeghẹ ọmwa hoo nọ gha rre odẹ ọghe ẹmwata, te ọ khẹke nọ ka rẹn avbe ẹmwata ni rre Evbagbẹn Nọhuanrẹn. Deba ọni, ọ ghi vbe “gha lele uhi ne Osanobua yi.” (Tie 1 Jọn 2:3-6; 2 Jọn 4, 6.) Te Jesu wa rhie igiemwi esi yotọ ne ima, vbe nọ dekaẹn na gha họn ẹmwẹ ne Jehova. Nọnaghiyerriọ, odẹ ọkpa kpataki ne ima khian ya rhiẹre ma wẹẹ, ma họn ẹmwẹ ne Jehova ọre ne ima gha ya egbe tae Jesu.—Jọn 8:29; 1 Pit 2:21.

5. De ilẹkẹtin nọ khẹke ne ima gha mwẹ?

⁵ Ma ghaa hoo ne ima mudia gbain vbe odẹ ọghe ẹmwata na, ọ khẹke ne ima gha mwẹ ilẹkẹtin wẹẹ, e Jehova i sẹtin ta ohoghe kevbe wẹẹ, emwi hia nọ tama ima vbe Evbagbẹn Nọhuanrẹn keghi re ẹmwata. Ọ khẹke ne ima vbe yayi wẹẹ, e Jesu ọre Mẹzaia. Emwa nibun vbe ẹdẹnẹrẹ ma yayi wẹẹ, Jesu ọre ọmwa ne Jehova zẹ nọ gha kha zẹvbe Ọba ọghe Arriọba Osanobua. Ukọ e Jọn keghi kha wẹẹ, “avbe ọrẹrẹ ọmwa nibun” rrọọ, ni gha sẹtin rẹrẹ emwa ni ma mu ẹtin yan emwi ne Baibol tae vbekpae Jehova kevbe Jesu. (2 Jọn 7-11) E Jọn vbe kha wẹẹ: “Gha ọ ghi re nene ọhọnhoghe khekherriọ? Irẹn nọ ighẹ ọmwa nọ khare ighẹ Jesu i re nene Kristi.” (1 Jọn 2:22) Adeghẹ ima ma hoo ne ọmwa rhọkpa mu ima rẹrẹ, ọ khẹke ne ima gha ruẹ e Baibol ne egbe ima. Ẹghẹ nii, ma ghi gele do rẹn e Jehova kevbe Jesu. (Jọn 17:3) Ọna ẹre ọ khian ghi ya ima gha mwẹ ilẹkẹtin wẹẹ, emwi ne ima yayi keghi re ẹmwata.

6. De isievẹn ne avbe igbama werriẹ aro daa?

⁶ Ọ khẹke ne Ivbiotu e Kristi hia, katekate avbe igbama gha begbe, ne iziro ọghe emwa nagbọn ghẹ do si iran hin odẹ ọghe ẹmwata rre. (1 Jọn 2:26) Ọ mwẹ ọtẹn nokhuo ọkpa na tie ẹre Alexia, * nọ ke France rre. Ukpo 25 ẹre ọtẹn nokhuo na ye. Ọ keghi kha wẹẹ: “Vbe I waan dee, a keghi maa mwẹ re vbe owebe wẹẹ, te emwi hia didaghori rre. Imamwaemwi na kevbe emwi ọvbehe ne iran ghaa maa mwẹ re vbe owebe, kegha ya mwẹ gbe awawẹ deghẹ imamwaemwi ẹmwata ẹre ọ gele rre uwu e Baibol. Ẹghẹ eso, emwi ne iran maa mwẹ re vbe owebe ghi wa mu mwẹ ekhọe. Sokpan I na do gha roro ẹre wẹẹ, ọ ma khẹke ne I bizugbe emwi ne Jehova tae vbe Baibol, ne I wa gha yaeyi ighẹ emwi hia na maa mwẹ re vbe owebe.” Ẹre Alexia na ghi suẹn gha tie ebe ọghomwa na tie ẹre Life—How Did It Get Here? By Evolution or by Creation? Vbene ọ te sẹ uzọla eso, ọ ma ghi gha gbe awawẹ. Alexia keghi kha wẹẹ: “I keghi ru ezanzan ne egbe mwẹ, ne I mieke na gele yayi wẹẹ, imamwaemwi ẹmwata  ẹre ọ rre uwu e Baibol. I na do bẹghe ẹre wẹẹ, I ghaa hoo ne I gha mwẹ oghọghọ nọ sẹ otọ ẹko, ọ khẹke ne I gha ya ilele ọghe Baibol ru emwi.”

7. De emwi nọ khẹke ne ima na gha begbe? Vbọzẹe?

⁷ Ọ khẹke ne ima hia, ke ọmaẹn ke ẹghele gha begbe, ne ima ghẹ do gha mu egbe ima rẹrẹ wẹẹ ima ga e Jehova, vbene ima na mwẹ obọ vbe uyinmwẹ nọ ma khẹke. E Jọn gi ima rẹn wẹẹ, ma i khian sẹtin gha rre odẹ ọghe ẹmwata, ne ima vbe gha mwẹ obọ vbe uyinmwẹ esakan. (1 Jọn 1:6) Ma ghaa hoo ne ima sẹtin gha ya ẹko rhiẹnrhiẹn e Jehova vbe ẹghẹ hia, ọ khẹke ne ima gha yerre wẹẹ, emwi rhọkpa i rrọọ nọ lẹre vbe odaro e Jehova. Ọ gha khọnrẹn wẹẹ, emwa ma bẹghe emwi ne ima ru vbe ẹkhokho, e Jehova bẹghe ẹre.—Hib 4:13.

8. De iziro nọ ma khẹke ne ima gha mwẹ?

⁸ Ọ ma khẹke ne ima gha ya aro ne emwa nagbọn ya ghee orukhọ ghee ẹre. Ukọ e Jọn khare wẹẹ: “Deghẹ ima khare ighẹ ma i mwẹ orukhọ, te ima rẹrẹ egbe [ima].” (1 Jọn 1:8) Vbe ẹghẹ ọghe ukọ e Jọn, emwa okeke kegha kha wẹẹ, ọ gha khọnrẹn ne ọmwa mema gha ru orukhọ, ọ gha ye sẹtin gha re ọse ọghe Osanobua. Egbe iziro vbenian ẹre emwa nibun wa mwẹ vbe ẹdẹnẹrẹ. Emwa nibun vbe ẹdẹnẹrẹ keghi kha wẹẹ, iran ya Osa yi, sokpan iran i lẹẹ ne emwi ne Osanobua tie ẹre orukhọ, katekate deghẹ ọ na dekaẹn emwi ọdọ vbe amwẹ na ru. Iran keghi ghee avbe uyinmwẹ esakan ni sọnnọ e Jehova zẹvbe emwi nọ ma de emwi nọ rhiae, iran ghi gha kha wẹẹ, iran ẹre ọ rẹn vbene iran khian ya loo arrọọ ọghe iran hẹ.

9. De ere ne avbe igbama gha miẹn, vbe iran ghaa ya avbe ilele ni rre Baibol ru emwi?

⁹ Emwa ni lẹga igbama eso ni re Osẹe Jehova vbe owebe ra isiwinna, keghi re emwa ni mwẹ obọ vbe uyinmwẹ esakan, rhunmwuda ọni, ọ ghi do gha lọghọ etẹn ima na, ne iran sẹtin lele emwi ne Baibol tae vbekpa uyinmwẹ vbenian. Isievẹn vbenian ẹre ọtẹn nokpia ọkpa na tie ẹre Aleksandar werriẹ aro daa. Ọtẹn ima na khare wẹẹ: “Vbe I rre owebe, ibiẹka ikhuo eso kegha tama mwẹ wẹẹ, ne I gu iran ru emwi ọdọ vbe amwẹ. Iran na wẹẹ, ugbẹnvbe a miẹn wẹẹ, I i mwẹ egbakhian okhuo, ọni rhiema wẹẹ, ọghe okpia ẹre I mwẹ.” Adeghẹ isievẹn vbenian ẹre u werriẹ aro daa, ghẹ mianmian wẹẹ, u ghaa ya avbe ilele ọghe Baibol ru  emwi, ẹre u khian na gha mwẹ oghọghọ. U i khian vbe mu emianmwẹ na mu vbe oghẹ, orhiọn ruẹ ghi sotọ, u ghi vbe gu e Jehova gha mwẹ asikẹgbe nọ wegbe. Zẹvbe ne u ya hia ne u gha lẹẹ ne emwi dan, emwi esi na ru ghi do gha yẹẹ ruẹ sayọ. Ọ vbe khẹke ne u gha yerre wẹẹ, obọ Esu ẹre ọ ke rre ighẹ iziro nọ ma gba ne emwa nagbọn mwẹ vbekpa emwi ọdọ vbe amwẹ na ru. Nọnaghiyerriọ, ẹghẹ ke ẹghẹ ne u ya lẹẹ ne edanmwẹ ọghe uyinmwẹ esakan, te u rhiẹre ma wẹẹ, obọ ruẹ ke ukhunmwu ne Esu.—1 Jọn 2:14.

10. De vbene emwi nọ rre ebe 1 Jọn 1:9 khian ya ru iyobọ ne ima hẹ, ne ima sẹtin gha ya ekhọe ọguọmwaziro nọ hianrẹn ga e Jehova?

¹⁰ Ma rẹnrẹn wẹẹ, e Jehova ọkpa ẹre ọ mwẹ asẹ na ya tae deghẹ emwi maan ra ẹi maan. Ọni ẹre ọ si ẹre ne ima na lẹẹ ne emwi ke emwi ne Jehova ghi tie ẹre orukhọ nẹ. Sokpan deghẹ ima na ru orukhọ, ọ khẹke ne ima miẹn orukhọ ọghe ima kue ma e Jehova vbe erhunmwu. (Tie 1 Jọn 1:9.) Ma gha vbe ru orukhọ nọ wegbe, ọ khẹke ne ima bu ediọn ni rre uwu iko, ne iran ru iyobọ ne ima, rhunmwuda iran ẹre Jehova zẹ nọ gha gbaroghe ima. (Jems 5:14-16) Vbọrhirhighayehẹ, ọ ma khẹke ne ima gi orukhọ ne ima ru vbe ẹghẹ nọ gberra ye gha kpokpo ima vbe orhiọn. Vbọzẹe? Rhunmwuda, izọese adẹwerriegbe ọghe Jesu kie ẹkpotọ yọ ne Jehova ya ya orukhọ ọghe ima bọ ima. Vbene ẹmwata, ne Jehova na wẹẹ, irẹn gha ya orukhọ ọghe ima bọ ima, vbe ima gha ro iro fi uyinmwẹ werriẹ, ẹi re te ọ ba tae. Nọnaghiyerriọ, emwi rhọkpa i rrọọ nọ gha sẹtin mu idobo ye ima egbe, ne ima ghẹ sẹtin ya ekhọe ọguọmwaziro nọ hianrẹn ga e Jehova.—1 Jọn 2:1, 2, 12; 3:19, 20.

11. De vbene ima khian ya sẹtin lẹẹ ne avbe imamwaemwi nọ gha sẹtin gbe amuẹtinyan ọghe ima mu otọ?

¹¹ Te ima gha lẹẹ ne avbe imamwaemwi ọghe emwa okeke. Ke obọ na ya mu iko ọghe Ivbiotu e Kristi gbọọ, Esu keghi loo egbe imamwaemwi vbenian, nọ mieke na gbe amuẹtinyan ọghe Ivbiotu e Kristi mu otọ. Nọnaghiyerriọ, ọ khẹke ne ima rẹn alughaẹn nọ rre imamwaemwi ẹmwata kevbe ọghe ohoghe. * Emwa okeke sẹtin loo  intanẹt ya gha ta ohoghe khian vbekpae Jehova kevbe etẹn ima, ne iran mieke na gbe ẹre mu otọ, amuẹtinyan ne ima mwẹ dae Jehova kevbe ahoẹmwọmwa ne ima mwẹ ne etẹn ima. Ọ ma khẹke ne ima ya avbe ohoghe vbenian yi, rhunmwuda, Esu ẹre ọ muẹn khian.—1 Jọn 4:1, 6; Arhie 12:9.

12. Vbọzẹe nọ na khẹke ne ima gha mwẹ amuẹtinyan nọ wegbe wẹẹ, emwi ne ima yayi keghi re ẹmwata?

¹² Adeghẹ ima ma hoo ne Esu gbe amuẹtinyan ọghe ima mu otọ, ọ khẹke ne ima gi amuẹtinyan ne ima mwẹ dae Jesu wegbe sayọ, ma ghi vbe gha mwẹ ilẹkẹtin wẹẹ, Jesu ẹre Jehova loo ya mu emwamwa ọghẹe sẹ. Ọ khẹke ne ima vbe yayi wẹẹ, ọviẹn nọ gia mu ẹtin yan kevbe nọ fuẹro, ẹre Jehova loo ya kpemehe evbare orhiọn ne ima vbe ẹdẹnẹrẹ. (Mat 24:45-47) Ma ghaa ruẹ e Baibol ne egbe ima vbe ẹghẹ hia, amuẹtinyan ọghe ima ghi gha wegbe yọ. Amuẹtinyan ọghe ima ghi do yevbe erhan nọ kakabọ gbọzinian. Egbe ẹmwẹ na ẹre Pọl tama etẹn ni ghaa rre Kọlose vbe elẹta nọ gbẹn gie iran. Ọ keghi kha wẹẹ: “Vbene uwa ghi na rhan obọ miẹn e Kristi Jesu nẹ nian zẹvbe Nọyaẹnmwa, wa ku ẹdẹ agbọn uwa gbe ba ọghẹe. Wa gie inian uwa dinmwi ye uwu irẹn, wa hẹnhẹn ẹdẹ agbọn uwa yan irẹn, ne uwa gha wegbe yọ vbe uwu iyayi uwa.” (Kọl 2:6, 7) Adeghẹ ọmwa na ya amuẹtinyan ọghẹe khian nọ wegbe, Esu kevbe ikpayẹ ọre i khian sẹtin si ẹre hin odẹ ọghe ẹmwata na rre.—2 Jọn 8, 9.

13. De emwi nọ khẹke ne ima kọ ye orhiọn? Vbọzẹe?

¹³ Ọ khẹke ne ima kọe ye orhiọn wẹẹ, te agbọn na khian gha khẹko ima. (1 Jọn 3:13) Ukọ e Jọn keghi ye ima ẹre rre wẹẹ, “ọmwa dan nii ẹre ọ kha yan agbọn na hia.” (1 Jọn 5:19) Zẹvbe ne ima ya sikẹ ufomwẹ ọghe agbọn dan na, erriọ ohu nọ mu e Setan ya tua sayọ. (Arhie 12:12) Ọ keghi hoo nọ loo uyinmwẹ esakan kevbe imamwaemwi ọghe emwa okeke, nọ mieke na si ima hin odẹ ọghe ẹmwata na rre. Sokpan, ẹi re ọni ọkpa, ọ vbe hia nọ loo ukpokpo nọ wegbe. Esu rẹnrẹn wẹẹ ovbiẹghẹ kherhe ẹre irẹn ghi mwẹ, rhunmwuda ọni, ọ keghi hia vbe odẹ ke odẹ nọ mu idobo ye iwinna ikporhu ọghe ima kevbe nọ gbe amuẹtinyan ọghe ima mu otọ. Ẹi khabe ne a na mu awua ye iwinna ugamwẹ ọghe ima vbe ẹvbo eso. Ọrheyerriọ, te etẹn ima ni rre ẹvbo vbenian wa ye da imudiase ọghe iran yi. Igiemwi ọghe iran rhiẹre ma wẹẹ, emwi rhọkpa i rrọọ ne Esu gha ru ima re, nọ gha ya ima mu imudiase ọghe ima fua!

14. De odẹ ọkpa ne ima khian ya ru iyobọ ne etẹn ima, ne iran ya mudia gbain vbe odẹ ọghe ẹmwata?

¹⁴ Ma ghaa hoo ne ima ru iyobọ ne etẹn ya mudia gbain vbe odẹ ọghe ẹmwata na, te ọ khẹke ne ima gha mwẹ ẹnina daa iran. (1 Jọn 3:10, 11, 16-18) Ọ khẹke ne ima gha rhie ahoẹmwọmwa ma iran vbe ẹghẹ hia, uhiẹn ya sẹ egbe ẹghẹ ne emwi ya lọghọ. Vbe igiemwi, uwẹ rẹn ọtẹn rhọkpa ne ọmwa rẹn wu nọ gualọ ifuẹko ra iyobọ ọvbehe ra? Ra uwẹ vbe họn wẹẹ, odekun ẹrhia ra oguomiẹrẹ sunu vbe ẹdogbo ọghe etẹn eso, kevbe wẹẹ, iran hoo ne iran dọlegbe bọ owa ọghe iran, ra Ọgua Arriọba ọghe iran? Ahoẹmwọmwa ne ima mwẹ ne etẹn ima i re ọghe okpunu, rhunmwuda ọni, emwi nọ wegbe gha sunu daa iran, ma keghi zẹ emwi ru ne ima ya ru iyobọ ne iran.

15. Zẹvbe nọ rre ebe 1 Jọn 4:7, 8, vbọ khẹke ne ima ru?

¹⁵ Ma ghaa rhiẹre ma wẹẹ, ma hoẹmwẹ etẹn ima, te ima ya egbe taa Erha mwa nọ rre ẹrinmwi ighẹ e Jehova. (Tie 1 Jọn 4:7, 8.) Odẹ ọkpa kpataki ne ima khian ya ru ọna ọre ne ima gha yabọ egbe. Vbe igiemwi, gia kha wẹẹ, ọmwa ru ima emwi nọ sọnnọ ima, ọ na vbe do rinmwian ima. Ma gha yabọe, ma na vbe rhie emwi nọ ru ima re hin ekhọe rre, te ima rhiẹre ma wẹẹ, ma mwẹ ahoẹmwọmwa. (Kọl 3:13) Ọ mwẹ ọtẹn nokpia ọkpa na tie ẹre Aldo nọ werriẹ aro daa isievẹn vbenian. Ọtẹn nokpia ọvbehe ne Aldo te wa rhie ọghọ na, keghi ya unu kpamisikan ku ẹvbo nọ ke rre. Aldo keghi kha wẹẹ, “Ẹghẹ hia ẹre I ya gha na erhunmwu gie Jehova nọ ru iyobọ mẹ, ne I ghẹ do gha mu ohu ọtẹn na.” Sokpan, ọ mwẹ emwi  ọvbehe ne Aldo ru. Ọ na wẹẹ ne irẹn vbe ọtẹn nokpia nii koko winna vbe ikporhu. Vbe iran ghi rre ikporhu, Aldo keghi tama ọtẹn nokpia nii wẹẹ, emwi nọ tae wa kakabọ da irẹn. Aldo keghi kha wẹẹ, “Vbe I ghi tama ọtẹn na vbene ẹmwẹ nii da mwẹ hẹ, ọ na wa suẹn gha rinmwian. Vbe I ghi họn urhu nọ ya gha rinmwian mwẹ, I na wa rẹn wẹẹ, ọtẹn na gbe I ma rẹn ye ẹmwẹ nọ tae. Ẹre I na ghi mu ẹzọ fua.”

16-17. Vbọ khẹke nọ gha re atamuolọyan ọghe ima?

¹⁶ Te ukọ e Jọn wa kakabọ hoẹmwẹ etẹn ni ghaa rre iko ọghe Ivbiotu e Kristi, ọ na vbe gha hoo ne iran mudia gbain vbe odẹ ọghe ẹmwata. Elẹta eha nọ gbẹn gie iran nọ ya rhie ibude ne iran so igiẹ yọ wẹẹ, ọ gele hoẹmwẹ iran. U miẹn vbene ọ sẹ ima ọyẹnmwẹ hẹ, ne ima na rẹn wẹẹ, emwa nikẹre ni khian deba e Kristi kha vbe ẹrinmwi keghi mwẹ ekhọe ahoẹmwọmwa, zẹvbe ne ukọ e Jọn ghaa ye!—1 Jọn 2:27.

¹⁷ Wa gi ma kọe ye orhiọn, ẹmwẹ ibude ne ima ziro yan vbe ako iruẹmwi na. Gi ẹre gha re atamuolọyan ọghe ima wẹẹ, te ima khian ye gha rre odẹ ọghe ẹmwata na. Ọna rhiema wẹẹ, te ima khian gha họn ẹmwẹ ne Jehova vbe emwi hia ne ima ru, ma ghi gha ruẹ e Baibol ne egbe ima, ma ghi vbe gha mwẹ ilẹkẹtin wẹẹ, emwi hia fẹẹrẹ ni rre uwu e Baibol keghi re ẹmwata. Deba ọni, ma ghi gha mwẹ amuẹtinyan nọ wegbe dae Jesu. Ma ghi vbe gha lẹẹ ne iziro ọghe emwa nagbọn kevbe imamwaemwi ọghe emwa okeke. Ọ ma khẹke ne ima kue ne emwa kpikpi ima ya ru emwi dan, rhunmwuda, ma i khian sẹtin gha ga e Jehova, ne ima vbe gha mwẹ obọ vbe uyinmwẹ dan. Ọ khẹke ne ima gha ya avbe ilele ọghe Jehova nọ gbae ru emwi vbe arrọọ ọghe ima. Ma ghi gha yabọ etẹn ni ru ima khọọ, ma ghi vbe gha ru iyobọ ne etẹn ni rre uwu ibavbaro, ne iran mieke na mudia gbain vbe odẹ ọghe ẹmwata na. Ma ghaa ru ena hia, ma tobọ ima ghi sẹtin mudia gbain vbe odẹ ọghe ẹmwata, agharhemiẹn wẹẹ, ma werriẹ aro daa isievẹn ughughan.