Ako ọghe Evbagbẹn Nọhuanrẹn nii keghi guan kaẹn akpa ihinrin nọ khẹke ne Ivbiotu e Kristi gha mwẹ. Ako nii khare wẹẹ: “Orhiọn nọhuanrẹn ẹre ọ biẹ avbe ahoẹmwọmwa, oghọghọ, ọfunmwegbe, izinegbe, itohan, ekhọesi [ra umamwẹ], amuẹtinyan, [ufumwẹ kevbe a dia egbe ọmwa, NW].” Sokpan ọna ma rhiema wẹẹ, avbe akpa na sunu yi na ọkpa, ẹre orhiọn nọhuanrẹn ọghe Osanobua gha sẹtin ru iyobọ ne ima ya gha mwẹ.

Gia ziro yan emwi ne ukọ e Pọl tae vbe uviẹn 19-21, ọ khare wẹẹ: “Emwi ne egbe ru . . . ọrọre uyinmwẹ alama oghẹ, iruẹn kevbe osọnnọ, ẹbọ ne a gho kevbe azẹn, emwa ghi ya eghian so egbe, iran ghi gha gbinna, oya iran ghi gha da egbe, okuo kevbe oguegue. Iran ghi gha ghae egbe ye otu kevbe oka. Iran ghi gha gbọvo egbe, iran ghi gha da ayọn gbe egbe, iran ghi gha gbe izabọbọ ẹwia kevbe avbe emwi ni khọ vberriọ.” (Gal 5:19-21) Ne Pọl na kha wẹẹ, “kevbe avbe emwi ni khọ vberriọ,” rhiema wẹẹ, e Pọl ma wa sunu yi emwi hia “ne egbe ru” vbe na ghee eso na sunu yi vbe ebe Kọlose 3:5. Erriọ vbe nọ, vbe Pọl ghi sunu ye akpa ihinrin nọ khẹke ne ima gha mwẹ, ọ na vbe kha wẹẹ: “A ma yi uhi ye egbe emwi vberriọ.” Ọna rhiema wẹẹ, e Pọl ma wa sunu ye akpa hia ne orhiọn nọhuanrẹn ru iyobọ ne ọmwa ya gha mwẹ.

Ma gha kakabọ rẹn otọre sayọ deghẹ ima na ya ẹmwẹ ne Pọl tae vbe Galatia 5:22, 23 taa ẹmwẹ nọ gbẹn gie iko nọ ghaa rre Ẹfisọs, ọ khare wẹẹ: “Uwanmwẹ ẹre ọ rhie otọ ne avbe emwi esi, vbene umamwẹ, emwi nọ gbae [ra iruemwiẹse] kevbe ẹmwata ye, na mọ ọmọ wọrhọwọrhọ.” (Ẹfis 5:8, 9) Ako evbagbẹn na ghi guan kaẹn avbe akpa ne emwa ni rre uwu “uwanmwẹ” mwẹ, ọ na sunu yi “umamwẹ,” iruemwiẹse kevbe ẹmwata, sokpan ebe Galatia vbe ka “umamwẹ” ba avbe akpa ne orhiọn nọhuanrẹn ya ọmwa mwẹ.

Erriọ vbe ye, e Pọl keghi sunu yi akpa ehan nọ khẹke ne Timoti gha mwẹ, avbe akpa na ọre “ẹmwata [ra iruemwiẹse], uyinmwẹ nọ khọ ọghe Osanobua, iyayi [ra amuẹtinyan], ahoẹmwọmwa, izinegbe kevbe ufumwẹ.” (1 Tim 6:11) Vbuwe akpa ehan ne ukọ e Pọl sunu yi na, eha vbọ kẹkan (amuẹtinyan, ahoẹmwọmwa, kevbe ufumwẹ) ẹre ebe Galatia 5:22, 23 ka ba avbe akpa ne orhiọn nọhuanrẹn ya ọmwa mwẹ. Vbọrhirhighayehẹ, orhiọn nọhuanrẹn ẹre ọ khian vbe ru iyobọ ne Timoti ya gha mwẹ avbe akpa nikẹre ne ukọ e Pọl sunu yi vbe na ghee iruemwiẹse kevbe uyinmwẹ nọ khọ ọghe Osanobua.—Yae taa Kọlose 3:12; 2 Pita 1:5-7.

Nọnaghiyerriọ, ẹi re akpa hia nọ khẹke ne Ivbiotu e Kristi gha mwẹ ẹre ọ rre ebe Galatia 5:22, 23. Vbene ẹmwata, orhiọn nọhuanrẹn ọghe Osanobua gha ru iyobọ ne ima ya gha mwẹ akpa ihinrin na sunu yi vbe ako na. Sokpan akpa ọvbehe nibun ye rrọọ nọ ye khẹke ne ima ne Ivbiotu e Kristi gha mwẹ zẹvbe ne ima ya mwẹ alaghodaro vbe odẹ ọghe orhiọn kevbe zẹvbe ne ima ya “muẹn yọ ighẹ egbe ọgbọn nii na yi zẹvbe ama ọghe Osanobua, nọ vbe rhie egbe ma vbe arrọọ ọghe ẹmwata nọ re nọ mudia ẹse kevbe nọhuanrẹn.”—Ẹfis 4:24.