Iyobọ ẹghẹ ọkpa ẹre avbe ẹmwẹ akhasẹ ni rre isama na ya mwẹ amusẹ. Avbe ẹmwẹ akhasẹ na keghi so igiẹ yọ wẹẹ, ẹghẹ “ufomwẹ agbọn” ẹre ima ye na.—Dan 12:4.

• Evbagbẹn Nọhuanrẹn Arhie 11:7; 12:13, 17; 13:1-8, 12

  Ẹmwẹ Akhasẹ “Aranmwẹ oha” ọkpa kegha kha yan agbọn na vbe ọwara ukpo arriaisẹn nibun. Vbe ọ ghi rre ẹghẹ ufomwẹ agbọn, uhunmwu nogie ihinrọn ọghe aranmwẹ oha na keghi miẹn ikuanegbe. Vbene ẹghẹ ya khian, ẹtẹ nọ rre uhunmwu nogie ihinrọn nii keghi rrie, “agbọn hia” keghi vẹ lele aranmwẹ oha nii. E Setan keghi loo aranmwẹ oha nii ya gu “ni dekẹe gbinna.”

  Amusẹ Vbe iyeke Okpamẹ nọ dae vbe ẹghẹ e Noa, arriọba emwa nagbọn ni gbodan ghee Jehova keghi suẹn gha khaevbisẹ. Ukpo arriaisẹn nibun ghi gberra nẹ, vbe ẹghẹ na ya gha khọn Okuo Ọgbagbọn Nokaro, arriọba ọghe Britain keghi miẹn ikuanegbe nọ kuan ẹre use yotọ. Ọ keghi werriegbe do gha mwẹ ẹtin, vbe ẹghẹ ne arriọba ọghe United States ya deba ẹre. Esu keghi loo arriọba emwa nagbọn hia ni rre uhunmwu otagbọn na, ya zẹ eguọmwadia Osanobua kpokpo, katekate vbe ẹghẹ ufomwẹ agbọn ne ima ye na.

• Evbagbẹn Nọhuanrẹn Dan 11:25-45

  Ẹmwẹ Akhasẹ Vbe ẹghẹ ufomwẹ ọghe agbọn na, ọba ọghe ahọ kevbe ọba ọghe okuọ ghi gha gu egbe suan.

  Amusẹ Arriọba e Germany kegha gu Anglo-America suan. Vbe ukpo 1945, arriọba e Soviet Union kevbe avbe ẹvbo ni ye ẹre ike keghi do gha re ọba ọghe okuọ. Vbe ukpo 1991, arriọba e Soviet Union keghi de, vbene ẹghẹ ya khian, arriọba e Russia kevbe avbe ẹvbo ni ye ẹre ike, ẹre ọ ghi do gha re ọba ọghe okuọ.

• Evbagbẹn Nọhuanrẹn Aiz 61:1; Mal 3:1; Luk 4:18

  Ẹmwẹ Akhasẹ E Jehova keghi gie “ukọ” ọghẹe nọ ya “dọlọ odẹ yi” a te miẹn wẹẹ, a mu Arriọba ọghe Mẹzaia gbọọ. Ukọ na keghi suẹn gha “kporhu iyẹn nọ maan” ma emwa ọmẹhẹ.

  Amusẹ Ke ukpo 1870 kpa, Ọtẹn Nokpia C. T. Russell kevbe etẹn ọvbehe keghi suẹn gha zanzan e Baibol kugbe, ne iran mieke na rẹn ẹmwata ni rre uwu ẹre kevbe ne iran sẹtin rhan otọ re. Vbe ukpo 1881, iran na do bẹghe ẹre wẹẹ, ọ wa kakabọ ru ekpataki ne eguọmwadia Osanobua gha kporhu. Rhunmwuda ọni, vbe Zion’s Watch Tower ne iran gbẹnnẹ ladian vbe ukpo nii, uhunmwuta vbe na ghee “Wanted 1,000 Preachers” kevbe “Anointed to Preach” kegha rrọọ.

• Evbagbẹn Nọhuanrẹn Mat 13:24-30, 36-43

  Ẹmwẹ Akhasẹ Vbe okpia ọkpa ghi kọ ọka ye ugbo ẹre, oghian rẹn keghi do kọ irunmwu yọ. Irunmwu nii keghi sọn gue avbe ọka nii. Vbe ọ ghi sẹ ẹghẹ emwiorhọ, a keghi wannọ avbe irunmwu nii hin uwu ọka rre.

  Amusẹ Ke ukpo 1870 kpa, a keghi suẹn gha bẹghe alughaẹn nọ rre ẹkpo Ivbiotu e Kristi ọghe ẹmwata kevbe emwa iyayi okeke. Vbe a ghi la ẹghẹ ufomwẹ agbọn na, a keghi si eguọmwadia Osanobua koko ye uwu iko ọghe Ivbiotu e Kristi, a na ghi wannọ iran hin uwu ẹbu emwa iyayi okeke rre.

• Evbagbẹn Nọhuanrẹn Dan 2:31-33, 41-43

  Ẹmwẹ Akhasẹ Atata owẹ ọghe ematọn kevbe obuẹ ọghe amazẹ na ya emwi ughughan ru.

  Amusẹ Obuẹ nọ rrọọ keghi mudia ye ihe emwa kẹkan ne Anglo-American World Power kha yan, ni gbe olighi ye emwamwa ọghe arriọba na. Rhunmwuda olighi ne iran gbe, Anglo-America i ghi sẹtin zẹ ẹtin vbe nọ te khẹke.

• Evbagbẹn Nọhuanrẹn Mat 13:30; 24:14, 45; 28:19, 20

  Ẹmwẹ Akhasẹ A keghi si avbe “ọka” koko ye owa “aza,” a keghi zẹ ‘ọviẹn nọ gia mu ẹtin yan kevbe nọ fuẹro’ nọ gha ya evbare orhiọn koko igiowa ọghe Osanobua. Ikporhu “iyẹn nọ maan ọghe Arriọba” keghi suẹn gha vẹwa “la otọ agbọn hia.”

  Amusẹ Vbe ukpo 1919, a keghi zẹ ọviẹn nọ gia mu ẹtin yan nọ gha gbaroghe emwa ọghe Osanobua. Ke ẹghẹ nii kpa, etẹn keghi rhiegbe ye iwinna ikporhu sayọ. Vbe ẹdẹnẹrẹ, otọ ni gberra 200 ẹre Avbe Osẹe Jehova na kporhu, iran vbe gbẹnnẹ ebe ughughan ni rhan otọ e Baibol ladian vbe urhuẹvbo ni gberra 1,000.

• Evbagbẹn Nọhuanrẹn Dan 12:11; Arhie 13:11, 14, 15

  Ẹmwẹ Akhasẹ Aranmwẹ oha nọ mwẹ igho eva keghi tama emwa nagbọn ne iran ma “amazẹ ọkpa na ya ya ọghọ” ne aranmwẹ oha nọ mwẹ uhunmwu ihinrọn. Aranmwẹ oha nii nọ mwẹ igho eva keghi “hiọnrọn arrọọ ye uwu amazẹ” na.

  Amusẹ Anglo-American World Power keghi mu otu na tie ẹre League of Nations gbọọ. Agbẹnvbo nibun keghi deba otu na. Vbene ẹghẹ ya khian, vbe ukpo 1926 ya sẹ 1933, ọba ọghe okuọ na vbe deba otu na. League of Nations kevbe United Nations nọ ghi do rhihe ẹre keghi mu egbe iran ye ukpo nọ khẹke Arriọba Osanobua.

• Evbagbẹn Nọhuanrẹn Dan 8:23, 24

  Ẹmwẹ Akhasẹ Ọba ne aro ẹre kpannọ ugiọnmwẹ erhẹn gha “rhia emwi nibun [vbe odẹ] ọghe ọhannabe.”

  Amusẹ Ẹi re avbiẹ emwa ẹre arriọba ọghe Anglo-America he gbele, ẹi re avbiẹ emwi iran he vbe fuan. Vbe igiemwi, vbe ẹghẹ na ya khọn Okuo Ọgbagbọn Nogieva, arriọba ọghe United States keghi filo ugbe nọ wẹwẹ eva ye ẹvbo eghian ọghe Anglo-America. Ọfuan na ma he miẹn egbọre ẹdẹ, ẹre iran si ye ẹvbo nii.

• Evbagbẹn Nọhuanrẹn Dan 11:31; Arhie 17:3, 7-11

  Ẹmwẹ Akhasẹ “Aranmwẹ oha nọ baa ọkpa” nọ mwẹ igho igbe keghi ladian vbuwe uvun nẹi mwẹ otọ, irẹn ọre ọba nogie erẹnrẹn. Ebe Daniẹl ghi guan kaẹn ọba na, ọ keghi tie ẹre “evbikhọ ugborrirri.”

  Amusẹ Vbe ẹghẹ na ya khọn Okuo Ọgbagbọn Nogieva, otu na tie ẹre League of Nations ma ghi gha rrọọ. Vbe a ghi khọn okuo nii fo nẹ, a keghi mu e United Natiọns “gbọọ.” League of Nations kevbe United Nations keghi mu egbe iran ye ukpo nọ khẹke Arriọba Osanobua. E United Nations ẹre ọ khian werriẹ aro daa ugamwẹ hia.

• Evbagbẹn Nọhuanrẹn 1 Tẹs 5:3; Arhie 17:16

  Ẹmwẹ Akhasẹ Avbe agbẹnvbo kegha yae wewe wẹẹ, ọfunmwegbe kevbe agbẹkunsotọ rrọọ nẹ. “Igho igbe” nii kevbe “aranmwẹ oha nii” ghi werriẹ daa “ebabotu nii,” iran ghi vbe fuẹn ọnrẹn rua. Vbe iyeke ọni, a ghi fuẹn avbe agbẹnvbo rua.

  Amusẹ Avbe agbẹnvbo ghi gha kha wẹẹ, iran mwẹ ọfunmwegbe kevbe agbẹkunsotọ nẹ. Vbe iyeke ọni, avbe agbẹnvbo ni ye United Nations ike, ghi fuẹn avbe ugamwẹ ohoghe rua. Ọna ọre omuhẹn ọghe orueghe nọkhua. Orueghe nọkhua gha sẹ ufomwẹ vbe okuo Amagẹdọn, vbe ẹghẹ ne Jesu khian ya fuẹn abọ ni ghi dekẹ vbe agbọn Esu rua.

• Evbagbẹn Nọhuanrẹn Ẹzik 38:11, 14-17; Mat 24:31

  Ẹmwẹ Akhasẹ E Gọg ghi mu okuo la otọ ọghe emwa Osanobua. Vbe iyeke ọni, avbe odibosa ghi do si emwa “na hannọ zẹ” koko.

  Amusẹ Ọba ọghe okuọ kevbe arriọba nikẹre ghi werriẹ aro nọ khọọ daa emwa ọghe Osanobua. Vbe iran gha da suẹn gha werriẹ aro nọ khọọ daa emwa ọghe Osanobua, a ghi viọ emwa na hannọ zẹ ni ghi dekẹ vbe agbọn na gha rrie ẹrinmwi.

• Evbagbẹn Nọhuanrẹn Ẹzik 38:18-23; Dan 2:34, 35, 44, 45; Arhie 6:2; 16:14, 16; 17:14; 19:20

  Ẹmwẹ Akhasẹ “Ọmwa nọ hin” “ẹsin nọfua ọkpa” keghi “khọnmiotọ” yan Gọg kevbe ivbiyokuo ọghẹe. A keghi mu “aranmwẹ oha nii” ye uwu “odighi erhẹn.” Ugbe nọ ke ẹrinmwi rre keghi guọghọ amazẹ nii sotọ.

  Amusẹ Jesu nọ re Ọba ọghe Arriọba Osanobua gha do miẹn emwa Osanobua fan. Jesu, kevbe orhunmwu 144,000 ni khian deba re kha, kẹ kevbe avbe odibosa gha do fuẹn iran rua ighẹ avbe agbẹnvbo ni werriẹ aro nọ khọọ daa emwa Osanobua. Erriọ agbọn ọghe Esu khian ya sẹ ufomwẹ.