1. De emwi nọ ya ima rẹn wẹẹ iwinna ikporhu iyẹn nọ maan keghi re iwinna nọ miẹn emwa fan?

IWINNA ikporhu iyẹn nọ maan keghi re iwinna nọ miẹn emwa fan. Vbọ ya ima kha vberriọ? Vbe ẹghẹ ne Jesu na yi iyi ne erhuangbe ẹre, ne iran gha kporhu iyẹn nọ maan vbe ebe Matiu 28:19, 20, NW, ọ na khama iran wẹẹ: “Wa bu emwa hia gha rrie ehe hia, ne uwa gha ya iran khian erhuanegbe mwẹ, wa ghi gha dinmwi iran ye amẹ.” De vbene idinmwiamẹ ru ekpataki sẹ hẹ? Ọmwaikọmwa nọ hoo nọ miẹn fan, te ọ khẹke nọ dinmwiamẹ. A te miẹn wẹẹ ọmwa dinmwiamẹ, te ọ khẹke nọ yayi wẹẹ, ne Jesu na wu ne ima, nọ na vbe rhiọ kpaegbe, ẹre ọ zẹe ne ẹkpotọ na kie ne ima ya gha rrọọ vbe etẹbitẹ, vbe ẹi re erriọ, ọghe ima te fo nẹ. Ẹi khabe ne ukọ e Pita na gbẹn gie Ivbiotu e Kristi wẹẹ: “Erriọ ẹre idinmwiamẹ vbe ya miẹn uwa fan nia . . . lekpae arhiọkpaegbe ọghe Jesu Kristi.” (1 Pit 3:21, NW) Ọmwa gha ghi dinmwiamẹ nẹ, ọni rhiema wẹẹ ọ la odẹ nọ su rrie arrọọ ọghe etẹbitẹ nẹ.

2. Zẹvbe nọ rre ebe 2 Timoti 4:1, 2, de aro ọmamwaemwi nọ khẹke ne ima gha khin?

² Ma ghaa hoo ne ima sẹtin gha ru iyobọ ne emwa ya khian erhuanegbe Jesu, te ọ khẹke ne ima gha re emwa ni gua “maa emwa emwi.” (Tie 2 Timoti 4:1, 2.) Vbọzẹe? Rhunmwuda, Jesu tama ima wẹẹ: “Wa bu emwa hia gha rrie ehe hia, ne uwa gha ya iran khian erhuanegbe mwẹ . . . , wa ghi gha maa iran [emwi].” Ukọ e Pọl rhie igiọdu ne ima, ne ima rhiegba ye iwinna na. U gha gele ru vberriọ, “u gha miẹn egbe ruẹ kevbe iran ni danmwehọ ruẹ fan.” Ẹi khabe ne ukọ e Pọl na vbe kha wẹẹ: “Gha ya emwi ne u maa emwa ẹre ẹro.” (1 Tim 4:16) Ugbẹnvbe a miẹn wẹẹ iwinna ikporhu ọghe ima, ru iyobọ ne emwa ya khian erhuanegbe Jesu, te ọ khẹke ne ima gha re emwa ni gua maa emwa emwi.

3. De emwi ne ima khian ziro yan vbe ako iruẹmwi na?

 ³ Ẹbo emwa nibun ẹre ima gu ruẹ e Baibol vbe ehe ughughan vbe uhunmwu otagbọn hia. Sokpan, zẹvbe ne ima ruẹ ọre vbe ako iruẹmwi nọ lae, ma hoo ne ima ru iyobọ ne iran nibun ne ima gu ruẹ e Baibol, ne iran do dinmwiamẹ zẹvbe erhuanegbe Jesu Kristi. Vbe ako iruẹmwi na, ma gha ziro yan emwi isẹn ọvbehe nọ khẹke ne ima ru, ne ima ya ru iyobọ ne emwa ne ima gu ruẹ e Baibol ya sẹtin do dinmwiamẹ.

4. Vbọzẹe nọ ma na khẹke ne ima gha talọ gbe, vbe ima ghaa maa ọmwa emwi? (Vbe ya ghee evba gbẹn ye ototọ kuẹi.)

⁴ Emwi ne ima ruẹ vbe Baibol keghi gbe ima otiti, rhunmwuda ọni, deghẹ ima ma na begbe, ma sẹtin do talọ gbe vbe ima ghaa gu emwa guan vbekpa re. Ọre te ima siẹnro Iruẹmwi Ebe Owa Ọkhẹ ra Iruẹmwi E Baibol Ọghe Iko, ra te ima gu ọmwa ruẹ e Baibol, ọ ma khẹke ne ima gha talọ ẹmwẹ nọ bun gbe. E Baibol ẹre ima loo ya maa emwa emwi, ẹi re ẹmwẹ ọghe obọ ima. Rhunmwuda ọni, ọ ma khẹke ne u gha talọ ẹmwẹ nọ bun gbe, vbe u ghaa gu ọmwa ruẹ emwi. Vbe igiemwi, uwa gha tie ako evbagbẹn nọhuanrẹn rhọkpa, ghẹ wa ta emwi hia fẹẹrẹ ne u rẹnrẹn vbekpa ako evbagbẹn nọhuanrẹn nii. Uwa gha vbe gha ziro yan uhunmwuta nọ rhirhi gha khin, ghẹ vbe ta emwi hia ne u rẹnrẹn vbekpa uhunmwuta nii. * (Jọn 16:12) U gha ya irẹnmwi ne u ghaa mwẹ u ke dinmwiamẹ, taa irẹnmwi ne u ghi mwẹ nia, ẹi mwẹ u ma bẹghe ẹre wẹẹ, ẹi re emwi hia ne u rẹnrẹn nia, ẹre u rẹnrẹn vbe ẹghẹ nii. (Hib 6:1) Nọnaghiyerriọ, ghẹ wa gha hoo ne ọmwa ne u gu ruẹ e Baibol wa rẹn emwi hia fẹẹrẹ vbe ẹdẹ ọkpa, rhunmwuda, ọ rhie ẹghẹ, uwẹ tobọ uwẹ ke do rẹn emwi ne u rẹnrẹn vbe ẹdẹnẹrẹ.

5. (a) Zẹvbe nọ rre ebe 1 Tẹsalonaika 2:13, de emwi ne ima hoo ne ọmwa ne ima gu ruẹ e Baibol rẹn vbekpa emwi nọ ruẹ? (b) De vbene u khian ya gha kie ẹkpotọ ne ọmwa ne u gu ruẹ e Baibol nọ ya gha guan kaẹn emwi nọ ruẹ?

⁵ Ma hoo ne ima ru iyobọ ne ọmwa ne ima gu ruẹ e Baibol ya rẹn wẹẹ, uwu e Baibol ẹre emwi nọ ruẹ ke rre. (Tie 1 Tẹsalonaika 2:13.) Vbe ima khian ya ru ọna hẹ? Ne uwẹ ọkpa gha te ya gha mu idan mu ẹgogo vbe u ghaa gu ọmwa ruẹ emwi, kie ẹkpotọ nẹẹn, nọ tobọre gha guan kaẹn emwi nọ ruẹ. Ẹi re ẹghẹ hia ẹre u khian wa ya gha rhan otọ ako evbagbẹn nọhuanrẹn ne uwa tiere ma rẹn, u ghi vbe kie ẹkpotọ nẹẹn, ne irẹn tobọ irẹn vbe rhan otọ re. Ru iyobọ nẹẹn ya bẹghe vbene ako evbagbẹn nọhuanrẹn ne uwa tiere ya dekaẹn rẹn hẹ. U sẹtin nọ rẹn ọta eso, nọ gha ru iyobọ nẹẹn ya ta emwi nọ rre ọre ekhọe kevbe nọ gha ya ruẹ rẹn, vbene ọ ghee ako evbagbẹn nọhuanrẹn nọ tiere hẹ. (Luk 10:25-28) Vbe igiemwi, u sẹtin nọ rẹn wẹẹ: “De akpa ọghe Jehova ne u bẹghe vbe ako evbagbẹn nọhuanrẹn na?” “De vbene emwi ne u ruẹ re vbe ako evbagbẹn nọhuanrẹn na khian ya ru iyobọ nuẹn hẹ?” “Vbọ ye ruẹ hẹ vbe ekhọe ighẹ emwi ne u ruẹ re na?” (Itan 20:5) Avbe inọta na wa ru ekpataki rhunmwuda, ẹi re ne ọmwa wa gha mwẹ irẹnmwi ọghe Baibol ọkpa ẹre ima gu maa re emwi, sokpan te ọ khẹke ne emwi nọ ruẹ mu ẹre ekhọe, ọ ghi vbe gha rhiẹre ye uyinmwẹ vbe arrọọ ọghẹe.

6. Vbọzẹe nọ na khẹke ne ima vbe zẹdia gha rhie etẹn ni gua maa emwa emwi lele egbe, vbe ima gha khian ya gu ọmwa ruẹ e Baibol?

⁶ Uwẹ vbe zẹdia rhie etẹn ọvbehe ni gua maa  emwa emwi lele egbe, vbe u gha khian ya gu ọmwa ruẹ e Baibol ra? Adeghẹ u na rhie ọtẹn vberriọ lele egbe, u sẹtin nọ rẹn deghẹ ako eso rrọọ nọ khẹke ne u winna yan vbe odẹ ne u ya maa emwa emwi, kevbe deghẹ odẹ ne u ya maa emwa emwi rhiẹre ma wẹẹ, uwu e Baibol ẹre ẹmwẹ ne u ta ke rre. U ghaa hoo ne u gha mwẹ alaghodaro vbe odẹ ne u ya maa emwa emwi, te ọ khẹke ne u gha mu egbe rriotọ. (Yae taa ebe Iwinna 18:24-26.) U ghi vbe nọ rẹn deghẹ ọ ghee ẹre wẹẹ, ọmwa ne u gu ruẹ emwi rẹn ototọ emwi ne u maa re. Adeghẹ u i khian gha rre owa vbe ọwara uzọla ọkpa, ra ọ gha gberra vberriọ, u sẹtin tama ọtẹn vbenian nọ gu ruẹ ya maa ọmwa ne u gu ruẹ e Baibol emwi vbene u te rre, na ghẹ do miẹn wẹẹ uzọla ọkpa gberra, a ma zẹdẹ gu ẹre ruẹ emwi. Ọna gha vbe ya ọmwa ne u gu ruẹ emwi rẹn wẹẹ, iruẹmwi nii wa kakabọ ru ekpataki. Ghẹ gha roro ẹre wẹẹ, ugbẹnvbe a miẹn wẹẹ, uwẹ ẹre ọ gu ẹre ruẹ e Baibol, ọmwa rhọkpa i khian sẹtin ru iyobọ nuẹn. A gha gele wẹẹ na ghee ẹre, ẹi re ne ọmwa ne u gu ruẹ e Baibol gha mwẹ alaghodaro ẹre u gualọ?

7. De emwi nọ khian ru iyobọ ne ọmwa ne u gu ruẹ e Baibol, ne emwi nọ ruẹ gha gbe ẹre otiti?

⁷ U ghaa gu ọmwa ruẹ e Baibol, te ọ khẹke ne u gha ya oyaya maa re emwi nọ mieke na bẹghe ẹre wẹẹ, avbe ẹmwata ni rre uwu e Baibol ne u maa re gele mu ruẹ ekhọe. (1 Tẹs 1:5) Ẹghẹ nii, emwi nọ ruẹ ghi do gha gbe ẹre otiti. U sẹtin vbe tama rẹn vbene avbe ilele ni rre uwu e Baibol he ya ru iyobọ nuẹn hẹ. Ena hia gha ru iyobọ nẹẹn ya rẹn wẹẹ, ọ ghaa ya avbe ilele ni rre uwu e Baibol ru emwi, ọ gha wa miẹn ere vbọ.

8. De emwi ọvbehe ne u gha sẹtin loo ya ru iyobọ ne ọmwa ne u gu ruẹ e Baibol? Vbọzẹe nọ na khẹke ne u ru vberriọ?

⁸ Adeghẹ ọ mwẹ isievẹn eso ne ọmwa ne u gu ruẹ e Baibol werriẹ aro daa, u sẹtin ya unu kaẹn emwi ẹwaẹn ọghe etẹn eso ni ka werriẹ aro daa egbe isievẹn vberriọ kevbe emwi nọ ru iyobọ ne iran ya lae gberra. U sẹtin rhie etẹn vbenian lele egbe, vbe u gha khian ya gu ẹre ruẹ emwi, ne iran vbe tobọ iran ta emwi ẹwaẹn ọghe iran ma rẹn. U sẹtin vbe gualọ emwi ẹwaẹn eso ni gha ru iyobọ nẹẹn vbe jw.org, vbe ako na tie ẹre “The Bible Changes Lives.” * Emwi ẹwaẹn vbenian gha ru iyobọ ne ọmwa ne u gu ruẹ e Baibol ya rẹn vbene ọ ru ekpataki sẹ hẹ, nọ gha ya avbe ilele ọghe Baibol ru emwi vbe arrọọ ọghẹe.

9. De vbene u khian ya rhie igiọdu ne ọmwa ne u gu ruẹ e Baibol, nọ vbe gha tama avbe ọsiọre kevbe ẹgbẹe ọre vbekpa emwi nọ ruẹ?

⁹ Adeghẹ ọmwa ne u gu ruẹ e Baibol ru orọnmwẹ nẹ, ọdafẹn ọnrẹn ra ọvbokhan rẹn mwẹ ọmwa nọ gu ẹre ruẹ emwi ra? Adeghẹ ẹi mwẹ, u sẹtin tama rẹn nọ gha deba uwa vbe uwa ghaa ruẹ emwi. Rhie igiọdu ne ọmwa ne u gu ruẹ e Baibol nọ vbe gha tama avbe ọsiọre kevbe ẹgbẹe ọre vbekpa emwi nọ ruẹ. (Jọn 1:40-45) Vbua  khian ya ru ọna hẹ? U sẹtin nọ rẹn wẹẹ: “Vbua khian ya rhan otọ imamwaemwi na, ma ọmwa vbuwe ẹgbẹe ruẹ hẹ?” ra “De ako evbagbẹn nọhuanrẹn ne u gha sẹtin loo, vbe u ghaa rhan otọ imamwaemwi na ma ọmwa?” U ghaa nọ rẹn egbe inọta vbenian, ọni rhiema wẹẹ, te u ru iyobọ nẹẹn ya rẹn vbene ọ khian ya gha maa emwa ọvbehe emwi hẹ. Vbene ẹghẹ ya khian, ọ sẹtin do khian ọmwa nọ ya iyẹn wewe nọ ma he dinmwiamẹ. U sẹtin vbe nọ rẹn deghẹ ọ rẹn ọmwa ọvbehe nọ gha hoo nọ ruẹ e Baibol. Adeghẹ ọmwa vberriọ rrọọ, u sẹtin ru emwamwa vbobọvbobọ, na ya suẹn gha gu ọmwa nii ruẹ e Baibol. U ghi ma re vidio nọ khare wẹẹ, De Vbene Iruẹmwi Ọghe Baibol Ye Hẹ? *

10. De vbene ima khian ya ya egbe taa igiemwi ne Pọl rhie yotọ vbe ebe 1 Tẹsalonaika 2:7, 8?

¹⁰ Ọ khẹke ne u gha mwẹ amuroro daa emwa ne u gu ruẹ e Baibol, u ghi vbe gha rhiẹre ma wẹẹ u mwẹ ẹmwẹ iran vbe ekhọe. Ọ khẹke ne u gha ghee iran zẹvbe emwa ni gha do deba ruẹ ga e Jehova vbe ẹdẹ ọkpa. (Tie 1 Tẹsalonaika 2:7, 8.) Ẹi khian wa gha khuẹrhẹ ne iran, ne iran sẹ emwa ni rre uwu agbọn ne iran te gu muobọ rae, ra ne iran ru afiwerriẹ nọ khẹke vbe arrọọ ọghe iran. Rhunmwuda ọni, te ọ khẹke ne ima ru iyobọ ne iran ya zẹ avbe ọse ni maan vbuwe iko. Ọ khẹke ne ima tobọ ima vbe gha re ọsie iran. Gberra na wa gha gu iran ruẹ emwi, ma ghi vbe gha mwẹ ẹghẹ ne iran. Ma sẹtin tie iran vbe efoni, ra ma ghi gie uhunmwu gie iran, ma sẹtin wa vbe mu otuẹ gie iran, ne ima vbe ya nọ ẹmwẹ iran, ọ gha khọnrẹn wẹẹ, ẹi re te ima khian gu iran ruẹ emwi. Ọna gha ya iran rẹn wẹẹ, ma mwẹ ẹmwẹ iran vbe orhiọn.

11. De aro ne ima hoo ne emwa ne ima gu ruẹ e Baibol ya gha ghee etẹn ni rre uwu iko? Vbọzẹe?

¹¹ Emwa mobọ kha wẹẹ: “Orhunmwu ọkpa i biẹ ọmọ.” Erriọ vbe ye, na do sẹtin ru iyobọ ne ọmwa ya khian ọrhuanegbe Kristi, ẹi re iwinna ọghe orhunmwu ọkpa; iwinna ọghe etẹn hia ni rre uwu iko ẹre nọ. Ọni ẹre ọ si ẹre ne etẹn eso na ru iyobọ ne emwa ne iran gu ruẹ e Baibol, ya rẹn etẹn ọvbehe vbuwe iko ni mwẹ uyinmwẹ esi, ne iran gha sẹtin ya egbe taa. Iran gha ghi suẹn gha gu etẹn ni rre uwu iko muobọ nẹ, ọ ghi ya iran sikẹ e Jehova sayọ, iran gha vbe gha mwẹ ọlọghọmwa ne iran werriẹ aro daa, etẹn na ghi vbe sẹtin ru iyobọ ne iran ya lae gberra. Ma ma hoo ne emwa ne ima gu ruẹ e Baibol gha ghee egbe iran orhunmwuyẹn vbe iran ghaa rre uwu ẹbu etẹn nikpia kevbe etẹn nikhuo vbuwe iko, nọghayayerriọ, ma hoo ne dọmwadẹ emwa ne ima gu ruẹ e Baibol ghaa ghee etẹn ni rre uwu iko zẹvbe etẹn iran. Iran gha bẹghe vbene ima mwẹ ahoẹmwọmwa hẹ vbuwe iko, ẹi ghi lọghọ gbe, ne iran ya sẹ emwa ni rre uwu agbọn ne iran te gu muobọ rae. (Itan 13:20) Adeghẹ emwa eso ne iran te gu muobọ na vbe suẹn gha lẹẹ ne iran, ra iran na yangbe iran, ẹi ghi da iran gbe rhunmwuda, iran rẹnrẹn wẹẹ, iran gha miẹn avbe ọse ni maan vbuwe iko ọghe Jehova.—Mak 10:29, 30; 1 Pit 4:4.

12. Vbọzẹe nọ na khẹke ne ima gi ọmwa ne ima gu ruẹ e Baibol rẹn vbene ọ ru ekpataki sẹ hẹ, ne ọmwa ya egbe ẹre fiohan ne Osanobua kevbe nọ dinmwiamẹ?

¹² Ọ khẹke ne u gha tama ọmwa ne u gu ruẹ e Baibol vbe ẹghẹ hia, vbene ọ ru ekpataki sẹ hẹ, ne ọmwa ya egbe ẹre fiohan ne Osanobua kevbe nọ dinmwiamẹ. Rhunmwuda, emwi nọ ya ima gu emwa ruẹ e Baibol ọre ne iran do ga e Jehova. Ọmwa ne u gu ruẹ e Baibol gha ghi ruẹ emwi la uki eso nẹ, katekate deghẹ ọ suẹn gha yo iko nẹ, u ghi gi ẹre rẹn wẹẹ, te u gu ẹre ruẹ e Baibol nọ mieke na sẹtin khian Osẹe Jehova.

13. De emwi eso nọ khẹke ne ọmwa ne ima gu ruẹ e Baibol ru, nọ mieke na gbegba nọ gha dinmwiamẹ?

¹³ Emwi bun ne ọmwa ne ima gu ruẹ e Baibol gha sẹtin ru, nọ mieke na gbegba nọ gha dinmwiamẹ. Vbe okaro, ọ khẹke nọ do rẹn e Jehova, ọ ghi vbe gha mwẹ ahoẹmwọmwa kevbe amuẹtinyan daa re. (Jọn 3:16; 17:3) Vbe iyeke ọni, ọ ghi hia ne irẹn tobọ irẹn guobọ e Jehova, ọ ghi vbe gha gu etẹn ni rre uwu iko muobọ. (Hib 10:24, 25; Jems 4:8) Vbene ẹghẹ ya khian, ọ ghi hia nọ rhie obọ hin avbe uyinmwẹ dan rre, ọ ghi vbe roro iro fi uyinmwẹ werriẹ. (Iwinna 3:19) Deba ọni, ọ ghi gha tama emwa ọvbehe vbekpa emwi nọ yayi. (2 Kọr 4:13) Vbe okiekie, ọ ghi ya egbe ẹre fiohan ne Jehova, ọ ghi vbe dinmwiamẹ. (1 Pit 3:21; 4:2) U miẹn ọyẹnmwẹ nọ khian gha sẹ emwa hia, vbe ọmwa vbenian gha dinmwiamẹ! U gha bẹghe vbene ọmwa ne u gu ruẹ e Baibol ya mwẹ alaghodaro hẹ, u ghi gha tian rẹn yọ vbe ẹghẹ hia, u ghi vbe gha rhie igiọdu nẹẹn, nẹ ghẹ gi egbe wọọ ẹre.

14. De inọta eso ne ima gha sẹtin nọ egbe ima re, ne ima mieke na rẹn deghẹ ọmwa ne ima gu ruẹ e Baibol gele mu egbe nọ ya ga e Jehova?

¹⁴ Ẹi re emwi nọ khuẹrhẹ na ru iyobọ ne ọmwa ne ima gu ruẹ e Baibol, nọ do sẹtin gbegba nọ gha dinmwiamẹ. Rhunmwuda ọni, ọ khẹke ne ima gha mwẹ izinegbe. Ọrheyerriọ, ọ mwẹ eke ne ima gha gu ọmwa ruẹ emwi sẹ, ma ghi mu ukpa mu uwerhẹn ghee ẹre, ne ima mieke na rẹn deghẹ ọmwa nii gele mu egbe nọ ya ga e Jehova. Nọ egbuẹ wẹẹ: ‘Ọmwa ne I gu ruẹ e Baibol zẹdẹ rhiẹre ma wẹẹ, irẹn hoo ne irẹn gha họn ẹmwẹ ne Jesu ra? Ra rhunmwuda nọ wa gha mwẹ irẹnmwi ọghe Baibol ọkpa, ẹre ọ si ẹre nọ na ruẹ emwi?’

15. De emwi eso ne u gha bẹghe vbe egbe ọmwa ne u gu ruẹ e Baibol, nọ gha ya ruẹ rẹn deghẹ ọ zẹdẹ mwẹ alaghodaro?

¹⁵ Gi aro ruẹ gha sotọ vbe egbe ẹre vbe ẹghẹ hia, ne u mieke na rẹn vbene ọ he mwẹ alaghodaro sẹ hẹ. Vbe igiemwi, ẹmwẹ nọ ke ọre unu ladian rhiẹre ma wẹẹ ọ hoẹmwẹ e Jehova ra? Ọ na erhunmwu gie Jehova ra? (Psm 116:1, 2) E Baibol na tie gbe ẹre otiti ra? (Psm 119:97) Ọ yo iko vbe ẹghẹ hia ra? (Psm 22:22) Ọ he ru afiwerriẹ rhọkpa vbe arrọọ ọghẹe nọ rhiẹre ma wẹẹ, ọ rhie emwi nọ ruẹ ye uyinmwẹ ra? (Psm 119:112) Ọ suẹn gha tama avbe ọsiọre nẹ kevbe  emwa vbuwe ẹgbẹe ọre vbekpa emwi nọ ruẹ ra? (Psm 9:1) Sẹ ehia, ọ mu egbe nọ ya khian Osẹe Jehova ra? (Psm 40:8) U gha bẹghe ẹre wẹẹ, ọmwa ne u gu ruẹ e Baibol i zẹdẹ mwẹ alaghodaro, u ghi fẹko ya ẹwaẹn gualọ otọ emwi nọ si ẹre, iyeke ọni, uwẹ vbe ọre ghi fẹko tota guan vbekpa ẹre, u ghi wa vbe gi ẹre rẹn ako nọ khẹke nọ winna yan. *

16. De emwi eso nọ khian ya ruẹ dobọ re yi ighẹ e Baibol ne u gu ọmwa ruẹ?

¹⁶ Adeghẹ u mwẹ ọmwa ne u gu ruẹ e Baibol, gha nọ egbuẹ ke ẹghẹ ya fi ẹghẹ, deghẹ esa rrọọ ne u ye gha gu ọmwa nii ruẹ emwi. Nọ egbuẹ wẹẹ: ‘Ọ mu egbe yotọ khẹ dọmwadẹ iruẹmwi ra? Ọ hoo nọ gha yo iko ra? Ọ ban uyinmwẹ dan eso nọ guẹ nẹ ra? Ọ wio obọ hin ugamwẹ ohoghe rre nẹ ra?’ Adeghẹ ‘ẹn o’ ọre ewanniẹn ne u rhie ye avbe inọta na, u ghi la evba rẹn wẹẹ, u gha ye gha gu ọmwa vbenian ruẹ e Baibol, ọ ghi yevbe na miẹn wẹẹ, te u wa mu ẹghẹ rhia. Adeghẹ ọmwa ne u gu ruẹ e Baibol ma gbọyẹmwẹ ye emwi nọ ruẹ, ọ ma na vbe hoo nọ ru afiwerriẹ nọ khẹke vbe arrọọ ọghẹe, uwẹ ghee ẹre wẹẹ esa rrọọ ne u ye gha gu ẹre ruẹ e Baibol ra?

17. Zẹvbe nọ rre ebe 1 Timoti 4:16, vbọ khẹke ne ima ru?

¹⁷ Ma i ya iwinna ikporhu iyẹn nọ maan ọghe ima rhẹghẹrẹ. Ma hoo ne ima ru iyobọ ne emwa ne ima gu ruẹ e Baibol, ne iran mieke na gbegba nọ gha dinmwiamẹ. Ọni ẹre ọ si ẹre ne ima na ya emwi nọ rre uwu e Baibol maa emwa emwi, ne ima gha te ya gha loo ẹmwẹ obọ ima. Ọni ẹre ọ vbe si ẹre ne ima na ya oyaya maa iran emwi, ne iran mieke na rẹn wẹẹ emwi ne ima maa iran re vbuwe Baibol gele mu ima ekhọe. Ọ khẹke ne ima gha rhie igiọdu ne iran, ne iran gha gu emwa ni rre uwu iko muobọ, ma ghi vbe hia ne ima gi iran rẹn vbene ọ ru ekpataki sẹ hẹ, ne ọmwa ya egbe fiohan ne Osanobua kevbe nọ dinmwiamẹ. Ọ vbe khẹke ne ima zẹdia gha mu ukpa mu uwerhẹn ghee ẹre, deghẹ iran mwẹ alaghodaro. (Ya ghee ẹkpẹti nọ khare wẹẹ, “ Emwi Nọ Khẹke Ne Etẹn Ru Ne Iran Mieke Na Ru Iyobọ Ne Emwa Ne Iran Gu Ruẹ E Baibol Ya Dinmwiamẹ.”) Ma rẹnrẹn wẹẹ ukpamuyọmọ nọkhua nọ, ne ima na mwẹ obọ vbe iwinna na, nọ miẹn emwa fan! Nọnaghiyerriọ, gi ima gha hia vbene ẹtin ma sẹ, ne ima ru iyobọ ne emwa ne ima gu ruẹ e Baibol, ne iran mieke na sẹtin dinmwiamẹ.