Emwi nọ rre ako ọghe evbagbẹn nọhuanrẹn na keghi re emwi nọ rhie igiọdu ne ọmwa. Ọ khare wẹẹ: “Ghẹ gi ẹre yan uwẹ unu ruan adeghẹ arriọba kpokpo ovbiogue, ighẹ ọ ma vbe gia bu ohiẹn ẹmwata ne iran, ra ne a rhie emwi ne ọ khẹke iran ne iran. Dọmwadẹ ọmwa iwinna, ọmwa ne irẹn rre ototọ ẹre, ẹre ọ sinmwi nẹẹn, ọmwa ne ukpo ẹre ghi vbe yo sẹ, ẹre ọ sinmwi ne iran eveva.”—Asan 5:8.

Ma gha ka wa tie ako ọghe evbagbẹn nọhuanrẹn na, ọ ghi yevbe na miẹn wẹẹ, emwa ni mwẹ ọdakha vbe arriọba emwa nagbọn ọkpa, ẹre ako na wa guan kaẹn. Sokpan ma gha mu ukpa mu uwerhẹn ghee ẹre, ma gha do bẹghe ẹre wẹẹ, ọ vbe dekaẹn e Jehova. Vbene ẹmwata, ako na ya ima rẹn emwi eso vbekpae Jehova, nọ rhie ifuẹko ne ọmwa.

Ebe Asan-Ibo 5:8 keghi guan kaẹn ọmwa nọ rre ọdakha nọ ya obọ yẹnyẹn ivbiogue mu otọ, kevbe nọ gbe iran ekueku. Ọ te khẹke ne ọmwa nọ rre ukpo ọdakha na yerre wẹẹ, ọmwa ọvbehe rrọọ nọ rre ukpo nọ yo sẹ ọghe irẹn, nọ ghee ẹre. Yevbesọni, ọmwa ọvbehe sẹtin vbe gha rrọọ nọ vbe yo sẹ ọni. Sokpan, rhunmwuda ne arriọba emwa nagbọn na kulo, ọ sẹtin gha lọghọ na miẹn orhunmwu ọkpa nọ rre ọdakha, nọ gha tohan ivbiogue. Emwi nọ da ọmwa ẹre ọna wa khin!

Vbọrhirhighayehẹ, ọ khẹke ne ima kọe ye orhiọn wẹẹ, e Jehova bẹghe emwi hia nọ sunu vbe arriọba emwa nagbọn. Rhunmwuda ọni, ma gha sẹtin tu tie ẹre, nọ ru iyobọ ne ima. (Psm 55:22; Fil 4:6, 7) Ma rẹnrẹn wẹẹ, e Jehova “wa rhie aro sẹ otọ vbe agbọn na hia, ne ọ miẹn ehe na rhie ẹtin ne iran ne ekhọe ẹre mudia ẹse vbe ehe ne ọ ye.”—2 Krọ 16:9.

Nọnaghiyerriọ, ebe Asan-Ibo 5:8 keghi guan kaẹn vbene emwi ye hẹ vbe arriọba emwa nagbọn, ọ vbe gi ima rẹn wẹẹ, ọmwa rrọọ nọ rre ukpo nọ yo sẹ ọghe iran. Nọ ghi ru ekpataki sẹ ọre wẹẹ, ako na ya ima rẹn wẹẹ, e Jehova ẹre ọ rre ukpo nọ ghi yo sẹ, irẹn ọre Osa Ne Udazi. Vbe na wa guan na, Jesu Kristi ne irẹn tobọre ma re Ọba, suẹn gha khaemwisẹ nẹ. E Jehova ne Osa Ne Udazi, nọ bẹghe emwi hia nọ sunu, i re Osa nọ gbe ọmwa ekueku, nọghayayerriọ, obọ esi ẹre irẹn ya mu emwa hia. Erriọ Ovbi ẹre ighẹ Jesu Kristi vbe ye.