E Hulda Keghi Sẹtin Ru Emwi Nọ Hoo Nọ Ru
Ọ MWẸ etẹn ima nikhuo eha ni rre ẹvbo ne amẹ gbodin lẹga na tie ẹre Sangir Besar vbe Indonesia. Ọkpẹn okun nọ rre ẹvbo nii ẹre iran na gha kporhu iyẹn nọ maan vbe ukpo eso nọ gberra. A wa rẹn iran zẹvbe emwa ni ru iyobọ ne emwa ya rẹn otọ e Baibol. Gia guan kaẹn iwinna ọvbehe ne iran vbe gha ru vbe ọkpẹn okun nii.
Ẹvbo ne amẹ gbodin lẹga na tie ẹre Sangir Besar vbe Indonesia
Iran gha ghi khian la uwu okun nii, iran ghi gha viọ avbe okuta ni khua ladian, iran ghi ya viọ ọre ye ọkpẹn okun nii. Eso vbe uwu avbe okuta na kpọlọ sẹ ebọlu. Iyeke ọni, iran ghi tota ye joko, iran ghi gha ya umomọ dunmwu avbe okuta na, sẹrriọ wẹẹ nene avbe okuta ghi do kherhe sẹ ekẹn ọkhọkhọ. Iran gha ghi ru ọni nẹ, iran ghi do viọ ọre ye ikoroba, iran ghi mu gha rrie owa; iran gha zẹ khian vbe odẹ, ọ mwẹ ihe ọkpa nọ yo ne iran hin iran ke sẹ owa. Iyeke ọni, iran ghi do mwamwa avbe okuta na ye ẹkpo ni kpọlọ, a ghi do mwamwa avbe ẹkpo na ye imọto nikhua, imọto na ẹre ọ khian ghi viọ ọre gha rrie eke ne iran khian na yae so ukpo.
E Hulda gha si avbe okuta koko vbe ọkpẹn okun
Ọkpa vbe uwu etẹn nikhuo eha na ọre Hulda. Ẹkpotọ keghi kie nẹẹn ya rhiegbe ye iwinna na sẹ iran nikẹre. Igho nọ miẹn vbe iwinna na, ẹre ọ ya gha gaga ẹgbẹe ọre. Sokpan, ọ na do gha mwẹ emwi ọvbehe nọ hoo nọ ya igho ru. Ọ na gha hoo ne irẹn dẹ e tablet, nọ mieke na sẹtin yae gha la e JW Library®. Ọtẹn Nokhuo Hulda rẹnrẹn wẹẹ, avbe vidio kevbe emwi ọvbehe ni rre JW Library® gha ru iyobọ ne irẹn ya guẹ vbe na ya kporhu sayọ, ọ ghi vbe ru iyobọ nẹẹn ya kakabọ rẹn otọ e Baibol.
Ughaẹdẹ eva ẹre Hulda ya gha winna vbe owiẹ owiẹ vbe uki ọkpa vbe ukhiọnmwẹ, nọ mieke na sẹtin koko igho nọ khian ya dẹ nene tablet. Okuta nọ ghaa dunmwu bun sẹrriọ wẹẹ, ọ ghi vuọn iyeke trailer nọ ma kpọlọ gbe. Vbọ ma he kpẹẹ vba, ọ keghi sẹtin koko igho nọ gha sẹ ọre ya dẹ nene tablet.
E Hulda da e tablet ọghẹe yi
Ọtẹn Nokhuo Hulda khare wẹẹ, “Agharhemiẹn we egbe wa wọọ mwẹ ne I ya gha dunmwu okuta, vbe I ghi suẹn gha loo e tablet na vbe kporhu kevbe vbe I ghi bẹghe vbe nọ khuẹrhẹ hẹ na ya mu egbe iko yotọ, I ma ghi ye ẹsọn ne I miẹn rre.” Ọ vbe kha wẹẹ, nene tablet wa ru iyobọ ne irẹn vbe covid-19 da suẹn, rhunmwuda vbe ẹghẹ nii, efoni ẹre a ya gha do iko, ẹre a vbe ya gha kporhu. Ma ghọghọ wẹẹ, Ọtẹn Nokhuo Hulda sẹtin ru emwi nọ hoo nọ ru.
