Emwa eso rrọọ ni ke uniẹn e Livai rre ni ma gha winna iwinna ohẹn vbe Ọgua Osa. Iran ghaa mwẹ iwinna nibun ne iran ghaa ru, ọkpa vbọ ọre iwinna olakpa. Ọkaolotu ọghe Ọgua Osa ẹre ọ ghaa dia iran. Vbe ọgbenbe ọkpa na tiẹre Philo ghi guan kaẹn iwinna ne avbe olakpa na winna, ọ keghi kha wẹẹ: “Eso vbe iran na [Ivbi e Livai] kegha khẹ odẹ vbe odaro Ọgua Osa, vbene eso na mudia ye onurho ne emwa ghẹ gha la uwu Ọgua Osa vbene iran rhirhi miẹn. Eso vbe avbe olakpa na keghi khian lẹga Ọgua Osa gha ba odẹ, iran keghi ru iwinna na ọsegbe ọsegbe, eso gha winna vbe avan, eso ghi winna vbe asọn.”

Avbe olakpa na vbe gha winna ne emwa ni rre ekọtu ọghe Ivbi e Ju na tiẹre Sahẹndrin. Iran ọkpa ẹre ọ ghaa re Ivbi e Ju ne arriọba ọghe Ivbi e Rom kpasẹ yi, ne iran gha mu emwi igbinna.

Okpia ọkpa nọ rri egie ebe na tiẹre Joachim Jeremias keghi kha wẹẹ, vbe ẹghẹ ne avbe olakpa ya mu e Jesu, Jesu keghi nọ iran evbọzẹe ne iran ma na mu irẹn vbe irẹn kporhu vbe Ọgua Osa. (Mat 26:55) Akpawẹ avbe olakpa na ma gele gha winna vbe Ọgua Osa, Jesu i ghẹ te nọ iran ọta vberriọ. Ọgbenbe na guan kaẹn ban vbe yayi wẹẹ, avbe olakpa na, ẹre a ka vbe gie ne iran ya mu e Jesu. (Jọn 7:32, 45, 46) Vbe ẹghẹ eso ghi gberra, emwa ni rre Sahẹndrin keghi gie ọkaolotu ọghe Ọgua Osa kevbe avbe olakpa ni winna vba, ne iran ya mu avbe ukọ ọghe Jesu. Ọ gha kẹ, avbe olakpa na ẹre ọ vbe si e Pọl ladian vbuwe Ọgua Osa.—Iwinna 4:1-3; 5:17-27; 21:27-30.