NE UKPO, vbe uhunmwu otagbọn hia, ikpia arriaisẹn nibun ẹre a zẹ ye ukpo ediọn kevbe eguọmwadia iwinna vbe otu e Jehova. Deghẹ ọkpa vbe usun etẹn na ẹre u khin, ma yayi wẹẹ, u sọyẹnmwẹ ukpamuyọmọ ne u ghi mwẹ nia.

Ukpamuyọmọ na sẹtin vbe ya osi gha si ruẹ. Erriọ ghaa ye vbe a da zẹ Jason ye ukpo ediọn rhunmwuda igbama ẹre ghaa nọ. Ọ keghi kha wẹẹ: “Ọna ye vbe ne iro han mwẹ. I na gha roro ẹre wẹẹ I ma somwa.” E Mozis kevbe Jerimaia vbe gha mwẹ ekhọe vbenian vbe Jehova da waa iwinna ne iran. (Ẹks 4:10; Jer 1:6) Deghẹ ohan vberriọ mu ruẹ, de emwi nọ gha ru iyobọ nuẹn, ne u mieke na gha mwẹ alaghodaro vbe ugamwẹ e Jehova? Gi ima ziro yan igiemwi ọghe Timoti.—Iwinna 16:1-3.

Odẹ ukpo 20 ẹre Timothy ghaa ye vbe Pọl wẹẹ ne ọ deba irẹn vbe iwinna arọndẹ ne a gie yo isi. Ẹi mwẹ ohan ma vbe gha mu e Timoti vbe a da zẹ ọre ye ukpo. Ọ gha kẹ, ọ vbe gha si egbe nọ ya loo asẹ ne ọ mwẹ. (1 Tim 4:11, 12; 2 Tim 1:1, 2, 7) Sokpan, odẹ ukpo igbe ghi gberra nẹ, ohan vberriọ ma ghi gha mu e Timoti, ọni ẹre ọ si ẹre ne Pọl na tama iko nọ rre Filipai wẹẹ: “I mu ẹtin yan Nọyaẹnmwa Jesu Kristi ighẹ I gha sẹtin gie Timoti bu uwa gha dee . . . Rẹn ọkpa ọre I miẹn ne emwi ne ọ rre imẹ ekhọe vbe rre ọre ekhọe.”—Fil 2:19, 20.

Vbọ ye Timoti do gha re ọdiọn ne kpataki ne a ya egbe ta? Gi ima guan kaẹn emwi ehan ne ima gha miẹn ruẹ vbe igiemwi e Timoti.

1. Te ọ gele hoẹmwẹ emwa ọvbehe. E Pọl keghi tama etẹn ni rre Filipai wẹẹ, e Timoti gha “zẹ ye ẹmwẹ uwa.” (Fil 2:20) Erriọ e Timoti gele wa gha ye zẹẹ. Obọ esi ẹre ọ ya gha mu emwa hia. Ekhọe hia ẹre ọ vbe ya gha ru iyobọ ne etẹn vbe odẹ ọghe orhiọn.

Ọ ma khẹke ne ediọn ye vbe ole tuke tuke nọ khirhi rrie ehe ne okotọ ne a kun sie vbene ekhẹn rhọkpa i na rre ọre imọto. Ọ te gberra ekhẹn eso vbe odẹ sokpan, ọ ma kue mu iran rhunmwuda ọ hoo ne ọ sẹ evba ye ẹghẹ. Ọtẹn nokpia William nọ re ọdiọn ne emwa nibun rẹnrẹn, ọ vbe gberra ukpo 20 nọ ke ga zẹvbe ọkpa vbe ediọn vbe iko keghi rhie ibude na ne etẹn ne a da zẹ ye ukpo ediọn. Ọ na kha wẹẹ: “Wa gha hoẹmwẹ etẹn. Gi aro uwa gha sotọ vbe egbe etẹn ne uwa mieke na rẹn iyobọ ne uwa gha ru ne iran. Ọ ma khẹke ne etẹn rẹn ruẹ ye ọmwa ne ọ waa iwinna ne ọmwa kevbe ne ọ rhie adia ne ọmwa vbe ẹghẹ hia.”

2. Iwinna ikporhu iyẹn nọ maan ẹre ọ mu ye okaro. Vbe Pọl guan kaẹn vbene Timoti ya lughaẹn ne emwa ọvbehe, ọ keghi kha wẹẹ: “Emwa nekpa hia, ẹmwẹ enegbe iran ọre iran rhie aro daa, ẹi zẹdẹ re ẹmwẹ iwinna Jesu Kristi.” (Fil 2:21) E Pọl keghi bẹghe ẹre wẹẹ, ọghe enegbe iran ẹre ọ mu etẹn ni ghaa rre Rom rhunmwuda, evba nii, ẹre ọ na gbẹn ebe Filipai. E Timoti ma gha yerriọ. Vbe ẹkpotọ kie nẹẹn ne ọ ya ru sayọ vbe iwinna ikporhu iyẹn nọ maan, ọ kegha mwẹ egbe ekhọe ọghe Aizaia nọ khare wẹẹ: “I gha yo! Gie mwẹ.”—Aiz 6:8.

Vbua khian ya sẹtin mu iwinna obọ ruẹ ye oreghe hẹ, ne u mieke na ye sẹtin mu ọghe orhiọn ye okaro? Okaro, hae emwamwa ruẹ ye ugan, u ghi mu enọ ru ekpataki sẹ ye okaro. E Pọl keghi kha wẹẹ: “Zẹ emwi nọ maan sẹ.” (Fil 1:10) Gi ugamwẹ e Jehova gha re okaro vbe arrọọ ruẹ. Nogieva, ya arrọọ ruẹ khian ne khuẹrhẹ. Ghẹ mu ẹghẹ rhia ye emwi ne ẹi mwẹ esa. E Pọl keghi tama e Timoti wẹẹ: “Gha bi egbe hin orriarria ibiẹka, u ghi gha gbinna ne emwi ẹmwata, iyayi, kevbe ahoẹmwẹ kevbe ọfunmwegbe.”—2 Tim 2:22.

 3. Ọ keghi rhiegba ye iwinna ugamwẹ. E Pọl keghi tama etẹn ni ghaa rre Filipai wẹẹ: “Wa tobọ uwa miẹn uyinmwẹ ne Timoti rhiema, vbe imẹ vbe ọre gba gha kporhu iyẹn nọ maan zẹ vbe ọmọ vbe erha.” (Fil 2:22, NW) Ọna ya ima rẹn wẹẹ, e Timoti ma ghaa re ọmwa avbiẹrẹ ra ọmwa ne obọ gbe. Te ọ wa ya egbe hia deba e Pọl vbe iwinna ugamwẹ. Ọna ẹre ọ ghi ya ahoẹmwọmwa ne iran mwẹ daa egbe wegbe sayọ.

Iwinna i fo vbe ugamwẹ Jehova. Iwinna na keghi re nọ sẹ ọmwa ọkẹn, erriọ vbe ya ima sikẹ etẹn ima nikpia kevbe nikhuo. Nọnaghiyerriọ, wa gha mwẹ ọghae vbe iwinna ughughan vbe ugamwẹ e Jehova, uwa ghi vbe “tua obọ ye iwinna ne uwa winna ne Nọyaẹnmwa.”—1 Kọr 15:58.

4. Ọ rhie emwi nọ ruẹ re ye uyinmwẹ. Vbe ebe ne Pọl gbẹn gie Timoti, ọ keghi tama rẹn wẹẹ: “Aro ruẹ sẹ emwi ne I ma emwa ẹre, kevbe uyinmwẹ mwẹ, u vbe miẹn iyayi mwẹ, izinegbe mwẹ, ahoẹmwọmwa mwẹ, kevbe vbene I hia hẹ.” (2 Tim 3:10) E Timoti wa gele gha rhie emwi nọ ruẹ re ye uyinmwẹ. Ọ ghi sẹ ẹghẹ, ọ na do gha re ọmwa nọ gbegba, ne a ghi mu iwinna ne kpataki yọ re ọbọ.—1 Kọr 4:17.

Ọ mwẹ ọtẹn ne u ya egbe ta vbe otu e Jehova ra? Deghe ẹi rrọọ, ọ khẹke ne u gha mwẹ. E Tọm nọ kpẹre nẹ vbe ukpo ediọn keghi kha wẹẹ: “Odiọn ọkpa vbuwe iko keghi si mwẹ kẹ egbe, ọ na maa mwẹ emwi ẹsẹse. Ẹghẹ hia, ẹre I ya gha tama rẹn nọ rhie adia mẹ, I na vbe gha lele adia nọ rhie mẹ. Ọna ẹre ọ ghi ya mwẹ dọ gha mwẹ udinmwẹ.”

5. Ọ keghi tobọ re gha ruẹ emwi sayọ. E Pọl keghi rhie igiọdu na ne Timoti: “Tobọ gha maa egbuẹ emwi ye uyinmwẹ ọghe Osanobua.” (1 Tim 4:7) Ọmwa ne ọ ku iko isasegbe sẹtin gha mwẹ ọmwa nọ maa re emwi (coach) sokpan, te ọ vbe khẹke nọ tobọre gha maa egbe ẹre emwi. E Pọl keghi tama e Timoti wẹẹ: ‘Kakabọ rhie ẹghẹ ne u mu egbe ye ẹmwẹ ebe ne a tie ma emwa . . . kevbe emwi ne a maan emwa ẹre. . . . Gha ya avbe emwi na ru emwi, ne u vbe zẹ egbuẹ obọ ne iran, ne alaghodaro ruẹ miẹn ehe na gha re ne aro emwa hia sẹe.’—1 Tim 4:13-15.

Te ọ vbe khẹke ne ediọn gha mwẹ ifuẹro sayọ. Ghẹ gha re ọmwa ne ẹi mwẹ alaghodaro vbe odẹ ọghe orhiọn. Ọ ma vbe khẹke ne u de ghee iyeke vbe nọ dekaan emwamwa ọghe otu. Ghẹ vbe gha mwẹ ekhọe ọghe vbọghiyekede, ne u gha roro ẹre wẹẹ, u gha sẹtin ya ẹwaẹn obọ ruẹ ra irẹnmwi ne u mwẹ ya ru emwi ke emwi vbe otu e Jehova, ọ gha khọn rẹn wẹẹ u ma ru ezanzan. Gha ya egbe tae Timoti vbe odẹ nọ ya gha begbe kevbe vbene ọ ya gha gbaro kotọ maa emwa emwi.—1 Tim 4:16.

6. Ọ keghi hẹnhẹn egbe yan orhiọn nọhuanrẹn ọghe Jehova. Ne Timoti mieke na sẹtin musọe vbe iwinna ikporhu iyẹn nọ maan, e Pọl keghi rhie adia na nẹẹn: “Viọ iran mwẹ ighẹ avbe emwi esi ne a ka yuẹ obọ, vbe ekpa ẹtin ọghe orhiọn nọhuanrẹn ne ọ rre uwu ima.” (2 Tim 1:14) Orhiọn nọhuanrẹn ẹre ọ zẹe ighẹ Timọti sẹtin musọe vbe iwinna ikporhu iyẹn nọ maan.

E Donald nọ gbe ukpo nibun nẹ zẹvbe ọdiọn vbe iko keghi kha wẹẹ: “Te ọ khẹke ne ediọn kevbe eguọmwadia iwinna gha gu Osanobua mu obọ. Iran na gele gha ru vberriọ, orhiọn ghi gha ‘la iran iwu.’ Iran ghaa na erhunmwu ne Jehova ya orhiọn nọhuanrẹn ru iyobọ ne iran, iran na vbe gha rhie akpa ọghe orhiọn nọhuanrẹn ma vbe arrọọ ọghe iran, etẹn vbuwe iko ghi do bẹghe ẹre wẹẹ, ikpia ne Osanobua ya ru iran ẹse ẹre ediọn gele khin vbe iko.”—Psm 84:7; 1 Pit 4:11.

Ukpo ukpo ẹre a ya zẹ etẹn nikpia nibun ye ukpo ediọn. Alaghodaro vbenian keghi sẹ ima ọyẹnmwẹ. E Jason ne a ya unu kaẹn vbe omuhẹn ban keghi kha wẹẹ: “Ẹi re avbiẹ emwi ẹre I he ruẹ ke na ya zẹ mwẹ ye ukpo ediọn. Ohan i ghi vbe mu mwẹ. Vbene ẹmwata, ne a gha re ọkpa vbe ediọn vbe iko keghi re ukpamuyọmọ nọ hiunsi. Te I ghi wa sọyẹnmwẹ iwinna na.”

Ye gha mwẹ alaghodaro vbe ugamwẹ e Jehova. Gha ya egbe tae Timoti, odẹ vberriọ, u gele do gha re afiangbe ne eguọmwadia Osanobua.