AKO IRUẸMWI 19
Vbọ Khian Ya Ima Gha Mwẹ Amuẹtinyan Nọ Wegbe Wẹẹ, E Jehova Gha Mu Agbọn Ọgbọn Rre?
“Emwi ne [Jehova] rhirhi ta, ẹre ọ ru.”—NỌM 23:19.
IHUAN 142 Ghẹ Muẹn Fua Ayayẹro Ne U Mwẹ
OLIKA ẸMWẸ ỌGHE AKO IRUẸMWI NA a
1-2. Vbọ khẹke ne ima gha ru, zẹvbe ne ima ya mudia khẹ agbọn ọgbọn nii?
Ọ WA sẹ ima ọyẹnmwẹ ne Jehova na wẹẹ irẹn gha mu agbọn ọgbọn rre. (2 Pit 3:13) Agharhemiẹn wẹẹ, ima ma rẹn ẹdẹ nọ khin, emwi hia ni sunu nian ya ima rẹn wẹẹ, ẹi khian ghi kpẹẹ gbe.—Mat 24:32-34, 36; Iwinna 1:7.
2 Ọ gha khọnrẹn wẹẹ, ọ kpẹẹ re ne ima ke rre odẹ ẹmwata na, ọ khẹke ne ima ye gha hia ne ima gha mwẹ amuẹtinyan nọ wegbe wẹẹ, e Jehova gha gele mu agbọn ọgbọn rre. Vbọzẹ? Rhunmwuda, amuẹtinyan nọ wegbe sẹtin khian nọ ghi worua. Uhiẹn ukọ e Pọl khare wẹẹ, “orukhọ nọ [rherhe] rhikhan obọ mu ọmwa” ẹre amuẹtinyan nọ ma ghi wegbe khin. (Hib 12:1) Ne amuẹtinyan ọghe ima ghẹ mieke na worua, ọ khẹke ne ima gha muẹn roro vbe ẹghẹ hia, emwi ughughan ni so igiẹ yọ wẹẹ, agbọn ọgbọn nii gha rherhe rre.—Hib 11:1.
3. De emwi ne ima khian ziro yan vbe ako iruẹmwi na?
3 Vbe ako iruẹmwi na, ma gha ziro yan emwi eha nọ khẹke ne ima gha ru, nọ gha gele ya ima yayi wẹẹ, e Jehova gha mu agbọn ọgbọn rre. Ọ khẹke: (1) ne ima gha muẹn roro uwu ne Jesu do wu ne ima, (2) ne ima gha muẹn roro vbene Jehova mwẹ ẹtin hẹ (3) ne ima gha ru emwi nọ gha ya ima sikẹ e Jehova sayọ. Vbe iyeke ọni, ma ghi ziro yan vbene ẹmwẹ ne Jehova tama e Habakọk ya ya ima mwẹ amuẹtinyan nọ wegbe vbe ẹdẹnẹrẹ. Sokpan vbe okaro, gia ka ziro yan ẹghẹ eso nọ ya khẹke ne ima rhie ẹre ma wẹẹ, ima mwẹ amuẹtinyan nọ wegbe wẹẹ, e Jehova gha mu agbọn ọgbọn rre.
ẸGHẸ ESO NỌ YA KHẸKE NE IMA RHIE ẸRE MA WẸẸ IMA MWẸ AMUẸTINYAN NỌ WEGBE
4. De emwi eso ne ima ru, nọ na khẹke ne ima gha mwẹ amuẹtinyan nọ wegbe?
4 Emwi nibun rrọọ ne ima ru vbe ẹdẹgbegbe, nọ rhie ẹre ma deghẹ ima mwẹ amuẹtinyan nọ wegbe. Vbe igiemwi, ma tobọ ima ẹre ọ zẹ aro emwa ne ima gu mu obọ, aro ughe ne ima ghee, owebe ne ima yo, ma vbe ru azẹ eso nọ dekaẹn orọnmwẹ ọghe ima, ivbi ima kevbe iwinna ne ima ru. Nọnaghiyerriọ, ọ khẹke ne ima nọ egbe ima wẹẹ, ‘Emwi ne I ru rhie ẹre ma wẹẹ, I yayi wẹẹ ovbi ẹghẹ kherhe ẹre ọ ghi kẹ vbe agbọn na ra, kevbe wẹẹ, agbọn ọgbọn gha rherhe rre ra? Ra te imẹ ya egbe taa emwa ni rre uwu agbọn, ni yayi wẹẹ a gha wu, ọni ọre ọ fo?’ (Mat 6:19, 20; Luk 12:16-21) Ma gha gele yayi wẹẹ, agbọn ọgbọn gha rherhe rre, ẹre ima khian na sẹtin ru emwi nọ khẹke.
5-6. Vbọzẹ nọ na khẹke ne ima gha mwẹ amuẹtinyan nọ wegbe vbe ẹghẹ ọlọghọmwa? Ru igiemwi yọ.
5 Ma vbe miẹn ọlọghọmwa eso nọ na khẹke ne ima rhie ẹre ma wẹẹ ima mwẹ amuẹtinyan nọ wegbe. A sẹtin gha zẹ ima kpokpo, ma sẹtin vbe gha khuọnmwi emianmwẹ nọ wegbe, emwi eso sẹtin vbe sunu nọ gha ya egbe wọọ ima. Ọlọghọmwa gha da suẹn, ma ghi gha ghee ẹre wẹẹ ima gha sẹtin zin egbe ẹre. Sokpan ẹghẹ nibun, ọlọghọmwa ne ima ye sẹtin gha sun vbe otọ. Ọ ghaa yerriọ, amuẹtinyan nọ wegbe ẹre ọ khian ru iyobọ ne ima ya sẹtin zin egbe ẹre, ọ ghi vbe ya ima gha ya ekhọe ọyẹnmwẹ ga e Jehova.—Rom 12:12; 1 Pit 1:6, 7.
6 Emwi ghaa ba su ima, ma sẹtin gha ghee ẹre wẹẹ, Arriọba Osanobua i khian ghi rre. Te ọna ghi rhie ma wẹẹ, ma i mwẹ amuẹtinyan nọ wegbe ra? Ẹo, ọ ma wa rhie ma wẹẹ ima i mwẹ amuẹtinyan nọ wegbe. Gia kha wẹẹ, ẹghẹ uyunmwu ẹre ima ye, na kha na, okhuakhua wa kakabọ fi, rhunmwuda ọni, ọ ghi do yevbe na miẹn wẹẹ, orhọ i khian ghi rre. Sokpan ẹi mwẹ ne orhọ ghẹ rre. Erriọ vbe ye, egbe gha wọọ ima, ma sẹtin gha ghee ẹre wẹẹ, agbọn ọgbọn i khian ghi rre. Sokpan, deghẹ ima na gha mwẹ amuẹtinyan nọ wegbe, ẹre ima khian na gele rẹn wẹẹ, Osanobua gha mu eyan rẹn sẹ. (Psm 94:3, 14, 15; Hib 6:17-19) Ọna gha ru iyobọ ne ima ya mu ugamwẹ e Jehova ye okaro.
7. De aro uyinmwẹ nọ khẹke ne ima na gha begbe?
7 Ne ima mieke na sẹtin gha kporhu, ọ khẹke ne ima gha mwẹ amuẹtinyan nọ wegbe. Emwa nibun ne ima kporhu ma, ma yayi wẹẹ ma gha sẹtin rri orhiẹnrhiẹn agbọn vbe etẹbitẹ. (Mat 24:14; Ẹzik 33:32) Ọ khẹke ne ima gha begbe, ne ima tobọ ima ghẹ do gha gbawawẹ. Ne ọna ghẹ mieke na sunu, ọ khẹke ne ima gha ru emwi nọ gha ya amuẹtinyan ọghe ima wegbe sayọ. Gi ima ziro yan odẹ eha ne ima gha ya sẹtin ru ọna.
GHA MU UWU ỌGHE JESU RORO
8-9. Ma ghaa mu uwu ọghe Jesu roro, vbọ khian ya ya ima gha mwẹ amuẹtinyan nọ wegbe?
8 Ma ghaa muẹn roro uwu ne Jesu wu ne ima, ọ gha ru iyobọ ne ima ya gha mwẹ amuẹtinyan nọ wegbe. Uwu ọghe Jesu ẹre ọ ya ima mwẹ ilẹkẹtin wẹẹ, Osanobua gha mu eyan rẹn sẹ. Ma ghaa muẹn roro evbọzẹe ne Jesu na wu kevbe emwi ne uwu ọghẹe demu, ọ gha ya ima gha mwẹ amuẹtinyan wẹẹ, ma gha sẹtin gha rrọọ vbe etẹbitẹ zẹvbe ne Osanobua yan rẹn. Vbe ima gu kha vberriọ?
9 De emwi ne uwu ọghe Jesu gele demu? E Jehova keghi gie ọmọdiọn ọghẹe, nọ re ọmwa nọ ghi sikẹ ọre sẹ gha die agbọn na, na biẹ ọre zẹvbe ọmwa nọ gbae. Vbe Jesu rre agbọn na, ọ wa rri oya ne udẹn rri oya ne ẹvbi. Ọ ghi sẹ ẹghẹ, ọ na vbe wu uwu obalọ. Ẹi re emwi kherhe ẹre Jehova ru ne ima! Osanobua i ghẹ te kue ne ovbi ẹre rri oya, nọ vbe wu adeghẹ ọ rẹnrẹn wẹẹ, ovbi ẹghẹ kherhe ẹre ima khian ya rri orhiẹnrhiẹn agbọn. (Jọn 3:16; 1 Pit 1:18, 19) Ugbẹnvbe a miẹn wẹẹ, e Jehova kue ne ovbi ẹre wu, ọ gha vbe ru ẹre ne ima sẹtin gha rrọọ vbe etẹbitẹ vbe agbọn ọgbọn nọ dee.
GHA MUẸN RORO VBENE JEHOVA MWẸ ẸTIN HẸ
10. De emwi ne Jehova gha sẹtin ru, zẹvbe nọ rre ebe Ẹfisọs 3:20?
10 Emwi ọvbehe nọ gha ya ima gha mwẹ amuẹtinyan nọ wegbe, ọre ne ima gha muẹn roro vbene Jehova mwẹ ẹtin hẹ. E Jehova mwẹ ẹtin nọ khian ya mu eyan rẹn hia sẹ. Vbene ẹmwata, ma sẹtin gha ghee ẹre wẹẹ, ọ gha lọghọ ne ima gha rrọọ vbe etẹbitẹ vbe agbọn ọgbọn nii. Sokpan emwi ne emwa nagbọn i sẹtin ru, ẹre Jehova mobọ yan wẹẹ irẹn gha ru, rhunmwuda irẹn ọre Osanobua Ne Udazi. (Job 42:2; Mak 10:27) Rhunmwuda ọni, ma i ba iro eveva vbe ọ gha ru eyan nọ yan ọmwa unu rua.—Tie Ẹfisọs 3:20.
11. Ru igiemwi ọkpa ọghe vbene Jehova ya mu eyan nọ yan rẹn sẹ. (Ya ghee ẹkpẹti nọ khare wẹẹ, “ Emwi Eso Ni Kpa Ọmwa Odin Ne Jehova Wẹẹ Irẹn Gha Ru, Nọ Gele Ru.”)
11 Gia guan kaẹn emwi eso nọ yevbe emwi nẹi khian sẹtin sunu ne Jehova ru eyan rẹn vbe ẹghẹ nọ gberra. Ọ keghi tama Ebraham vbe Sera wẹẹ, iran gha biẹ ọmokpia ọkpa, agharhemiẹn wẹẹ, iran khian ọmaẹn nẹ. (Gẹn 17:15-17) Ọ na vbe tama Ebraham wẹẹ, irẹn gha mu otọ e Kena ne uniẹn ọnrẹn. Vbe ọwara ukpo nibun ne Ivbi Izrẹl ni re Ivbi Ebraham ya gha rri oya vbe Igipt, ọ na do yevbe na miẹn wẹẹ, eyan ọghe Jehova i khian ghi sẹ. Sokpan, te ọ ye sẹ. Vbene ẹghẹ ya khian, e Jehova na vbe tae wẹẹ, Elizabẹt gha ya egbe ọmaẹn biẹ. Ọ na vbe tama e Meri nọ re uvbi nọ ma he rẹn okpia wẹẹ, ọ gha biẹ Ovbi irẹn. Erriọ e Jehova ya muẹn sẹ eyan nọ yan rẹn vbe ogba ọghe Idẹni!—Gẹn 3:15.
12. De vbene ebe Jọsua 23:14 kevbe Aizaia 55:10, 11 ya ya ima rẹn wẹẹ, e Jehova gele mwẹ ẹtin?
12 Ma ghaa muẹn roro vbene Jehova ya mu eyan rẹn sẹ vbe ẹghẹ nọ gberra, ọ gha ya ima gha mwẹ ilẹkẹtin wẹẹ, ọ gha gele mu agbọn ọgbọn nii rre, rhunmwuda Osa Ne Olẹtin ẹre nọ. (Tie Jọsua 23:14; Aizaia 55:10, 11.) Ẹghẹ nii, ma ghi sẹtin ru iyobọ ne emwa ọvbehe ya rẹn wẹẹ, agbọn ọgbọn i re ọtakua na tisẹ. E Jehova ghi tae nẹ wẹẹ. irẹn gha mu ẹrinmwi ọgbọn kevbe agbọn ọgbọn rre, ọ na vbe kha wẹẹ: “Ẹmwẹ ẹmwata nọ gia mu ẹtin yan ẹre nọ.”—Arhie 21:1, 5.
GHA RU EMWI NỌ GHA YA RUẸ SIKẸ E JEHOVA SAYỌ
IKO NA YO
De vbene ena khian ya ru iyobọ nuẹn ya gha mwẹ amuẹtinyan nọ wegbe hẹ? (Ghee okhuẹn 13)
13. De vbene iko na yo, ya ru iyobọ ne ima ya gha mwẹ amuẹtinyan nọ wegbe hẹ? Rhan otọ re.
13 Emwi ọvbehe nọ gha ya ima gha mwẹ amuẹtinyan nọ wegbe, ọre deghẹ ima na rhiegba ye emwi nọ gha ya ima sikẹ e Jehova sayọ. Vbe igiemwi, muẹn roro vbene iko na yo ya ru iyobọ ne ima hẹ. Ọtẹn ọkpa na tie ẹre Anna, b nọ gbe ukpo nibun nẹ vbe iwinna ugamwẹ ẹghẹ hia khare wẹẹ: “Iko na yo wa ru iyobọ mẹ ya gha mwẹ amuẹtinyan nọ wegbe. Ọ gha khọnrẹn wẹẹ, ọmwa nọ ya ọta guan i mobọ gua ma emwa emwi, ra emwi ne I ka rẹn ẹre ọ guan kaẹn, te I ye miẹn emwi ruẹ nọ gha ya mwẹ rẹn e Baibol sayọ kevbe nọ gha vbe ya amuẹtinyan mwẹ wegbe sayọ.” Vbene ẹmwata, ma hia wa miẹn ere vbe ewanniẹn ne etẹn zẹ vbe iko.—Rom 1:11, 12; 10:17.
IWINNA IKPORHU
De vbene ena khian ya ru iyobọ nuẹn ya gha mwẹ amuẹtinyan nọ wegbe hẹ? (Ghee okhuẹn 14)
14. De vbene iwinna ikporhu iyẹn nọ maan ya ya ima mwẹ amuẹtinyan nọ wegbe hẹ?
14 Iwinna ikporhu iyẹn nọ maan vbe ya amuẹtinyan ọghe ima wegbe sayọ. (Hib 10:23) Ọ mwẹ ọtẹn ọkpa na tie ẹre Barbara, ọ gberra ukpo 70 nẹ, nọ ke ga e Jehova, ọ khare wẹẹ: “Iwinna ikporhu wa gele ya ima mwẹ amuẹtinyan nọ wegbe. Zẹvbe ne I ya tama emwa vbekpa emwamwa ne Jehova mwẹ ne ima vbe odaro, erriọ amuẹtinyan mwẹ vbe ya wegbe sayọ.”
NA GHA RUẸ EMWI NE EGBE ỌMWA
De vbene ena khian ya ru iyobọ nuẹn ya gha mwẹ amuẹtinyan nọ wegbe hẹ? (Ghee okhuẹn 15)
15. Ma ghaa ruẹ emwi ne egbe ima, vbọ khian ya ya ima gha mwẹ amuẹtinyan nọ wegbe hẹ? (Ghee efoto nọ rre ipapa 30.)
15 Emwi ọvbehe nọ gha vbe ya ima gha mwẹ amuẹtinyan nọ wegbe, ọre deghẹ ima na gha ruẹ emwi ne egbe ima. Ọtẹn nokhuo ọkpa na tie ẹre Susan khare wẹẹ, ne irẹn na mwẹ emwamwa ne irẹn lele ya ruẹ emwi wa ru iyobọ ne irẹn. Ọtẹn na wẹẹ: “Ẹdẹ e Sọnde ẹre I ya mu egbe Iruẹmwi Ebe Owa Ọkhẹ na khian tie vbe uzọla nọ dee yotọ. Ẹdẹ e Mọnde vbe Tuizde ẹre I ya mu egbe iko na do vbe uwu uzọla yotọ. Ẹdẹ ni ghi dekẹ, I ghi yae ruẹ emwi ọvbehe ne egbe mwẹ.” Emwamwa ne Susan lele na keghi ru iyobọ nẹẹn ya gha mwẹ amuẹtinyan nọ wegbe. Ọtẹn nokhuo ọvbehe na tie ẹre Irene, nọ he ga vbe ọwara ukpo nibun vbe igiogbẹ ọghomwa do bẹghe ẹre wẹẹ, adeghẹ a na gha tie vbekpa ẹmwẹ akhasẹ ni rre Baibol, ọ ru iyobọ ne ọmwa ya gha mwẹ amuẹtinyan nọ wegbe. Ọ khare wẹẹ, “Ọ keghi wa kpa mwẹ odin vbe I ghaa bẹghe ẹre wẹẹ, ẹmwẹ akhasẹ hia ne Jehova tae wa gele sẹ, erhọkpa ma zẹdẹ defua.” c
“ẸI MWẸ Ọ MA SUNU”
16. De vbene ẹmwẹ ne Jehova tama Habakọk ya dekaẹn ima hẹ vbe ẹdẹnẹrẹ? (Hibru 10:36, 37)
16 Ẹi re eban eguọmwadia e Jehova nibun ke khẹ ẹghẹ ne agbọn na khian ya sẹ ufomwẹ. Ma sẹtin gha ghee ẹre wẹẹ, te ọ khian ghi kue kpẹẹ gbe. E Jehova rẹn vbene emwi ye ima hẹ, rhunmwuda ọni, ọ keghi tama Habakọk ne akhasẹ wẹẹ: “Ọ ma he sẹ ẹghẹ nọ gha ya sunu. Sokpan ẹghẹ nii dee ẹgiẹgiẹ, emwi ne I mu ma ruẹ na, te ọ gha sunu. Ọ sẹtin yevbe ne okhian i kẹ ọre vbene ọ ya dee hẹ, sokpan, zin egbe diakhẹ ọre, ẹi mwẹ ọ ma sunu, ẹi ra vbe kpẹẹ!” (Hab 2:3) Ẹmwẹ na ne Jehova tama e Habakọk, vbe dekaẹn ima ni rrọọ vbe ẹdẹnẹrẹ ra? E Jehova keghi loo ukọ e Pọl ya rhan otọ ẹmwẹ nọ rre ako na ma Ivbiotu e Kristi ni khẹ agbọn ọgbọn nii. (Tie Hibru 10:36, 37.) Ọ gha khọnrẹn nọ yevbe na miẹn wẹẹ, te eyan ọghe Jehova ghi kpẹẹ vbe otọ, ma mwẹ ilẹkẹtin wẹẹ, “ẹi mwẹ ọ ma sunu, ẹi ra vbe kpẹẹ!”
17. De vbene ọtẹn nokhuo ọkpa ya zẹ owẹ lele ẹmwẹ ibude ne Jehova rhie ne Habakọk?
17 Ke ukpo nibun gha dee, ẹre eguọmwadia e Jehova nibun ke “zin egbe” khẹ agbọn ọgbọn. Vbe igiemwi, ukpo 1939 ẹre ọtẹn nokhuo Louise suẹn gha ga e Jehova. Ọ khare wẹẹ: “Vbe ẹghẹ nii, I na gha roro ẹre wẹẹ, vbene I te ladian vbe owebe nọ yo, okuo Amagẹdọn gha rre. Sokpan, ọ ma gha yerriọ. Ke ukpo nibun gha dee, ẹre I ke tie okha ọghe emwa ni wa gele zin egbe, a te miẹn wẹẹ, emwi ne Osanobua ve iran re sẹ iran obọ, emwa vbe na ghee Noa, Ebraham, Josẹf kevbe nibun ọvbehe. Izinegbe ne ima mwẹ, ẹre ọ ya ima mwẹ ilẹkẹtin wẹẹ, agbọn ọgbọn nii gha rherhe rre.” Etẹn nibun ni kpẹẹ nẹ vbe ugamwẹ e Jehova gha wa kue ye ẹmwẹ ne ọtẹn na tae!
18. Ma ghaa ghee evbayi, vbọ khian ya ru iyobọ ne ima hẹ ya gha mwẹ amuẹtinyan wẹẹ, agbọn ọgbọn nii gha gele rre?
18 Ẹmwata nọ wẹẹ, agbọn ọgbọn nii ma he rre. Sokpan muẹn roro emwi eso ni rrọọ nian; avbe orhọnmwẹ, erhan, aranmwẹ kevbe emwa nagbọn. Ọmwa i khian kha wẹẹ, avbe emwi na i gele rrọọ, agharhemiẹn wẹẹ, ẹghẹ eso ghaa rrọọ ne iran ma ya gha rrọọ. Sokpan te iran ghi rrọọ nian, rhunmwuda, e Jehova ẹre ọ yi iran. (Gẹn 1:1, 26, 27) Osanobua vbe tae nẹ wẹẹ, irẹn gha mu agbọn ọgbọn rre. Ẹi mwẹ ọ ma ru vberriọ. Vbe agbọn ọgbọn nii, te emwa khian gha rri orhiẹnrhiẹn agbọn vbe etẹbitẹ, egbe ghi vbe rran iran. Ẹghẹ ne Osanobua mwamwa yọ gha sẹ, agbọn ọgbọn nii gha gele rre.—Aiz 65:17; Arhie 21:3, 4.
19. Vbua khian ru, ne amuẹtinyan ọghuẹ mieke na gha wegbe sayọ?
19 Vbene agbọn ọgbọn nii ghi te rre, hia vbe odẹ ke odẹ ne amuẹtinyan ọghuẹ gha wegbe sayọ. Gha gbọyẹmwẹ ye uwu ọghe Jesu. Gha muẹn roro vbene Jehova mwẹ ẹtin hẹ. Rhiegba ye emwi nọ gha ya ruẹ sikẹ e Jehova sayọ. U ghaa ru ena hia, ‘ive nii gha sẹ ruẹ obọ, rhunmwuda amuẹtinyan kevbe izinegbe ne u mwẹ.’—Hib 6:11, 12; Rom 5:5.
IHUAN 139 Gha Mu Agbọn Ọghe Ọgbọn Roro
a Emwa nibun vbe ẹdẹnẹrẹ ma yayi wẹẹ, agbọn ọgbọn ne Jehova yan rẹn gha gele rre. Te iran ghee ẹre wẹẹ, ọtakua na tisẹ ẹre nọ. Sokpan ma wa yayi wẹẹ, e Jehova gha mu eyan rẹn hia sẹ. Ọrheyerriọ, te ima gha ye hia ne amuẹtinyan na, gha wegbe sayọ. Ako iruẹmwi na gha ya ima rẹn vbene ima gha ya sẹtin ru ọna hẹ.
b A fi eni eso werriẹ
c U gha miẹn uhunmwuta nibun ni guan kaẹn ẹmwẹ akhasẹ vbe ototọ uhunmwuta nọ khare wẹẹ, “Prophecy” vbe Watch Tower Publications Index. Vbe igiemwi, ya ghee uhunmwuta na “What Jehovah Foretells Comes to Be” nọ ladian vbe The Watchtower ọghe January 1, 2008.
