Vbe ako iruẹmwi nii, ma ruẹ ọre wẹẹ, ẹmwẹ ọkpa nọ rre otọ nọ kaẹn emwa nagbọn kevbe avbe odibosa ọre na kpe eni e Jehova nọ hin usi huan. Abọ ọkpa vbe ẹmwẹ nọ rre otọ na ọre, nọ dekaẹn odẹ ne Jehova ya kha, ọni nọ wẹẹ odẹ ne Jehova ya kha ẹre ọ maan sẹ. Abọ nogieva, ọre deghẹ emwa nagbọn gha sẹtin rhikhan mu e Jehova vbe iran gha miẹn edanmwẹ.

Vbọzẹ ne ima na kha wẹẹ na kpe eni e Jehova huan ẹre ẹmwẹ nọ rre otọ na wa mobọ dekaẹn? Gi ma guan kaẹn emwi eha nọ si ẹre.

Nokaro, Esu keghi hia nọ mu eni e Jehova rhia vbe ogba ọghe Idẹni. Te Setan ya ọta ohoghe nọ nọ e Ivi re kha wẹẹ, Osa nẹi ze emwi obọ, nẹi gi emwa nọ kha yan zẹ obọ zẹ owẹ ẹre Jehova khin. E Setan keghi gbodan ghee emwi ne Jehova ta, te ọ ya ọna kha wẹẹ ọmwa ohoghe ẹre Osanobua khin. Rhunmwuda ọni, te ọ mu eni e Jehova rhia. Ọ na do khian “Esu,” emwi na ya Esu kha ọre “ọmwa nọ mu ọmwa eni rhia.” (Jọn 8:44) Rhunmwuda ne Ivi na ya ohoghe ne Esu ta yi, ọ na he ẹmwẹ ye Osanobua obọ, nọ rhie ma wẹẹ, ọ ma hoo nọ gha rre ototọ ọdakha ọghe Osanobua. (Gẹn 3:1-6) Do fi ebanban, te Setan wa ye mu eni e Jehova rhia, ọ keghi ta ohoghe vbekpa e Jehova. Emwa ni ya ohoghe na yi, ẹre ọ mobọ he ẹmwẹ ye Osanobua obọ. Nọnaghiyerriọ, nọ ne emwa ọghe Jehova, eni e Jehova na mu rhia, ẹre ọ wa re ẹmwẹ nọ rre otọ. Ọna ẹre ọ si ẹre ne usẹ kevbe emwi dan na gba uhunmwu otagbọn na.

Nogieva, rhunmwuda wẹẹ, e Jehova hoo ne agbọn maan evbayi hia, ọ hoo nọ kpe eni ẹnrẹn huan fo fẹfẹfẹ. Ọna ọre emwi nọ wa ru ekpataki sẹ ne Jehova. Ẹre ọ si ẹre nọ na kha wẹẹ: “I gha kpe eni mwẹ nọkhua huan.” (Ẹzik 36:23) E Jesu vbe gi ima rẹn emwi nọ khẹke nọ ru ekpataki sẹ vbe erhunmwu ne ima ne eguọmwadia e Jehova na, vbe ọ khare wẹẹ: “Gi eni ruẹ gha re na kpe huan.” (Mat 6:9) Ẹ i re avbiẹ inugba ẹre Baibol nianiaẹn, vbene ọ ru ekpataki sẹ hẹ na rhie uyi ye eni e Jehova. Gi ima guan kaẹn eso vbọ: “Uwa rho eni e Jehova nọ mwẹ uyi.” (1 Krọ 16:29; Psm 96:8) “Uwa so ihuan uyi gie eni ẹnrẹn.” (Psm 66:2) “I gha rho eni ruẹ vbe etẹbitẹ.” (Psm 86:12) Ọkpa vbe usun ẹghẹ ne Jehova ya tobọre guan ke ẹrinmwi rre ọre vbe Jesu rre ọgua Osa vbe Jerusalẹm, e Jesu keghi kha wẹẹ: “Evbavba, rhie uyi ne eni ruẹ!” Ẹghẹ nii, e Jehova na guan ke ẹrinmwi rre wẹẹ, “I ka rhie uyi nẹẹn nẹ, I gha ye vbe dọlegbe rhie uyi nẹẹn.”—Jọn 12:28. a

Nogieha, emwamwa ne Jehova mwẹ kotọ gha dee keghi dekaẹn eni ẹnrẹn. Muẹn roro: Vbe ukpo arriaisẹn ọkpa gha ghi gberra nẹ, vbe emwa nagbọn gha miẹn edanmwẹ nokiekie nẹ, vbọ khian ghi sunu vbe iyeke ọni? De aro ne avbe odibosa kevbe emwa nagbọn khian ghi ya gha ghee eni e Jehova? Ne ima ya rhie ewanniẹn ye ọta na, gi ima guan kaẹn abọ eva ne ima ka sunu yi—ọni ọre deghẹ emwa nagbọn gha sẹtin rhikhan mu e Jehova  kevbe ọmwa nọ khẹke nọ gha khaevbisẹ. Emwa nagbọn ni ya ekhọe hia rhikhan mu e Jehova gha ye gha miẹn edanmwẹ nọ gha rhie ẹre ma deghẹ iran gele mwẹ ẹkoata daa e Jehova ra? Ẹo. Iran khian emwa ni gbae nẹ vbe ẹghẹ nii, iran vbe la edanmwẹ nibun gberra nẹ. Arrọọ ọghe etẹbitẹ gha sẹ iran obọ nẹ vbe ẹghẹ nii. Vbe deba ọni, esa i khian ghi gha rrọọ ne Jehova ya rhie ẹre ma wẹẹ, odẹ ne irẹn ya khaevbisẹ ẹre ọ maan sẹ, ẹghẹ nii, avbe odibosa kevbe emwa nagbọn ghi do gha mwẹ akugbe, iran ghi vbe miẹn ọnrẹn yi odẹ ne Jehova ya khaevbisẹ. Eni e Jehova ghi vbo?

Ẹghẹ nii, a gha kpe eni e Jehova huan fo fẹfẹfẹ, ozan rhọkpa i khian ghi vbe gha rre eni ẹnrẹn. Vbọrhirhighayehẹ, eni e Jehova ẹre ọ khian ye gha re emwi nọ ghi ru ekpataki sẹ ne avbe eguọmwadia ẹre ni rre ẹrinmwi kevbe ni rre uhunmwu otagbọn na. Vbọzẹ? Rhunmwuda aro iran gha sẹ emwi ọyunnuan nibun ne Jehova khian gha ru. Muẹn roro: Rhunmwuda ne Jesu khian na mu ọdakha hia ye obọ e Jehova, Osanobua ghi gha “khaevbisẹ yan emwa hia.” (1 Kọr 15:28) Iyeke ọni, emwa nagbọn ghi gha sọyẹnmwẹ rhunmwuda “afanvbimu ọghe uyi ne ivbi Osanobua mwẹ.” (Rom 8:21) Ẹghẹ nii, e Jehova ghi vbe ru emwi nọ mwamwa kotọ gha dee, ọ ghi ya emwa nagbọn kevbe avbe odibosa khian ẹgbẹe ọkpa ni mwẹ akugbe.—Ẹfis 1:10.

De vbene emwi khian ghi gha ye hẹ ne ẹgbẹe ọghe Jehova ni rre ẹrinmwi kevbe uhunmwu otagbọn na vbe ena hia gha ghi sunu nẹ? Vbene ẹmwata te ima khian wa gha hoo ne ima gha rho eni nọhuanrẹn ọghe Jehova. Orhiọn nọhuanrẹn keghi dia e Devid ya gbẹn wẹẹ: “Uwa rho e Jehova ne Osanobua . . . Uwa rho eni ẹnrẹn nọ mwẹ uyi ẹdẹdẹmwẹdẹ.” (Psm 72:18, 19) Ke etẹbitẹ ya fi etẹghori te ima khian ye gha miẹn emwi ughughan nọ khian gua ima kpa ya gha rho eni e Jehova.

Te aro ọmwa ne Jehova khin wa rhie egbe ma vbe emwi na ya eni ẹnrẹn kha. Ẹghẹ nii, emwi ne eni ẹnrẹn khian mobọ gha ye ima ẹre rre, ọre ahoẹmwọmwa nọ mwẹ. (1 Jọn 4:8) Te ima khian gha yerre wẹẹ, ahoẹmwọmwa ne Jehova mwẹ ne ima ẹre ọ si ẹre nọ na yi ima, ẹre ọ si ẹre nọ na gie Ovbi ẹre rre do wu ne ima, ẹre ọ vbe si ẹre nọ na khaevbisẹ vbe odẹ nọ ghi maan sẹ. Te ima khian ye gha bẹghe odẹ ughughan ne Jehova khian ya gha rhie ẹre ma wẹẹ irẹn hoẹmwẹ ima. Ke etẹbitẹ ya fi etẹghori, te ima khian gha sikẹ e Jehova sayọ zẹvbe Erha ima, ma ghi vbe gha so ihuan urhomwẹ ya rho eni ẹnrẹn nọhuanrẹn.—Psm 73:28.