1-2. De ọlọghọmwa eso ne eguọmwadia e Jehova gha sẹtin werriẹ aro daa?

 EMWI nọ wegbe gha sunu, ẹdagbọn ima sẹtin wa fi werriẹ vbe udemwurri. Vbe igiemwi, ọbo ebo keghi tama ọtẹn nokpia ọkpa na tie ẹre Luis a wẹẹ, ọ mwẹ cancer nọ wegbe. Ọ na vbe tama rẹn wẹẹ, uki eso ẹre ọ khian ghi gbe vbe agbọn. Te Monika vbe ọdafẹn ọnrẹn wa rhiegba ye ugamwẹ e Jehova. Ọ ghi rre ẹdẹ ọkpa, e Monika keghi do rẹn wẹẹ, ọdafẹn ọnrẹn nọ re ọdiọn vbe iko, wa lẹre ru orukhọ vbe ọwara ukpo nibun. A keghi tama ọtẹn nokhuo ọkpa na tie ẹre Olivia, nọ ma he ru orọnmwẹ, nọ kpa hin owa ẹre rre rhunmwuda okpe ẹhoho nọkhua na tie ẹre hurricane nọ khian sunu vbe ẹdogbo ọghe iran. Ọ ghi dọlegbe gha die owa, ọ na do bẹghe ẹre wẹẹ okpe ẹhoho nii guọghọ owa irẹn nẹ. Udemwurri ẹre arrọọ ọghe avbe etẹn na wa ya fi werriẹ. Emwi vbenian he sunu da ruẹ ẹdẹ ra? Emwi he sunu nọ fi ẹdagbọn ruẹ werriẹ fo fẹẹrẹ ra?

² Ma ne eguọmwadia e Jehova wa werriẹ aro daa ọlọghọmwa, ma vbe khuọnmwi vbene emwa ọvbehe vbe ye. Avbe eghian ọghe Osanobua vbe zẹ ima kpokpo. E Jehova i khian gbogba ga ima ne ima ghẹ werriẹ aro daa egbe avbe ọlọghọmwa vbenian, sokpan ọ yan rẹn we irẹn gha ru iyobọ ne ima. (Aiz 41:10) Ẹ i mwẹ vbene ọlọghọmwa ne ima ye gha wegbe sẹ hẹ, e Jehova gha ru iyobọ ne ima ne ima sẹtin gha sọyẹnmwẹ, ne ima sẹtin ru azẹ nọ maan kevbe ne ima sẹtin mudia ẹse. Vbe ako iruẹmwi na, ma gha guan kaẹn odẹ enẹ ne Jehova ya ru iyobọ ne ima vbe ima ghaa rre uwu ibavbaro. Ma gha guan kaẹn emwi nọ khẹke ne ima ru, ne ima mieke na miẹn iyobọ e Jehova.

 E JEHOVA GHA GBOGBA GA RUẸ

3. Emwi nọ wegbe gha sunu daa ima, de emwi nọ gha sẹtin gha lọghọ ima na ru?

³ Ọlọghọmwa nọ rrọọ. Ma ghaa werriẹ aro da ọlọghọmwa nọ wegbe, emwi sẹtin wa pirhi ye ima aro, sẹrriọ wẹẹ, ma i ghi rẹn emwi nọ khẹke ya ru. Vbọzẹ? Rhunmwuda iro sẹtin han ima, osi sẹtin vbe gha si ima. Ọ ghi wa yevbe na miẹn wẹẹ, te ima bibi odẹ, ma i ghi rẹn vbene ima khian khian hẹ. Gi ima guan kaẹn vbene emwi ghaa ye etẹn nikhuo eva ne ima ka guan kaẹn sin vbe iran rre uwu edanmwẹ. Olivia khare wẹẹ, “Vbe okpe ẹhoho nii ghi guọghọ owa mwẹ nẹ, iro na wa han mwẹ, I ma ghi rẹn vbene I khian khian ẹmwẹ agbọn mwẹ hẹ.” E Monika ghi guan kaẹn emwi ne ọdafẹn ọnrẹn ru, ọ na kha wẹẹ: “Te emwi nọ sunu na wa gbe mwẹ egbe. Obalọ ne emwi na si yọ mwẹ egbe i re nekherhe. I ma ghi sẹtin gha ru avbe emwi ne I ka ru. A gha tama mwẹ wẹẹ egbe emwi vbenian gha sunu daa mwẹ I i yayi.” De vbene Jehova we irẹn khian ya ru iyobọ ne ima hẹ vbe ima ghaa rre uwu ọlọghọmwa nọ wegbe?

4. Zẹvbe nọ rre ebe Filipai 4:​6, 7, de emwi ne Jehova we irẹn khian ru ne ima?

⁴ Emwi ne Jehova we irẹn khian ru ne ima. Ọ yan rẹn wẹẹ, irẹn gha rhie “ọfunmwegbe ọghe Osanobua” ne ima. (Tie Filipai 4:​6, 7.) Ọfunmwegbe na ọre ọfunmwegbe ne ọmwa mwẹ kevbe ne orhiọn ọmwa na sotọ rhunmwuda nọ na rẹn wẹẹ, ọsie Jehova ẹre irẹn khin. Ọfunmwegbe na “gberra ne ọmwa gha sẹtin rẹn otọ re”; ọ gberra emwi ke emwi ne ima mu roro vbe ekhọe. U he ka na erhunmwu gie Jehova ẹdẹ ra vbe u rre ọlọghọmwa, u na wa vbe bẹghe vbene Jehova ya mu ruẹ orhiọn sotọ hẹ? Ọna ẹre ọ wa re “ọfunmwegbe ọghe Osanobua” na guan kaẹn na.

5. De vbene ọfunmwegbe Osanobua ya gbogba ga ẹkokoudu kevbe ekhọe ọghe ima hẹ?

⁵ Ebe Filipai 4:7 vbe kha wẹẹ ọfunmwegbe Osanobua gha “gbogba ga ekhọe uwa kevbe iziro ọghe uwa.” Ẹmwẹ na ke zedu “gbogba ga” keghi re ẹmwẹ na ya gie ivbiyokuo ni gbogba ga ẹvbo, ne avbe eghian ghẹ mieke na sẹtin laọ. Te emwa ni rre ẹvbo na gbogba ga vbiẹ faan, rhunmwuda iran rẹnrẹn wẹẹ avbe ivbiyokuo rre onurhu ẹvbo. Erriọ vbe ye, ọfunmwegbe Osanobua gha gbogba ga ẹkokoudu kevbe ekhọe ọghe ima, orhiọn ima ghi sotọ, rhunmwuda ma rẹnrẹn wẹẹ e Jehova gbogba ga ima. (Psm 4:8) Vbe na ghee Hanna, ọ gha khọnrẹn wẹẹ, ọlọghọmwa ne ima ye ma wa fo vbobọvbobọ ma gha ye sẹtin gha mwẹ ọfunmwegbe. (1 Sam 1:​16-18) Orhiọn ima gha sotọ, ẹre ima khian na sẹtin gha roro emwi ẹse, ma ghi vbe sẹtin rẹn emwi nọ khẹke ya ru.

6. De emwi nọ khẹke ne ima ru ne ima mieke na miẹn ọfunmwegbe Osanobua? (Vbe ya ghee efoto.)

⁶ Emwi nọ khẹke ne ima ru. U ghaa rre uwu  ọlọghọmwa, rinmwian e Jehova nọ gbogba ga ruẹ. Vbua khian ya ru ọna hẹ? Rhiegba ye erhunmwu na na, a te miẹn wẹẹ, Osanobua rhie ọfunmwegbe ọghẹe nuẹn. (Luk 11:9; 1 Tẹs 5:17) Ọtẹn Nokpia Luis na ka guan kaẹn sin, ghi guan kaẹn vbene irẹn vbe ọvbokhan rẹn ighẹ Ana ya sẹtin zin egbe vbe iran ghi rẹn wẹẹ uki eso ẹre irẹn khian ghi gbe vbe agbọn, ọ na kha wẹẹ: “Emwi vbenian gha sunu, ẹ i zẹdẹ khuẹrhẹ na do sẹtin ru azẹ nọ dekaẹn vbe na khian ya gbaroghe egbe ọmwa hẹ ra azẹ nọ dekaẹn emwi ọvbehe. Erhunmwu ẹre ọ zẹ vbe egbe ima, ọ keghi mu ima orhiọn sotọ vbe ẹghẹ ne ima ya gha rre uwu edanmwẹ.” E Luis vbe ọvbokhan rẹn khare wẹẹ, iran keghi rhiegba ye erhunmwu na na, iran na gha nọ e Jehova nọ mu iran orhiọn sotọ, kevbe nọ ru iyobọ ne iran ya sẹtin rẹn emwi nọ khẹke ya ru. Iran keghi bẹghe ẹre wẹẹ, e Jehova gele ru iyobọ ne iran. Adeghẹ u na gha werriẹ aro daa ọlọghọmwa nọ wegbe, rhiegba ye erhunmwu na na, u gha bẹghe vbene ọfunmwegbe ọghe Jehova khian ya gbogba ga ẹkokoudu ruẹ kevbe ekhọe ruẹ hẹ.—Rom 12:12.

E JEHOVA GHA YA RUẸ DEZIẸN

7. Vbọ ye ima hẹ vbe ima ghaa rre ọlọghọmwa nọ wegbe?

⁷ Ọlọghọmwa nọ rrọọ. Ma ghaa werriẹ aro daa ọlọghọmwa nọ wegbe, a sẹtin miẹn wẹẹ iziro ọghe ima kevbe vbene ima ya ru emwi hẹ i khian ghi gha yevbe nọ ka ye. Ọ sẹtin yevbe na miẹn wẹẹ, obalọ ne ima ye i fo vbe otọ, ẹrẹna iro sẹtin han ima, akhuẹ ohu ohu ghi wa gha mu ima. Ọna ọre emwi nọ sunu daa Ana na ka guan kaẹn ban vbe ẹghẹ ne ọdafẹn ọnrẹn ighẹ Luis ya wu. Ọtẹn na khare wẹẹ: “Ugbẹnso, iro ghi wa han mwẹ, ohan egbe mwẹ ghi wa gha to mwẹ. Ohu ghi wa vbe gha mu mwẹ wẹẹ, ọdafẹn mwẹ wu.” Ugbẹnso, ọ ghi wa gha rre ohioro, egbe ghi vbe wọọ ọre, rhunmwuda irẹn ẹre ọ ghi tobọre ru azẹ ne Luis te ka ru. Ugbẹnso, ọ ghi yevbe na miẹn wẹẹ, ọ rre uwu okun nọ hu yo hu rre. De vbene Jehova ya ru iyobọ ne ima hẹ, vbe ọlọghọmwa gha lẹ rhu ima vbe na ghee amẹ nọ rre okun?

8. Zẹvbe nọ rre ebe Aizaia 33:​6, de emwi ne Jehova we irẹn khian ru ne ima?

⁸ Emwi ne Jehova we irẹn khian ru ne ima. E Jehova gi ima rẹn wẹẹ irẹn gha ya ima deziẹn. (Tie Aizaia 33:6.) Okpe ẹhoho ghaa hoho vbe okun, ọ sẹtin gha bi okọ yo bi ẹre rre. Sokpan, okọ nibun mwẹ emwi nọ ladian vbe ototọ ọre vbe obọ eveva, nọ ya okọ nii deziẹn. Avbe emadogua na ẹre ọ khian da okọ na yi, nẹi ghẹ mieke na gha bi yo bi rre, ẹghẹ nii emwa ni rre uwu ẹre i khian miẹn ikuanegbe, orhiọn iran ghi vbe sotọ. Sokpan, a gha ye gha gua okọ nii khian ẹre avbe emadogua na khian na sẹtin winna ẹse. Erriọ vbe ye, e Jehova gha ya ima deziẹn deghẹ ima na ye gha ya ẹkoata gae vbe ima ghaa rre uwu edanmwẹ.

9. De vbene emwi ughughan ne ima ya ru ezanzan khian ya ru iyobọ ne ima, ne ima mieke na deziẹn vbe ima ghaa rre uwu ọlọghọmwa? (Vbe ya ghee efoto.)

 ⁹ Emwi nọ khẹke ne ima ru. U ghaa rre uwu obalọ, rhiegba ye erhunmwu na na, u ghi vbe gha yo iko kevbe ikporhu. Ẹmwata nọ wẹẹ, a sẹtin miẹn wẹẹ, u i khian ghi sẹtin gha ru vbene u ka ru, sokpan ghẹ mianmian wẹẹ Osa nọ mwẹ amuroro ẹre Jehova khin. (Yae tae Luk 21:​1-4.) Hia ne u zẹ ẹghẹ kọ ne u khian ya gha ruẹ emwi ne egbuẹ. Vbọzẹ? E Jehova keghi loo otu ọghẹe ya kpemehe emwi ughughan ni rhan otọ e Baibol, ni ru iyobọ ne ima ya deziẹn vbe ima ghaa rre uwu ọlọghọmwa. Deghẹ u gualọ enọ gha ru iyobọ nuẹn, u sẹtin loo avbe emadogua ọghomwa ne ima ya ru ezanzan, vbe na ghee JW Library^® app, Watch Tower Publications Index, kevbe Research Guide for Jehovah’s Witnesses. Ọtẹn nokhuo na tie ẹre Monika na ka guan kaẹn sin khare wẹẹ, ẹghẹ ke ẹghẹ ne irẹn ya bẹghe ẹre wẹẹ, iro khian han irẹn, irẹn ghi ya ru ezanzan ne irẹn mieke na gualọ adia eso nọ gha ru iyobọ ne irẹn. Vbe igiemwi, ọ ghi gualọ ẹmwẹ na ighẹ “anger.” Ugbẹnso, ọ ghi vbe gualọ ẹmwẹ na ighẹ “betrayal” ra “loyalty.” Iyeke ọni, ọ ghi suẹn gha tie vbekpa avbe ẹmwẹ na, a te miẹn wẹẹ orhiọn rẹn sotọ. Ọ khare wẹẹ: “I gha da suẹn gha tie avbe emwi na, orhiọn mwẹ i sotọ, sokpan I gha ghi tie ẹre buan nẹ, ọ ghi yevbe na miẹn wẹẹ, te Jehova mu mwẹ dede. Zẹvbe ne I ya tie ẹre, I na do bẹghe ẹre wẹẹ, e Jehova gele rẹn vbene emwi ye mwẹ hẹ, kevbe wẹẹ, ọ wa vbe ru iyobọ mẹ.” Iyobọ vbenian nọ ke obọ e Jehova rre gha sẹtin ya ruẹ deziẹn, a te miẹn wẹẹ orhiọn ruẹ sotọ.—Psm 119:​143, 144.

E JEHOVA GHA RU IYOBỌ NUẸN

10. De vbene emwi ye ima hẹ vbe ugbẹnso, vbe emwi nọ wegbe gha sunu daa ima?

¹⁰ Ọlọghọmwa nọ rrọọ. Emwi nọ wegbe gha sunu daa ima, ugbẹnso egbe ghi wa wọọ ima, ẹghẹ eso, iro ghi vbe han ima. Ma sẹtin do gha yevbe ọmwa nọ ku iku isasegbe nọ ka wa gua rhulẹ, sokpan te ọ ghi dikẹ owẹ, rhunmwuda nọ na miẹn ikuanegbe. A sẹtin miẹn wẹẹ urriẹdẹ ẹre ima ghi ya ru emwi nẹi te sẹ ima ru, rhunmwuda te ọ ghi lọghọ ima, ra ma i ghi mwẹ aguakpa ne ima ya ru emwi eso ne ima te sọyẹnmwẹ ọnrẹn. Vbe na ghee Elaija, egbe sẹtin wa wọọ ima, ne ima do kpaegbe ru emwi ghi ba kua, ma ghi wa gha hoo ne ima wa gha rre efọnkpa vba. (1 Ọba 19:​5-7) De emwi ne Jehova we irẹn khian ru ne ima vbe egbe gha wọọ ima?

11. De odẹ ọvbehe ne Jehova ya ru iyobọ ne ima? (Psalm 94:18)

¹¹ Emwi ne Jehova we irẹn khian ru ne ima. E Jehova wẹẹ irẹn gha ru iyobọ ne ima. (Tie Psalm 94:18.) Zẹvbe na ru iyobọ ne ọmwa nọ ku iku isasegbe nọ miẹn ikuanegbe, ima tobọ ima vbe gualọ iyobọ ne ima mieke na ye rhiegba  ye ugamwẹ e Jehova. Vbe ẹghẹ vbenian, e Jehova yan rẹn wẹẹ: “Mẹ ne Jehova ne Osanobua uwa, keghi da obọ erha ọmwa ọghe uwa yi, mẹ ẹre ọ tama uwa wẹẹ, ‘Uwa ghẹ fian afianma. I gha yi uwa obọ.’” (Aiz 41:13) Ọba ighẹ Devid wa miẹn iyobọ vbenian vbe obọ e Jehova. Vbe ẹghẹ nọ na gha werriẹ aro da edanmwẹ kevbe ẹghẹ ne eghian na gha zẹ ọre kpokpo, ọ na kha wẹẹ: “Obọ erhọmwa ruẹ ru iyobọ mẹ.” (Psm 18:35) Sokpan de vbene Jehova ya ru iyobọ ne ima hẹ?

12. De emwa ne Jehova gha sẹtin loo ya ru iyobọ ne ima vbe egbe gha wọọ ima?

¹² E Jehova mobọ loo emwa ọvbehe ya ru iyobọ ne ima. Vbe igiemwi, ọ mwẹ asẹ ọkpa ne egbe ya wọọ e Devid, ọsiọre ighẹ Jonatan keghi mu otuẹ gie Devid, ọ na vbe rhie igiọdu nẹẹn. (1 Sam 23:​16, 17) Erriọ e Jehova vbe ya loo Elaisia ya ru iyobọ ne Elaija. (1 Ọba 19:​16, 21; 2 Ọba 2:2) Vbe ẹdẹnẹrẹ, e Jehova sẹtin loo emwa ima vbe uwu ẹgbẹe, avbe ọse ra avbe ediọn ya ru iyobọ ne ima. Vbọrhirhighayehẹ, ma ghaa rre uwu obalọ, ma sẹtin wa gha zẹ egbe ima hin usun rre. Ma i hoo ne ọmwa rhọkpa sikẹ ima. Erriọ ye vbe emwi nọ wegbe gha sunu da ọmwa. De emwi ne ima gha ru ne Jehova mieke na ru iyobọ ne ima?

13. De emwi nọ khẹke ne ima ru ne ima mieke na miẹn iyobọ ọghe Jehova? (Vbe ya ghee efoto.)

¹³ Emwi nọ khẹke ne ima ru. Hia vbe odẹ ke odẹ ne u ghẹ zẹ egbuẹ hin usun rre. Ma ghaa zẹ egbe ima hin usun rre, ọlọghọmwa ne ima ye kevbe ọghe enegbe ima ọkpa ẹre ima khian ghi gha mu roro. Ọ ghaa yerriọ, ọ gha lọghọ ma ke sẹtin ru azẹ nọ khẹke. (Itan 18:1) Ẹmwata nọ wẹẹ, ẹghẹ eso rrọọ ne ima i ya hoo ne ima gha rre uwu ẹbu emwa, katekate vbe emwi nọ wegbe gha sunu daa ima. Vbọrhirhighayehẹ, adeghẹ ọ na gua ima obọ ro ne ima gha zẹ egbe ima hin usun rre, ma ghi do khian rree ne emwa ne Jehova gha te ya ru iyobọ ne ima. Nọnaghiyerriọ, ọ gha khọnrẹn wẹẹ u rre uwu ọlọghọmwa nọ wegbe, kie ẹkpotọ yọ ne emwa ruẹ vbe uwu ẹgbẹe, avbe ọse kevbe ediọn ru iyobọ nuẹn. Emwa ne Jehova loo ya ru iyobọ nuẹn ẹre iran khin, rhunmwuda ọni, aro vberriọ ẹre ọ khẹke ne u ya gha ghee iran.—Itan 17:17; Aiz 32:​1, 2.

E JEHOVA GHA FU RUẸ ẸKO RRE

14. De emwi eso nọ gha sẹtin si ohan ye ima egbe?

¹⁴ Ọlọghọmwa nọ rrọọ. Emwi eso sẹtin sunu nọ gha ya ohan gha mu ima. E Baibol wa guan kaẹn eguọmwadia e Jehova nibun ni ta vbene ohan ghaa mu iran hẹ vbe iran rre uwu ọlọghọmwa nọ wegbe kevbe vbe avbe eghian ọghe iran ghaa zẹ iran kpokpo. Emwi ọvbehe nibun vbe ya iran gha mu ohan. (Psm 18:4; 55:​1, 5) Vbe ẹdẹnẹrẹ, emwa ne ima gba rre esuku, ne ima gba winna, emwa ima vbe uwu ẹgbẹe ra  avbe arriọba sẹtin gha zẹ ima kpokpo. Ma sẹtin kue gha mu ohan wẹẹ, ima gha wu vbe ima ghaa khuọnmwi. Egbe emwi vbenian gha sunu, ma sẹtin do gha yevbe ọmobọ nẹi mwẹ ọmwa nọ khian ru iyobọ nẹẹn. De vbene Jehova ya ru iyobọ ne ima vbe emwi vbenian gha sunu?

15. De emwi ne Jehova wẹẹ irẹn khian ru ne ima zẹvbe nọ rre ebe Psalm 94:19?

¹⁵ Emwi ne Jehova we irẹn khian ru ne ima. E Jehova fu ima ẹko rre, ọ ghi vbe ya ima gha sọyẹnmwẹ. (Tie Psalm 94:19.) Igiemwi nọ lae ima ekhọe vbe ima gha mu emwi ne ọsian na tae roro, ọre igiemwi ọghe ọmokhuo nọ ma sẹtin vbiẹ, ne ohan mu rhunmwuda avannukhunmwu. Erhae na gha dee, ọ na do muẹn, ọ ghi zẹ kpẹẹ, ovbe na rhie ọmọ nii. Agharhemiẹn wẹẹ, avannukhunmwu nii ma he dobọyi vbe okpamẹ rhọọ, ohan ma ghi gha mu ọmọ na, rhunmwuda ne erhae na muẹn. Ma wa gualọ iyobọ vbenian vbe obọ Erha ima nọ rre ẹrinmwi, vbe ima ghaa werriẹ aro daa ọlọghọmwa nọ wegbe nọ ya ohan mu ima, a te miẹn wẹẹ, orhiọn ima sotọ. De vbene Jehova khian ya fu ima ẹko rre hẹ?

16. De emwi nọ khẹke ne ima ru ne Jehova mieke na fu ima ẹko rre? (Vbe ya ghee efoto.)

¹⁶ Emwi nọ khẹke ne ima ru. Gha gu e Jehova mu obọ vbe ẹghẹ hia, ọni nọ wẹẹ, u ghi gha na erhunmwu, u ghi vbe gha tie Ẹmwẹ ọghẹe. (Psm 77:​1, 12-14) Ẹghẹ nii, emwi okaro nọ khian ka la ruẹ ekhọe vbe u ghaa rre uwu orhikhan, ọre ne u tu bu e Jehova. Gi ẹre rẹn emwi nọ ya ohan mu ruẹ kevbe emwi nọ ya ruẹ si osi. Iyeke ọni, u ghi gi e Jehova gu ruẹ guan vbe Baibol, u gha bẹghe vbene ọ khian ya ya Ẹmwẹ ọghẹe rhie ifuẹko nuẹn hẹ. (Psm 119:28) U gha bẹghe ako ọghe evbagbẹn nọhuanrẹn eso nọ gha gele wa fu ruẹ ẹko rre vbe ohan ghaa mu ruẹ. Vbe igiemwi, u gha miẹn ako eso nọ gha fu ruẹ ẹko rre vbe ebe Job, Psalm, ebe Itan kevbe emwi ne Jesu ta nọ rre ebe Matiu uhunmwu ẹnrẹn 6. U ghaa na erhunmwu gie Jehova, u na vbe gha tie Ẹmwẹ ọghẹe, u gha bẹghe vbene ọ khian ya fu ruẹ ẹko rre hẹ.

17. De ilẹkẹtin ne ima mwẹ?

¹⁷ Ma gha sẹtin gha mwẹ ilẹkẹtin wẹẹ, e Jehova gha mudia ne ima, vbe ima ghaa rre uwu ibavbaro. E Jehova i khian sẹ ima rae. (Psm 23:4; 94:14) Ọ yan rẹn wẹẹ irẹn gha gbogba gae ima, irẹn gha ya ima deziẹn, irẹn gha ru iyobọ ne ima, kevbe wẹẹ, irẹn gha fu ima ẹko rre. Ebe Aizaia 26:3 ghi guan kaẹn e Jehova, ọ na wẹẹ: “U gha gbogba ga emwa ni ya ekhọe hia mu ẹtin yan ruẹ; U gha rhie ọfunmwegbe etẹbitẹ ne iran rhunmwuda, wẹ ẹre iran mu orhiọn yan.” Nọnaghiyerriọ, mu ẹtin yan e Jehova, gha ru emwi nọ gha ya ruẹ miẹn iyobọ ọre. U gha ru vberriọ, ọ gha rhie ẹtin nuẹn ya sẹtin zin egbe ọlọghọmwa ne u ye.