1. De emwi eso nọ ya ima mu ohan vbe ugbẹnso?

 MA HIA keghi mu ohan ugbẹnso. Ẹmwata nọ rrọọ ọre wẹẹ, rhunmwuda ne ima na ruẹ e Baibol, ma i mu ohan uwu, avbe ugbogiorinmwi, kevbe emwi nọ khian sunu vbe odaro. Ẹghẹ ne “emwi ni gbe orrirri” ya sunu ẹre ima wa ye na; te okuo, uyinmwẹ ikpata vbe izigan kevbe emianmwẹ wa gba ehe hia. (Luk 21:11) Ma sẹtin vbe gha mu ohan emwa nagbọn, uhiẹn ya sẹ egbe avbe arriọba ni zẹ ima kpokpo ra emwa ima vbe uwu ẹgbẹe ni gbodan ghee ugamwẹ ẹmwata. Orhiọn emwa eso ma vbe sotọ rhunmwuda, iran roro ẹre wẹẹ, iran i khian sẹtin zin egbe edanmwẹ ne iran ye nian, ra ne iran gha miẹn vbe odaro.

2. Vbọ sunu daa e Devid vbe ọ rre Gat?

² Ọ mwẹ ẹghẹ ne Devid ya gha mu ohan. Vbe igiemwi, vbe ẹghẹ ne Ọba e Sọl ya gha khu e Devid khian nọ gbe ẹre rua, e Devid keghi lẹẹ gha rrie ẹvbo ọkpa na tie ẹre Gat vbe otọ e Filistia. Akis ne Ọba ọghe Gat keghi do rẹn wẹẹ, e Devid ẹre ọ ghaa re ọkaokuo nọ wegbe ne emwa ghaa ya eni rẹn so ihuan wẹẹ, ọ gbele Ivbi e Filistia “arriaisẹn igbe inu nọ khin.” ‘Ohan kegha mu e David ẹsẹse.’ (1 Sam 21:​10-12) Ọ kegha mu ohan, rhunmwuda ọ ma rẹn emwi ne Akis gha ya aro irẹn miẹn. De emwi nọ ghi ru iyobọ ne Devid ne orhiọn ọnrẹn na sotọ?

3. Zẹvbe nọ rre Psalm 56:​1-3, 11, vbọ ya orhiọn e Devid sotọ?

³ Vbe Psalm 56, e Devid keghi ta vbene emwi ghaa ye irẹn hẹ vbe irẹn rre Gat. Vbe ako nii, e Devid ya unu kaẹn emwi nọ ya ohan gha mu irẹn kevbe emwi nọ ya orhiọn irẹn sotọ. Vbe ẹghẹ ne ohan ya gha mu e Devid, ọ keghi mu ẹtin yan e Jehova. (Tie Psalm 56:​1-3, 11.) Emwi bun nọ ya e Devid mu ẹtin yan e Jehova. E Jehova keghi ru iyobọ ne Devid, e Devid na ru vbe na miẹn wẹẹ, ọmwẹmwẹ ẹre irẹn khin, emwi nọ ru na keghi biẹ ọmọ esi! Ne Akis gha te ya gbe Devid rua, ọ na gha hoo ne Devid kpa  hin eke ne irẹn ye rre, ọna ẹre ọ ghi zẹe ighẹ e Devid miẹn uhunmwu.—1 Sam 21:13–22:1.

4. De emwi nọ gha ru iyobọ ne ima ya mu ẹtin yan e Jehova sayọ? Ru igiemwi yọ.

⁴ Adeghẹ ima na mu ẹtin yan e Jehova, orhiọn ima gha vbe sẹtin sotọ vbe ohan ghaa mu ima. Sokpan de vbene ima khian ya mu ẹtin yan e Jehova hẹ, katekate deghẹ ohan na gha mu ima? Gi ima ru igiemwi ọkpa yọ. U na suẹn gha khuọnmwi, ohan sẹtin gha mu ruẹ. Sokpan, u gha mu ẹtin yan ọbo ebo ruẹ, orhiọn ruẹ ghi sotọ. A sẹtin miẹn wẹẹ, ọ ka mu emwa ni khuọnmwi egbe emianmwẹ vberriọ egbe rran. Ọ sẹtin gbehọkotọ danmwehọ ruẹ, ọ ghi vbe gu ruẹ rẹn wẹẹ, irẹn rẹn vbene emianmwẹ nii ru ruẹ hẹ. Ọ sẹtin vbe tama ruẹ wẹẹ, ọ mwẹ obẹlẹ ne irẹn ka loo ne emwa ọvbehe nọ wa winna, ne irẹn gha hoo ne irẹn loo nuẹn. Erriọ vbe ye, ma gha muẹn roro emwi ne Jehova he ru, emwi nọ ru nian kevbe nọ khian ru vbe odaro, ma ghi gele do mu ẹtin yan rẹn sayọ. Erriọ Devid wa ru ẹre zẹẹ. Zẹvbe ne ima ya guan kaẹn ẹmwẹ nọ rre ebe Psalm 56, gha muẹn roro vbene u khian ya mu ẹtin yan e Jehova sayọ hẹ kevbe emwi ne u gha ru ne orhiọn ruẹ mieke na sotọ vbe ohan ghaa mu ruẹ.

GHA MUẸN RORO EMWI NE JEHOVA HE RU

5. De emwi ne Devid ghaa mu roro nọ ya orhiọn rẹn sotọ, vbe ẹghẹ ne ohan na gha muẹn? (Psalm 56:​12, 13)

⁵ Agharhemiẹn wẹẹ, arrọọ ọghe Devid ghaa rre ikpadede, ọ keghi rhie aro tua emwi ne Jehova he ru. (Tie Psalm 56:​12, 13.) Erriọ e Devid wa gha ru ẹre vbe ẹdagbọn ọnrẹn hia. Vbe igiemwi, ọ mwẹ ẹghẹ eso nọ ya gha muẹn roro emwi ughughan ne Jehova yi, ọna kegha ye ẹre rre wẹẹ, e Jehova ẹre ọ mwẹ ẹtin sẹ vbe agbọn vbe ẹrinmwi, kevbe wẹẹ, ọ hoẹmwẹ ima ne emwa nagbọn. (Psm 65:​6-9) Ọ vbe gha muẹn roro emwi ne Jehova ru ne emwa ọvbehe. (Psm 31:19; 37:​25, 26) Ọ wa vbe gha muẹn roro ẹsẹsẹmwẹse emwi ne Jehova he ru ne irẹn. Ke egbe ọvbokhan kpa ẹre Jehova ke ru iyobọ ne Devid, erriọ vbe ya gha gbogba ga ẹre. (Psm 22:​9, 10) U miẹn vbene ọna gha ru iyobọ ne Devid ya mu ẹtin yan e Jehova sayọ hẹ!

6. De emwi nọ khian ya ima mu ẹtin yan e Jehova vbe ohan ghaa mu ima?

⁶ Ohan ghaa mu ruẹ, u sẹtin nọ egbuẹ wẹẹ,  ‘De emwi ne Jehova he ru mẹ?’ Gha muẹn roro emwi ughughan nọ yi. Vbe igiemwi, e Jehova ma yi avbe ahianmwẹ kevbe avbe obobo ne iran gha yevbe irẹn, iran i vbe sẹtin gae, sokpan ma gha “gbarokotọ ghee” vbene Jehova ya gbaroghe iran, ọ gha ya ima gha mwẹ ilẹkẹtin wẹẹ e Jehova gha vbe gbaroghe ima. (Mat 6:​25-32) Vbe muẹn roro emwi ne Jehova he ru ne eguọmwadia ẹre. U sẹtin ya tie okha ọghe eguọmwadia e Jehova vbe Baibol, nọ ghaa mwẹ amuẹtinyan nọ wegbe, ra u sẹtin vbe tie okha ọghe eguọmwadia e Jehova ni rrọọ vbe ẹdẹnẹrẹ. a Vbe deba ọni, gha muẹn roro vbene Jehova he ya gbaroghe ruẹ. De vbene Jehova ya si ruẹ la odẹ ẹmwata na hẹ? (Jọn 6:44) De vbene ọ he ya họn erhunmwu ruẹ hẹ? (1 Jọn 5:14) De vbene u ya miẹn ere vbe izọese adẹwerriegbe ọghe Ovbi ẹre vbe ẹdẹgbegbe?—Ẹfis 1:7; Hib 4:​14-16.

7. De vbene okha ọghe Daniẹl ya ru iyobọ ne Vanessa ne orhiọn ọnrẹn na sotọ?

⁷ Ọtẹn nokhuo ọkpa na tie ẹre Vanessa, b nọ rre Haiti, keghi werriẹ aro daa ọlọghọmwa nọ wegbe. Okpia ọkpa nọ rre ẹdogbo nọ ye, kegha tie ẹre vbe efoni, ọ na vbe gha gie uhunmwu gie ẹre vbe ẹdẹgbegbe, ọ na gha kpikpi ẹre ne irẹn vbe ọre gba gha si egbe obọ. Sokpan, e Vanessa ma kue ye ọre. Ohu keghi mu okpia na, ọ na kue gha yan wẹẹ, irẹn gha ru e Vanessa emwi. E Vanessa khare wẹẹ, “Ohan na wa gha mu mwẹ.” De emwi nọ ghi ru iyobọ ne Vanessa, ne orhiọn ọnrẹn na sotọ? Ọ keghi ru emwi nọ gha sẹtin ru ya gbogba ga egbe ẹre. Ọdiọn ọkpa na ghi ru iyobọ nẹẹn, ọ na ya tama avbe olakpa. Sokpan, e Vanessa vbe gha muẹn roro vbene Jehova ya gbaroghe eguọmwadia ẹre vbe ẹghẹ nọ gberra. Ọ khare wẹẹ, “Ọmwa okaro ne ẹmwẹ ọnrẹn wa la mwẹ ekhọe ọre akhasẹ ighẹ e Daniẹl. A keghi fi ẹre fi uwu uvun oduma, agharhemiẹn wẹẹ, ọ ma rẹn ọkpa rẹn eva. Sokpan, e Jehova keghi mudia nẹẹn. I na ghi mu emwi hia ye obọ e Jehova. Iyeke ọni, ohan ma ghi gha mu mwẹ.”—Dan 6:​12-22.

DE EMWI NE JEHOVA RU NIAN?

8. De ilẹkẹtin ne Devid ghaa mwẹ? (Psalm 56:8)

⁸ Agharhemiẹn wẹẹ arrọọ ọghe Devid ghaa rre ikpadede vbe ọ rre Gat, ọ ma rhie aro tua emwi nọ ghaa ya ohan muẹn. Nọghayayerriọ, ọ kegha muẹn roro iyobọ ne Jehova ghaa ru nẹẹn vbe ẹghẹ nii. E Devid wa bẹghe ẹre wẹẹ, e Jehova ghaa gbogba ga irẹn kevbe wẹẹ, ọ rẹn emwi ne irẹn la gberra. (Tie Psalm 56:8.) E Devid wa gha mwẹ ọse eso ni wa vbe ru iyobọ nẹẹn, vbe na ghee Jonatan kevbe Ogie Ohẹn ighẹ Ahimẹlẹk, iran wa rhie igiọdu nẹẹn. (1 Sam 20:​41, 42; 21:​6, 8, 9) Agharhemiẹn wẹẹ, Ọba ighẹ Sọl te gha hoo nọ gbe Devid rua, e Devid keghi lẹẹ fe vbe obọ ọre. E Devid wa rẹn wẹẹ, e Jehova rẹn ọlọghọmwa ne irẹn la gberra kevbe vbene ọlọghọmwa nii ya gha kpokpo irẹn vbe orhiọn.

9. De emwi ne Jehova rẹn vbekpa edọmwadẹ ima?

⁹ U ghaa werriẹ aro daa ọlọghọmwa nọ ya ohan mu ruẹ, ghẹ mianmian wẹẹ, e Jehova bẹghe ọlọghọmwa ne u ye, ọ vbe rẹn vbene emwi ye ruẹ hẹ. Vbe igiemwi, ẹ i re obọ atosi na ya gha mu Ivbi Izrẹl ọkpa ẹre Jehova bẹghe, ọ vbe bẹghe “oya ne iran re.” (Ẹks 3:7) E Devid keghi so ihuan gie Jehova, ọ na wẹẹ, “u miẹn oya ne I re, u rẹn ọlọghọmwa mwẹ.” (Psm 31:7) Uhiẹn vbe ẹghẹ ne emwa ọghe Osanobua na gha rri oya, rhunmwuda orukhọ ne iran ru, te ọ ye gha “dae vbe iran rri oya.” (Aiz 63:9) Ohan ghaa mu ruẹ, e Jehova rẹn vbene emwi ye ruẹ hẹ, ọ vbe hoo nọ ru iyobọ nuẹn ne orhiọn ruẹ mieke na sotọ.

10. Vbọzẹ ne u na mwẹ ilẹkẹtin wẹẹ, aro e Jehova sotọ vbe egbuẹ kevbe wẹẹ, ọ gha sẹtin ru iyobọ nuẹn ya zin egbe ọlọghọmwa ne u ye?

¹⁰ U ghaa werriẹ aro daa ọlọghọmwa nọ  wegbe, ọ sẹtin gha lọghọ ruẹ ne u bẹghe vbene Jehova ya ru iyobọ nuẹn hẹ. Rinmwian e Jehova nọ ru iyobọ nuẹn ne u sẹtin bẹghe odẹ nọ ya ru iyobọ nuẹn. (2 Ọba 6:​15-17) Iyeke ọni, u ghi muẹn roro, deghẹ ọ mwẹ ọta, ra ewanniẹn ne ọtẹn zẹ vbe iko nọ he rhie igiọdu nuẹn. Ọ mwẹ ebe ọghomwa, e vidio ra avbe ihuan ọghomwa nọ he rhie igiọdu nuẹn ra? Ọ mwẹ ẹmwẹ eso ne ọmwa ta ra ako evbagbẹn nọhuanrẹn ne ọmwa he ya rhie igiọdu nuẹn ra? Deghẹ ima ma begbe, ma sẹtin mianmian vbene etẹn ni hoẹmwẹ ima kevbe vbene ẹmwẹ igiọdu ne ima miẹn vbe Baibol ya ru iyobọ ne ima hẹ. Ẹse ọhẹ nẹi gia gie nọ ke obọ e Jehova rre ẹre ena hia wa khin. (Aiz 65:13; Mak 10:​29, 30) Avbe ẹse ọhẹ na, ya ima rẹn vbene Jehova hoẹmwẹ ima hẹ. (Aiz 49:​14-16) Iran vbe rhie ẹre ma wẹẹ, e Jehova sẹ ne ima gha mu ẹtin yan.

11. Vbọ ru iyobọ ne Aida ne ohan ma na ghi gha muẹn?

¹¹ Ọtẹn nokhuo ọkpa na tie ẹre Aida, nọ rre Senegal, keghi bẹghe vbene Jehova ya ru iyobọ ne irẹn hẹ, vbe irẹn rre uwu ọlọghọmwa nọ wegbe. Rhunmwuda nọ na gha re ọmọ ọdiọn, evbibiẹ ọre keghi ya aro yọ wẹẹ, ọ gha wa khuan igho nọ khian ya gha gbaroghe iran kevbe egbe ẹre. Sokpan, Aida ma mu ẹmwẹ igho yan uhunmwu, nọ mieke na miẹn ẹghẹ ya gha ru iwinna arọndẹ, rhunmwuda ọni, ọ ma gha mwẹ igho. Ẹgbẹe ọre kegha khẹko ẹre, iran na vbe gha zaan rẹn. Ọtẹn na khare wẹẹ, “I na gha mu ohan wẹẹ, I i khian sẹtin ru iyobọ ne evbibiẹ mwẹ kevbe wẹẹ, ọmwa rhọkpa i khian ghi miẹn mwẹ yi, I na kue gha kha wẹẹ, e Jehova ẹre ọ si eniye yọ mwẹ egbe.” Ọ mwẹ ọta ọkpa ne ọtẹn nokhuo na họn vbe iko. Ọtẹn na khare wẹẹ, “Ọtẹn nọ ya ọta nii guan keghi ye ima ẹre rre wẹẹ, e Jehova rẹn emwi ke emwi nọ da ima vbe orhiọn. Kherhe kherhe, ibude ne ediọn kevbe etẹn ọvbehe rhie mẹ keghi ya mwẹ rẹn wẹẹ, e Jehova hoẹmwẹ mwẹ. Rhunmwuda ọni, ẹghẹ ke ẹghẹ ne I ya na erhunmwu gie Jehova, te I ghi mwẹ ilẹkẹtin wẹẹ ọ gha ru iyobọ mẹ. Orhiọn mwẹ na ghi sotọ vbe I ghi bẹghe ẹre wẹẹ, e Jehova họn erhunmwu mwẹ.” Vbene ẹghẹ ya khian, Aida na ghi miẹn iwinna, iwinna na ẹre ọ ghi ya gha gbaroghe egbe ẹre zẹvbe nọ ya ru iwinna arọndẹ, ẹre ọ vbe ya gha gbaroghe ẹgbẹe ọre kevbe emwa ọvbehe. Ọ khare wẹẹ, “Te I ghi wa ya ekhọe hia mu ẹtin yan e Jehova, nian, ẹghẹ ke ẹghẹ ne I ya na erhunmwu, orhiọn mwẹ ghi wa sotọ.”

 DE EMWI NE JEHOVA KHIAN RU VBE ODARO?

12. Zẹvbe nọ rre ebe Psalm 56:​9, de ilẹkẹtin ne Devid ghaa mwẹ?

¹² Tie Psalm 56:9. Ako na gi ima rẹn emwi ọvbehe nọ ya orhiọn e Devid sotọ vbe ẹghẹ ne ohan na gha muẹn. Agharhemiẹn wẹẹ, te arrọọ ọghẹe ye gha rre ikpadede, ọ ye gha muẹn roro emwi ne Jehova khian ru ne irẹn vbe odaro. E Devid rẹnrẹn wẹẹ, e Jehova gha miẹn irẹn fan vbe ẹghẹ nọ khẹke. Rhunmwuda, e Jehova ka tae nẹ wẹẹ, e Devid ẹre ọ khian gha re ọba ọghe Izrẹl. (1 Sam 16:​1, 13) Nọ ne Devid, emwi ke emwi ne Jehova khare, te ọ yevbe na miẹn wẹẹ, ọ ru ẹre nẹ.

13. De emwi ne ima yayi wẹẹ, e Jehova gha ru ne ima?

¹³ De emwi ne Jehova we irẹn khian ru nuẹn? Ma ma ya aro yọ wẹẹ, e Jehova gha gbogba ga ima ne ima ghẹ zẹdẹ miẹn ọlọghọmwa. c Sokpan, ghẹ mianmian wẹẹ, ọlọghọmwa ke ọlọghọmwa ne u rhirhi gha la gberra, e Jehova gha wabọ ọre rua vbe agbọn ọgbọn. (Aiz 25:​7-9) E Jehova mwẹ ẹtin nọ khian ya huẹn emwa ni wulo kpaegbe, nọ khian ya sọfurre ye ọlọghọmwa ne ima rhirhi gha ye, kevbe nọ khian ya wabọ emwa dan hia rua.—1 Jọn 4:4.

14. Vbọ khẹke ne ima gha mu roro?

¹⁴ Ohan ghaa mu ruẹ, hia ne u gha muẹn roro emwi ne Jehova khian ru nuẹn vbe odaro. Gha muẹn roro vbe nọ khian gha ye hẹ vba gha wabọ Setan rua nẹ, vbe ọ gha ghi kẹ emwa esi ọkpa vbe uhunmwu otagbọn, kevbe vbe emwa nagbọn gha fẹko gha khian emwa ni gbae. Vbe orhiema ọkpa na ru vbe asikoko nọkhua ọghe ukpo 2014, a keghi rhie ẹre ma vbene ima khian ya sẹtin gha mu emwi ne ima ya aro yi roro. Ọtẹn nokpia ọkpa keghi tama ẹgbẹe ọre emwi nọ gha te gha rre ebe 2Timoti 3:​1-5, akpawẹ emwi nọ khian sunu vbe Paradais ẹre evba nii guan kaẹn: “Vbe agbọn ọgbọn te emwa khian wa gha sọyẹnmwẹ, rhunmwuda emwa ghi hoẹmwẹ emwa ọvbehe, imamwaemwi ẹmwata ghi gha yẹẹ iran, emwa ghi gha ru emwi ye oreghe, emwa ghi gha mu egbe rriotọ, emwa ghi gha rho Osanobua, emọ ghi gha họn ẹmwẹ ne evbibiẹ iran, emwa ghi gha kpọnmwẹ ẹse, emwa ghi gha mwẹ ẹkoata, emwa ghi gha mwẹ ẹnina daa emwa iran vbe uwu ẹgbẹe, emwa ghi gha hoo ne iran ru adọlọ, emwa i khian ghi gha ta emwa ọtakhọ, emwa ghi sẹtin gha dia egbe iran, emwa ghi fu, emwi nọ maan ghi gha yẹẹ iran, iran ghi gha re ọmwa nọ gia mu ẹtin yan, emwa i ghi ze vbe udu, emwa i khian ghi gha hio, emwa ghi hoẹmwẹ Osanobua ne iran gha te ya hoẹmwẹ orhiẹnrhiẹn agbọn, emwa ghi gha ru emwi nọ yẹẹ Osanobua; sikẹ emwa vbenian.” U gu ẹgbẹe ruẹ kevbe etẹn guan vbekpa vbene emwi khian gha ye hẹ vbe agbọn ọgbọn ra?

15. De emwi nọ ru iyobọ ne Tanja ne orhiọn rẹn na sotọ vbe ẹghẹ ne ohan na gha muẹn?

¹⁵ Ọtẹn nokhuo ọkpa na tie ẹre Tanja, nọ rre North Macedonia kegha muẹn roro afiangbe nọ khian miẹn vbe odaro, ọna keghi mu ẹre orhiọn sotọ vbe ẹghẹ ne ohan ya gha muẹn. Evbibiẹ ọre na gha kpokpo ẹre rhunmwuda iran ma hoo nọ ruẹ e Baibol. Ọtẹn nokhuo na khare wẹẹ: “Emwi eso ne I ghaa mu ohan wẹẹ ọ gha sunu, gele sunu. Ẹghẹ ke ẹghẹ ne I ya yo iko, iye mwẹ ghi gbe mwẹ. Evbibiẹ mwẹ keghi kha wẹẹ iran gha gbe mwẹ rua deghẹ I na khian ọkpa vbe Avbe Osẹe Jehova.” Vbene ẹghẹ ya khian, iran na khu ẹre hin owa rre. De emwi ne Tanja ghi ru? Ọ khare wẹẹ: “I kegha muẹn roro ọyẹnmwẹ nọ khian gha sẹ mwẹ vbe etẹbitẹ adeghẹ I na sẹtin rhikhan mu e Jehova. I na vbe gha muẹn roro afiangbe ne I khian miẹn vbe obọ e Jehova vbe agbọn ọgbọn, deghẹ emwi eso na wii mwẹ vbe agbọn Esu na, kevbe vbe na khian ya mianmian emwi dan hia fẹẹrẹ nọ sunu.” Tanja ma sẹ e Jehova rae. E Jehova na ghi ru iyobọ nẹẹn, ọ na miẹn ehe nọ khian gha dia. Vbe na  guan na, Tanja ru orọnmwẹ nẹ, irẹn vbe ọdafẹn rẹn fẹko ru iwinna ugamwẹ ẹghẹ hia.

MU ẸTIN YAN E JEHOVA SAYỌ

16. De emwi nọ khian ya ima gha mwẹ udinmwẹ vbe emwi nọ rre ebe Luk 21:​26-28 gha suẹn gha sunu?

¹⁶ Vbe ẹghẹ orueghe nọkhua “ẹtin ghi fo emwa nagbọn, rhunmwuda ohan nọ khian gha mu iran.” Sokpan ohan i khian mu emwa ọghe Osanobua, erriọ iran khian vbe ya gha mwẹ udinmwẹ. (Tie Luk 21:​26-28.) Vbọzẹ ne ohan i khian na gha mu ima? Rhunmwuda ma miẹn emwi nibun nẹ, nọ ya ima mu ẹtin yan e Jehova. Tanja na ka guan kaẹn ban, khare wẹẹ, emwi eso ne irẹn he miẹn vbe agbọn, wa ru iyobọ ne irẹn nian vbe ọlọghọmwa ne irẹn rhirhi gha ye. Ọ khare wẹẹ, “e Jehova gha sẹtin ru iyobọ ne ima ya zin egbe ọlọghọmwa ne ima rhirhi gha ye, ọ ghi vbe fiangbe ima. Ugbẹnso, ọ ghi yevbe na miẹn wẹẹ, emwa ọvbehe ẹre ọ ta vbene emwi khian gha ye hẹ, sokpan e Jehova sẹ iran. Ẹ i mwẹ vbene ọlọghọmwa ne ima ye gha wegbe sẹ hẹ, ọ gha fo vbe ẹdẹ ọkpa.”

17. De vbene Evbagbẹn Nọhuanrẹn ọghe ukpo 2024 khian ya ru iyobọ ne ima hẹ? (Ghee efoto nọ rre odaro ebe na.)

¹⁷ Emwi bun nọ ya emwa mu ohan vbe ẹdẹnẹrẹ. Sokpan, vbe na ghee Devid, ọ ma khẹke ne ima gi ohan nọ mu ima ya iro han ima. Evbagbẹn Nọhuanrẹn ọghe ukpo 2024 keghi re erhunmwu ne Devid na gie Jehova. Ọ khare wẹẹ: “Ohan ghaa mu mwẹ, I mu ẹtin yan ruẹ.” (Psm 56:3) Ebe ọkpa nọ guan kaẹn ako ọghe evbagbẹn nọhuanrẹn na, khare wẹẹ, e Devid “ma gha muẹn roro emwi nọ ghaa ya ohan muẹn, ọ ma vbe rhie aro tua ọlọghọmwa nọ ghaa ye, sokpan ọmiọnmwafan ọghẹe ẹre ọ ya aro kọ.” Gha muẹn Evbagbẹn Nọhuanrẹn ọghe ukpo na roro, katekate vbe u ghaa werriẹ aro daa ọlọghọmwa nọ ya ohan mu ruẹ. Vbe gha muẹn roro emwi ne Jehova ru vbe ẹghẹ nọ gberra, emwi nọ ru nian kevbe emwi nọ khian ru vbe odaro. Ẹghẹ nii, vbe na ghee Devid, u ghi vbe sẹtin kha wẹẹ: “I mu ẹtin yan Osanobua, ohan i ghi mu mwẹ.”—Psm 56:4.