1. Vbọzẹ ne ẹdẹ Ugie Ayere na re ẹdẹ nọ ghi ru ekpataki sẹ vbe ukpo? (Luk 22:​19, 20)

 NỌ NE emwa ọghe Jehova, ẹdẹ Ugie Ayere Ọghe Uwu Ọghe Kristi ọre ẹdẹ nọ ghi ru ekpataki sẹ vbe ukpo. Ọna ọre ugie ọkpa kẹkan ne Jesu wa tobọre tama erhuanegbe ẹre ne iran gha do. (Tie Luk 22:​19, 20.) Emwi bun nọ ya Ugie Ayere gbe ima otiti. Gi ima guan kaẹn eso vbọ.

2. De emwi eso nọ ya ẹdẹ Ugie Ayere gbe ima otiti?

² Ugie Ayere keghi ya ima muẹn roro vbene izọese adẹwerriegbe ru ekpataki sẹ hẹ. Ọ vbe ye ima ẹre rre odẹ eso ne ima khian ya rhie ẹre ma wẹẹ ma gbọyẹmwẹ ye izọese ne Jesu ru. (2 Kọr 5:​14, 15) Ọ vbe kie ẹkpotọ yọ ne ima ya “rhie igiọdu” ne etẹn ima nikpia kevbe etẹn ima nikhuo. (Rom 1:12) Vbe ukpo ukpo, etẹn nẹi ghi yo iko ra ikporhu wa vbe deba ima do ugie na. Eso ghi kue dọlegbe bu e Jehova gha dee rhunmwuda vbe na ya gbọbokhian ne iran. Emwi ne emwa ọgbọn bẹghe vbe ugie na kevbe emwi ne iran họn wa yẹẹ iran, ọ ghi kue gua iran kpa ya suẹn gha ruẹ e Baibol. Ẹ i khabe ne Ugie Ayere na gbe ima otiti!

3. De vbene Ugie Ayere ya ya ima mwẹ akugbe vbe uhunmwu otagbọn hia? (Vbe ya ghee efoto.)

³ Vbe muẹn roro vbene Ugie Ayere ya ya ima mwẹ akugbe vbe uhunmwu otagbọn hia. Zẹvbe ne ovẹn ya dero, Avbe Osẹe Jehova keghi si egbe koko vbe uhunmwu otagbọn hia. Ma hia keghi danmwehọ ọta nọ rhan otọ vbene izọese adẹwerriegbe ru ekpataki sẹ hẹ. Ma ghi so ihuan urhomwẹ eva, ma ghi vbe mu eka kevbe ayọn lẹga, ma ghi vbe ya ekhọe hia gbe isẹ ye erhunmwu enẹ na na vbe ẹdẹrriọ. Ọna ọre emwi ne iko hia ni rre uhunmwu otagbọn na wa ru vbene ẹdẹrriọ te fo. U miẹn vbene ẹko khian gha rhiẹnrhiẹn e Jehova vbe Jesu hẹ, vbe iran  gha bẹghe vbene ima ya koko rhie uyi gie iran!

4. Vbe ima khian guan kaẹn vbe ako iruẹmwi na?

⁴ Vbe ako iruẹmwi na, ma gha zẹ iro yan avbe inọta na: Vbe ima khian ya mu egbe yotọ khẹ Ugie Ayere hẹ? Vbe ima khian ya ru iyobọ ne emwa ọvbehe ne iran mieke na miẹn ere vbọ? Vbe ima khian ya ru iyobọ ne etẹn nẹi ghi yo iko ra ikporhu? Ewanniẹn ọghe avbe inọta na gha ru iyobọ ne ima ya mu egbe khẹ ugie ne kpataki na.

VBE IMA KHIAN YA MU EGBE YOTỌ KHẸ UGIE AYERE HẸ?

5. (a) Vbọzẹ nọ na khẹke ne ima gha muẹn roro vbene izọese adẹwerriegbe ru ekpataki sẹ hẹ? (Psalm 49:​7, 8) (b) De emwi ne u miẹn ruẹ vbe vidio nọ khare wẹẹ, Vbọzẹe Ne Jesu Na Wu?

⁵ Odẹ ọkpa nọ wa ru ekpataki ne ima gha ya sẹtin mu egbe yotọ khẹ Ugie Ayere ọre, ne ima gha muẹn roro vbene izọese ọghe Jesu Kristi ru ekpataki sẹ hẹ. Ma rhọkpa i khian sẹtin miẹn egbe ima fan vbe obọ orukhọ kevbe uwu. (Tie Psalm 49:​7, 8; vbe ya ghee vidio nọ mwẹ uhunmwuta nọ khare wẹẹ, Vbọzẹe Ne Jesu Na Wu?) a E Jehova keghi ru emwamwa ne Ovbi ẹre do wu ne ima, ne ima mieke na miẹn fan, ẹse nọkhua ne ima i sẹtin ha osa yi ẹre Jehova vbe Jesu ru ne ima na. (Rom 6:23) Zẹvbe ne ima ya muẹn roro emwi ne Jehova vbe Jesu ru ne ima, erriọ ima khian ya gha gbọyẹmwẹ ye izọese adẹwerriegbe sayọ. Ma gha guan kaẹn emwi eso ne Jehova vbe Jesu ru nai miẹn egbọre. Sokpan, gi ima ka guan kaẹn emwi ne adẹwerriegbe demu?

6. De emwi ne izọese adẹwerriegbe demu?

⁶ Adẹwerriegbe keghi re ive na hae na ya dẹ emwi werriegbe. Ọmwa nọ gba ẹre okpia nokaro ighẹ Adam ghaa khin vba yi ẹre. Vbe ọ ru orukhọ, ọ keghi muẹn fua ẹkpotọ nọ kie ne irẹn vbe ivbi ẹre ya gha rrọọ vbe etẹbitẹ. Na mieke na sẹtin dẹ emwi ne Adam mu fua werriegbe, Jesu keghi ya arrọọ ọghẹe nọ gbae zọ ese. Vbe Jesu rre agbọn na “ọ ma ru orukhọ rhọkpa, ẹmwẹ erẹrẹ ma vbe ke ọre unu ladian.” (1 Pit 2:22) Ọmwa nọ gbae Jesu ghaa khin vbe ọ wu, rhunmwuda ọni te arrọọ ne Jesu ya zọ ese wa gua ẹre ro arrọọ ne Adam mu fua.—1 Kọr 15:45; 1Tim 2:6.

7. De edanmwẹ eso ne Jesu miẹn vbe ọ rre uhunmwu otagbọn na?

⁷ Te Jesu wa họn ẹmwẹ ne Erhae, ọ ma gha mwẹ ẹghẹ ọkpa nọ ya he ẹmwẹ ye ọre obọ, agharhemiẹn wẹẹ, ọ miẹn edanmwẹ nibun vbe ọ rre uhunmwu otagbọn na. Ọmwa nọ gba ẹre Jesu ghaa khin vba biẹ ọre, ọrheyerriọ, te ọ ye gha họn ẹmwẹ ne evbibiẹ ọre ni re emwa ni ma gba. (Luk 2:51) Vbe ọ waan dee, ọ ma gi emwa ọvbehe kpikpi ẹre, nọ ru emwi nọ gha sọnnọ evbibiẹ ọre ra e Jehova. Vbe Jesu ghi waan nẹ, ọ ma de ye edanmwẹ ọghe Esu, uhiẹn vbe Esu tama rẹn nọ ru emwi nọ gha sọnnọ Jehova. (Mat 4:​1-11) Te Setan wa gha hia vbe odẹ ke odẹ nọ ya Jesu ru orukhọ, ne Jesu ghẹ mieke na sẹtin ya arrọọ ọghẹe dẹ emwa nagbọn werriegbe.

8. De edanmwẹ ọvbehe ne Jesu zin egbe ẹre?

⁸ Edanmwẹ ọvbehe ye rrọọ ni Jesu zin egbe ẹre vbe ọ rre uhunmwu otagbọn na. Avbe eghian kegha zẹ ọre kpokpo, iran na vbe gha hia ne iran gbe ẹre rua. (Luk 4:​28, 29; 13:31) Emwa ni ma gba ẹre erhuanegbe ẹre ghaa khin, rhunmwuda ọni, ọ vbe zin egbe emwi eso ne iran ma ru ẹse. (Mak 9:​33, 34) Vbe ẹghẹ na ya muẹn gha rrie ekọtu, iran keghi gbe ẹre, iran na vbe gha zaan rẹn. Iyeke ọni, ọ keghi wu uwu obalọ kevbe uwu efa. (Hib 12:​1-3) Na kha na, e Jehova ma gbogba ga ẹre, irẹn ẹre ọ tobọre zin egbe ena hia. b—Mat 27:46.

9. De aro ne ima ya ghee izọese ne Jesu ru? (1 Pita 1:8)

 ⁹ Gele gele, te Jesu wa rri oya ne udẹn, oya ne ẹvbi nọ mieke na sẹtin ya arrọọ ọghẹe dẹ emwa nagbọn werriegbe. Ma gha gele muẹn roro izọese ne Jesu ru, ma ghi gele do ya ekhọe hia hoẹmwẹ ọnrẹn.—Tie 1 Pita 1:8.

10. Vbọ ya ima kha wẹẹ, ẹse nọkhua ẹre Jehova ru ne ima nọ na ya Ovbi ẹre zọ ese?

¹⁰ E Jehova vbe vbo? De emwi kpataki ne Jehova ru ne Jesu mieke na sẹtin ya arrọọ ọghẹe zọ ese? E Jehova vbe Jesu ọre Erha vbe ọmọ nọ ghi sikẹ egbe sẹ vbe agbọn vbe ẹrinmwi. (Itan 8:30) Muẹn roro, vbe nọ khian gha ye Jehova hẹ, vbe ọ bẹghe vbene Jesu ya gha zin egbe edanmwẹ ughughan vbe uhunmwu otagbọn na. Vbe nai na gbawawẹ, ọ wa da e Jehova vbe ọ bẹghe obọ atosi na ya gha mu Ovbi ẹre, vbe emwa he ẹre yotọ kevbe vbe ọ werriẹ aro daa edanmwẹ.

11. De vbe nọ ghaa ye Jehova hẹ, vba gbe Jesu rua? Ru igiemwi yọ.

¹¹ Evbibiẹ emọ ne ivbi iran he wu, rẹnrẹn wẹẹ ọmọ gha wu ọmwa, ọ balọ sẹ ukpẹ osisi. Ma wa yayi wẹẹ, a gha huẹn emwa ni wulo kpaegbe, sokpan ọna ma rhie ma wẹẹ, ẹ i da ima vbe ọmwa ne ima hoẹmwẹ ọnrẹn gha wu. Igiemwi na rhie ẹre ma vbe nọ khian gha ye Jehova hẹ, vbe ọ bẹghe ẹre wẹẹ Ovbi ẹre nọ hoẹmwẹ ọnrẹn rri oya, a na vbe gbe ẹre rua vbe 33 C.E. c—Mat 3:17.

12. De emwi eso ne ima gha sẹtin ru vbe nọ te sẹ ẹghẹ Ugie Ayere?

¹² Kẹ ẹghẹ na ya fi ẹghẹ na khian ya do Ugie Ayere, u sẹtin hia ne u ru emwamwa ọghe emwi eso ne u gha hoo ne u ruẹ, ni guan kaẹn izọese adẹwerriegbe vbe u ghaa ruẹ emwi ne egbuẹ ra vbe Iruẹmwi Ẹgbẹe. Loo e Research Guide for Jehovah’s Witnesses (adeghẹ u mwẹ ọnrẹn vbe urhuẹvbo ruẹ) ra avbe ebe ọghomwa ọvbehe ya ru ezanzan, ne u mieke na gele rẹn otọ re sayọ emwi ne izọese adẹwerriegbe demu. d Hia ne u gha tie ako e Baibol na tie vbe ẹghẹ Ugie Ayere nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima Ne Ivbiotu E Kristi. Vbe deba ọni, ghẹ mianmian ya ghee vidio ọghe Ebe Ẹdẹ na khian zẹ iro yan vbe ẹdẹ na do Ugie Ayere. Deghẹ ima na mu egbe yotọ khẹ Ugie Ayere, ẹre ima khian na sẹtin ru iyobọ ne emwa ọvbehe ya miẹn ere vbe ugie na.—Ẹzra 7:10.

RU IYOBỌ NE EMWA ỌVBEHE NE IRAN MIEKE NA MIẸN ERE VBE UGIE AYERE

13. De emwi okaro ne ima gha sẹtin ru ya ru iyobọ ne emwa ọvbehe, ne iran mieke na miẹn ere vbe Ugie Ayere?

¹³ Vbe ima khian ya ru iyobọ ne emwa ọvbehe, ne iran mieke na miẹn ere vbe Ugie  Ayere? Emwi nokaro ne ima gha ru ọre ne ima gie na tie iran. Vbọ gberra emwa ne ima miẹn vbe ikporhu vbe ẹghẹ hia, ma sẹtin vbe gbẹnnẹ eni emwa ne ima hoo ne ima tie gha die Ugie Ayere ye ebe. Ọ sẹtin gha re emwa ima vbe uwu ẹgbẹe, emwa ne ima gba winna, emwa ne ima gba rre owebe ra emwa ọvbehe. Deghẹ ebe itie ne ima mwẹ vbe obọ i khian sẹ, ma sẹtin ya e link sẹnd ẹre gie iran. Emwa nibun sẹtin wa miẹn itie nii yi.—Asan 11:6.

14. Ru igiemwi nọ rhie ẹre ma vbe nọ ru ekpataki sẹ hẹ, vbe u gha tobọ ruẹ gie na tie ọmwa gha die Ugie Ayere.

¹⁴ U na tobọ ruẹ rhie ebe itie ne ọmwa ne u rẹnrẹn, ọ sẹtin ya ọmwa nii gha die Ugie Ayere. Ọ mwẹ ọtẹn ima nokhuo ọkpa ne ọdafẹn ọnrẹn i ga e Jehova, ọ ghi rre ẹdẹ ọkpa, ọdafẹn ọnrẹn na tama rẹn wẹẹ, irẹn gha lelẹe gha rrie Ugie Ayere. Ọna keghi wa kpa ọtẹn ima nokhuo odin. Vbọzẹ? Rhunmwuda, ẹ i avbiẹ inugba ẹre ọtẹn na he ka tama ọdafẹn ọnrẹn nọ gha die Ugie Ayere, sokpan ọ ma rre. Vbọ ghi fi ẹre ekhọe werriẹ? Ọdafẹn ọnrẹn keghi tama rẹn wẹẹ, “Ọmwa ne I rẹnrẹn ẹre ọ gie na tie mwẹ,” ọ na wẹẹ, okpia ọkpa nọ re ọdiọn ne irẹn rẹnrẹn ẹre ọ rhie ebe itie ne irẹn. Ke ẹghẹ nii kpa, ukpo ukpo ẹre ọdafẹn ọnrẹn ghi ya gha yo Ugie Ayere.

15. De emwi nọ khẹke ne ima kọ ye orhiọn vbe ima gha tie emwa gha die Ugie Ayere?

¹⁵ Ghẹ mianmian wẹẹ, emwa ne ima tie re gha nọ ima ọta, katekate deghẹ iran ma he ka fi owẹ lae iko ọghe ima ẹdẹ. Ma ghi hia ne ima rẹn aro inọta ne iran gha sẹtin nọ, ma ghi vbe mu egbe ẹre yotọ ighẹ ewanniẹn ne ima gha rhie yọ. (Kọl 4:6) Vbe igiemwi, eso sẹtin nọ wẹẹ: ‘De emwi na khian ru vbe evba?’ ‘Inu ẹghẹ ẹre ọ khian rhie?’ ‘Ọ mwẹ aro ukpọn nọ khẹke ne I yọ ra?’ ‘A ya igho laọ ra?’ ‘A gha hae igho vbọ ra?’ Deghẹ u na gie na tie ọmwa gha die Ugie Ayere, u sẹtin nọ rẹn deghẹ ọ mwẹ inọta rhọkpa, adeghẹ ọ na wẹẹ irẹn mwẹ, hia ne u rhie ewanniẹn yọ. Ma sẹtin vbe kpee avbe vidio na ma rẹn, nọ khare wẹẹ, Yee Uwu Ọghe Jesu Rre kevbe De Emwi Na Ru Vbe Ọgua Arriọba? nọ mieke na rẹn vbe na ya do iko ọghomwa hẹ. Ma gha wa vbe miẹn emwi nibun vbe iruẹmwi 28 ọghe ebe na tie ẹre, Sọyẹnmwẹ Arrọọ Vbe Etẹbitẹ!​  ne ima gha sẹtin loo ya ru iyobọ ne ọmwa vberriọ.

16. De inọta ọvbehe ne emwa ni rhie Ugie Ayere gha sẹtin nọ?

¹⁶ Emwa ne ima tie gha die Ugie Ayere gha rre, iran sẹtin gha mwẹ ọta ọvbehe ne iran khian nọ. Iran sẹtin gha nọ wẹẹ, vbọzẹ na na miẹn wẹẹ, emwa nibun ma rri eka, iran ma vbe wọn vbe ayọn na mu lẹga, ra vbọzẹ ne ọmwa rhọkpa ma na zẹdẹ rri eka kevbe ne iran ma na vbe wọn vbe ayọn na mu lẹga? Iran sẹtin vbe nọ inugba ne ima do Ugie Ayere vbe ukpo. Iran sẹtin vbe gha hoo ne iran rẹn deghẹ erriọ Avbe Osẹe Jehova ya do iko hia ne iran do. Agharhemiẹn wẹẹ, a ka guan kaẹn avbe emwi na nẹ vbe ọta ọghe Ugie Ayere, emwa ni rre vbe ẹghẹ okaro sẹtin ye gha hoo na rhan otọ re ma iran sayọ. Uhunmwuta nọ rre jw.org, nọ khare wẹẹ “Why Do Jehovah’s Witnesses Observe the Lord’s Supper Differently From the Way Other Religions Do?” gha sẹtin ru iyobọ nuẹn ya rhie ewanniẹn ye eso vbe uwu avbe inọta na. Vbe na te do Ugie Ayere, vbe ẹghẹ Ugie Ayere kevbe vba gha do Ugie na fo nẹ, ọ khẹke ne ima hia vbe odẹ ke odẹ, ne ima ru iyobọ ne “emwa ni mwẹ ekhọe ata,” ne iran mieke na miẹn ere vbe ugie na.—Iwinna 13:48.

RU IYOBỌ NE ETẸN NẸI GHI YO IKO RA IKPORHU

17. De vbene ediọn khian ya sẹtin ru iyobọ ne etẹn nẹi ghi yo iko ra ikporhu? (Ẹzikiẹl 34:​12, 16)

¹⁷ De vbene ediọn khian ya sẹtin ru iyobọ ne etẹn nẹi ghi yo iko ra ikporhu, vbe uwu ẹghẹ na ya do Ugie Ayere? Rhie ẹre ma wẹẹ, u mwẹ ẹmwẹ iran vbe orhiọn. (Tie Ẹzikiẹl 34:​12, 16.) Vbe na te do Ugie Ayere, hia ne u nọ ẹmwẹ iran inugba nọ khin. Gi iran rẹn wẹẹ, u hoẹmwẹ iran kevbe wẹẹ, u mu egbe ne u ya ru iyobọ ne iran. Tie iran gha die Ugie Ayere. Deghẹ iran na rre, ya ekhọe hia gbọbokhian ne iran. Ugie Ayere gha ghi fo nẹ, hia ne u ye gha nọ ẹmwẹ etẹn na, u ghi vbe hia ne u ru iyobọ ne iran ya dọlegbe bu e Jehova gha dee.—1 Pit 2:25.

18. De vbene ima hia khian ya sẹtin ru iyobọ ne etẹn nẹi ghi yo iko ra ikporhu? (Rom 12:10)

¹⁸ Emwa hia ni rre uwu iko gha sẹtin ru iyobọ ne etẹn nẹi ghi yo iko ra ikporhu ni rrie Ugie  Ayere. Odẹ vbo? Iran ghi rhie ẹre ma wẹẹ, iran hoẹmwẹ etẹn na, iran ghi ya obọ esi mu iran, iran ghi vbe mu ọghọ ye iran egbe. (Tie Rom 12:10.) Ghẹ mianmian wẹẹ, ọ sẹtin gha lọghọ etẹn na ne iran dọlegbe suẹn iko na yo. Ọ gha kẹ, iran sẹtin gha roro ẹre wẹẹ, etẹn i khian ya obọ esi mu iran. e Nọnaghiyerriọ, ghẹ gha nọ iran ọta nọ gha ya ekhue mu iran ra ne u gha ta ẹmwẹ nọ gha si obalọ ye iran egbe. (1 Tẹs 5:11) Ghẹ mianmain wẹẹ, etẹn ima ẹre iran ye khin. U miẹn vbene ẹko rhiẹnrhiẹn ima hẹ, ne iran na dọlegbe suẹn gha deba ima ga e Jehova!—Psm 119:176; Iwinna 20:35.

19. De afiangbe ne ima miẹn deghẹ ima na ye uwu ọghe Jesu rre?

¹⁹ Ma wa ghọghọ wẹẹ, Jesu we ne ima gha do Ugie Ayere vbe ukpo ukpo, kevbe wẹẹ, ma vbe rẹn evbọzẹe ne ugie na na ru ekpataki. Ere nọkhua ẹre ima kevbe emwa ọvbehe khian miẹn deghẹ ima na rrie Ugie Ayere. (Aiz 48:​17, 18) Ahoẹmwọmwa ne ima mwẹ ne Jehova kevbe Jesu ghi gha wegbe yọ. Te ima vbe rhie ẹre ma wẹẹ, ma gbọyẹmwẹ ye emwi ne iran ru ne ima. Ọ vbe ya ima sikẹ etẹn ima sayọ. Ma sẹtin vbe ru iyobọ ne emwa ọvbehe ya do rẹn afiangbe ne iran khian miẹn rhunmwuda izọese adẹwerriegbe ọghe Jesu Kristi. Nọnaghiyerriọ, wa gi ima hia vbe odẹ ke odẹ ne ima mu egbe yotọ khẹ ẹdẹ Ugie Ayere, nọ re ẹdẹ nọ ghi ru ekpataki sẹ vbe ukpo!