Vbe ebe 2 Kọrinti 12:2, 3, e Pọl keghi ya unu kaẹn okpia ọkpa na gua rhie gha rrie “ẹrinmwi ne ukpogieha.” Gha re ọmwa na? Vbe ebe ne Pọl gbẹn gie etẹn vbe iko ọghe Kọrinti, ọ keghi nianiaẹn wẹẹ, ukọ ne Osanobua tobọre zẹ, ẹre irẹn khin. (2 Kọr 11:5, 23) Vbe iyeke ọni, e Pọl keghi guan kaẹn “umian . . . kevbe oro Enọyaẹnmwa.” Vbe ako na, e Pọl ma ya unu kaẹn etẹn ọvbehe. Vbe ọna rhiema? Ọni ọre wẹẹ, e Pọl tobọre ẹre ọ miẹn nene umian kevbe oro.—2 Kọr 12:1, 5.

Nọnaghiyerriọ, e Pọl ọre nene okpia na gua rhie gha rrie “ẹrinmwi ne ukpogieha” kevbe “paradais.” (2 Kọr 12:2-4) Vbe ebe 2 Kọrinti 12:1, e Pọl keghi guan kaẹn “oro ne Nọyaẹnmwa wee ma irẹn.” Ọna rhiema wẹẹ, ọ mwẹ oro ne Osanobua were ma e Pọl nọ dekaẹn emwi nọ khian sunu vbe odaro.

Vbọ re “ẹrinmwi ne ukpogieha” ne Pọl miẹn?

Emwi ughughan ẹre “ẹrinmwi” demu vbe Baibol. Ọ guan kaẹn ẹrinmwi na zaromiẹn. (Gẹn 11:4; 27:28; Mat 6:26) Ugbẹnso, ẹrinmwi keghi re arriọba ọghe emwa nagbọn. (Dan 4:20-22) Ọ sẹtin vbe gha re Arriọba Osanobua.—Arhie 21:1.

Vbọ demu ighẹ “ẹrinmwi ne ukpogieha” ne Pọl miẹn. Ugbẹnso, e Baibol gha khian niannian ẹmwẹ, ọ ghi tae yan egbe igba eha, nọ rhiema wẹẹ, ẹmwẹ nii ru ekpataki. (Aiz 6:3; Ẹzik 21:27; Arhie 4:8) Ọ khọ wẹẹ, “ẹrinmwi ne ukpogieha” ne Pọl miẹn, ọre arriọba nọ ghi hiunsi sẹ, nọ re Arriọba e Mẹzaia ne Jesu kevbe 144,000 khian na gha kha zẹvbe ọba. (Ya Ghee Insight on the Scriptures, Vol. 1, ipapa 1059, 1062.) Ọna keghi guaero, emwi ne ukọ Pita khare. Ọ wẹẹ, ima mudia khẹ “ẹrinmwi ọgbọn” zẹ vbene Osanobua yan rẹn.—2 Pit 3:13.

Vbọ vbe demu ighẹ “paradais” ne Pọl miẹn?

Emwi ughughan ẹre paradais vbe demu: (1) E paradais ẹre Adam vbe Ivi ghaa ye vbe ẹghẹ omuhẹn, nọnaghiyerriọ, e Paradais ne Pọl miẹn, sẹtin gha re nọ dee vbe odaro. (2) Ọ sẹtin gha re ọfunmwegbe ne eguọmwadia Osanobua khian gha mwẹ vbe agbọn ọgbọn. (3) Ọ sẹtin vbe gha re, ọfunmwegbe ọghe ọyunnuan nọ rre ẹrinmwi. Ọna ọre “ogba ọghe Osanobua” ne ebe Arhie Maan 2:7 guan kaẹn.—Ya Ghee The Watchtower, July 15, 2015, ipapa 8. okhuẹn 8.

Ọ gha kẹ, odẹ eha na ya rhan otọ e paradais na, ẹre Pọl ghaa mwẹ vbe orhiọn vbe ebe.—2 Kọrinti 12:4.

Na ya gbẹrọrriẹ:

Ọ khọ wẹẹ “ẹrinmwi ne ukpogieha” ne Pọl ya unu kaẹn vbe 2 Kọrinti 12:2, ọre Arriọba e Mẹzaia ne Jesu kevbe 144,000 khian na gha kha zẹvbe ọba. Jesu kevbe etẹn na hannọ zẹ ọre nene “ẹrinmwi ọgbọn” na guan kaẹn na.—2 Pit 3:13.

A keghi tie ẹre “ẹrinmwi ne ukpogieha” rhunmwuda, Arriọba nọ ghi hiunsi sẹ arriọba hia nikẹre nọ.

E “paradais” na gua ukọ Pọl gha rrie sẹtin gha re (1) Paradais nọ khian gha rre uhunmwu otagbọn vbe odaro, (2) ọfunmwegbe ne eguọmwadia Osanobua mwẹ vbe ugamwẹ ọghẹe nia kevbe ọfunmwegbe ne iran khian gha mwẹ vbe uhunmwu otagbọn hia vbe ẹghẹ nọ dee vbe odaro (3) e paradais ọghe Osanobua nọ rre ẹrinmwi, nọ khian gha rrọọ vbe ẹghẹ ne agbọn na khian ya khian ọghe ọgbọn.

Ọna rhiema wẹẹ, e paradais na guan kaẹn na keghi dekaẹn “agbọn ọgbọn” kevbe “ẹrinmwi ọgbọn.” Ọ keghi re emwamwa ọgbọn ne Arriọba Osanobua khian na ke ẹrinmwi gha kha yan emwa nagbọn ni khian gha rre paradais vbe agbọn na.