Uwẹ gbarokotọ tie avbe ebe Owa Ọkhẹ ọghe ukpo na ra? Adeghẹ erriọ nọ, hia ne u rhie ewanniẹn ye avbe inọta na:

Vba yae kha vba gha wẹẹ, “fi ekhọe uwa werriẹ”? (Rom 12:2)

Ọ gberra na wa gha ru emwi esi. Ọ khẹke ne ima gha zanzan ekhọe ima, ne ima mieke na gele rẹn aro ọmwa ne ima khin, ma ghi vbe ru afiwerriẹ nọ khẹke, ne ima mieke na gha lele uhi ọghe Osanobua vbe ẹdagbọn ima.—w23.01, ipapa 8-9.

De emwi nọ khẹke ne ima gban egbe na zẹvbe ne ima ya bẹghe ẹmwẹ akhasẹ ni sunu?

Ma wa hoo ne ima rẹn vbene emwi ni sunu vbe ẹdẹnẹrẹ ya mu ẹmwẹ akhasẹ ni rre Baibol sẹ. Ne ima gha te ya gha ta ẹmwẹ obọ ima, nọ gha sẹtin si ighaegbe ye uwu iko, emwi ne otu e Jehova he ta ẹre ọ khẹke ne ima ya gha gu emwa zẹ iro. (1 Kọr 1:10)—w23.02, ipapa 16.

De vbene idinmwiamẹ ọghe Jesu ya lughaẹn ne ọghe Ivbi Otu e Kristi hẹ?

Esa ma gha rrọọ ne Jesu khian ya ya egbe ẹre fiohan ne Jehova vbene ima ru ẹre vbe ẹdẹnẹrẹ, rhunmwuda, agbẹnvbo na ya fiohan ne Jehova, ẹre a biẹ ọre yi. E Jesu ma ru orukhọ, ọmwa nọ gbae ẹre ghaa nọ, rhunmwuda ọni, esa ma gha rrọọ nọ ya fi werriẹ, rhunmwuda ọ ma ru orukhọ.—w23.03, ipapa 5.

Vbe ima khian ya ru iyobọ ne emwa ọvbehe ya gha zẹ ewanniẹn vbe iko?

Ma ghaa zẹ ewanniẹn nọ ma tan gbe, ẹkpotọ ghi vbe kie ne emwa ọvbehe ya zẹ ewanniẹn. Ọ ma khẹke ne ima ya unu kaẹn olika ẹmwẹ hia vbe ima ghaa zẹ ewanniẹn. Odẹ vberriọ, emwa ọvbehe ghi vbe miẹn ẹmwẹ ta.—w23.04, ipapa 23.

Vbọ demu ighẹ “Odẹ Uhuanmwẹ” na guan kaẹn vbe ebe Aizaia 35:8?

Odẹ na mudia ye odẹ ne Ivbi e Ju la vbe iran ke Babilọn rrie ẹvbo ọghe iran. Vbe ẹdẹnẹrẹ vbe vbo? Vbe ukpo iyisẹn nibun ọ te sẹ ukpo 1919, a ke suẹn gha zẹ odẹ uhuanmwẹ na, a keghi suẹn gha zẹdu e Baibol, a na vbe gha print iran ladian, iwinna nibun ọvbehe vbe gha rrọọ na vbe gha ru. Kotọ gha dee ẹre emwa ọghe Osanobua ke suẹn gha khian vbe “Odẹ Uhuanmwẹ” nọ rrie paradais ọghe orhiọn, nọ khian vbe ya iran miẹn afiangbe nibun vbe Arriọba Osanobua.—w23.05, ipapa 15-19.

Vbe ima miẹn ruẹ vbe igiemwi ọghe ikhuo eva na guan kaẹn vbe ebe Itan uhunmwu ẹnrẹn 9?

Ebe Itan guan kaẹn “okhuo nọ kọẹn” nọ su ọmwa rri “idin” kevbe “ẹwaẹn ọghe ẹmwata” nọ mudia ye ihe okhuo nọ su ọmwa rri “odẹ irẹnmwi” kevbe arrọọ. (Itan 9:​1, 6, 13, 18)—w23.06, ipapa 22-24.

De vbene Osanobua ya rhie ẹre ma wẹẹ, irẹn mwẹ imuegberriotọ kevbe amuroro?

E Jehova keghi tama e Lot nọ lẹẹ hin e Sọdọm rre, nọ gha rrie uhunmwu oke. Sokpan vbe Lot ghi rinmwian Osanobua nọ gi irẹn gha rrie Zoa, Osanobua na kue yọ.—w23.07, ipapa 21.

De emwi nọ khẹke ne okhuo ru, adeghẹ ọdafẹn ọnrẹn na gha ghee ughe ne emwa na bannọ ruan?

Ọ ma khẹke nọ gha roro ẹre wẹẹ, irẹn ẹre ọ si ẹre. Ọ khẹke nọ hia nọ sikẹ e Jehova sayọ, ọ ghi vbe gha muẹn roro okha ọghe ikhuo ne osi ghaa si ne Baibol guan kaẹn, kevbe vbene Jehova ya fu iran ẹko rre hẹ. Ọ ghi ru iyobọ ne ọdafẹn ọnrẹn ya gha lẹẹ ne emwi ke emwi nọ gha sẹtin si ẹre fi uyinmwẹ dan.—w23.08, ipapa 14-17.

De vbene ẹwaẹn khian ya ru iyobọ ne ima ya gha re emwa ni fu vbe ọmwa gha nọ ima ọta vbekpa emwi ne ima yayi?

Ọ khẹke ne ima hia ne ima ya ọta ne iran nọ rẹn, ya rẹn emwi nọ rre iran ekhọe. Ọna gha ru iyobọ ne ima ya sẹtin ya ọghọ vbe ute zẹ ẹmwẹ wanniẹn iran.—w23.09, ipapa 17.

Vbe ima miẹn ruẹ vbe obọ e Meri vbe nọ dekaẹn na gha gualọ iyobọ?

Vbe Meri ghi bẹghe ẹre wẹẹ irẹn ẹre ọ khian gha re iye Mezaia, ọ keghi gualọ iyobọ vbe obọ emwa ọvbehe. E Gebriẹl kevbe Ẹlizabẹt keghi rhie igiọdu ne Meri. Etẹn ne ima gba ga gha vbe sẹtin rhie igiọdu ne ima.—w23.10, ipapa 15.

De vbene Jehova gha ya sẹtin họn erhunmwu ima hẹ?

E Jehova yan rẹn wẹẹ, irẹn gha họn erhunmwu ima, ọ vbe ghee vbene erhunmwu ne ima na ya gua iho ọghe irẹn ro hẹ. (Jer 29:12) Emwa ughughan gha nọ emwi ọkpa vbe obọ e Jehova, e Jehova sẹtin họn erhunmwu iran vbe odẹ ughughan, ẹghẹ ọkpa i rrọọ ne Jehova khian ya sẹ ima rae.—w23.11, ipapa 21-22.

E Pol ka ya unu kaẹn emwi “ne ima ya aro yi” vbe ebe Rom 5:​2, vbọ ghi zẹ nọ na dọlegbe guan kaẹn rẹn vbe uviẹn ọnrẹn 4?

Ọmwa gha da miẹn odẹ ẹmwata na, ọ sẹtin yayi wẹẹ, a gha sọyẹnmwẹ e Paradais vbe uhunmwu otagbọn na. Sokpan, zẹvbe nọ ya werriẹ aro daa ọlọghọmwa ughughan, ọ na zin egbe ẹre, e Jehova na vbe rhie ẹre ma wẹẹ, irẹn miẹn ọnrẹn yi, ọ ghi do ya ekhọe hia yayi wẹẹ, e Jehova gha mu eyan rẹn hia sẹ.—w23.12, ipapa 12-13.